৩. কোটুম্বৰিযত্থেৰঅপদানং

১২. ‘‘কণিকাৰংৱ জোতন্তং, নিসিন্নং পব্বতন্তৰে;

অপ্পমেয্যংৱ উদধিং, ৱিত্থতং ধৰণিং যথা.

১৩. ‘‘পূজিতং [পৰেতং (সী.)] দেৱসঙ্ঘেন, নিসভাজানিযং যথা;

হট্ঠো হট্ঠেন চিত্তেন, উপাগচ্ছিং নৰুত্তমং.

১৪. ‘‘সত্তপুপ্ফানি পগ্গয্হ, কোটুম্বৰসমাকুলং;

বুদ্ধস্স অভিৰোপেসিং, সিখিনো লোকবন্ধুনো.

১৫. ‘‘একত্তিংসে ইতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

১৬. ‘‘ইতো ৱীসতিকপ্পম্হি, মহানেলসনামকো;

একো আসি মহাতেজো, চক্কৱত্তী মহব্বলো.

১৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কোটুম্বৰিযো থেৰো ইমা গাথাযো অভাসিত্থাতি.

কোটুম্বৰিযত্থেৰস্সাপদানং ততিযং.