৮. উত্তিযত্থেৰঅপদানং

১৬৯. ‘‘চন্দভাগানদীতীৰে, সুসুমাৰো অহং তদা;

সগোচৰপ্পসুতোহং [সভোজনপসুতাহং (স্যা. ক.)], নদীতিত্থং অগচ্ছহং.

১৭০. ‘‘সিদ্ধত্থো তম্হি সমযে, সযম্ভূ অগ্গপুগ্গলো;

নদিং তৰিতুকামো সো, নদীতিত্থং উপাগমি.

১৭১. ‘‘উপাগতে চ [উপাগতম্হি (স্যা. ক.)] সম্বুদ্ধে, অহম্পি তত্থুপাগমিং;

উপগন্ত্ৱান সম্বুদ্ধং, ইমং ৱাচং উদীৰযিং.

১৭২. ‘‘‘অভিৰূহ মহাৱীৰ, তাৰেস্সামি অহং তুৱং;

পেত্তিকং ৱিসযং ময্হং, অনুকম্প মহামুনি’.

১৭৩. ‘‘মম উগ্গজ্জনং সুত্ৱা, অভিৰূহি মহামুনি;

হট্ঠো হট্ঠেন চিত্তেন, তাৰেসিং লোকনাযকং.

১৭৪. ‘‘নদিযা পাৰিমে তীৰে, সিদ্ধত্থো লোকনাযকো;

অস্সাসেসি মমং তত্থ, অমতং পাপুণিস্সসি.

১৭৫. ‘‘তম্হা কাযা চৱিত্ৱান, দেৱলোকং আগচ্ছহং;

দিব্বসুখং অনুভৱিং, অচ্ছৰাহি পুৰক্খতো.

১৭৬. ‘‘সত্তক্খত্তুঞ্চ দেৱিন্দো, দেৱৰজ্জমকাসহং;

তীণিক্খত্তুং চক্কৱত্তী, মহিযা ইস্সৰো অহুং.

১৭৭. ‘‘ৱিৱেকমনুযুত্তোহং, নিপকো চ সুসংৱুতো;

ধাৰেমি অন্তিমং দেহং, সম্মাসম্বুদ্ধসাসনে.

১৭৮. ‘‘চতুন্নৱুতিতো কপ্পে, তাৰেসিং যং নৰাসভং;

দুগ্গতিং নাভিজানামি, তৰণায ইদং ফলং.

১৭৯. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা উত্তিযো [উত্তিৰিযো (সী.)] থেৰো ইমা গাথাযো অভাসিত্থাতি.

উত্তিযত্থেৰস্সাপদানং অট্ঠমং.