৫. গোসীসনিক্খেপকত্থেৰঅপদানং

২১. ‘‘আৰামদ্ৱাৰা নিক্খম্ম, গোসীসং সন্থতং মযা;

অনুভোমি সকং কম্মং, পুব্বকম্মস্সিদং ফলং.

২২. ‘‘আজানিযা ৱাতজৱা, সিন্ধৱা সীঘৱাহনা;

অনুভোমি সব্বমেতং, গোসীসস্স ইদং ফলং.

২৩. ‘‘অহো কাৰং পৰমকাৰং, সুখত্তে সুকতং মযা;

সঙ্ঘে কতস্স কাৰস্স, ন অঞ্ঞং কলমগ্ঘতি.

২৪. ‘‘চতুন্নৱুতিতো কপ্পে, যং সীসং সন্থৰিং অহং;

দুগ্গতিং নাভিজানামি, সন্থৰস্স ইদং ফলং.

২৫. ‘‘পঞ্চসত্ততিকপ্পম্হি, সুপ্পতিট্ঠিতনামকো;

একো আসিং মহাতেজো, চক্কৱত্তী মহব্বলো.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গোসীসনিক্খেপকো থেৰো ইমা গাথাযো অভাসিত্থাতি.

গোসীসনিক্খেপকত্থেৰস্সাপদানং পঞ্চমং.