৯. সপ্পিদাযকত্থেৰঅপদানং

৪৪. ‘‘নিসিন্নো পাসাদৱৰে, নাৰীগণপুৰক্খতো;

ব্যাধিতং সমণং দিস্ৱা, অভিনামেসহং ঘৰং.

৪৫. ‘‘উপৱিট্ঠং মহাৱীৰং, দেৱদেৱং নৰাসভং;

সপ্পিতেলং মযা দিন্নং, সিদ্ধত্থস্স মহেসিনো.

৪৬. ‘‘পস্সদ্ধদৰথং দিস্ৱা, ৱিপ্পসন্নমুখিন্দ্ৰিযং;

ৱন্দিত্ৱা সত্থুনো পাদে, অনুসংসাৱযিং পুৰে.

৪৭. ‘‘দিস্ৱা মং সুপ্পসন্নত্তং [সুপ্পসন্নন্তং (স্যা. ক.) সুপ্পসন্নচিত্তন্তি অত্থো], ইদ্ধিযা পাৰমিঙ্গতো;

নভং অব্ভুগ্গমী ধীৰো, হংসৰাজাৱ অম্বৰে.

৪৮. ‘‘চতুন্নৱুতিতো কপ্পে, যং দানমদদিং তদা;

দুগ্গতিং নাভিজানামি, সপ্পিতেলস্সিদং ফলং.

৪৯. ‘‘ইতো সত্তৰসে কপ্পে, জুতিদেৱ [দুতিদেৱ (স্যা.), তুতিদেৱ (ক.)] সনামকো;

সত্তৰতনসম্পন্নো, চক্কৱত্তী মহব্বলো.

৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সপ্পিদাযকো থেৰো ইমা গাথাযো অভাসিত্থাতি.

সপ্পিদাযকত্থেৰস্সাপদানং নৱমং.