১. খেমাসুত্তৱণ্ণনা

৪১০. অব্যাকতসংযুত্তস্স পঠমে খেমাতি গিহিকালে বিম্বিসাৰস্স উপাসিকা সদ্ধাপব্বজিতা মহাথেৰী ‘‘এতদগ্গং, ভিক্খৱে, মম সাৱিকানং ভিক্খুনীনং মহাপঞ্ঞানং যদিদং খেমা’’তি এৱং ভগৱতা মহাপঞ্ঞতায এতদগ্গে ঠপিতা. পণ্ডিতাতি পণ্ডিচ্চেন সমন্নাগতা. ৱিযত্তাতি ৱেয্যত্তিযেন সমন্নাগতা. মেধাৱিনীতি মেধায পঞ্ঞায সমন্নাগতা. বহুস্সুতাতি পৰিযত্তিবাহুসচ্চেনপি পটিৱেধবাহুসচ্চেনপি সমন্নাগতা.

গণকোতি অচ্ছিদ্দকগণনায কুসলো. মুদ্দিকোতি অঙ্গুলিমুদ্দায গণনায কুসলো. সঙ্খাযকোতি পিণ্ডগণনায কুসলো. গম্ভীৰোতি চতুৰাসীতিযোজনসহস্সগম্ভীৰো. অপ্পমেয্যোতি আড়্হকগণনায অপ্পমেয্যো. দুপ্পৰিযোগাহোতি আড়্হকগণনায পমাণগহণত্থং দুৰোগাহো. যেন ৰূপেন তথাগতন্তি যেন ৰূপেন দীঘো ৰস্সো সামো ওদাতোতি সত্তসঙ্খাতং তথাগতং পঞ্ঞপেয্য. তং ৰূপং তথাগতস্স পহীনন্তি তং ৱুত্তপ্পকাৰৰূপং সমুদযপ্পহানেন সব্বঞ্ঞুতথাগতস্স পহীনং. ৰূপসঙ্খায ৱিমুত্তোতি আযতিং ৰূপস্স অনুপ্পত্তিযা ৰূপাৰূপকোট্ঠাসেনপি এৱৰূপো নাম ভৱিস্সতীতি ৱোহাৰস্সপি পটিপস্সদ্ধত্তা ৰূপপণ্ণত্তিযাপি ৱিমুত্তো. গম্ভীৰোতি অজ্ঝাসয গম্ভীৰতায চ গুণগম্ভীৰতায চ গম্ভীৰো. তস্স এৱং গুণগম্ভীৰস্স সতো সব্বঞ্ঞুতথাগতস্স যং উপাদায সত্তসঙ্খাতো তথাগতোতি পঞ্ঞত্তি হোতি, তদভাৱেন তস্সা পঞ্ঞত্তিযা অভাৱং পস্সন্তস্স অযং সত্তসঙ্খাতো হোতি তথাগতো পৰং মৰণাতি ইদং ৱচনং ন উপেতি ন যুজ্জতি, ন হোতি তথাগতো পৰং মৰণাতিআদিৱচনম্পি ন উপেতি ন যুজ্জতীতি অত্থো.

সংসন্দিস্সতীতি একং ভৱিস্সতি. সমেস্সতীতি নিৰন্তৰং ভৱিস্সতি. ন ৱিৰোধযিস্সতীতি ন ৱিৰুদ্ধং পদং ভৱিস্সতি. অগ্গপদস্মিন্তি দেসনায. দেসনা হি ইধ অগ্গপদন্তি অধিপ্পেতা.