৫. ওকিলিনীসুত্তৱণ্ণনা

২১৬. ওকিলিনীৱত্থুস্মিং উপ্পক্কং ওকিলিনিং ওকিৰিনিন্তি সা কিৰ অঙ্গাৰচিতকে নিপন্না ৱিপ্ফন্দমানা ৱিপৰিৱত্তমানা পচ্চতি, তস্মা উপ্পক্কা চেৱ হোতি উণ্হেন অগ্গিনা পক্কসৰীৰা, ওকিলিনী চ কিলিন্নসৰীৰা, বিন্দূনিস্সা সৰীৰতো পগ্ঘৰন্তি, ওকিৰিনী চ অঙ্গাৰসম্পৰিকিণ্ণা. তস্সা হি হেট্ঠতোপি কিংসুকপুপ্ফৱণ্ণা অঙ্গাৰা, উভযপস্সেসুপি, আকাসতোপিস্সা উপৰি পতন্তি. তেন ৱুত্তং – ‘‘উপ্পক্কং ওকিলিনিং ওকিৰিনি’’ন্তি. সা ইস্সাপকতা সপত্তিং অঙ্গাৰকটাহেন ওকিৰীতি তস্স কিৰ ৰঞ্ঞো একা নাটকিনী অঙ্গাৰকটাহং সমীপে ঠপেত্ৱা গত্ততো উদকং পুঞ্ছতি, পাণিনা চ সেদং কৰোতি. ৰাজাপি তায সদ্ধিং কথঞ্চ কৰোতি, পৰিতুট্ঠাকাৰঞ্চ দস্সেতি. অগ্গমহেসী তং অসহমানা ইস্সাপকতা হুত্ৱা অচিৰপক্কন্তস্স ৰঞ্ঞো তং অঙ্গাৰকটাহং গহেত্ৱা তস্সা উপৰি অঙ্গাৰে ওকিৰি. সা তং কম্মং কত্ৱা তাদিসংযেৱ ৱিপাকং পচ্চনুভৱিতুং পেতলোকে নিব্বত্তা. পঞ্চমং.