১. পঠমপাটিদেসনীযসিক্খাপদৱণ্ণনা

পাটিদেসনীযা ধম্মা, খুদ্দকানং অনন্তৰা;

ঠপিতা যে অযং দানি, তেসং ভৱতি ৱণ্ণনা.

৫৫২. পঠমপাটিদেসনীযে তাৱ পটিক্কমনকালেতি পিণ্ডায চৰিত্ৱা পটিআগমনকালে. সব্বেৱ অগ্গহেসীতি সব্বমেৱ অগ্গহেসি. পৱেধেন্তীতি কম্পমানা. অপেহীতি অপগচ্ছ.

৫৫৩-৫. গাৰয্হং আৱুসোতিআদি পটিদেসেতব্বাকাৰদস্সনং. ৰথিকাতি ৰচ্ছা. ব্যূহন্তি অনিব্বিজ্ঝিত্ৱা ঠিতা গতপচ্চাগতৰচ্ছা. সিঙ্ঘাটকন্তি চতুক্কোণং ৱা তিকোণং ৱা মগ্গসমোধানট্ঠানং. ঘৰন্তি কুলঘৰং. এতেসু যত্থ কত্থচি ঠত্ৱা গণ্হন্তস্স গহণে দুক্কটং, অজ্ঝোহাৰে অজ্ঝোহাৰগণনায পাটিদেসনীযং. হত্থিসালাদীসু গণ্হন্তস্সাপি এসেৱ নযো. ভিক্খুনী ৰথিকায ঠত্ৱা দেতি, ভিক্খু সচেপি অন্তৰাৰামাদীসু ঠত্ৱা গণ্হাতি, আপত্তিযেৱ. ‘‘অন্তৰঘৰং পৱিট্ঠাযা’’তি হি ৱচনতো ভিক্খুনিযা অন্তৰঘৰে ঠত্ৱা দদমানায ৱসেনেত্থ আপত্তি ৱেদিতব্বা, ভিক্খুস্স ঠিতট্ঠানং পন অপ্পমাণং. তস্মা সচেপি ৱীথিআদীসু ঠিতো ভিক্খু অন্তৰাৰামাদীসু ঠত্ৱা দদমানায ভিক্খুনিযা গণ্হাতি, অনাপত্তিযেৱ.

যামকালিকং সত্তাহকালিকং যাৱজীৱিকং আহাৰত্থায পটিগ্গণ্হাতি, আপত্তি দুক্কটস্স. অজ্ঝোহাৰে অজ্ঝোহাৰে আপত্তি দুক্কটস্সাতি ইদং আমিসেন অসম্ভিন্নং সন্ধায ৱুত্তং, সম্ভিন্নে পন একৰসে পাটিদেসনীযমেৱ. একতো উপসম্পন্নাযাতি ভিক্খুনীনং সন্তিকে উপসম্পন্নায. ভিক্খূনং সন্তিকে উপসম্পন্নায পন যথাৱত্থুকমেৱ.

৫৫৬. দাপেতি ন দেতীতি অঞ্ঞাতিকা অঞ্ঞেন কেনচি দাপেতি তং গণ্হন্তস্স অনাপত্তি. উপনিক্খিপিত্ৱা দেতীতি ভূমিযং ঠপেত্ৱা ‘‘ইদং অয্য তুম্হাকং দম্মী’’তি দেতি, এৱং দিন্নং ‘‘সাধু ভগিনী’’তি সম্পটিচ্ছিত্ৱা তায এৱ ৱা ভিক্খুনিযা অঞ্ঞেন ৱা কেনচি পটিগ্গহাপেত্ৱা ভুঞ্জিতুং ৱট্টতি. সিক্খমানায সামণেৰিযাতি এতাসং দদমানানং গণ্হন্তস্স অনাপত্তি. সেসমেত্থ উত্তানমেৱ.

এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, তিচিত্তং, তিৱেদনন্তি.

পঠমপাটিদেসনীযং.