৯. কুলসুত্তৱণ্ণনা

৩৬১. নৱমে দুব্ভিক্খাতি দুল্লভভিক্খা. দ্ৱীহিতিকাতি ‘‘জীৱিস্সাম নু খো ন নু খো’’তি এৱং পৱত্তঈহিতিকা. ‘‘দুহিতিকা’’তিপি পাঠো. অযমেৱ অত্থো. দুক্খা ঈহিতি এত্থ ন সক্কা কোচি পযোগো সুখেন কাতুন্তি দুহিতিকা. তত্থ তত্থ মতমনুস্সানং ৱিপ্পকিণ্ণানি সেতানি অট্ঠিকানি এত্থাতি সেতট্ঠিকা. সলাকাৱুত্তাতি সলাকমত্তৱুত্তা, যং তত্থ ৱুত্তং ৱাপিতং, তং সলাকমত্তমেৱ অহোসি, ফলে ন জনযতীতি অত্থো.

উগ্গিলিতুন্তি দ্ৱে অন্তে মোচেত্ৱা কথেতুং অসক্কোন্তো উগ্গিলিতুং বহি নীহৰিতুং ন সক্খীতি. ওগিলিতুন্তি পুচ্ছায দোসং দিস্ৱা হাৰেতুং অসক্কোন্তো ওগিলিতুং অন্তো পৱেসেতুং ন সক্খীতি.

ইতো সো গামণি একনৱুতিকপ্পেতি ভগৱা কথযমানোৱ যাৱ নিক্খন্তো নাসিকৱাতো ন পুন পৱিসতি, তাৱতকেন কালেন একনৱুতিকপ্পে অনুস্সৰি ‘‘অত্থি নু খো কিঞ্চি কুলে পক্কভিক্খাদানেন উপহতপুব্ব’’ন্তি পৰিজাননত্থং. অথেকম্পি অপস্সন্তো ‘‘ইতো সো, গামণী’’তিআদিমাহ. ইদানি দানাদীনং আনিসংসং কথেন্তো অথ খো যানি তানি কুলানি অড্ঢানীতি ধম্মদেসনং আৰভি. তত্থ দানসম্ভূতানীতি দানেন সম্ভূতানি নিব্বত্তানি. সেসপদদ্ৱযেপি এসেৱ নযো. এত্থ পন সচ্চং নাম সচ্চৱাদিতা. সামঞ্ঞং নাম সেসসীলং. ৱিকিৰতীতি অযোগেন ৱড়ঞ্জেন্তো ৱিপ্পকিৰতি. ৱিধমতীতি ধমেন্তো ৱিয নাসেতি. ৱিদ্ধংসেতীতি নাসেতি. অনিচ্চতাতি হুত্ৱা অভাৱো বহুনাপি কালেন সঙ্গতানং খণেনেৱ অন্তৰধানং.