২৯. পণ্ণদাযকৱগ্গো

১. পণ্ণদাযকত্থেৰঅপদানং

১. ‘‘পণ্ণসালে নিসিন্নোম্হি, পণ্ণভোজনভোজনো;

উপৱিট্ঠঞ্চ মং সন্তং, উপাগচ্ছি মহাইসি [মহামুনি (সী.)].

২. ‘‘সিদ্ধত্থো লোকপজ্জোতো, সব্বলোকতিকিচ্ছকো;

তস্স পণ্ণং মযা দিন্নং, নিসিন্নং [নিসিন্নস্স (স্যা. অট্ঠ.)] পণ্ণসন্থৰে.

৩. ‘‘চতুন্নৱুতিতো কপ্পে, যং পণ্ণমদদিং তদা;

দুগ্গতিং নাভিজানামি, পণ্ণদানস্সিদং ফলং.

৪. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা পণ্ণদাযকো থেৰো ইমা গাথাযো অভাসিত্থাতি.

পণ্ণদাযকত্থেৰস্সাপদানং পঠমং.

২. ফলদাযকত্থেৰঅপদানং

৫. ‘‘সিনেৰুসমসন্তোসো, ধৰণীসম [ধৰণীধৰ (সী. স্যা.)] সাদিসো;

ৱুট্ঠহিত্ৱা সমাধিম্হা, ভিক্খায মমুপট্ঠিতো.

৬. ‘‘হৰীতকং [হৰীতকিং (স্যা.)] আমলকং, অম্বজম্বুৱিভীতকং;

কোলং ভল্লাতকং বিল্লং, ফাৰুসকফলানি চ.

৭. ‘‘সিদ্ধত্থস্স মহেসিস্স, সব্বলোকানুকম্পিনো;

তঞ্চ সব্বং মযা দিন্নং, ৱিপ্পসন্নেন চেতসা.

৮. ‘‘চতুন্নৱুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

৯. ‘‘সত্তপঞ্ঞাসিতো কপ্পে, একজ্ঝো নাম খত্তিযো;

সত্তৰতনসম্পন্নো, চক্কৱত্তী মহব্বলো.

১০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ফলদাযকো থেৰো ইমা গাথাযো অভাসিত্থাতি.

ফলদাযকত্থেৰস্সাপদানং দুতিযং.

৩. পচ্চুগ্গমনিযত্থেৰঅপদানং

১১. ‘‘সীহং যথা ৱনচৰং, নিসভাজানিযং যথা;

ককুধং ৱিলসন্তংৱ, আগচ্ছন্তং নৰাসভং.

১২. ‘‘সিদ্ধত্থং লোকপজ্জোতং, সব্বলোকতিকিচ্ছকং;

অকাসিং পচ্চুগ্গমনং, ৱিপ্পসন্নেন চেতসা.

১৩. ‘‘চতুন্নৱুতিতো কপ্পে, পচ্চুগ্গচ্ছিং নৰাসভং;

দুগ্গতিং নাভিজানামি, পচ্চুগ্গমনে ইদং ফলং.

১৪. ‘‘সত্ততিংসে [সত্তৱীসে (সী. স্যা.)] ইতো কপ্পে, একো আসিং জনাধিপো;

সপৰিৱাৰোতি নামেন, চক্কৱত্তী মহব্বলো.

১৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পচ্চুগ্গমনিযো থেৰো ইমা গাথাযো অভাসিত্থাতি.

পচ্চুগ্গমনিযত্থেৰস্সাপদানং ততিযং.

৪. একপুপ্ফিযত্থেৰঅপদানং

১৬. ‘‘দক্খিণম্হি দুৱাৰম্হি, পিসাচো আসহং তদা;

অদ্দসং ৱিৰজং বুদ্ধং, পীতৰংসিংৱ ভাণুমং.

১৭. ‘‘ৱিপস্সিস্স নৰগ্গস্স, সব্বলোকহিতেসিনো;

একপুপ্ফং মযা দিন্নং, দ্ৱিপদিন্দস্স তাদিনো.

১৮. ‘‘একনৱুতিতো কপ্পে, যং পুপ্ফমদদিং তদা;

দুগ্গতিং নাভিজানামি, বুদ্ধপূজাযিদং ফলং.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একপুপ্ফিযো থেৰো ইমা গাথাযো অভাসিত্থাতি.

একপুপ্ফিযত্থেৰস্সাপদানং চতুত্থং.

৫. মঘৱপুপ্ফিযত্থেৰঅপদানং

২০. ‘‘নম্মদানদিযা তীৰে, সযম্ভূ অপৰাজিতো;

সমাধিং সো সমাপন্নো, ৱিপ্পসন্নো অনাৱিলো.

২১. ‘‘দিস্ৱা পসন্নসুমনো, সম্বুদ্ধং অপৰাজিতং;

তাহং মঘৱপুপ্ফেন, সযম্ভুং পূজযিং তদা.

২২. ‘‘একনৱুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মঘৱপুপ্ফিযো থেৰো ইমা গাথাযো অভাসিত্থাতি.

মঘৱপুপ্ফিযত্থেৰস্সাপদানং পঞ্চমং.

৬. উপট্ঠাকদাযকত্থেৰঅপদানং

২৪. ‘‘ৰথিযং পটিপজ্জন্তং, আহুতীনং পটিগ্গহং;

দ্ৱিপদিন্দং মহানাগং, লোকজেট্ঠং নৰাসভং.

২৫. ‘‘পক্কোসাপিয তস্সাহং, সব্বলোকহিতেসিনো;

উপট্ঠাকো মযা দিন্নো, সিদ্ধত্থস্স মহেসিনো.

২৬. ‘‘পটিগ্গহেত্ৱা [পটিগ্গহেসি (ক.)] সম্বুদ্ধো, নিয্যাদেসি মহামুনি [মহাইসি (ক.)];

উট্ঠায আসনা তম্হা, পক্কামি পাচিনামুখো.

২৭. ‘‘চতুন্নৱুতিতো কপ্পে, উপট্ঠাকমদং তদা;

দুগ্গতিং নাভিজানামি, উপট্ঠানস্সিদং ফলং.

২৮. ‘‘সত্তপঞ্ঞাসিতো কপ্পে, বলসেনসনামকো;

সত্তৰতনসম্পন্নো, চক্কৱত্তী মহব্বলো.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উপট্ঠাকদাযকো থেৰো ইমা গাথাযো অভাসিত্থাতি.

উপট্ঠাকদাযকত্থেৰস্সাপদানং ছট্ঠং.

৭. অপদানিযত্থেৰঅপদানং

৩০. ‘‘অপদানং সুগতানং, কিত্তযিংহং মহেসিনং;

পাদে চ সিৰসা ৱন্দিং, পসন্নো সেহি পাণিভি.

৩১. ‘‘দ্ৱেনৱুতে ইতো কপ্পে, অপদানং পকিত্তযিং;

দুগ্গতিং নাভিজানামি, কিত্তনায ইদং ফলং.

৩২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অপদানিযো থেৰো ইমা গাথাযো অভাসিত্থাতি.

অপদানিযত্থেৰস্সাপদানং সত্তমং.

৮. সত্তাহপব্বজিতত্থেৰঅপদানং

৩৩. ‘‘ৱিপস্সিস্স ভগৱতো, সঙ্ঘো সক্কতমানিতো;

ব্যসনং মে অনুপ্পত্তং, ঞাতিভেদো পুৰে অহু.

৩৪. ‘‘পব্বজ্জং উপগন্ত্ৱান, ব্যসনুপসমাযহং;

সত্তাহাভিৰতো তত্থ, সত্থুসাসনকম্যতা.

৩৫. ‘‘একনৱুতিতো কপ্পে, যমহং পব্বজিং তদা;

দুগ্গতিং নাভিজানামি, পব্বজ্জায ইদং ফলং.

৩৬. ‘‘সত্তসট্ঠিম্হিতো কপ্পে, সত্ত আসুং মহীপতী;

সুনিক্খমাতি ঞাযন্তি, চক্কৱত্তী মহব্বলা.

৩৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সত্তাহপব্বজিতো থেৰো ইমা গাথাযো অভাসিত্থাতি.

সত্তাহপব্বজিতত্থেৰস্সাপদানং অট্ঠমং.

৯. বুদ্ধুপট্ঠাযিকত্থেৰঅপদানং

৩৮. ‘‘ৱেটম্ভিনীতি [ৱেটম্বৰীতি (সী.), ৱেধম্ভিনীতি (স্যা.)] মে নামং, পিতুসন্তং [পিতা’সন্তং (?)] মমং তদা;

মম হত্থং গহেত্ৱান, উপানযি মহামুনিং.

৩৯. ‘‘ইমেমং উদ্দিসিস্সন্তি, বুদ্ধা লোকগ্গনাযকা;

তেহং উপট্ঠিং সক্কচ্চং, পসন্নো সেহি পাণিভি.

৪০. ‘‘একত্তিংসে ইতো কপ্পে, বুদ্ধে উপট্ঠহিং [পৰিচৰিং (সী. স্যা.)] তদা;

দুগ্গতিং নাভিজানামি, উপট্ঠানস্সিদং ফলং.

৪১. ‘‘তেৱীসম্হি ইতো কপ্পে, চতুৰো আসু খত্তিযা;

সমণুপট্ঠাকা নাম, চক্কৱত্তী মহব্বলা.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বুদ্ধুপট্ঠাযিকো থেৰো ইমা গাথাযো অভাসিত্থাতি.

বুদ্ধুপট্ঠাযিকত্থেৰস্সাপদানং নৱমং.

১০. পুব্বঙ্গমিযত্থেৰঅপদানং

৪৩. ‘‘চুল্লাসীতিসহস্সানি, পব্বজিম্হ অকিঞ্চনা;

তেসং পুব্বঙ্গমো আসিং, উত্তমত্থস্স পত্তিযা.

৪৪. ‘‘সৰাগা সভৱা [সমোহা (স্যা.)] চেতে, ৱিপ্পসন্নমনাৱিলা;

উপট্ঠহিংসু সক্কচ্চং, পসন্না সেহি পাণিভি.

৪৫. ‘‘খীণাসৱা ৱন্তদোসা, কতকিচ্চা অনাসৱা;

ফৰিংসু মেত্তচিত্তেন, সযম্ভূ অপৰাজিতা.

৪৬. ‘‘তেসং উপট্ঠহিত্ৱান, সম্বুদ্ধানং পতিস্সতো;

মৰণঞ্চ অনুপ্পত্তো, দেৱত্তঞ্চ অগম্হসে.

৪৭. ‘‘চতুন্নৱুতিতো কপ্পে, যং সীলমনুপালযিং;

দুগ্গতিং নাভিজানামি, সঞ্ঞমস্স ইদং ফলং.

৪৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুব্বঙ্গমিযো থেৰো ইমা গাথাযো অভাসিত্থাতি.

পুব্বঙ্গমিযত্থেৰস্সাপদানং দসমং.

পণ্ণদাযকৱগ্গো একূনতিংসতিমো.