১. পঠমৱগ্গো

১-১১. কাযগতাসতিসুত্তাদিৱণ্ণনা

৩৬৬-৩৭৬. অসঙ্খতসংযুত্তে অসঙ্খতন্তি অকতং. হিতেসিনাতি হিতং এসন্তেন. অনুকম্পকেনাতি অনুকম্পমানেন. অনুকম্পং উপাদাযাতি অনুকম্পং চিত্তেন পৰিগ্গহেত্ৱা, পটিচ্চাতিপি ৱুত্তং হোতি. কতং ৱো তং মযাতি তং মযা ইমং অসঙ্খতঞ্চ অসঙ্খতমগ্গঞ্চ দেসেন্তেন তুম্হাকং কতং. এত্তকমেৱ হি অনুকম্পকস্স সত্থু কিচ্চং, যদিদং অৱিপৰীতধম্মদেসনা. ইতো পৰং পন পটিপত্তি নাম সাৱকানং কিচ্চং. তেনাহ এতানি, ভিক্খৱে, ৰুক্খমূলানি…পে… অম্হাকং অনুসাসনীতি ইমিনা ৰুক্খমূলসেনাসনং দস্সেতি. সুঞ্ঞাগাৰানীতি ইমিনা জনৱিৱিত্তং ঠানং. উভযেন চ যোগানুৰূপং সেনাসনং আচিক্খতি, দাযজ্জং নিয্যাতেতি.

ঝাযথাতি আৰম্মণূপনিজ্ঝানেন অট্ঠতিংসাৰম্মণানি, লক্খণূপনিজ্ঝানেন চ অনিচ্চাদিতো খন্ধাযতনাদীনি উপনিজ্ঝাযথ, সমথঞ্চ ৱিপস্সনঞ্চ ৱড্ঢেথাতি ৱুত্তং হোতি. মা পমাদত্থাতি মা পমজ্জিত্থ. মা পচ্ছা ৱিপ্পটিসাৰিনো অহুৱত্থাতি যে হি পুব্বে দহৰকালে অৰোগকালে সত্তসপ্পাযাদিসম্পত্তিকালে সত্থু সম্মুখীভাৱকালে চ যোনিসোমনসিকাৰৰহিতা ৰত্তিন্দিৱং মঙ্কুলভত্তং হুত্ৱা সেয্যসুখং মিদ্ধসুখং অনুভোন্তা পমজ্জন্তি, তে পচ্ছা জৰাকালে ৰোগকালে মৰণকালে ৱিপত্তিকালে সত্থু পৰিনিব্বুতকালে চ তং পুব্বে পমাদৱিহাৰং অনুস্সৰন্তা সপ্পটিসন্ধিকালকিৰিযঞ্চ ভাৰিযং সম্পস্সমানা ৱিপ্পটিসাৰিনো হোন্তি. তুম্হে পন তাদিসা মা অহুৱত্থাতি দস্সেন্তো আহ ‘‘মা পচ্ছা ৱিপ্পটিসাৰিনো অহুৱত্থা’’তি.

অযং ৱো অম্হাকং অনুসাসনীতি অযং অম্হাকং সন্তিকা ‘‘ঝাযথ মা পমাদত্থা’’তি তুম্হাকং অনুসাসনী, ওৱাদোতি ৱুত্তং হোতি.