৯. বিড়ালিদাযকত্থেৰঅপদানং

৫৩. ‘‘হিমৱন্তস্সাৱিদূৰে, ৱসামি পণ্ণসন্থৰে;

ঘাসেসু গেধমাপন্নো, সেয্যসীলো চহং [সেযসীলোৱহং (স্যা. ক.)] তদা.

৫৪. ‘‘খণন্তালু [খণমালু (স্যা.)] কলম্বানি, বিড়ালিতক্কলানি চ;

কোলং ভল্লাতকং বিল্লং, আহত্ৱা পটিযাদিতং.

৫৫. ‘‘পদুমুত্তৰো লোকৱিদূ, আহুতীনং পটিগ্গহো;

মম সঙ্কপ্পমঞ্ঞায, আগচ্ছি মম সন্তিকং.

৫৬. ‘‘উপাগতং মহানাগং, দেৱদেৱং নৰাসভং;

বিড়ালিং পগ্গহেত্ৱান, পত্তম্হি ওকিৰিং অহং.

৫৭. ‘‘পৰিভুঞ্জি মহাৱীৰো, তোসযন্তো মমং তদা;

পৰিভুঞ্জিত্ৱান সব্বঞ্ঞূ, ইমং গাথং অভাসথ.

৫৮. ‘‘‘সকং চিত্তং পসাদেত্ৱা, বিড়ালিং মে অদা তুৱং;

কপ্পানং সতসহস্সং, দুগ্গতিং নুপপজ্জসি’.

৫৯. ‘‘চৰিমং ৱত্ততে ময্হং, ভৱা সব্বে সমূহতা;

ধাৰেমি অন্তিমং দেহং, সম্মাসম্বুদ্ধসাসনে.

৬০. ‘‘চতুপঞ্ঞাসিতো কপ্পে, সুমেখলিযসৱ্হযো;

সত্তৰতনসম্পন্নো, চক্কৱত্তী মহব্বলো.

৬১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বিড়ালিদাযকো থেৰো ইমা গাথাযো অভাসিত্থাতি.

বিড়ালিদাযকত্থেৰস্সাপদানং নৱমং.