৩. তিসৰণগমনিযত্থেৰঅপদানং

১০৬. ‘‘নগৰে চন্দৱতিযা [বন্ধুমতিযা (অট্ঠ.)], মাতুউপট্ঠাকো [মাতুপট্ঠাযকো (সী.), মাতুপট্ঠানকো (স্যা.)] অহুং;

অন্ধা মাতা পিতা ময্হং, তে পোসেমি অহং তদা.

১০৭. ‘‘ৰহোগতো নিসীদিত্ৱা, এৱং চিন্তেসহং তদা;

পোসেন্তো মাতাপিতৰো, পব্বজ্জং ন লভামহং.

১০৮. ‘‘মহন্ধকাৰপিহিতা [তমন্ধকাৰপিহিতা (স্যা.)], তিৱিধগ্গীহি ডয্হৰে;

এতাদিসে ভৱে [ভযে (সী.)] জাতে, নত্থি কোচি ৱিনাযকো.

১০৯. ‘‘বুদ্ধো লোকে সমুপ্পন্নো, দিপ্পতি [দিব্বতি (ক.)] [জিনসাসনং (সী.)] দানি সাসনং;

সক্কা উদ্ধৰিতুং অত্তা, পুঞ্ঞকামেন জন্তুনা.

১১০. ‘‘উগ্গয্হ তীণি সৰণে, পৰিপুণ্ণানি গোপযিং;

তেন কম্মেন সুকতেন, পটিমোক্খামি দুগ্গতিং.

১১১. ‘‘নিসভো নাম সমণো, বুদ্ধস্স অগ্গসাৱকো;

তমহং উপগন্ত্ৱান, সৰণগমনং গহিং.

১১২. ‘‘ৱস্সসতসহস্সানি, আযু ৱিজ্জতি তাৱদে;

তাৱতা সৰণগমনং, পৰিপুণ্ণং অগোপযিং.

১১৩. ‘‘চৰিমে ৱত্তমানম্হি, সৰণং তং অনুস্সৰিং;

তেন কম্মেন সুকতেন, তাৱতিংসং অগচ্ছহং.

১১৪. ‘‘দেৱলোকগতো সন্তো, পুঞ্ঞকম্মসমাহিতো;

যং দেসং [যং যং দেসং (স্যা.)] উপপজ্জামি [উপগচ্ছামি (সী.)], অট্ঠ হেতূ লভামহং.

১১৫. ‘‘দিসাসু পূজিতো হোমি, তিক্খপঞ্ঞো ভৱামহং;

সব্বে দেৱানুৱত্তন্তি, অমিতভোগং লভামহং.

১১৬. ‘‘সুৱণ্ণৱণ্ণো সব্বত্থ, পটিকন্তো ভৱামহং;

মিত্তানং অচলো হোমি, যসো অব্ভুগ্গতো মমং.

১১৭. ‘‘অসীতিক্খত্তু দেৱিন্দো, দেৱৰজ্জমকাৰযিং;

দিব্বসুখং অনুভৱিং, অচ্ছৰাহি পুৰক্খতো.

১১৮. ‘‘পঞ্চসত্ততিক্খত্তুঞ্চ, চক্কৱত্তী অহোসহং;

পদেসৰজ্জং ৱিপুলং, গণনাতো অসঙ্খিযং.

১১৯. ‘‘পচ্ছিমে ভৱে সম্পত্তে, পুঞ্ঞকম্মসমাহিতো;

পুৰে সাৱত্থিযং জাতো, মহাসালে সুঅড্ঢকে.

১২০. ‘‘নগৰা নিক্খমিত্ৱান, দাৰকেহি পুৰক্খতো;

হসখিড্ডসমঙ্গীহং [সাহং খিড্ডসমঙ্গী (স্যা.)], সঙ্ঘাৰামং উপাগমিং.

১২১. ‘‘তত্থদ্দসাসিং [তত্থদ্দসাহং (ক.)] সমণং, ৱিপ্পমুত্তং নিৰূপধিং;

সো মে ধম্মমদেসেসি, সৰণঞ্চ অদাসি মে.

১২২. ‘‘সোহং সুত্ৱান সৰণং, সৰণং মে অনুস্সৰিং;

একাসনে নিসীদিত্ৱা, অৰহত্তমপাপুণিং.

১২৩. ‘‘জাতিযা সত্তমে ৱস্সে, অৰহত্তমপাপুণিং;

উপসম্পাদযি বুদ্ধো, গুণমঞ্ঞায চক্খুমা.

১২৪. ‘‘অপৰিমেয্যে ইতো কপ্পে, সৰণানি অগচ্ছহং;

ততো মে সুকতং কম্মং, ফলং দস্সেসি মে ইধ.

১২৫. ‘‘সুগোপিতং মে সৰণং, মানসং সুপ্পণীহিতং;

অনুভোত্ৱা যসং সব্বং, পত্তোম্হি অচলং পদং.

১২৬. ‘‘যেসং সোতাৱধানত্থি, সুণোথ মম ভাসতো;

অহং [অত্থং (স্যা.)] ৱো কথযিস্সামি, সামং দিট্ঠং পদং মম.

১২৭. ‘‘‘বুদ্ধো লোকে সমুপ্পন্নো, ৱত্ততে জিনসাসনং;

অমতা ৱাদিতা ভেৰী, সোকসল্লৱিনোদনা.

১২৮. ‘‘‘যথাসকেন থামেন, পুঞ্ঞক্খেত্তে অনুত্তৰে;

অধিকাৰং কৰেয্যাথ, পস্সযিস্সথ নিব্বুতিং.

১২৯. ‘‘‘পগ্গয্হ তীণি সৰণে, পঞ্চসীলানি গোপিয;

বুদ্ধে চিত্তং পসাদেত্ৱা, দুক্খস্সন্তং কৰিস্সথ.

১৩০. ‘‘‘সম্মা ধম্মং ভাৱেত্ৱান [মমোপমং কৰিত্ৱান (সী. স্যা.)], সীলানি পৰিগোপিয;

অচিৰং অৰহত্তং ৱো, সব্বেপি পাপুণিস্সথ.

১৩১. ‘‘‘তেৱিজ্জো ইদ্ধিপত্তোম্হি, চেতোপৰিযকোৱিদো;

সাৱকো তে মহাৱীৰ, সৰণো [চৰণে (সী. স্যা.)] ৱন্দতি সত্থুনো’.

১৩২. ‘‘অপৰিমেয্যে ইতো কপ্পে, সৰণং বুদ্ধস্স গচ্ছহং;

দুগ্গতিং নাভিজানামি, সৰণং গমনে ফলং.

১৩৩. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা তিসৰণগমনিযো থেৰো ইমা গাথাযো অভাসিত্থাতি.

তিসৰণগমনিযত্থেৰস্সাপদানং ততিযং.