৩৭. মন্দাৰৱপুপ্ফিযৱগ্গো

১. মন্দাৰৱপুপ্ফিযত্থেৰঅপদানং

১. ‘‘তাৱতিংসা ইধাগন্ত্ৱা, মঙ্গলো নাম মাণৱো;

মন্দাৰৱং গহেত্ৱান, ৱিপস্সিস্স মহেসিনো.

২. ‘‘সমাধিনা নিসিন্নস্স, মত্থকে ধাৰযিং অহং;

সত্তাহং ধাৰযিত্ৱান, দেৱলোকং পুনাগমিং.

৩. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা মন্দাৰৱপুপ্ফিযো থেৰো ইমা গাথাযো অভাসিত্থাতি.

মন্দাৰৱপুপ্ফিযত্থেৰস্সাপদানং পঠমং.

২. কক্কাৰুপুপ্ফিযত্থেৰঅপদানং

৫. ‘‘যামা দেৱা ইধাগন্ত্ৱা, গোতমং সিৰিৱচ্ছসং;

কক্কাৰুমালং [গোক্খনুমালং (সী.)] পগ্গয্হ, বুদ্ধস্স অভিৰোপযিং.

৬. ‘‘দ্ৱেনৱুতে ইতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কক্কাৰুপুপ্ফিযো [গোক্খনুপুপ্ফিযো (ক.)] থেৰো ইমা গাথাযো অভাসিত্থাতি.

কক্কাৰুপুপ্ফিযত্থেৰস্সাপদানং দুতিযং.

৩. ভিসমুড়ালদাযকত্থেৰঅপদানং

৮. ‘‘ফুস্সো নামাসি সম্বুদ্ধো, সব্বধম্মান পাৰগূ;

ৱিৱেককামো সব্বঞ্ঞূ [সপ্পঞ্ঞো (সী. স্যা.)], আগঞ্ছি মম সন্তিকে.

৯. ‘‘তস্মিং চিত্তং পসাদেত্ৱা, মহাকাৰুণিকে জিনে;

ভিসমুড়ালং পগ্গয্হ, বুদ্ধসেট্ঠস্সদাসহং.

১০. ‘‘দ্ৱেনৱুতে ইতো কপ্পে, যং ভিসমদদিং তদা;

দুগ্গতিং নাভিজানামি, ভিসদানস্সিদং ফলং.

১১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভিসমুড়ালদাযকো থেৰো ইমা গাথাযো অভাসিত্থাতি.

ভিসমুড়ালদাযকত্থেৰস্সাপদানং ততিযং.

৪. কেসৰপুপ্ফিযত্থেৰঅপদানং

১২. ‘‘ৱিজ্জাধৰো তদা আসিং, হিমৱন্তম্হি পব্বতে;

অদ্দসং ৱিৰজং বুদ্ধং, চঙ্কমন্তং মহাযসং.

১৩. ‘‘তীণি কেসৰপুপ্ফানি [কেসৰিপুপ্ফানি (সী.)], সীসে কত্ৱানহং তদা;

উপসঙ্কম্ম সম্বুদ্ধং, ৱেস্সভুং অভিপূজযিং.

১৪. ‘‘একত্তিংসে ইতো কপ্পে, যং কম্মমকৰিং তদা;

দুগ্গতিং নাভিজানামি, বুদ্ধপূজাযিদং ফলং.

১৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কেসৰপুপ্ফিযো থেৰো ইমা গাথাযো অভাসিত্থাতি.

কেসৰপুপ্ফিযত্থেৰস্সাপদানং চতুত্থং.

৫. অঙ্কোলপুপ্ফিযত্থেৰঅপদানং

১৬. ‘‘পদুমো নাম সম্বুদ্ধো, চিত্তকূটে ৱসী তদা;

দিস্ৱান তং অহং বুদ্ধং, সযম্ভুং অপৰাজিতং [উপগচ্ছিহং (সী. স্যা.)].

১৭. ‘‘অঙ্কোলং পুপ্ফিতং দিস্ৱা, ওচিনিত্ৱানহং তদা;

উপগন্ত্ৱান সম্বুদ্ধং, পূজযিং পদুমং জিনং.

১৮. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অঙ্কোলপুপ্ফিযো থেৰো ইমা গাথাযো অভাসিত্থাতি.

অঙ্কোলপুপ্ফিযত্থেৰস্সাপদানং পঞ্চমং.

৬. কদম্বপুপ্ফিযত্থেৰঅপদানং

২০. ‘‘সুৱণ্ণৱণ্ণং সম্বুদ্ধং, গচ্ছন্তং অন্তৰাপণে;

কঞ্চনগ্ঘিযসঙ্কাসং, বাত্তিংসৱৰলক্খণং.

২১. ‘‘নিসজ্জ পাসাদৱৰে, অদ্দসং লোকনাযকং;

কদম্বপুপ্ফং পগ্গয্হ, ৱিপস্সিং অভিপূজযিং.

২২. ‘‘একনৱুতিতো কপ্পে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কদম্বপুপ্ফিযো থেৰো ইমা গাথাযো অভাসিত্থাতি.

কদম্বপুপ্ফিযত্থেৰস্সাপদানং ছট্ঠং.

৭. উদ্দালকপুপ্ফিযত্থেৰঅপদানং

২৪. ‘‘অনোমো [সুজাতো (স্যা.), অনুমো (ক.)] নাম সম্বুদ্ধো, গঙ্গাকূলে ৱসী তদা;

উদ্দালকং গহেত্ৱান, পূজযিং অপৰাজিতং.

২৫. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদ্দালকপুপ্ফিযো থেৰো ইমা গাথাযো অভাসিত্থাতি.

উদ্দালকপুপ্ফিযত্থেৰস্সাপদানং সত্তমং.

৮. একচম্পকপুপ্ফিযত্থেৰঅপদানং

২৭. ‘‘উপসন্তো চ সম্বুদ্ধো, ৱসতী পব্বতন্তৰে;

একচম্পকমাদায, উপগচ্ছিং নৰুত্তমং.

২৮. ‘‘পসন্নচিত্তো সুমনো, পচ্চেকমুনিমুত্তমং;

উভোহত্থেহি পগ্গয্হ, পূজযিং অপৰাজিতং.

২৯. ‘‘পঞ্চসট্ঠিম্হিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একচম্পকপুপ্ফিযো থেৰো ইমা গাথাযো অভাসিত্থাতি.

একচম্পকপুপ্ফিযত্থেৰস্সাপদানং অট্ঠমং.

৯. তিমিৰপুপ্ফিযত্থেৰঅপদানং

৩১. ‘‘চন্দভাগানদীতীৰে, অনুসোতং ৱজামহং;

অদ্দসং ৱিৰজং বুদ্ধং, সালৰাজংৱ ফুল্লিতং.

৩২. ‘‘পসন্নচিত্তো সুমনো, পচ্চেকমুনিমুত্তমং;

গহেত্ৱা তিমিৰং পুপ্ফং, মত্থকে ওকিৰিং অহং.

৩৩. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৩৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিমিৰপুপ্ফিযো থেৰো ইমা গাথাযো অভাসিত্থাতি.

তিমিৰপুপ্ফিযত্থেৰস্সাপদানং নৱমং.

১০. সড়লপুপ্ফিযত্থেৰঅপদানং

৩৫. ‘‘চন্দভাগানদীতীৰে, অহোসিং কিন্নৰো তদা;

তত্থদ্দসং দেৱদেৱং, চঙ্কমন্তং নৰাসভং.

৩৬. ‘‘ওচিনিত্ৱান সড়লং, পুপ্ফং বুদ্ধস্সদাসহং;

উপসিঙ্ঘি মহাৱীৰো, সড়লং দেৱগন্ধিকং.

৩৭. ‘‘পটিগ্গহেত্ৱা সম্বুদ্ধো, ৱিপস্সী লোকনাযকো;

উপসিঙ্ঘি মহাৱীৰো, পেক্খমানস্স মে সতো.

৩৮. ‘‘পসন্নচিত্তো সুমনো, ৱন্দিত্ৱা দ্ৱিপদুত্তমং;

অঞ্জলিং পগ্গহেত্ৱান, পুন পব্বতমাৰুহিং.

৩৯. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৪০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সড়লপুপ্ফিযো থেৰো ইমা গাথাযো অভাসিত্থাতি.

সড়লপুপ্ফিযত্থেৰস্সাপদানং দসমং.

মন্দাৰৱপুপ্ফিযৱগ্গো সত্ততিংসতিমো.