৭. নড়মালিযত্থেৰঅপদানং

৩৬. ‘‘পদুমুত্তৰবুদ্ধস্স, লোকজেট্ঠস্স তাদিনো;

তিণত্থৰে নিসিন্নস্স, উপসন্তস্স তাদিনো.

৩৭. ‘‘নড়মালং গহেত্ৱান, বন্ধিত্ৱা [বীজিত্ৱা (ক.)] বীজনিং অহং;

বুদ্ধস্স উপনামেসিং, দ্ৱিপদিন্দস্স তাদিনো.

৩৮. ‘‘পটিগ্গহেত্ৱা সব্বঞ্ঞূ, বীজনিং লোকনাযকো;

মম সঙ্কপ্পমঞ্ঞায, ইমং গাথং অভাসথ.

৩৯. ‘‘‘যথা মে কাযো নিব্বাতি, পৰিড়াহো ন ৱিজ্জতি;

তথেৱ তিৱিধগ্গীহি, চিত্তং তৱ ৱিমুচ্চতু’.

৪০. ‘‘সব্বে দেৱা সমাগচ্ছুং, যে কেচি ৱননিস্সিতা;

সোস্সাম বুদ্ধৱচনং, হাসযন্তঞ্চ দাযকং.

৪১. ‘‘নিসিন্নো ভগৱা তত্থ, দেৱসঙ্ঘপুৰক্খতো;

দাযকং সম্পহংসেন্তো, ইমা গাথা অভাসথ.

৪২. ‘‘‘ইমিনা বীজনিদানেন, চিত্তস্স পণিধীহি চ;

সুব্বতো নাম নামেন, চক্কৱত্তী ভৱিস্সতি.

৪৩. ‘‘‘তেন কম্মাৱসেসেন, সুক্কমূলেন চোদিতো;

মালুতো নাম নামেন, চক্কৱত্তী ভৱিস্সতি’.

৪৪. ‘‘‘ইমিনা বীজনিদানেন, সম্মানৱিপুলেন চ;

কপ্পসতসহস্সম্পি, দুগ্গতিং নুপপজ্জতি.

৪৫. ‘‘তিংসকপ্পসহস্সম্হি, সুব্বতা অট্ঠতিংস তে;

একূনতিংসসহস্সে, অট্ঠ মালুতনামকা.

৪৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নড়মালিযো থেৰো ইমা গাথাযো অভাসিত্থাতি.

নড়মালিযত্থেৰস্সাপদানং সত্তমং.

সত্তমভাণৱাৰং.