২. তালপুটসুত্তৱণ্ণনা

৩৫৪. দুতিযে তালপুটোতি এৱংনামকো. তস্স কিৰ বন্ধনা পমুত্ততালপক্কৱণ্ণো ৱিয মুখৱণ্ণো ৱিপ্পসন্নো অহোসি, তেনস্স তালপুটোতি নামং অকংসু. স্ৱাযং অভিনীহাৰসম্পন্নো পচ্ছিমভৱিকপুগ্গলো. যস্মা পন পটিসন্ধি নাম অনিযতা আকাসে খিত্তদণ্ডসদিসা, তস্মা এস নটকুলে নিব্বত্তি. ৱুড্ঢিপ্পত্তো পন নটসিপ্পে অগ্গো হুত্ৱা সকলজম্বুদীপে পাকটো জাতো. তস্স পঞ্চ সকটসতানি পঞ্চ মাতুগামসতানি পৰিৱাৰো, ভৰিযাযপিস্স তাৱতকাৱাতি মাতুগামসহস্সেন চেৱ সকটসহস্সেন চ সদ্ধিং যং যং নগৰং ৱা নিগমং ৱা পৱিসতি, তত্থস্স পুৰেতৰমেৱ সতসহস্সং দেন্তি. সমজ্জৱেসং গণ্হিত্ৱা পন মাতুগামসহস্সেন সদ্ধিং কীড়ং কৰোন্তস্স যং হত্থূপগপাদূপগাদিআভৰণজাতং খিপন্তি, তস্স পৰিযন্তো নত্থি. সো তংদিৱসং মাতুগামসহস্সপৰিৱাৰিতো ৰাজগহে কীড়ং কত্ৱা পৰিপক্কঞাণত্তা সপৰিৱাৰোৱ যেন ভগৱা তেনুপসঙ্কমি.

সচ্চালিকেনাতি সচ্চেন চ অলিকেন চ. তিট্ঠতেতন্তি তিট্ঠতু এতং. ৰজনীযাতি ৰাগপ্পচ্চযা মুখতো পঞ্চৱণ্ণসুত্তনীহৰণৱাতৱুট্ঠিদস্সনাদযো অঞ্ঞে চ কামস্সাদসংযুত্তাকাৰদস্সনকা অভিনযা. ভিয্যোসোমত্তাযাতি অধিকপ্পমাণত্তায. দোসনীযাতি দোসপ্পচ্চযা হত্থপাদচ্ছেদাদিদস্সনাকাৰা. মোহনীযাতি মোহপ্পচ্চযা উদকং গহেত্ৱা তেলকৰণং, তেলং গহেত্ৱা উদককৰণন্তি এৱমাদযো মাযাপভেদা.

পহাসো নাম নিৰযোতি ৱিসুং পহাসনামকো নিৰযো নাম নত্থি, অৱীচিস্সেৱ পন একস্মিং কোট্ঠাসে নচ্চন্তা ৱিয গাযন্তা ৱিয চ নটৱেসং গহেত্ৱাৱ পচ্চন্তি, তং সন্ধাযেতং ৱুত্তং. নাহং, ভন্তে, এতং ৰোদামীতি অহং, ভন্তে, এতং ভগৱতো ব্যাকৰণং ন ৰোদামীতি এৱং সকম্মকৱসেনেত্থ অত্থো ৱেদিতব্বো, ন অস্সুৱিমোচনমত্তেন. ‘‘মতং ৱা অম্মৰোদন্তী’’তিআদযো চেত্থ অঞ্ঞেপি ৱোহাৰা ৱেদিতব্বা.