৪৫. ৱিভীতকৱগ্গো

১. ৱিভীতকমিঞ্জিযত্থেৰঅপদানং

১. ‘‘ককুসন্ধো মহাৱীৰো, সব্বধম্মান পাৰগূ;

গণম্হা ৱূপকট্ঠো সো, অগমাসি ৱনন্তৰং.

২. ‘‘বীজমিঞ্জং গহেত্ৱান, লতায আৱুণিং অহং;

ভগৱা তম্হি সমযে, ঝাযতে পব্বতন্তৰে.

৩. ‘‘দিস্ৱানহং দেৱদেৱং, ৱিপ্পসন্নেন চেতসা;

দক্খিণেয্যস্স ৱীৰস্স, বীজমিঞ্জমদাসহং.

৪. ‘‘ইমস্মিংযেৱ কপ্পম্হি, যং মিঞ্জমদদিং [ফলমদদিং (সী. পী.), বীজমদদিং (স্যা.)] তদা;

দুগ্গতিং নাভিজানামি, বীজমিঞ্জস্সিদং ফলং.

৫. ‘‘কিলেসা ঝাপিতা ময্হং, ভৱা সব্বে সমূহতা;

নাগোৱ বন্ধনং ছেত্ৱা, ৱিহৰামি অনাসৱো.

৬. ‘‘স্ৱাগতং ৱত মে আসি, মম বুদ্ধস্স সন্তিকে;

তিস্সো ৱিজ্জা অনুপ্পত্তা, কতং বুদ্ধস্স সাসনং.

৭. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা ৱিভীতকমিঞ্জিযো [ৱিভেদক… (স্যা. ক.)] থেৰো ইমা

গাথাযো অভাসিত্থাতি.

ৱিভীতকমিঞ্জিযত্থেৰস্সাপদানং পঠমং.

২. কোলদাযকত্থেৰঅপদানং

৮. ‘‘অজিনেন নিৱত্থোহং, ৱাকচীৰধৰো তদা;

খাৰিযা পূৰযিত্ৱান, কোলংহাসিং মমস্সমং [খাৰিভাৰং হৰিত্ৱান, কোলমাহৰিমস্সমং (সী. পী.)].

৯. ‘‘তম্হি কালে সিখী বুদ্ধো, একো অদুতিযো অহু;

মমস্সমং উপাগচ্ছি, জানন্তো সব্বকালিকং.

১০. ‘‘সকং চিত্তং পসাদেত্ৱা, ৱন্দিত্ৱান চ সুব্বতং;

উভো হত্থেহি পগ্গয্হ, কোলং বুদ্ধস্সদাসহং.

১১. ‘‘একতিংসে ইতো কপ্পে, যং ফলমদদিং তদা;

দুগ্গতিং নাভিজানামি, কোলদানস্সিদং ফলং.

১২. ‘‘কিলেসা ঝাপিতা ময্হং…পে… ৱিহৰামি অনাসৱো.

১৩. ‘‘স্ৱাগতং ৱত মে আসি…পে… কতং বুদ্ধস্স সাসনং.

১৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কোলদাযকো থেৰো ইমা গাথাযো

অভাসিত্থাতি.

কোলদাযকত্থেৰস্সাপদানং দুতিযং.

৩. বিল্লিযত্থেৰঅপদানং

১৫. ‘‘চন্দভাগানদীতীৰে, অস্সমো সুকতো মম;

বিল্লৰুক্খেহি [বেলুৱৰুক্খেহি (স্যা.)] আকিণ্ণো, নানাদুমনিসেৱিতো.

১৬. ‘‘সুগন্ধং বেলুৱং দিস্ৱা, বুদ্ধসেট্ঠমনুস্সৰিং;

খাৰিভাৰং পূৰযিত্ৱা, তুট্ঠো সংৱিগ্গমানসো.

১৭. ‘‘ককুসন্ধং উপাগম্ম, বিল্লপক্কমদাসহং;

পুঞ্ঞক্খেত্তস্স ৱীৰস্স, ৱিপ্পসন্নেন চেতসা.

১৮. ‘‘ইমস্মিংযেৱ কপ্পস্মিং, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

১৯. ‘‘কিলেসা ঝাপিতা ময্হং…পে… ৱিহৰামি অনাসৱো.

২০. ‘‘স্ৱাগতং ৱত মে আসি…পে… কতং বুদ্ধস্স সাসনং.

২১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বিল্লিযো থেৰো ইমা গাথাযো

অভাসিত্থাতি.

বিল্লিযত্থেৰস্সাপদানং ততিযং.

৪. ভল্লাতদাযকত্থেৰঅপদানং

২২. ‘‘সুৱণ্ণৱণ্ণং সম্বুদ্ধং, দ্ৱত্তিংসৱৰলক্খণং;

ৱিপিনগ্গেন [পৱনগ্গেন (সী. স্যা. পী.)] গচ্ছন্তং, সালৰাজংৱ ফুল্লিতং.

২৩. ‘‘তিণত্থৰং পঞ্ঞাপেত্ৱা, বুদ্ধসেট্ঠং অযাচহং;

‘অনুকম্পতু মং বুদ্ধো, ভিক্খং ইচ্ছামি দাতৱে’.

২৪. ‘‘অনুকম্পকো কাৰুণিকো, অত্থদস্সী মহাযসো;

মম সঙ্কপ্পমঞ্ঞায, ওৰূহি মম অস্সমে.

২৫. ‘‘ওৰোহিত্ৱান সম্বুদ্ধো, নিসীদি পণ্ণসন্থৰে;

ভল্লাতকং গহেত্ৱান, বুদ্ধসেট্ঠস্সদাসহং.

২৬. ‘‘মম নিজ্ঝাযমানস্স, পৰিভুঞ্জি তদা জিনো;

তত্থ চিত্তং পসাদেত্ৱা, অভিৱন্দিং তদা জিনং.

২৭. ‘‘অট্ঠাৰসে কপ্পসতে, যং ফলমদদিং তদা;

দুগ্গতিং নাভিজানামি, ফলদানস্সিদং ফলং.

২৮. ‘‘কিলেসা ঝাপিতা ময্হং…পে… ৱিহৰামি অনাসৱো.

২৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভল্লাতদাযকো থেৰো ইমা গাথাযো

অভাসিত্থাতি.

ভল্লাতদাযকত্থেৰস্সাপদানং চতুত্থং.

৫. উত্তলিপুপ্ফিযত্থেৰঅপদানং

৩১. ‘‘নিগ্ৰোধে হৰিতোভাসে, সংৱিৰুড়্হম্হি পাদপে;

উত্তলিমালং [উম্মা মালং হি (স্যা.)] পগ্গয্হ, বোধিযা অভিৰোপযিং.

৩২. ‘‘ইমস্মিংযেৱ কপ্পম্হি, যং বোধিমভিপূজযিং;

দুগ্গতিং নাভিজানামি, বোধিপূজাযিদং ফলং.

৩৩. ‘‘কিলেসা ঝাপিতা ময্হং…পে… ৱিহৰামি অনাসৱো.

৩৪. ‘‘স্ৱাগতং ৱত মে আসি…পে… কতং বুদ্ধস্স সাসনং.

৩৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উত্তলিপুপ্ফিযো থেৰো ইমা গাথাযো

অভাসিত্থাতি.

উত্তলিপুপ্ফিযত্থেৰস্সাপদানং পঞ্চমং.

৬. অম্বাটকিযত্থেৰঅপদানং

৩৬. ‘‘সুপুপ্ফিতং সালৱনং, ওগয্হ ৱেস্সভূ মুনি;

নিসীদি গিৰিদুগ্গেসু, অভিজাতোৱ কেসৰী.

৩৭. ‘‘পসন্নচিত্তো সুমনো, অম্বাটকমপূজযিং;

পুঞ্ঞক্খেত্তং অনুত্তৰং [মহাৱীৰং (সী. স্যা.)], পসন্নো সেহি পাণিভি.

৩৮. ‘‘একতিংসে ইতো কপ্পে, যং পুপ্ফমভিৰোপযিং;

দুগ্গতি নাভিজানামি, বুদ্ধপূজাযিদং ফলং.

৩৯. ‘‘কিলেসা ঝাপিতা ময্হং…পে… ৱিহৰামি অনাসৱো.

৪০. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অম্বাটকিযো থেৰো ইমা গাথাযো

অভাসিত্থাতি.

অম্বাটকিযত্থেৰস্সাপদানং ছট্ঠং.

৭. সীহাসনিকত্থেৰঅপদানং

৪২. ‘‘পদুমুত্তৰস্স ভগৱতো, সব্বভূতহিতেসিনো;

পসন্নচিত্তো সুমনো, সীহাসনমদাসহং.

৪৩. ‘‘দেৱলোকে মনুস্সে ৱা, যত্থ যত্থ ৱসামহং;

লভামি ৱিপুলং ব্যম্হং, সীহাসনস্সিদং ফলং.

৪৪. ‘‘সোণ্ণমযা ৰূপিমযা, লোহিতঙ্গমযা [লোহিতঙ্কমযা (সী. স্যা. পী.)] বহূ;

মণিমযা চ পল্লঙ্কা, নিব্বত্তন্তি মমং সদা.

৪৫. ‘‘বোধিযা আসনং কত্ৱা, জলজুত্তমনামিনো;

উচ্চে কুলে পজাযামি, অহো ধম্মসুধম্মতা.

৪৬. ‘‘সতসহস্সিতো কপ্পে, সীহাসনমকাসহং;

দুগ্গতিং নাভিজানামি, সীহাসনস্সিদং ফলং.

৪৭. ‘‘কিলেসা ঝাপিতা ময্হং…পে… ৱিহৰামি অনাসৱো.

৪৮. ‘‘স্ৱাগতং ৱত মে আসি…পে… কতং বুদ্ধস্স সাসনং.

৪৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সীহাসনিকো থেৰো ইমা গাথাযো

অভাসিত্থাতি.

সীহাসনিকত্থেৰস্সাপদানং সত্তমং.

৮. পাদপীঠিযত্থেৰঅপদানং

৫০. ‘‘সুমেধো নাম সম্বুদ্ধো, অগ্গো কাৰুণিকো মুনি;

তাৰযিত্ৱা বহূ সত্তে, নিব্বুতো সো মহাযসো.

৫১. ‘‘সীহাসনস্স সামন্তা, সুমেধস্স মহেসিনো;

পসন্নচিত্তো সুমনো, পাদপীঠমকাৰযিং.

৫২. ‘‘কত্ৱান কুসলং কম্মং, সুখপাকং সুখুদ্ৰযং;

পুঞ্ঞকম্মেন সংযুত্তো, তাৱতিংসমগচ্ছহং.

৫৩. ‘‘তত্থ মে ৱসমানস্স, পুঞ্ঞকম্মসমঙ্গিনো;

পদানি উদ্ধৰন্তস্স, সোণ্ণপীঠা ভৱন্তি মে.

৫৪. ‘‘লাভা তেসং সুলদ্ধং ৱো, যে লভন্তি উপস্সুতিং;

নিব্বুতে কাৰং কত্ৱান, লভন্তি ৱিপুলং সুখং.

৫৫. ‘‘মযাপি সুকতং কম্মং, ৱাণিজ্জং সুপ্পযোজিতং;

পাদপীঠং কৰিত্ৱান, সোণ্ণপীঠং লভামহং.

৫৬. ‘‘যং যং দিসং পক্কমামি, কেনচি কিচ্চযেনহং [পচ্চযেনহং (সী. পী.)];

সোণ্ণপীঠে অক্কমামি [সোণ্ণপীঠেন কমামি (ক.)], পুঞ্ঞকম্মস্সিদং ফলং.

৫৭. ‘‘তিংসকপ্পসহস্সম্হি, যং কম্মমকৰিং তদা;

দুগ্গতিং নাভিজানামি, পাদপীঠস্সিদং ফলং.

৫৮. ‘‘কিলেসা ঝাপিতা ময্হং…পে… ৱিহৰামি অনাসৱো.

৫৯. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পাদপীঠিযো থেৰো ইমা গাথাযো

অভাসিত্থাতি.

পাদপীঠিযত্থেৰস্সাপদানং অট্ঠমং.

৯. ৱেদিকাৰকত্থেৰঅপদানং

৬১. ‘‘পদুমুত্তৰস্স ভগৱতো, বোধিযা পাদপুত্তমে;

ৱেদিকং সুকতং কত্ৱা, সকং চিত্তং পসাদযিং.

৬২. ‘‘অতোড়াৰানি [অথোড়াৰানি (সী. পী.), অগ্গোড়াৰানি (স্যা.)] ভণ্ডানি, কতানি অকতানি চ;

অন্তলিক্খা পৱস্সন্তি, ৱেদিকায ইদং ফলং.

৬৩. ‘‘উভতো ব্যূড়্হসঙ্গামে, পক্খন্দন্তো ভযানকে;

ভযভেৰৱং ন পস্সামি, ৱেদিকায ইদং ফলং.

৬৪. ‘‘মম সঙ্কপ্পমঞ্ঞায, ব্যম্হং নিব্বত্ততে সুভং;

সযনানি মহগ্ঘানি, ৱেদিকায ইদং ফলং.

৬৫. ‘‘সতসহস্সিতো কপ্পে, যং ৱেদিকমকাৰযিং;

দুগ্গতিং নাভিজানামি, ৱেদিকায ইদং ফলং.

৬৬. ‘‘কিলেসা ঝাপিতা ময্হং…পে… ৱিহৰামি অনাসৱো.

৬৭. ‘‘স্ৱাগতং ৱত মে আসি…পে… কতং বুদ্ধস্স সাসনং.

৬৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৱেদিকাৰকো থেৰো ইমা গাথাযো

অভাসিত্থাতি.

ৱেদিকাৰকত্থেৰস্সাপদানং নৱমং.

১০. বোধিঘৰদাযকত্থেৰঅপদানং