২. ৰাধসংযুত্তং

১. পঠমৱগ্গো

১. মাৰসুত্তৱণ্ণনা

১৬০. ৰাধসংযুত্তস্স পঠমে মাৰো ৱা অস্সাতি মৰণং ৱা ভৱেয্য. মাৰেতা ৱাতি মাৰেতব্বো ৱা. যো ৱা পন মীযতীতি যো ৱা পন মৰতি. নিব্বিদত্থন্তি নিব্বিদাঞাণত্থং. নিব্বানত্থাতি ফলৱিমুত্তি নামেসা অনুপাদানিব্বানত্থাতি অত্থো. অচ্চযাসীতি অতিক্কন্তোসি. নিব্বানোগধন্তি নিব্বানে পতিট্ঠিতং. ইদং মগ্গব্ৰহ্মচৰিযং নাম নিব্বানব্ভন্তৰে ৱুস্সতি, ন নিব্বানং অতিক্কমিত্ৱাতি অত্থো. নিব্বানপৰিযোসানন্তি নিব্বানং অস্স পৰিযোসানং, নিপ্ফত্তি নিট্ঠাতি অত্থো. পঠমং.

২-১০. সত্তসুত্তাদিৱণ্ণনা

১৬১-১৬৯. দুতিযে সত্তো সত্তোতি লগ্গপুচ্ছা. তত্ৰ সত্তো তত্ৰ ৱিসত্তোতি তত্ৰ লগ্গো তত্ৰ ৱিলগ্গো. পংস্ৱাগাৰকেহীতি পংসুঘৰকেহি. কেড়াযন্তীতি কীড়ন্তি. ধনাযন্তীতি ধনং ৱিয মঞ্ঞন্তি. মমাযন্তীতি ‘‘মম ইদং, মম ইদ’’ন্তি মমত্তং কৰোন্তি, অঞ্ঞস্স ফুসিতুম্পি ন দেন্তি. ৱিকীড়নিযং কৰোন্তীতি ‘‘নিট্ঠিতা কীড়া’’তি তে ভিন্দমানা কীড়াৱিগমং কৰোন্তি. ততিযে ভৱনেত্তীতি ভৱৰজ্জু. চতুত্থং উত্তানমেৱ. পঞ্চমাদীসু চতূসু চত্তাৰি সচ্চানি কথিতানি, দ্ৱীসু কিলেসপ্পহানন্তি. দুতিযাদীনি.

পঠমো ৱগ্গো.

২. দুতিযৱগ্গো

১-১২. মাৰসুত্তাদিৱণ্ণনা

১৭০-১৮১. দুতিযৱগ্গস্স পঠমে মাৰো, মাৰোতি মৰণং পুচ্ছতি. যস্মা পন ৰূপাদিৱিনিমুত্তং মৰণং নাম নত্থি, তেনস্স ভগৱা ৰূপং খো, ৰাধ, মাৰোতিআদিমাহ. দুতিযে মাৰধম্মোতি মৰণধম্মো. এতেনুপাযেন সব্বত্থ অত্থো ৱেদিতব্বোতি.

দুতিযো ৱগ্গো.

৩-৪. আযাচনৱগ্গাদি

১-১১. মাৰাদিসুত্তএকাদসকৱণ্ণনা

১৮২-২০৫. ততো পৰং উত্তানত্থমেৱ. অযঞ্হি ৰাধত্থেৰো পটিভানিযত্থেৰো নাম. তথাগতস্স ইমং থেৰং দিস্ৱা সুখুমং কাৰণং উপট্ঠাতি. তেনস্স ভগৱা নানানযেহি ধম্মং দেসেতি. এৱং ইমস্মিং ৰাধসংযুত্তে আদিতো দ্ৱে ৱগ্গা পুচ্ছাৱসেন দেসিতা, ততিযো আযাচনেন, চতুত্থো উপনিসিন্নককথাৱসেন. সকলম্পি পনেতং ৰাধসংযুত্তং থেৰস্স ৱিমুত্তিপৰিপাচনীযধম্মৱসেনেৱ গহিতন্তি ৱেদিতব্বং.

ৰাধসংযুত্তৱণ্ণনা নিট্ঠিতা.