১. নখসিখাসুত্তৱণ্ণনা

৭৪. অভিসমযসংযুত্তস্স পঠমে নখসিখাযন্তি মংসট্ঠানেন ৱিমুত্তে নখগ্গে. নখসিখা চ নাম লোকিযানং মহতীপি হোতি, সত্থু পন ৰত্তুপ্পলপত্তকোটি ৱিয সুখুমা. কথং পনেত্থ পংসু পতিট্ঠিতোতি? অধিট্ঠানবলেন. ভগৱতা হি অত্থং ঞাপেতুকামেন অধিট্ঠানবলেন তত্থ পতিট্ঠাপিতো. সতিমং কলন্তি মহাপথৱিযা পংসুং সতকোট্ঠাসে কত্ৱা ততো এককোট্ঠাসং. পৰতোপি এসেৱ নযো. অভিসমেতাৱিনোতি পঞ্ঞায অৰিযসচ্চানি অভিসমেত্ৱা ঠিতস্স. পুৰিমং দুক্খক্খন্ধং পৰিক্খীণং পৰিযাদিণ্ণং উপনিধাযাতি এতদেৱ বহুতৰং দুক্খং, যদিদং পৰিক্খীণন্তি এৱং পঠমং ৱুত্তং দুক্খক্খন্ধং উপনিধায, ঞাণেন তং তস্স সন্তিকে ঠপেত্ৱা উপপৰিক্খিযমানেতি অত্থো. কতমং পনেত্থ পুৰিমদুক্খং নাম? যং পৰিক্খীণং. কতমং পন পৰিক্খীণং? যং পঠমমগ্গস্স অভাৱিতত্তা উপ্পজ্জেয্য. কতমং পন উপনিধায? যং সত্তসু অত্তভাৱেসু অপাযে অট্ঠমঞ্চ পটিসন্ধিং আদিং কত্ৱা যত্থ কত্থচি উপ্পজ্জেয্য, সব্বং তং পৰিক্খীণন্তি ৱেদিতব্বং. সত্তক্খত্তুন্তি সত্ত ৱাৰে, সত্তসু অত্তভাৱেসূতি অত্থো. পৰমতাতি ইদমস্স পৰং পমাণন্তি দস্সেতি. মহত্থিযোতি মহতো অত্থস্স নিপ্ফাদকো. পঠমং.