৭. খেত্তূপমসুত্তৱণ্ণনা

৩৫৯. সত্তমে জঙ্গলন্তি থদ্ধং ন মুদু. ঊসৰন্তি সঞ্জাতলোণং. পাপভূমীতি লামকভূমিভাগং. মংদীপাতিআদীসু অহং দীপো পতিট্ঠা এতেসন্তি মংদীপা. অহং লেণো অল্লীযনট্ঠানং এতেসন্তি মংলেণা. অহং তাণং ৰক্খা এতেসন্তি মংতাণা. অহং সৰণং ভযনাসনং এতেসন্তি মংসৰণা. ৱিহৰন্তীতি মং এৱং কত্ৱা ৱিহৰন্তি.

গোভত্তম্পীতি ধঞ্ঞফলস্স অভাৱেন লাযিত্ৱা কলাপকলাপং বন্ধিত্ৱা ঠপিতং গিম্হকালে গুন্নম্পি খাদনং ভৱিস্সতীতি অত্থো. উদকমণিকোতি কুচ্ছিযং মণিকমেখলায এৱং লদ্ধনামো ভাজনৱিসেসো. অহাৰী অপৰিহাৰীতি উদকং ন হৰতি ন পৰিহৰতি, ন পৰিযাদিযতীতি অত্থো. ইতি ইমস্মিং সুত্তে সক্কচ্চধম্মদেসনাৱ কথিতা. বুদ্ধানঞ্হি অসক্কচ্চধম্মদেসনা নাম নত্থি. সীহসমানৱুত্তিনো হি বুদ্ধা, যথা সীহো পভিন্নৱৰৱাৰণস্সপি সসবিড়াৰাদীনম্পি গহণত্থায একসদিসমেৱ ৱেগং কৰোতি, এৱং বুদ্ধাপি একস্স দেসেন্তাপি দ্ৱিন্নং বহূনং ভিক্খুপৰিসায ভিক্খুনিউপাসকউপাসিকাপৰিসাযপি তিত্থিযানম্পি দেসেন্তা সক্কচ্চমেৱ দেসেন্তি. চতস্সো পন পৰিসা সদ্দহিত্ৱা ওকপ্পেত্ৱা সুণন্তীতি তাসং দেসনা সক্কচ্চদেসনা নাম জাতা.