৩. সচ্চসঞ্ঞকত্থেৰঅপদানং

১১. ‘‘ৱেস্সভূ তম্হি সমযে, ভিক্খুসঙ্ঘপুৰক্খতো;

দেসেতি অৰিযসচ্চানি, নিব্বাপেন্তো মহাজনং.

১২. ‘‘পৰমকাৰুঞ্ঞপত্তোম্হি, সমিতিং অগমাসহং;

সোহং নিসিন্নকো সন্তো, ধম্মমস্সোসি সত্থুনো.

১৩. ‘‘তস্সাহং ধম্মং সুত্ৱান, দেৱলোকং অগচ্ছহং;

তিংসকপ্পানি দেৱেসু, অৱসিং তত্থহং পুৰে.

১৪. ‘‘একত্তিংসে ইতো কপ্পে, যং সঞ্ঞমলভিং তদা;

দুগ্গতিং নাভিজানামি, সচ্চসঞ্ঞাযিদং ফলং.

১৫. ‘‘ছব্বীসম্হি ইতো কপ্পে, একো আসিং জনাধিপো;

একফুসিতনামেন, চক্কৱত্তী মহব্বলো.

১৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সচ্চসঞ্ঞকো থেৰো ইমা গাথাযো অভাসিত্থাতি.

সচ্চসঞ্ঞকত্থেৰস্সাপদানং ততিযং.