১৮. কুমুদৱগ্গো

১. কুমুদমালিযত্থেৰঅপদানং

১. ‘‘পব্বতে হিমৱন্তম্হি, মহাজাতস্সৰো অহু;

তত্থজো ৰক্খসো আসিং, ঘোৰৰূপো মহব্বলো.

২. ‘‘কুমুদং পুপ্ফতে তত্থ, চক্কমত্তানি জাযৰে;

ওচিনামি চ তং পুপ্ফং, বলিনো সমিতিং তদা.

৩. ‘‘অত্থদস্সী তু ভগৱা, দ্ৱিপদিন্দো নৰাসভো;

পুপ্ফসঙ্কোচিতং [পুপ্ফং সঙ্কোচিতং (সী. স্যা.), পুপ্ফং সমোচিতং (?)] দিস্ৱা, আগচ্ছি মম সন্তিকং.

৪. ‘‘উপাগতঞ্চ সম্বুদ্ধং, দেৱদেৱং নৰাসভং;

সব্বঞ্চ পুপ্ফং পগ্গয্হ, বুদ্ধস্স অভিৰোপযিং.

৫. ‘‘যাৱতা হিমৱন্তন্তা, পৰিসা সা [হিমৱন্তস্মিং, যাৱ মালা (স্যা.)] তদা অহু;

তাৱচ্ছদনসম্পন্নো, অগমাসি তথাগতো.

৬. ‘‘অট্ঠাৰসে কপ্পসতে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৭. ‘‘ইতো পন্নৰসে কপ্পে, সত্তাহেসুং জনাধিপা;

সহস্সৰথনামা তে, চক্কৱত্তী মহব্বলা.

৮. ‘‘পটিসম্ভিদা চতস্সো, ৱিমোক্খাপি চ অট্ঠিমে;

ছড়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা কুমুদমালিযো থেৰো ইমা গাথাযো অভাসিত্থাতি.

কুমুদমালিযত্থেৰস্সাপদানং পঠমং.

২. নিস্সেণিদাযকত্থেৰঅপদানং

৯. ‘‘কোণ্ডঞ্ঞস্স ভগৱতো, লোকজেট্ঠস্স তাদিনো;

আৰোহত্থায পাসাদং, নিস্সেণী কাৰিতা মযা.

১০. ‘‘তেন চিত্তপ্পসাদেন, অনুভোত্ৱান সম্পদা;

ধাৰেমি অন্তিমং দেহং, সম্মাসম্বুদ্ধসাসনে.

১১. ‘‘একত্তিংসম্হি কপ্পানং, সহস্সম্হি তযো অহুং [মহা (সী. স্যা.)];

সম্বহুলা নাম ৰাজানো, চক্কৱত্তী মহব্বলা.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নিস্সেণিদাযকো থেৰো ইমা গাথাযো অভাসিত্থাতি.

নিস্সেণিদাযকত্থেৰস্সাপদানং দুতিযং.

৩. ৰত্তিপুপ্ফিযত্থেৰঅপদানং

১৩. ‘‘মিগলুদ্দো পুৰে আসিং, অৰঞ্ঞে কাননে অহং;

ৱিপস্সিং অদ্দসং বুদ্ধং, দেৱদেৱং নৰাসভং.

১৪. ‘‘ৰত্তিকং পুপ্ফিতং দিস্ৱা, কুটজং ধৰণীৰুহং;

সমূলং পগ্গহেত্ৱান, উপনেসিং মহেসিনো.

১৫. ‘‘একনৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, পুপ্ফদানস্সিদং ফলং.

১৬. ‘‘ইতো চ অট্ঠমে কপ্পে, সুপ্পসন্নসনামকো;

সত্তৰতনসম্পন্নো, ৰাজাহোসিং মহব্বলো.

১৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰত্তিপুপ্ফিযো থেৰো ইমা গাথাযো অভাসিত্থাতি.

ৰত্তিপুপ্ফিযত্থেৰস্সাপদানং ততিযং.

৪. উদপানদাযকত্থেৰঅপদানং

১৮. ‘‘ৱিপস্সিনো ভগৱতো, উদপানো কতো মযা;

পিণ্ডপাতঞ্চ দত্ৱান [গহেত্ৱান (স্যা.)], নিয্যাদেসিমহং তদা.

১৯. ‘‘একনৱুতিতো কপ্পে, যং কম্মমকৰিং তদা;

দুগ্গতিং নাভিজানামি, উদপানস্সিদং ফলং.

২০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদপানদাযকো থেৰো ইমা গাথাযো অভাসিত্থাতি.

উদপানদাযকত্থেৰস্সাপদানং চতুত্থং.

৫. সীহাসনদাযকত্থেৰঅপদানং

২১. ‘‘নিব্বুতে লোকনাথম্হি, পদুমুত্তৰনাযকে;

পসন্নচিত্তো সুমনো, সীহাসনমদাসহং.

২২. ‘‘বহূহি গন্ধমালেহি, দিট্ঠধম্মসুখাৱহে;

তত্থ পূজঞ্চ কত্ৱান, নিব্বাযতি বহুজ্জনো.

২৩. ‘‘পসন্নচিত্তো সুমনো, ৱন্দিত্ৱা বোধিমুত্তমং;

কপ্পানং সতসহস্সং, দুগ্গতিং নুপপজ্জহং.

২৪. ‘‘পন্নৰসসহস্সম্হি, কপ্পানং অট্ঠ আসু তে [অট্ঠ আসযুং (ক.)];

সিলুচ্চযসনামা চ, ৰাজানো চক্কৱত্তিনো.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সীহাসনদাযকো থেৰো ইমা গাথাযো অভাসিত্থাতি;

সীহাসনদাযকত্থেৰস্সাপদানং পঞ্চমং.

৬. মগ্গদত্তিকত্থেৰঅপদানং

২৬. ‘‘অনোমদস্সী ভগৱা, দ্ৱিপদিন্দো নৰাসভো;

দিট্ঠধম্মসুখত্থায, অব্ভোকাসম্হি চঙ্কমি.

২৭. ‘‘উদ্ধতে পাদে পুপ্ফানি, সোভং মুদ্ধনি তিট্ঠৰে;

পসন্নচিত্তো সুমনো, ৱন্দিত্ৱা পুপ্ফমোকিৰিং.

২৮. ‘‘ৱীসকপ্পসহস্সম্হি, ইতো পঞ্চ জনা অহুং;

পুপ্ফচ্ছদনিযা নাম, চক্কৱত্তী মহব্বলা.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মগ্গদত্তিকো থেৰো ইমা গাথাযো অভাসিত্থাতি.

মগ্গদত্তিকত্থেৰস্সাপদানং ছট্ঠং.

৭. একদীপিযত্থেৰঅপদানং

৩০. ‘‘পদুমুত্তৰস্স মুনিনো, সড়লে বোধিমুত্তমে;

পসন্নচিত্তো সুমনো, একদীপং অদাসহং.

৩১. ‘‘ভৱে নিব্বত্তমানম্হি, নিব্বত্তে পুঞ্ঞসঞ্চযে;

দুগ্গতিং নাভিজানামি, দীপদানস্সিদং ফলং.

৩২. ‘‘সোড়সে কপ্পসহস্সে, ইতো তে চতুৰো জনা;

চন্দাভা নাম নামেন, চক্কৱত্তী মহব্বলা.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একদীপিযো থেৰো ইমা গাথাযো অভাসিত্থাতি.

একদীপিযত্থেৰস্সাপদানং সত্তমং.

নৱমং ভাণৱাৰং.

৮. মণিপূজকত্থেৰঅপদানং

৩৪. ‘‘ওৰেন হিমৱন্তস্স, নদিকা সম্পৱত্তথ;

তস্সা চানুপখেত্তম্হি, সযম্ভূ ৱসতে তদা.

৩৫. ‘‘মণিং পগ্গয্হ পল্লঙ্কং, সাধুচিত্তং মনোৰমং;

পসন্নচিত্তো সুমনো, বুদ্ধস্স অভিৰোপযিং.

৩৬. ‘‘চতুন্নৱুতিতো কপ্পে, যং মণিং অভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

৩৭. ‘‘ইতো চ দ্ৱাদসে কপ্পে, সতৰংসীসনামকা;

অট্ঠ তে আসুং ৰাজানো, চক্কৱত্তী মহব্বলা.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মণিপূজকো থেৰো ইমা গাথাযো অভাসিত্থাতি.

মণিপূজকত্থেৰস্সাপদানং অট্ঠমং.

৯. তিকিচ্ছকত্থেৰঅপদানং

৩৯. ‘‘নগৰে বন্ধুমতিযা, ৱেজ্জো আসিং সুসিক্খিতো;

আতুৰানং সদুক্খানং, মহাজনসুখাৱহো.

৪০. ‘‘ব্যাধিতং সমণং দিস্ৱা, সীলৱন্তং মহাজুতিং;

পসন্নচিত্তো সুমনো, ভেসজ্জমদদিং তদা.

৪১. ‘‘অৰোগো আসি তেনেৱ, সমণো সংৱুতিন্দ্ৰিযো;

অসোকো নাম নামেন, উপট্ঠাকো ৱিপস্সিনো.

৪২. ‘‘একনৱুতিতো কপ্পে, যং ওসধমদাসহং;

দুগ্গতিং নাভিজানামি, ভেসজ্জস্স ইদং ফলং.

৪৩. ‘‘ইতো চ অট্ঠমে কপ্পে, সব্বোসধসনামকো;

সত্তৰতনসম্পন্নো, চক্কৱত্তী মহব্বলো.

৪৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিকিচ্ছকো থেৰো ইমা গাথাযো অভাসিত্থাতি.

তিকিচ্ছকত্থেৰস্সাপদানং নৱমং.

১০. সঙ্ঘুপট্ঠাকত্থেৰঅপদানং

৪৫. ‘‘ৱেস্সভুম্হি ভগৱতি, অহোসাৰামিকো অহং;

পসন্নচিত্তো সুমনো, উপট্ঠিং সঙ্ঘমুত্তমং.

৪৬. ‘‘একত্তিংসে ইতো কপ্পে, যং কম্মমকৰিং তদা;

দুগ্গতিং নাভিজানামি, উপট্ঠানস্সিদং ফলং.

৪৭. ‘‘ইতো তে সত্তমে কপ্পে, সত্তেৱাসুং সমোদকা;

সত্তৰতনসম্পন্না, চক্কৱত্তী মহব্বলা.

৪৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সঙ্ঘুপট্ঠাকো থেৰো ইমা গাথাযো অভাসিত্থাতি.

সঙ্ঘুপট্ঠাকত্থেৰস্সাপদানং দসমং.

কুমুদৱগ্গো অট্ঠাৰসমো.