১২. ৰাসিযসুত্তৱণ্ণনা

৩৬৪. দ্ৱাদসমে ৰাসিযোতি ৰাসিং কত্ৱা পঞ্হস্স পুচ্ছিতত্তা ৰাসিযোতি এৱং ধম্মসঙ্গাহকত্থেৰেহি গহিতনামো. তপস্সিন্তি তপনিস্সিতকং. লূখজীৱিন্তি লূখজীৱিকং. অন্তাতি কোট্ঠাসা. গামোতি গাম্মো. গম্মোতিপি পাঠো, গামৱাসীনং ধম্মোতি অত্থো. অত্তকিলমথানুযোগোতি অত্তনো কিলমথানুযোগো, সৰীৰদুক্খকৰণন্তি অত্থো.

কস্মা পনেত্থ কামসুখল্লিকানুযোগো গহিতো, কস্মা অত্তকিলমথানুযোগো, কস্মা মজ্ঝিমা পটিপদাতি? কামসুখল্লিকানুযোগো তাৱ কামভোগীনং দস্সনত্থং গহিতো, অত্তকিলমথানুযোগো তপনিস্সিতকানং, মজ্ঝিমা পটিপদা তিণ্ণং নিজ্জৰৱত্থূনং দস্সনত্থং গহিতা. কিং এতেসং দস্সনে পযোজনন্তি? ইমে দ্ৱে অন্তে পহায তথাগতো মজ্ঝিমায পটিপদায সম্মাসম্বোধিং পত্তো. সো কামভোগিনোপি ন সব্বে গৰহতি ন পসংসতি, তপনিস্সিতকেপি ন সব্বে গৰহতি ন পসংসতি, গৰহিতব্বযুত্তকেযেৱ গৰহতি, পসংসিতব্বযুত্তকে পসংসতীতি ইমস্সত্থস্স পকাসনং এতেসং দস্সনে পযোজনন্তি ৱেদিতব্বং.

ইদানি তমত্থং পকাসেন্তো তযো খোমে, গামণি, কামভোগিনোতিআদিমাহ. তত্থ সাহসেনাতি সাহসিককম্মেন. ন সংৱিভজতীতি মিত্তসহাযসন্দিট্ঠসম্ভত্তানং সংৱিভাগং ন কৰোতি. ন পুঞ্ঞানি কৰোতীতি অনাগতভৱস্স পচ্চযভূতানি পুঞ্ঞানি ন কৰোতি. ধম্মাধম্মেনাতি ধম্মেন চ অধম্মেন চ. ঠানেহীতি কাৰণেহি. সচ্ছিকৰোতীতি কথং অত্তানং আতাপেন্তো পৰিতাপেন্তো সচ্ছিকৰোতি? চতুৰঙ্গৱীৰিযৱসেন চ ধুতঙ্গৱসেন চ. তিস্সো সন্দিট্ঠিকা নিজ্জৰাতি এত্থ একোপি মগ্গো তিণ্ণং কিলেসানং নিজ্জৰণতায তিস্সো নিজ্জৰাতি ৱুত্তোতি.