১. সুভূতিত্থেৰঅপদানং

১. ‘‘হিমৱন্তস্সাৱিদূৰে, নিসভো নাম পব্বতো;

অস্সমো সুকতো ময্হং, পণ্ণসালা সুমাপিতা.

২. ‘‘কোসিযো নাম নামেন, জটিলো উগ্গতাপনো;

একাকিযো [একাকিকো (ক.)] অদুতিযো, ৱসামি নিসভে তদা.

৩. ‘‘ফলং মূলঞ্চ পণ্ণঞ্চ, ন ভুঞ্জামি অহং তদা;

পৱত্তংৱ সুপাতাহং [পৱত্তপণ্ডুপত্তানি (সী.)], উপজীৱামি তাৱদে.

৪. ‘‘নাহং কোপেমি আজীৱং, চজমানোপি জীৱিতং;

আৰাধেমি সকং চিত্তং, ৱিৱজ্জেমি অনেসনং.

৫. ‘‘ৰাগূপসংহিতং চিত্তং, যদা উপ্পজ্জতে মম;

সযংৱ পচ্চৱেক্খামি, একগ্গো তং দমেমহং.

৬. ‘‘‘ৰজ্জসে ৰজ্জনীযে চ, দুস্সনীযে চ দুস্সসে;

মুয্হসে মোহনীযে চ, নিক্খমস্সু ৱনা তুৱং.

৭. ‘‘‘ৱিসুদ্ধানং অযং ৱাসো, নিম্মলানং তপস্সিনং;

মা খো ৱিসুদ্ধং দূসেসি, নিক্খমস্সু ৱনা তুৱং.

৮. ‘‘‘অগাৰিকো ভৱিত্ৱান, যদা পুত্তং [সদাযুত্তং (সী.), যদাযুত্তং (স্যা.)], লভিস্সসি;

উভোপি মা ৱিৰাধেসি, নিক্খমস্সু ৱনা তুৱং.

৯. ‘‘‘ছৱালাতং যথা কট্ঠং, ন ক্ৱচি কিচ্চকাৰকং;

নেৱ গামে অৰঞ্ঞে ৱা, ন হি তং কট্ঠসম্মতং.

১০. ‘‘‘ছৱালাতূপমো ত্ৱংসি, ন গিহী নাপি সঞ্ঞতো;

উভতো মুত্তকো অজ্জ, নিক্খমস্সু ৱনা তুৱং.

১১. ‘‘‘সিযা নু খো তৱ এতং, কো পজানাতি তে ইদং;

সদ্ধাধুৰং ৱহিসি [সদ্ধাধুৰং জহসি (সী.), সীঘং ধুৰং ৱহিসি (স্যা.)] মে, কোসজ্জবহুলায চ.

১২. ‘‘‘জিগুচ্ছিস্সন্তি তং ৱিঞ্ঞূ, অসুচিং নাগৰিকো যথা;

আকড্ঢিত্ৱান ইসযো, চোদযিস্সন্তি তং সদা.

১৩. ‘‘‘তং ৱিঞ্ঞূ পৱদিস্সন্তি, সমতিক্কন্তসাসনং;

সংৱাসং অলভন্তো হি, কথং জীৱিহিসি [জীৱিস্সসি (সী.)] তুৱং.

১৪. ‘‘‘তিধাপভিন্নং মাতঙ্গং, কুঞ্জৰং সট্ঠিহাযনং;

বলী নাগো উপগন্ত্ৱা, যূথা নীহৰতে গজং.

১৫. ‘‘‘যূথা ৱিনিস্সটো সন্তো, সুখং সাতং ন ৱিন্দতি;

দুক্খিতো ৱিমনো হোতি, পজ্ঝাযন্তো পৱেধতি.

১৬. ‘‘‘তথেৱ জটিলা তম্পি, নীহৰিস্সন্তি দুম্মতিং;

তেহি ত্ৱং নিস্সটো সন্তো, সুখং সাতং ন লচ্ছসি.

১৭. ‘‘‘দিৱা ৱা যদি ৱা ৰত্তিং, সোকসল্লসমপ্পিতো;

ডয্হসি পৰিড়াহেন, গজো যূথাৱ নিস্সটো.

১৮. ‘‘‘জাতৰূপং যথা কূটং, নেৱ ঝাযতি [যাযতি (স্যা.)] কত্থচি;

তথা সীলৱিহীনো ত্ৱং, ন ঝাযিস্সসি [যাৰিস্সতি (স্যা.)] কত্থচি.

১৯. ‘‘‘অগাৰং ৱসমানোপি, কথং জীৱিহিসি তুৱং;

মত্তিকং পেত্তিকঞ্চাপি, নত্থি তে নিহিতং ধনং.

২০. ‘‘‘সযং কম্মং কৰিত্ৱান, গত্তে সেদং পমোচযং;

এৱং জীৱিহিসি গেহে, সাধু তে তং ন ৰুচ্চতি.

২১. ‘‘‘এৱাহং তত্থ ৱাৰেমি, সংকিলেসগতং মনং;

নানাধম্মকথং কত্ৱা, পাপা চিত্তং নিৱাৰযিং’.

২২. ‘‘এৱং মে ৱিহৰন্তস্স, অপ্পমাদৱিহাৰিনো;

তিংসৱস্সসহস্সানি, ৱিপিনে মে অতিক্কমুং.

২৩. ‘‘অপ্পমাদৰতং দিস্ৱা, উত্তমত্থং গৱেসকং;

পদুমুত্তৰসম্বুদ্ধো, আগচ্ছি মম সন্তিকং.

২৪. ‘‘তিম্বৰূসকৱণ্ণাভো, অপ্পমেয্যো অনূপমো;

ৰূপেনাসদিসো বুদ্ধো, আকাসে চঙ্কমী তদা.

২৫. ‘‘সুফুল্লো সালৰাজাৱ, ৱিজ্জূৱব্ভঘনন্তৰে;

ঞাণেনাসদিসো বুদ্ধো, আকাসে চঙ্কমী তদা.

২৬. ‘‘সীহৰাজা ৱসম্ভীতো [ছম্ভিতো (ক.)],

গজৰাজাৱ দপ্পিতো [দম্মিতো (ক.)].

লাসিতো [অভীতো (স্যা.)] ব্যগ্ঘৰাজাৱ, আকাসে চঙ্কমী তদা.

২৭. ‘‘সিঙ্গীনিক্খসৱণ্ণাভো, খদিৰঙ্গাৰসন্নিভো;

মণি যথা জোতিৰসো, আকাসে চঙ্কমী তদা.

২৮. ‘‘ৱিসুদ্ধকেলাসনিভো, পুণ্ণমাযেৱ চন্দিমা;

মজ্ঝন্হিকেৱ [মজ্ঝন্তিকেৱ (সব্বত্থ)] সূৰিযো, আকাসে চঙ্কমী তদা.

২৯. ‘‘দিস্ৱা নভে চঙ্কমন্তং, এৱং চিন্তেসহং তদা;

‘দেৱো নু খো অযং সত্তো, উদাহু মনুজো অযং.

৩০. ‘‘‘ন মে সুতো ৱা দিট্ঠো ৱা, মহিযা এদিসো নৰো;

অপি মন্তপদং অত্থি, অযং সত্থা ভৱিস্সতি’.

৩১. ‘‘এৱাহং চিন্তযিত্ৱান, সকং চিত্তং পসাদযিং;

নানাপুপ্ফঞ্চ গন্ধঞ্চ, সন্নিপাতেসহং [সন্নিপাতেত্ৱাহং (সী.)] তদা.

৩২. ‘‘পুপ্ফাসনং পঞ্ঞপেত্ৱা, সাধুচিত্তং মনোৰমং;

নৰসাৰথিনং অগ্গং, ইদং ৱচনমব্ৰৱিং.

৩৩. ‘‘‘ইদং মে আসনং ৱীৰ, পঞ্ঞত্তং তৱনুচ্ছৱং;

হাসযন্তো মমং চিত্তং, নিসীদ কুসুমাসনে’.

৩৪. ‘‘নিসীদি তত্থ ভগৱা, অসম্ভীতোৱ [অছম্ভিতোৱ (ক.)] কেসৰী;

সত্তৰত্তিন্দিৱং বুদ্ধো, পৱৰে কুসুমাসনে.

৩৫. ‘‘নমস্সমানো অট্ঠাসিং, সত্তৰত্তিন্দিৱং অহং;

ৱুট্ঠহিত্ৱা সমাধিম্হা, সত্থা লোকে অনুত্তৰো;

মম কম্মং পকিত্তেন্তো, ইদং ৱচনমব্ৰৱি.

৩৬. ‘‘‘ভাৱেহি বুদ্ধানুস্সতিং, ভাৱনানমনুত্তৰং;

ইমং সতিং ভাৱযিত্ৱা, পূৰযিস্সসি মানসং.

৩৭. ‘‘‘তিংসকপ্পসহস্সানি, দেৱলোকে ৰমিস্সসি;

অসীতিক্খত্তুং দেৱিন্দো, দেৱৰজ্জং কৰিস্সসি;

সহস্সক্খত্তুং চক্কৱত্তী, ৰাজা ৰট্ঠে ভৱিস্সসি.

৩৮. ‘‘‘পদেসৰজ্জং ৱিপুলং, গণনাতো অসঙ্খিযং;

অনুভোস্সসি তং সব্বং, বুদ্ধানুস্সতিযা ফলং.

৩৯. ‘‘‘ভৱাভৱে সংসৰন্তো, মহাভোগং লভিস্সসি;

ভোগে তে ঊনতা নত্থি, বুদ্ধানুস্সতিযা ফলং.

৪০. ‘‘‘কপ্পসতসহস্সম্হি, ওক্কাককুলসম্ভৱো;

গোতমো নাম গোত্তেন, সত্থা লোকে ভৱিস্সতি.

৪১. ‘‘‘অসীতিকোটিং ছড্ডেত্ৱা, দাসে কম্মকৰে বহূ;

গোতমস্স ভগৱতো, সাসনে পব্বজিস্সসি.

৪২. ‘‘‘আৰাধযিত্ৱা সম্বুদ্ধং, গোতমং সক্যপুঙ্গৱং;

সুভূতি নাম নামেন, হেস্সতি সত্থু সাৱকো.

৪৩. ‘‘‘ভিক্খুসঙ্ঘে নিসীদিত্ৱা, দক্খিণেয্যগুণম্হি তং;

তথাৰণৱিহাৰে চ, দ্ৱীসু অগ্গে ঠপেস্সতি’.

৪৪. ‘‘ইদং ৱত্ৱান সম্বুদ্ধো, জলজুত্তমনামকো;

নভং অব্ভুগ্গমী ৱীৰো, হংসৰাজাৱ অম্বৰে.

৪৫. ‘‘সাসিতো লোকনাথেন, নমস্সিত্ৱা তথাগতং;

সদা ভাৱেমি মুদিতো, বুদ্ধানুস্সতিমুত্তমং.

৪৬. ‘‘তেন কম্মেন সুকতেন, চেতনাপণিধীহি চ;

জহিত্ৱা মানুসং দেহং, তাৱতিংসং অগচ্ছহং.

৪৭. ‘‘অসীতিক্খত্তুং দেৱিন্দো, দেৱৰজ্জমকাৰযিং;

সহস্সক্খত্তুং ৰাজা চ, চক্কৱত্তী অহোসহং.

৪৮. ‘‘পদেসৰজ্জং ৱিপুলং, গণনাতো অসঙ্খিযং;

অনুভোমি সুসম্পত্তিং, বুদ্ধানুস্সতিযা ফলং.

৪৯. ‘‘ভৱাভৱে সংসৰন্তো, মহাভোগং লভামহং;

ভোগে মে ঊনতা নত্থি, বুদ্ধানুস্সতিযা ফলং.

৫০. ‘‘সতসহস্সিতো কপ্পে, যং কম্মমকৰিং তদা;

দুগ্গতিং নাভিজানামি, বুদ্ধানুস্সতিযা ফলং.

৫১. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সুভূতি থেৰো ইমা গাথাযো অভাসিত্থাতি.

সুভূতিত্থেৰস্সাপদানং পঠমং.