১১. সক্কসংযুত্তং

১. পঠমৱগ্গো

১. সুৱীৰসুত্তৱণ্ণনা

২৪৭. সক্কসংযুত্তস্স পঠমে অভিযংসূতি কদা অভিযংসু? যদা বলৱন্তো অহেসুং, তদা. তত্ৰাযং অনুপুব্বিকথা – সক্কো কিৰ মগধৰট্ঠে মচলগামকে মঘো নাম মাণৱো হুত্ৱা তেত্তিংস পুৰিসে গহেত্ৱা কল্যাণকম্মং কৰোন্তো সত্ত ৱতপদানি পূৰেত্ৱা তত্থ কালঙ্কতো দেৱলোকে নিব্বত্তি. তং বলৱকম্মানুভাৱেন সপৰিসং সেসদেৱতা দসহি ঠানেহি অধিগণ্হন্তং দিস্ৱা ‘‘আগন্তুকদেৱপুত্তা আগতা’’তি নেৱাসিকা গন্ধপানং সজ্জযিংসু. সক্কো সকপৰিসায সঞ্ঞং অদাসি – ‘‘মাৰিসা মা গন্ধপানং পিৱিত্থ, পিৱনাকাৰমত্তমেৱ দস্সেথা’’তি. তে তত্থ অকংসু. নেৱাসিকদেৱতা সুৱণ্ণসৰকেহি উপনীতং গন্ধপানং যাৱদত্থং পিৱিত্ৱা মত্তা তত্থ তত্থ সুৱণ্ণপথৱিযং পতিত্ৱা সযিংসু. সক্কো ‘‘গণ্হথ পুত্তহতায পুত্তে’’তি তে পাদেসু গহেত্ৱা সিনেৰুপাদে খিপাপেসি. সক্কস্স পুঞ্ঞতেজেন তদনুৱত্তকাপি সব্বে তত্থেৱ পতিংসু. তে সিনেৰুৱেমজ্ঝকালে সঞ্ঞং লভিত্ৱা, ‘‘তাতা ন সুৰং পিৱিম্হ, ন সুৰং পিৱিম্হা’’তি আহংসু. ততো পট্ঠায অসুৰা নাম জাতা. অথ নেসং কম্মপচ্চযউতুসমুট্ঠানং সিনেৰুস্স হেট্ঠিমতলে দসযোজনসহস্সং অসুৰভৱনং নিব্বত্তি. সক্কো তেসং নিৱত্তেত্ৱা অনাগমনত্থায আৰক্খং ঠপেসি, যং সন্ধায ৱুত্তং –

‘‘অন্তৰা দ্ৱিন্নং অযুজ্ঝপুৰানং,

পঞ্চৱিধা ঠপিতা অভিৰক্খা;

উদকং কৰোটি-পযস্স চ হাৰী,

মদনযুতা চতুৰো চ মহত্থা’’তি.

দ্ৱে নগৰানি হি যুদ্ধেন গহেতুং অসক্কুণেয্যতায অযুজ্ঝপুৰানি নাম জাতানি দেৱনগৰঞ্চ অসুৰনগৰঞ্চ. যদা হি অসুৰা বলৱন্তো হোন্তি, অথ দেৱেহি পলাযিত্ৱা দেৱনগৰং পৱিসিত্ৱা দ্ৱাৰে পিদহিতে অসুৰানং সতসহস্সম্পি কিঞ্চি কাতুং ন সক্কোতি. যদা দেৱা বলৱন্তো হোন্তি, অথাসুৰেহি পলাযিত্ৱা অসুৰনগৰস্স দ্ৱাৰে পিদহিতে সক্কানং সতসহস্সম্পি কিঞ্চি কাতুং ন সক্কোতি. ইতি ইমানি দ্ৱে নগৰানি অযুজ্ঝপুৰানি নাম. নেসং অন্তৰা এতেসু উদকাদীসু পঞ্চসু ঠানেসু সক্কেন আৰক্খা ঠপিতা. তত্থ উদকসদ্দেন নাগা গহিতা. তে হি উদকে বলৱন্তো হোন্তি. তস্মা সিনেৰুস্স পঠমালিন্দে তেসং আৰক্খা. কৰোটিসদ্দেন সুপণ্ণা গহিতা. তেসং কিৰ কৰোটি নাম পানভোজনং, তেন তং নামং লভিংসু. দুতিযালিন্দে তেসং আৰক্খা. পযস্সহাৰীসদ্দেন কুম্ভণ্ডা গহিতা. দানৱৰক্খসা কিৰ তে. ততিযালিন্দে তেসং আৰক্খা. মদনযুতসদ্দেন যক্খা গহিতা. ৱিসমচাৰিনো কিৰতে যুজ্ঝসোণ্ডা. চতুত্থালিন্দে তেসং আৰক্খা. চতুৰো চ মহন্তাতি চত্তাৰো মহাৰাজানো ৱুত্তা. পঞ্চমালিন্দে তেসং আৰক্খা. তস্মা যদি অসুৰা কুপিতাৱিলচিত্তা দেৱপুৰং উপযন্তি যুদ্ধেসূ, যং গিৰিনো পঠমং পৰিভণ্ডং, তং উৰগা পটিবাহন্তি এৱং সেসেসু সেসা.

তে পন অসুৰা আযুৱণ্ণৰসইস্সৰিযসম্পত্তীহি তাৱতিংসসদিসাৱ. তস্মা অন্তৰা অত্তানং অজানিত্ৱা পাটলিযা পুপ্ফিতায, ‘‘ন ইদং দেৱনগৰং, তত্থ পাৰিচ্ছত্তকো পুপ্ফতি, ইধ পন চিত্তপাটলী, জৰসক্কেনাম্হাকং সুৰং পাযেত্ৱা ৱঞ্চিতা, দেৱনগৰঞ্চ নো গহিতং, গচ্ছাম তেন সদ্ধিং যুজ্ঝিস্সামা’’তি হত্থিঅস্সৰথে আৰুয্হ সুৱণ্ণৰজতমণিফলকানি গহেত্ৱা, যুদ্ধসজ্জা হুত্ৱা, অসুৰভেৰিযো ৱাদেন্তা মহাসমুদ্দে উদকং দ্ৱিধা ভেত্ৱা উট্ঠহন্তি. তে দেৱে ৱুট্ঠে ৱম্মিকমক্খিকা ৱম্মিকং ৱিয সিনেৰুং অভিৰুহিতু আৰভন্তি. অথ নেসং পঠমং নাগেহি সদ্ধিং যুদ্ধং হোতি. তস্মিং খো পন যুদ্ধে ন কস্সচি ছৱি ৱা চম্মং ৱা ছিজ্জতি, ন লোহিতং উপ্পজ্জতি, কেৱলং কুমাৰকানং দাৰুমেণ্ডকযুদ্ধং ৱিয অঞ্ঞমঞ্ঞং সন্তাসনমত্তমেৱ হোতি. কোটিসতাপি কোটিসহস্সাপি নাগা তেহি সদ্ধিং যুজ্ঝিত্ৱা তে অসুৰপুৰংযেৱ পৱেসেত্ৱা নিৱত্তন্তি.

যদা পন অসুৰা বলৱন্তো হোন্তি, অথ নাগা ওসক্কিত্ৱা দুতিযে আলিন্দে সুপণ্ণেহি সদ্ধিং একতোৱ হুত্ৱা যুজ্ঝন্তি. এস নযো সুপণ্ণাদীসূপি. যদা পন তানি পঞ্চপি ঠানানি অসুৰা মদ্দন্তি, তদা একতো সম্পিণ্ডিতানিপি পঞ্চ বলানি ওসক্কন্তি. অথ চত্তাৰো মহাৰাজানো গন্ত্ৱা সক্কস্স তং পৱত্তিং আৰোচেন্তি. সক্কো তেসং ৱচনং সুত্ৱা দিযড্ঢযোজনসতিকং ৱেজযন্তৰথং আৰুয্হ সযং ৱা নিক্খমতি, একং ৱা পুত্তং পেসেতি. ইমস্মিং পন কালে পুত্তং পেসেতুকামো, তাত সুৱীৰাতিআদিমাহ.

এৱং ভদ্দন্তৱাতি খোতি এৱং হোতু ভদ্দং তৱ ইতি খো. পমাদং আপাদেসীতি পমাদং অকাসি. অচ্ছৰাসঙ্ঘপৰিৱুতো সট্ঠিযোজনং ৱিত্থাৰেন সুৱণ্ণমহাৱীথিং ওতৰিত্ৱা নক্খত্তং কীড়ন্তো নন্দনৱনাদীসু ৱিচৰতীতি অত্থো.

অনুট্ঠহন্তি অনুট্ঠহন্তো. অৱাযামন্তি অৱাযমন্তো. অলস্ৱস্সাতি অলসো অস্স. ন চ কিচ্চানি কাৰযেতি কিঞ্চি কিচ্চং নাম ন কৰেয্য. সব্বকামসমিদ্ধস্সাতি সব্বকামেহি সমিদ্ধো অস্স. তং মে, সক্ক, ৱৰং দিসাতি, সক্ক দেৱসেট্ঠ, তং মে ৱৰং উত্তমং ঠানং ওকাসং দিসং আচিক্খ কথেহীতি ৱদতি. নিব্বানস্স হি সো মগ্গোতি কম্মং অকত্ৱা জীৱিতট্ঠানং নাম নিব্বানস্স মগ্গো. পঠমং.

২. সুসীমসুত্তৱণ্ণনা

২৪৮. দুতিযে সুসীমন্তি অত্তনো পুত্তসহস্সস্স অন্তৰে এৱংনামকং একং পুত্তমেৱ. দুতিযং.

৩. ধজগ্গসুত্তৱণ্ণনা

২৪৯. ততিযে সমুপব্যূড়্হোতি সম্পিণ্ডিতো ৰাসিভূতো. ধজগ্গংউল্লোকেয্যথাতি সক্কস্স কিৰ দিযড্ঢযোজনসতাযামো ৰথো. তস্স হি পচ্ছিমন্তো পণ্ণাসযোজনো, মজ্ঝে ৰথপঞ্জৰো পণ্ণাসযোজনো, ৰথসন্ধিতো যাৱ ৰথসীসা পণ্ণাসযোজনানি. তদেৱ পমাণং দিগুণং কত্ৱা তিযোজনসতাযামোতিপি ৱদন্তিযেৱ. তস্মিং যোজনিকপল্লঙ্কো অত্থতো, তিযোজনিকং সেতচ্ছত্তং মত্থকে ঠপিতং, একস্মিংযেৱ যুগে সহস্সআজঞ্ঞা যুত্তা, সেসালঙ্কাৰস্স পমাণং নত্থি. ধজো পনস্স অড্ঢতিযানি যোজনসতানি উগ্গতো, যস্স ৱাতাহতস্স পঞ্চঙ্গিকতূৰিযস্সেৱ সদ্দো নিচ্ছৰতি, তং উল্লোকেয্যাথাতি ৱদতি. কস্মা? তং পস্সন্তানঞ্হি ৰাজা নো আগন্ত্ৱা পৰিসপৰিযন্তে নিখাতথম্ভো ৱিয ঠিতো, কস্স মযং ভাযামাতি ভযং ন হোতি. পজাপতিস্সাতি সো কিৰ সক্কেন সমানৱণ্ণো সমানাযুকো দুতিযং আসনং লভতি. তথা ৱৰুণো ঈসানো চ. ৱৰুণো পন ততিযং আসনং লভতি, ঈসানো চতুত্থং. পলাযীতি অসুৰেহি পৰাজিতো তস্মিং ৰথে ঠিতো অপ্পমত্তকম্পি ৰজধজং দিস্ৱা পলাযনধম্মো.

ইতিপি সো ভগৱাতিআদীনি ৱিসুদ্ধিমগ্গে ৱিত্থাৰিতানেৱ. ইদমৱোচাতি ইদং ধজগ্গপৰিত্তং নাম ভগৱা অৱোচ, যস্স আণাখেত্তে কোটিসতসহস্সচক্কৱাড়ে আনুভাৱো ৱত্ততি. ইদং আৱজ্জেত্ৱা হি যক্খভযচোৰভযাদীহি দুক্খেহি মুত্তানং অন্তো নত্থি. তিট্ঠতু অঞ্ঞদুক্খৱূপসমো, ইদং আৱজ্জমানো হি পসন্নচিত্তো আকাসেপি পতিট্ঠং লভতি.

তত্ৰিদং ৱত্থু – দীঘৱাপিচেতিযম্হি কিৰ সুধাকম্মে কযিৰমানে একো দহৰো মুদ্ধৱেদিকাপাদতো পতিত্ৱা চেতিযকুচ্ছিযা ভস্সতি. হেট্ঠা ঠিতো ভিক্খুসঙ্ঘো ‘‘ধজগ্গপৰিত্তং, আৱুসো, আৱজ্জাহী’’তি আহ. সো মৰণভযেন তজ্জিতো ‘‘ধজগ্গপৰিত্তং মং ৰক্খতূ’’তি আহ. তাৱদেৱস্স চেতিযকুচ্ছিতো দ্ৱে ইট্ঠকা নিক্খমিত্ৱা সোপানং হুত্ৱা অট্ঠংসু, উপৰিট্ঠিতো ৱল্লিনিস্সেণিং ওতাৰেসুং. তস্মিং নিস্সেণিযং ঠিতে ইট্ঠকা যথাট্ঠানেযেৱ অট্ঠংসু. ততিযং.

৪. ৱেপচিত্তিসুত্তৱণ্ণনা

২৫০. চতুত্থে ৱেপচিত্তীতি সো কিৰ অসুৰানং সব্বজেট্ঠকো. যেনাতি নিপাতমত্তং নন্তি চ. কণ্ঠপঞ্চমেহীতি দ্ৱীসু হত্থেসু পাদেসু কণ্ঠে চাতি এৱং পঞ্চহি বন্ধনেহি. তানি পন নড়িনসুত্তং ৱিয মক্কটকসুত্তং ৱিয চ চক্খুস্সাপাথং আগচ্ছন্তি, ইৰিযাপথং ৰুজ্ঝন্তি. তেহি পন চিত্তেনেৱ বজ্ঝতি, চিত্তেনেৱ মুচ্চতি. অক্কোসতীতি চোৰোসি বালোসি মূড়্হোসি থেনোসি ওট্ঠোসি গোণোসি গদ্ৰভোসি নেৰযিকোসি তিৰচ্ছানগতোসি, নত্থি তুয্হং সুগতি, দুগ্গতিযেৱ তুয্হং পাটিকঙ্খাতি ইমেহি দসহি অক্কোসৱত্থূহি অক্কোসতি. পৰিভাসতীতি, জৰসক্ক, ন ত্ৱং সব্বকালং জিনিস্সসি, যদা অসুৰানং জযো ভৱিস্সতি, তদা তম্পি এৱং বন্ধিত্ৱা অসুৰভৱনস্স দ্ৱাৰে নিপজ্জাপেত্ৱা পোথাপেস্সামীতি আদীনি ৱত্ৱা তজ্জেতি. সক্কো ৱিজিতৱিজযো ন তং মনসি কৰোতি, মহাপটিগ্গহণং পনস্স মত্থকে ৱিধুনন্তো সুধম্মদেৱসভং পৱিসতি চেৱ নিক্খমতি চ. অজ্ঝভাসীতি ‘‘কিং নু খো এস সক্কো ইমানি ফৰুসৱচনানি ভযেন তিতিক্খতি, উদাহু অধিৱাসনখন্তিযা সমন্নাগতত্তা’’তি? ৱীমংসন্তো অভাসি.

দুব্বল্যা নোতি দুব্বলভাৱেন নু. পটিসংযুজেতি পটিসংযুজেয্য পটিপ্ফৰেয্য. পভিজ্জেয্যুন্তি ৱিৰজ্জেয্যুং. পকুজ্ঝেয্যুন্তিপি পাঠো. পৰন্তি পচ্চত্থিকং. যো সতো উপসম্মতীতি যো সতিমা হুত্ৱা উপসম্মতি, তস্স উপসমংযেৱাহং বালস্স পটিসেধনং মঞ্ঞেতি অত্থো. যদা নং মঞ্ঞতীতি যস্মা তং মঞ্ঞতি. অজ্ঝাৰুহতীতি অজ্ঝোত্থৰতি. গোৱ ভিয্যো পলাযিনন্তি যথা গোযুদ্ধে তাৱদেৱ দ্ৱে গাৱো যুজ্ঝন্তে গোগণো ওলোকেন্তো তিট্ঠতি, যদা পন একো পলাযতি, অথ নং পলাযন্তং সব্বো গোগণো ভিয্যো অজ্ঝোত্থৰতি. এৱং দুম্মেধো খমন্তং ভিয্যো অজ্ঝোত্থৰতীতি অত্থো.

সদত্থপৰমাতি সকত্থপৰমা. খন্ত্যা ভিয্যো ন ৱিজ্জতীতি তেসু সকঅত্থপৰমেসু অত্থেসু খন্তিতো উত্তৰিতৰো অঞ্ঞো অত্থো ন ৱিজ্জতি. তমাহু পৰমং খন্তিন্তি যো বলৱা তিতিক্খতি, তস্স তং খন্তিং পৰমং আহু. বালবলং নাম অঞ্ঞাণবলং. তং যস্স বলং, অবলমেৱ তং বলন্তি আহু কথেন্তীতি দীপেতি. ধম্মগুত্তস্সাতি ধম্মেন ৰক্খিতস্স, ধম্মং ৱা ৰক্খন্তস্স. পটিৱত্তাতি পটিপ্ফৰিত্ৱা ৱত্তা, পটিপ্ফৰিত্ৱা ৱা বালবলন্তি ৱদেয্যাপি, ধম্মট্ঠং পন চালেতুং সমত্থো নাম নত্থি. তস্সেৱ তেন পাপিযোতি তেন কোধেন তস্সেৱ পুগ্গলস্স পাপং. কতৰস্স? যো কুদ্ধং পটিকুজ্ঝতি. তিকিচ্ছন্তানন্তি একৱচনে বহুৱচনং, তিকিচ্ছন্তন্তি অত্থো. জনা মঞ্ঞন্তীতি এৱৰূপং অত্তনো চ পৰস্স চাতি উভিন্নং অত্থং তিকিচ্ছন্তং নিপ্ফাদেন্তং পুগ্গলং ‘‘অন্ধবালো অয’’ন্তি অন্ধবালপুথুজ্জনাৱ এৱং মঞ্ঞন্তি. ধম্মস্স অকোৱিদাতি চতুসচ্চধম্মে অছেকা. ইধাতি ইমস্মিং সাসনে. খোতি নিপাতমত্তং. চতুত্থং.

৫. সুভাসিতজযসুত্তৱণ্ণনা

২৫১. পঞ্চমে অসুৰিন্দং এতদৱোচাতি ছেকতায এতং অৱোচ. এৱং কিৰস্স অহোসি ‘‘পৰস্স নাম গাহং মোচেত্ৱা পঠমং ৱত্তুং গৰু. পৰস্স ৱচনং অনুগন্ত্ৱা পন পচ্ছা সুখং ৱত্তু’’ন্তি. পুব্বদেৱাতি দেৱলোকে চিৰনিৱাসিনো পুব্বসামিকা, তুম্হাকং তাৱ পৱেণিআগতং ভণথাতি. অদণ্ডাৱচৰাতি দণ্ডাৱচৰণৰহিতা, দণ্ডং ৱা সত্থং ৱা গহেতব্বন্তি এৱমেত্থ নত্থীতি অত্থো. পঞ্চমং.

৬. কুলাৱকসুত্তৱণ্ণনা

২৫২. ছট্ঠে অজ্ঝভাসীতি তস্স কিৰ সিম্বলিৱনাভিমুখস্স জাতস্স ৰথসদ্দো চ আজানীযসদ্দো ধজসদ্দো চ সমন্তা অসনিপাতসদ্দো ৱিয অহোসি. তং সুত্ৱা সিম্বলিৱনে বলৱসুপণ্ণা পলাযিংসু, জৰাজিণ্ণা চেৱ ৰোগদুব্বলা চ অসঞ্জাতপক্খপোতকা চ পলাযিতুং অসক্কোন্তা, মৰণভযেন তজ্জিতা একপ্পহাৰেনেৱ মহাৱিৰৱং ৱিৰৱিংসু. সক্কো তং সুত্ৱা ‘‘কস্স সদ্দো, তাতা’’তি? মাতলিং পুচ্ছি. ৰথসদ্দং, তে দেৱ, সুত্ৱা সুপণ্ণা পলাযিতুং অসক্কোন্তা ৱিৰৱন্তীতি. তং সুত্ৱা কৰুণাসমাৱজ্জিতহদযো অভাসি. ঈসামুখেনাতি ৰথস্স ঈসামুখেন. যথা কুলাৱকে ঈসামুখং ন সঞ্চুণ্ণেতি, এৱং ইমিনা ঈসামুখেন তে পৰিৱজ্জয. সো হি ৰথো পুঞ্ঞপচ্চযনিব্বত্তো চক্কৱাড়পব্বতেপি সিনেৰুম্হিপি সম্মুখীভূতে ৱিনিৱিজ্ঝিত্ৱাৱ গচ্ছতি ন সজ্জতি, আকাসগতসদিসেনেৱ গচ্ছতি. সচে তেন সিম্বলিৱনেন গতো ভৱেয্য, যথা মহাসকটে কদলিৱনমজ্ঝেন ৱা এৰণ্ডৱনমজ্ঝেন ৱা গচ্ছন্তে সব্বৱনং ৱিভগ্গং নিম্মথিতং হোতি, এৱং তম্পি সিম্বলিৱনং ভৱেয্য. ছট্ঠং.

৭. নদুব্ভিযসুত্তৱণ্ণনা

২৫৩. সত্তমে উপসঙ্কমীতি ‘‘অযং সক্কো ‘যোপি মে অস্স সুপচ্চত্থিকো, তস্স পাহং ন দুব্ভেয্য’ন্তি চিন্তেতি, মযা তস্স পচ্চত্থিকতৰো নাম নত্থি, ৱীমংসিস্সামি তাৱ নং, কিং নু খো মং পস্সিত্ৱা দুব্ভতি, ন দুব্ভতী’’তি চিন্তেত্ৱা উপসঙ্কমি. তিট্ঠ ৱেপচিত্তি গহিতোসীতি ৱেপচিত্তি, এত্থেৱ তিট্ঠ, গহিতো ত্ৱং মযাতি ৱদতি. সহ ৱচনেনেৱস্স সো কণ্ঠপঞ্চমেহি বন্ধনেহি বদ্ধোৱ অহোসি. সপস্সু চ মেতি মযি অদুব্ভত্থায সপথং কৰোহীতি ৱদতি. যং মুসাভণতো পাপন্তি ইমস্মিং কপ্পে পঠমকপ্পিকেসু চেতিযৰঞ্ঞো পাপং সন্ধাযাহ. অৰিযূপৱাদিনোতি কোকলিকস্স ৱিয পাপং. মিত্তদ্দুনো চ যং পাপন্তি মহাকপিজাতকে মহাসত্তে দুট্ঠচিত্তস্স পাপং. অকতঞ্ঞুনোতি দেৱদত্তসদিসস্স অকতঞ্ঞুনো পাপং. ইমানি কিৰ ইমস্মিং কপ্পে চত্তাৰি মহাপাপানি. সত্তমং.

৮. ৱেৰোচনঅসুৰিন্দসুত্তৱণ্ণনা

২৫৪. অট্ঠমে অট্ঠংসূতি দ্ৱাৰপালৰূপকানি ৱিয ঠিতা. নিপ্ফদাতি নিপ্ফত্তি, যাৱ অত্থো নিপ্ফজ্জতি, তাৱ ৱাযমেথেৱাতি ৱদতি. দুতিযগাথা সক্কস্স. তত্থ খন্ত্যা ভিয্যোতি নিপ্ফন্নসোভনেসু অত্থেসু খন্তিতো উত্তৰিতৰো অত্থো নাম নত্থি. অত্থজাতাতি কিচ্চজাতা. সোণসিঙ্গালাদযোপি হি উপাদায অকিচ্চজাতো সত্তো নাম নত্থি. ইতো এত্তো গমনমত্তম্পি কিচ্চমেৱ হোতি. সংযোগপৰমা ত্ৱেৱ, সম্ভোগা সব্বপাণিনন্তি পাৰিৱাসিকওদনাদীনি হি অসম্ভোগাৰহানি হোন্তি, তানি পুন উণ্হাপেত্ৱা ভজ্জিত্ৱা সপ্পিমধুফাণিতাদীহি সংযোজিতানি সম্ভোগাৰহানি হোন্তি. তেনাহ ‘‘সংযোগপৰমা ত্ৱেৱ, সম্ভোগা সব্বপাণিন’’ন্তি. নিপ্ফন্নসোভনো অত্থোতি ইমে অত্থা নাম নিপ্ফন্নাৱ সোভন্তি. পুন চতুত্থগাথা সক্কস্স. তত্থাপি ৱুত্তনযেনেৱ অত্থো ৱেদিতব্বো. অট্ঠমং.

৯. অৰঞ্ঞাযতনইসিসুত্তৱণ্ণনা

২৫৫. নৱমে পণ্ণকুটীসু সম্মন্তীতি হিমৱন্তপদেসে ৰমণীযে অৰঞ্ঞাযতনে ৰত্তিট্ঠানদিৱাট্ঠানচঙ্কমনাদীহি সম্পন্নাসু পণ্ণসালাসু ৱসন্তি. সক্কো চ দেৱানমিন্দো ৱেপচিত্তি চাতি ইমে দ্ৱে জনা জামাতিকসসুৰা কালেন কলহং কৰোন্তি, কালেন একতো চৰন্তি, ইমস্মিং পন কালে একতো চৰন্তি. পটলিযোতি গণঙ্গণূপাহনা. খগ্গং ওলগ্গেত্ৱাতি খগ্গং অংসে ওলগ্গেত্ৱা. ছত্তেনাতি দিব্বসেতচ্ছত্তেন মত্থকে ধাৰযমানেন. অপব্যামতো কৰিত্ৱাতি ব্যামতো অকত্ৱা. চিৰদিক্খিতানন্তি চিৰসমাদিণ্ণৱতানং. ইতো পটিক্কম্মাতি ‘‘ইতো পক্কম পৰিৱজ্জয, মা উপৰিৱাতে তিট্ঠা’’তি ৱদন্তি. ন হেত্থ দেৱাতি এতস্মিং সীলৱন্তানং গন্ধে দেৱা ন পটিক্কূলসঞ্ঞিনো, ইট্ঠকন্তমনাপসঞ্ঞিনোযেৱাতি দীপেতি. নৱমং.

১০. সমুদ্দকসুত্তৱণ্ণনা

২৫৬. দসমে সমুদ্দতীৰে পণ্ণকুটীসূতি চক্কৱাড়মহাসমুদ্দপিট্ঠিযং ৰজতপট্টৱণ্ণে ৱালুকপুড়িনে ৱুত্তপ্পকাৰাসু পণ্ণসালাসু ৱসন্তি. সিযাপি নোতি সিযাপি অম্হাকং. অভযদক্খিণং যাচেয্যামাতি অভযদানং যাচেয্যাম. যেভুয্যেন কিৰ দেৱাসুৰসঙ্গামো মহাসমুদ্দপিট্ঠে হোতি. অসুৰানং ন সব্বকালং জযো হোতি, বহুৱাৰে পৰাজযোৱ হোতি. তে দেৱেহি পৰাজিতা পলাযন্তা ইসীনং অস্সমপদেন গচ্ছন্তা ‘‘সক্কো ইমেহি সদ্ধিং মন্তেত্ৱা অম্হে নাসেতি, গণ্হথ পুত্তহতায পুত্তে’’তি কুপিতা অস্সমপদে পানীযঘটচঙ্কমনসালাদীনি ৱিদ্ধংসেন্তি. ইসযো অৰঞ্ঞতো ফলাফলং আদায আগতা নং দিস্ৱা পুন দুক্খেন পটিপাকতিকং কৰোন্তি. তেপি পুনপ্পুনং তথেৱ ৱিনাসেন্তি. তস্মা ‘‘ইদানি তেসং সঙ্গামো পচ্চুপট্ঠিতো’’তি সুত্ৱা এৱং চিন্তযিংসু.

কামংকৰোতি ইচ্ছিতকৰো. ভযস্স অভযস্স ৱাতি ভযং ৱা অভযং ৱা. ইদং ৱুত্তং হোতি – সচে ত্ৱং অভযং দাতুকামো, অভযং দাতুং পহোসি. সচে ভযং দাতুকামো. ভযং দাতুং পহোসি. অম্হাকং পন অভযদানং দেহীতি. দুট্ঠানন্তি ৱিৰুদ্ধানং. পৱুত্তন্তি খেত্তে পতিট্ঠাপিতং.

তিক্খত্তুং উব্বিজ্জীতি সাযমাসভত্তং ভুঞ্জিত্ৱা সযনং অভিৰুয্হ নিপন্নো নিদ্দায ওক্কন্তমত্তায সমন্তা ঠত্ৱা সত্তিসতেন পহটো ৱিয ৱিৰৱন্তো উট্ঠহতি, দসযোজনসহস্সং অসুৰভৱনং ‘‘কিমিদ’’ন্তি সঙ্খোভং আপজ্জতি. অথ নং আগন্ত্ৱা ‘‘কিমিদ’’ন্তি পুচ্ছন্তি. সো ‘‘ন কিঞ্চী’’তি ৱদতি. দুতিযযামাদীসুপি এসেৱ নযো. ইতি অসুৰানং ‘‘মা ভাযি, মহাৰাজা’’তি তং অস্সাসেন্তানংযেৱ অৰুণং উগ্গচ্ছতি. এৱমস্স ততো পট্ঠায গেলঞ্ঞজাতং চিত্তং ৱেপতি. তেনেৱ চস্স ‘‘ৱেপচিত্তী’’তি অপৰং নামং উদপাদীতি. দসমং.

পঠমো ৱগ্গো.

২. দুতিযৱগ্গো

১. ৱতপদসুত্তৱণ্ণনা

২৫৭. দুতিযৱগ্গস্স পঠমে ৱতপদানীতি ৱতকোট্ঠাসানি. সমত্তানীতি পৰিপুণ্ণানি. সমাদিন্নানীতি গহিতানি. কুলে জেট্ঠাপচাযীতি কুলজেট্ঠকানং মহাপিতা মহামাতা চূড়পিতা চূড়মাতা মাতুলো মাতুলানীতিআদীনং অপচিতিকাৰকো. সণ্হৱাচোতি পিযমুদুমধুৰৱাচো. মুত্তচাগোতি ৱিস্সট্ঠচাগো. পযতপাণীতি দেয্যধম্মদানত্থায সদা ধোতহত্থো. ৱোস্সগ্গৰতোতি ৱোস্সজ্জনে ৰতো. যাচযোগোতি পৰেহি যাচিতব্বাৰহো, যাচযোগোতি ৱা যাচযোগেনেৱ যুত্তো. দানসংৱিভাগৰতোতি দানে চ সংৱিভাগে চ ৰতো. পঠমং.

২. সক্কনামসুত্তৱণ্ণনা

২৫৮. দুতিযে মনুস্সভূতোতি মগধৰট্ঠে মচলগামে মনুস্সভূতো. আৱসথং অদাসীতি চতুমহাপথে মহাজনস্স আৱসথং কাৰেত্ৱা অদাসি. সহস্সম্পি অত্থানন্তি সহস্সম্পি কাৰণানং, জনসহস্সেন ৱা ৱচনসহস্সেন ৱা ওসাৰিতে ‘‘অযং ইমস্স অত্থো, অযং ইমস্স অত্থো’’তি একপদে ঠিতোৱ ৱিনিচ্ছিনতি. দুতিযং.

৩. মহালিসুত্তৱণ্ণনা

২৫৯. ততিযে উপসঙ্কমীতি ‘‘সক্কো দেৱৰাজাতি কথেন্তি, অত্থি নু খো সো সক্কো, যেন সো দিট্ঠপুব্বোতি ইমমত্থং দসবলং পুচ্ছিস্সামী’’তি উপসঙ্কমি. তঞ্চ পজানামীতি বহুৱচনে একৱচনং, তে চ ধম্মে পজানামীতি অত্থো. সক্কো কিৰ অনন্তৰে অত্তভাৱে মগধৰট্ঠে মচলগামে মঘো নাম মাণৱো অহোসি পণ্ডিতো ব্যত্তো, বোধিসত্তচৰিযা ৱিয চ তস্স চৰিযা অহোসি. সো তেত্তিংস পুৰিসে গহেত্ৱা কল্যাণমকাসি. একদিৱসং অত্তনোৱ পঞ্ঞায উপপৰিক্খিত্ৱা গামমজ্ঝে মহাজনস্স সন্নিপতিতট্ঠানে কচৱৰং উভতোপস্সেসু অপব্যূহিত্ৱা তং ঠানং ৰমণীযং অকাসি. পুন তত্থেৱ মণ্ডপং কাৰেসি. পুন গচ্ছন্তে কালে সালং কাৰেসি. গামতো চ নিক্খমিত্ৱা গাৱুতম্পি অড্ঢযোজনম্পি তিগাৱুতম্পি যোজনম্পি ৱিচৰিত্ৱা তেহি সহাযেহি সদ্ধিং ৱিসমং সমং অকাসি. তে সব্বেৱ একচ্ছন্দা তত্থ তত্থ সেতুযুত্তট্ঠানে সেতুং, মণ্ডপসালাপোক্খৰণিমালাৱচ্ছৰোপনপদীনং যুত্তট্ঠানেসু মণ্ডপসালাপোক্খৰণিমালাৱচ্ছৰোপনাদীনি কৰোন্তা বহুং পুঞ্ঞমকংসু. মঘো সত্ত ৱতপদানি পূৰেত্ৱা কাযস্স ভেদা সদ্ধিং সহাযেহি তাৱতিংসভৱনে নিব্বত্তি. তং সব্বং ভগৱা জানাতি. তেনাহ – যেসং ধম্মানং সমাদিন্নত্তা সক্কো সক্কত্তং অজ্ঝগা, তঞ্চ পজানামীতি. অযং সক্কস্স সক্কত্তাধিগমে সঙ্খেপকথা, ৱিত্থাৰো পন সুমঙ্গলৱিলাসিনিযা দীঘনিকাযট্ঠকথায সক্কপণ্হৱণ্ণনাযং ৱুত্তো. ততিযং.

৪. দলিদ্দসুত্তৱণ্ণনা

২৬০. চতুত্থে মনুস্সদলিদ্দোতি মনুস্সঅধনো. মনুস্সকপণোতি মনুস্সকাৰুঞ্ঞতং পত্তো. মনুস্সৱৰাকোতি মনুস্সলামকো. তত্ৰাতি তস্মিং ঠানে, তস্মিং ৱা অতিৰোচনে. উজ্ঝাযন্তীতি অৱজ্ঝাযন্তি লামকতো চিন্তেন্তি. খিযন্তীতি কথেন্তি পকাসেন্তি. ৱিপাচেন্তীতি তত্থ তত্থ কথেন্তি ৱিত্থাৰেন্তি. এসো খো মাৰিসাতি এত্থ অযমনুপুব্বিকথা – সো কিৰ অনুপ্পন্নে বুদ্ধে কাসিৰট্ঠে বাৰাণসিৰাজা হুত্ৱা সমুস্সিতদ্ধজপটাকনানালঙ্কাৰেন সুট্ঠু অলঙ্কতং নগৰং পদক্খিণং অকাসি অত্তনো সিৰিসম্পত্তিযা সমাকড্ঢিতনেত্তেন জনকাযেন সমুল্লোকিযমানো. তস্মিঞ্চ সমযে একো পচ্চেকবুদ্ধো গন্ধমাদনপব্বতা আগম্ম তস্মিং নগৰে পিণ্ডায চৰতি, সন্তিন্দ্ৰিযো সন্তমানসো উত্তমদমথসমন্নাগতো. মহাজনোপি ৰাজগতং চিত্তীকাৰং পহায পচ্চেকবুদ্ধমেৱ ওলোকেসি. ৰাজা – ‘‘ইদানি ইমস্মিং জনকাযে একোপি মং ন ওলোকেতি. কিং নু খো এত’’ন্তি? ওলোকেন্তো পচ্চেকবুদ্ধং অদ্দস. সোপি পচ্চেকবুদ্ধো মহল্লকো হোতি পচ্ছিমৱযে ঠিতো. চীৱৰানিপিস্স জিণ্ণানি, ততো ততো সুত্তানি গড়ন্তি. ৰঞ্ঞো সতসহস্সাধিকানি দ্ৱে অসঙ্খ্যেয্যানি পূৰিতপাৰমিং পচ্চেকবুদ্ধং দিস্ৱা চিত্তপসাদমত্তং ৱা হত্থং পসাৰেত্ৱা ৱন্দনমত্তং ৱা নাহোসি. সো ৰাজা ‘‘পব্বজিতো মঞ্ঞে এস উসূযায মং ন ওলোকেতী’’তি কুজ্ঝিত্ৱা ‘‘ক্ৱাযং কুট্ঠিচীৱৰানি পাৰুতো’’তি নিট্ঠুভিত্ৱা পক্কামি. তস্স কম্মস্স ৱিপাকেন মহানিৰযে নিব্বত্তিত্ৱা ৱিপাকাৱসেসেন মনুস্সলোকং আগচ্ছন্তো ৰাজগহে পৰমকপণায ইত্থিযা কুচ্ছিম্হি পটিসন্ধিং গণ্হি. গহিতকালতো পট্ঠায সা ইত্থী কঞ্জিকমত্তম্পি উদৰপূৰং নালত্থ. তস্স কুচ্ছিগতস্সেৱ কণ্ণনাসা ৱিলীনা, সঙ্খপলিতকুট্ঠী হুত্ৱা মাতুকুচ্ছিতো নিক্খন্তো. মাতাপিতৰো নাম দুক্কৰকাৰিকা হোন্তি, তেনস্স মাতা যাৱ কপালং গহেত্ৱা চৰিতুং ন সক্কোতি, তাৱস্স কঞ্জিকম্পি উদকম্পি আহৰিত্ৱা অদাসি. ভিক্খায চৰিতুং সমত্থকালে পনস্স কপালং হত্থে দত্ৱা ‘‘পঞ্ঞাযিস্সসি সকেন কম্মেনা’’তি পক্কামি.

অথস্স ততো পট্ঠায সকলসৰীৰতো মংসানি ছিজ্জিত্ৱা ছিজ্জিত্ৱা পতন্তি, যূসং পগ্ঘৰতি, মহাৱেদনা ৱত্তন্তি. যং যং ৰচ্ছং নিস্সায সযতি, সব্বৰত্তিং মহাৰৱেন ৰৱতি. তস্স কাৰুঞ্ঞপৰিদেৱিতসদ্দেন সকলৱীথিযং মনুস্সা সব্বৰত্তিং নিদ্দং ন লভন্তি. তস্স ততো পট্ঠায সুখসযিতে পবোধেতীতি সুপ্পবুদ্ধোত্ৱেৱ নামং উদপাদি. অথাপৰেন সমযেন ভগৱতি ৰাজগহং সম্পত্তে নাগৰা সত্থাৰং নিমন্তেত্ৱা নগৰমজ্ঝে মহামণ্ডপং কত্ৱা দানং অদংসু. সুপ্পবুদ্ধোপি কুট্ঠী গন্ত্ৱা দানগ্গমণ্ডপস্স অৱিদূৰে নিসীদি. নাগৰা বুদ্ধপ্পমুখং ভিক্খুসঙ্ঘং পণীতেন খাদনীযেন ভোজনীযেন পৰিৱিসন্তা তস্সাপি যাগুভত্তং অদংসু. তস্স পণীতভোজনং ভুত্তস্স চিত্তং একগ্গং অহোসি. সত্থা ভত্তকিচ্চাৱসানে অনুমোদনং কত্ৱা সচ্চানি দীপেসি, সুপ্পবুদ্ধো নিসিন্নট্ঠানে নিসিন্নোৱ দেসনানুসাৰেন ঞাণং পেসেত্ৱা সোতাপত্তিফলে পতিট্ঠিতো. সত্থা উট্ঠায ৱিহাৰং গতো. সোপি চুম্বটং আৰুয্হ কপালমাদায দণ্ডমোলুব্ভ অত্তনো ৱসনট্ঠানং গচ্ছন্তো ৱিব্ভন্তায গাৱিযা জীৱিতা ৱোৰোপিতো মত্তিকপাতিং ভিন্দিত্ৱা সুৱণ্ণপাতিং পটিলভন্তো ৱিয দুতিযচিত্তৱাৰে দেৱলোকে নিব্বত্তো অত্তনো পুঞ্ঞং নিস্সায অঞ্ঞে দেৱে অতিক্কম্ম ৱিৰোচিত্থ. তং কাৰণং দস্সেন্তো সক্কো দেৱানমিন্দো এসো খো মাৰিসাতিআদিমাহ.

সদ্ধাতি মগ্গেনাগতসদ্ধা. সীলঞ্চ যস্স কল্যাণন্তি কল্যাণসীলং নাম অৰিযসাৱকস্স অৰিযকন্তসীলং ৱুচ্চতি. তত্থ কিঞ্চাপি অৰিযসাৱকস্স একসীলম্পি অকন্তং নাম নত্থি, ইমস্মিং পনত্থে ভৱন্তৰেপি অপ্পহীনং পঞ্চসীলং অধিপ্পেতং. চতুত্থং.

৫. ৰামণেয্যকসুত্তৱণ্ণনা

২৬১. পঞ্চমে আৰামচেত্যাতি আৰামচেতিযানি. ৱনচেত্যাতি ৱনচেতিযানি. উভযত্থাপি চিত্তীকতট্ঠেন চেত্যং ৱেদিতব্বং. মনুস্সৰামণেয্যস্সাতি মনুস্সৰমণীযভাৱস্স. ইদানি মনুস্সৰমণীযকৱসেন ভূমিৰমণীযকং দস্সেন্তো গামে ৱাতিআদিমাহ. পঞ্চমং.

৬. যজমানসুত্তৱণ্ণনা

২৬২. ছট্ঠে যজমানানন্তি যজন্তানং. তদা কিৰ অঙ্গমগধৱাসিকা মনুস্সা অনুসংৱচ্ছৰং সপ্পিমধুফাণিতাদীসু অগ্গং গহেত্ৱা একস্মিং ঠানে দাৰূনং সট্ঠিমত্তে সকটভাৰে ৰাসিং কত্ৱা অগ্গিং দত্ৱা পজ্জলিতকালে ‘‘মহাব্ৰহ্মুনো যজামা’’তি তং সব্বং পক্খিপন্তি. ‘‘একৱাৰং পক্খিত্তং সহস্সগুণফলং দেতী’’তি নেসং লদ্ধি. সক্কো দেৱৰাজা ‘‘সব্বেপিমে সব্বঅগ্গানি গহেত্ৱা ‘মহাব্ৰহ্মুনো যজামা’তি অগ্গিম্হি ঝাপেন্তি. অফলং কৰোন্তি, মযি পস্সন্তে মা নস্সন্তু, যথা বুদ্ধস্স চেৱ সঙ্ঘস্স চ দত্ৱা বহুং পুঞ্ঞং পসৱন্তি, এৱং কৰিস্সামী’’তি দাৰুৰাসিং জলাপেত্ৱা ওলোকেন্তেসু মনুস্সেসু পুণ্ণমদিৱসে ব্ৰহ্মত্তভাৱং মাপেত্ৱা মহাজনস্স পস্সন্তস্সেৱ চন্দমণ্ডলং ভিন্দিত্ৱা নিক্খন্তো ৱিয অহোসি. মহাজনো দিস্ৱা ‘‘ইমং যঞ্ঞং পটিগ্গহেতুং মহাব্ৰহ্মা আগচ্ছতী’’তি জণ্ণুকেহি ভূমিযং পতিট্ঠায, অঞ্জলিং পগ্গয্হ নমস্সমানো অট্ঠাসি. ব্ৰাহ্মণা আহংসু ‘‘তুম্হে ‘মযং তক্কেন কথেমা’তি মঞ্ঞথ, ইদানি পস্সথ, অযং ৱো ব্ৰহ্মা সহত্থা যঞ্ঞং পটিগ্গহেতুং আগচ্ছতী’’তি. সক্কো আগন্ত্ৱা দাৰুচিতকমত্থকে আকাসে ঠত্ৱা ‘‘কস্সাযং সক্কাৰো’’তি পুচ্ছি? তুম্হাকং, ভন্তে, পটিগ্গণ্হথ নো যঞ্ঞন্তি. তেন হি আগচ্ছথ, মা তুলং ছড্ডেত্ৱা হত্থেন তুলযিত্থ, অযং সত্থা ধুৰৱিহাৰে ৱসতি, তং পুচ্ছিস্সাম ‘‘কস্স দিন্নং মহপ্ফলং হোতী’’তি? উভযৰট্ঠৱাসিনো গহেত্ৱা সত্থু সন্তিকং গন্ত্ৱা পুচ্ছন্তো এৱমাহ.

তত্থ পুঞ্ঞপেক্খানন্তি পুঞ্ঞং ইচ্ছন্তানং পুঞ্ঞত্থিকানং. ওপধিকং পুঞ্ঞন্তি উপধিৱিপাকং পুঞ্ঞং. সঙ্ঘে দিন্নং মহপ্ফলন্তি অৰিযসঙ্ঘে দিন্নং ৱিপ্ফাৰৱন্তং হোতি. দেসনাৱসানে চতুৰাসীতিপাণসহস্সানি অমতপানং পিৱিংসু. ততো পট্ঠায মনুস্সা সব্বানি অগ্গদানানি ভিক্খুসঙ্ঘস্স অদংসু. ছট্ঠং.

৭. বুদ্ধৱন্দনাসুত্তৱণ্ণনা

২৬৩. সত্তমে উট্ঠেহীতি উট্ঠহ, ঘট, ৱাযম. ৱিজিতসঙ্গামাতি ৰাগাদীনঞ্চেৱ দ্ৱাদসযোজনিকস্স চ মাৰবলস্স জিতত্তা ভগৱন্তং এৱং আলপতি. পন্নভাৰাতি ওৰোপিতখন্ধকিলেসাভিসঙ্খাৰভাৰ. পন্নৰসায ৰত্তিন্তি পন্নৰসায পুণ্ণমায ৰত্তিং. সত্তমং.

৮. গহট্ঠৱন্দনাসুত্তৱণ্ণনা

২৬৪. অট্ঠমে পুথুদ্দিসাতি চতস্সো দিসা চতস্সো অনুদিসা চ. ভুম্মাতি ভূমিৱাসিনো. চিৰৰত্তসমাহিতেতি উপচাৰপ্পনাহি চিৰৰত্তসমাহিতচিত্তে. ৱন্দেতি ৱন্দামি. ব্ৰহ্মচৰিযপৰাযণেতি দসপি ৱস্সানি ৱীসতিপি ৱস্সানি…পে… সট্ঠিপি ৱস্সানি আপাণকোটিকং একসেয্যং একভত্তন্তিআদিকং সেট্ঠচৰিযং ব্ৰহ্মচৰিযং চৰমানেতি অত্থো. পুঞ্ঞকৰাতি চতুপচ্চযদানং কুসুম্ভসুমনপূজা দীপসহস্সজালন্তি এৱমাদিপুঞ্ঞকাৰকা. সীলৱন্তোতি উপাসকত্তে পতিট্ঠায পঞ্চহিপি দসহিপি সীলেহি সমন্নাগতা. ধম্মেন দাৰং পোসেন্তীতি উমঙ্গভিন্দনাদীনি অকত্ৱা ধম্মিকেহি কসিগোৰক্খৱণিজ্জাদীহি পুত্তদাৰং পোসেন্তি. পমুখো ৰথমাৰুহীতি দেৱানং পমুখো সেট্ঠো ৰথং আৰুহি. অট্ঠমং.

৯. সত্থাৰৱন্দনাসুত্তৱণ্ণনা

২৬৫. নৱমে ভগৱন্তং নমস্সতীতি একংসং উত্তৰিযং দুকুলং কত্ৱা, ব্ৰহ্মজাণুকো হুত্ৱা সিৰসি অঞ্জলিং ঠপেত্ৱা নমস্সতি. সো যক্খোতি সো সক্কো. অনোমনামন্তি সব্বগুণেহি ওমকভাৱস্স নত্থিতায সব্বগুণনেমিত্তকেহি নামেহি অনোমনামং. অৱিজ্জাসমতিক্কমাতি চতুসচ্চপটিচ্ছাদিকায ৱট্টমূলকঅৱিজ্জায সমতিক্কমেন. সেক্খাতি সত্ত সেক্খা. অপচযাৰামাতি ৱট্টৱিদ্ধংসনে ৰতা. সিক্খৰেতি সিক্খন্তি. নৱমং.

১০. সঙ্ঘৱন্দনাসুত্তৱণ্ণনা

২৬৬. দসমে অজ্ঝভাসীতি কস্মা এস পুনপ্পুনং এৱং ভাসতীতি? সক্কস্স কিৰ দেৱৰঞ্ঞো সদ্দো মধুৰো, সুফসিতং দন্তাৱৰণং, কথনকালে সুৱণ্ণকিঙ্কিণিকসদ্দো ৱিয নিচ্ছৰতি. তং পুনপ্পুনং সোতুং লভিস্সামীতি ভাসতি. পূতিদেহসযাতি পূতিম্হি মাতুসৰীৰে ৱা, অত্তনোযেৱ ৱা সৰীৰং অৱত্থৰিত্ৱা সযনতো পূতিদেহসযা. নিমুগ্গা কুণপম্হেতেতি দসমাসে মাতুকুচ্ছিসঙ্খাতে কুণপস্মিং এতে নিমুগ্গা. এতং তেসং পিহযামীতি এতেসং এতং পিহযামি পত্থযামি. ন তে সং কোট্ঠে ওপেন্তীতি ন তে সং সন্তকং ধঞ্ঞং কোট্ঠে পক্খিপন্তি. ন হি এতেসং ধঞ্ঞং অত্থি. ন কুম্ভীতি ন কুম্ভিযং. ন কড়োপিযন্তি ন পচ্ছিযং. পৰনিট্ঠিতমেসানাতি পৰেসং নিট্ঠিতং পৰঘৰে পক্কং ভিক্খাচাৰৱত্তেন এসমানা গৱেসমানা. তেনাতি এৱং পৰিযিট্ঠেন. সুব্বতাতি দসপি…পে… সট্ঠিপি ৱস্সানি সুসমাদিন্নসুন্দৰৱতা.

সুমন্তমন্তিনোতি ধম্মং সজ্ঝাযিস্সাম, ধুতঙ্গং সমাদিযিস্সাম, অমতং পৰিভুঞ্জিস্সাম, সমণধম্মং কৰিস্সামাতি এৱং সুভাসিতভাসিনো. তুণ্হীভূতা সমঞ্চৰাতি তিযামৰত্তিং অসনিঘোসেন ঘোসিতা ৱিয ধম্মং কথেন্তাপি তুণ্হীভূতা সমং চৰন্তিযেৱ নাম. কস্মা? নিৰত্থকৱচনস্সাভাৱা. পুথুমচ্চা চাতি বহুসত্তা চ অঞ্ঞমঞ্ঞং ৱিৰুদ্ধা. অত্তদণ্ডেসু নিব্বুতাতি পৰৱিহেঠনত্থং গহিতদণ্ডেসু সত্তেসু নিব্বুতা ৱিস্সট্ঠদণ্ডা. সাদানেসু অনাদানাতি সগহণেসু সত্তেসু চ ভৱযোনিআদীনং এককোট্ঠাসস্সাপি অগহিতত্তা অগহণা. দসমং.

দুতিযো ৱগ্গো.

৩. ততিযৱগ্গো

১. ছেত্ৱাসুত্তৱণ্ণনা

২৬৭. ততিযৱগ্গস্স পঠমং ৱুত্তত্থমেৱ. পঠমং.

২. দুব্বণ্ণিযসুত্তৱণ্ণনা

২৬৮. দুতিযে দুব্বণ্ণোতি ঝামখাণুৱণ্ণো. ওকোটিমকোতি লকুণ্ডকো মহোদৰো. আসনেতি পণ্ডুকম্বলসিলাযং. কোধভক্খোতি সক্কেন গহিতনামমেৱেতং. সো পন একো ৰূপাৱচৰব্ৰহ্মা, ‘‘সক্কো কিৰ খন্তিবলেন সমন্নাগতো’’তি সুত্ৱা ৱীমংসনত্থং আগতো. অৱৰুদ্ধকযক্খা পন এৱৰূপং সংৱিহিতাৰক্খং ঠানং পৱিসিতুং ন সক্কোন্তি. উপসঙ্কমীতি দেৱানং সুত্ৱা ‘‘ন সক্কা এস ফৰুসেন চালেতুং, নীচৱুত্তিনা পন খন্তিযং ঠিতেন সক্কা পলাপেতু’’ন্তি তথা পলাপেতুকামো উপসঙ্কমি. অন্তৰধাযীতি খন্তিযং ঠত্ৱা বলৱচিত্তীকাৰং পচ্চুপট্ঠপেত্ৱা নীচৱুত্তিযা দস্সিযমানায সক্কাসনে ঠাতুং অসক্কোন্তো অন্তৰধাযি. ন সূপহতচিত্তোম্হীতি এত্থ সূতি নিপাতমত্তং, উপহতচিত্তোম্হীতি আহ. নাৱত্তেন সুৱানযোতি ন কোধাৱত্তেন সুআনযো, কোধৱসে ৱত্তেতুং ন সুকৰোম্হীতি ৱদতি. ন ৱো চিৰাহন্তি ৱোতি নিপাতমত্তং, অহং চিৰং ন কুজ্ঝামীতি ৱদতি. দুতিযং.

৩. সম্বৰিমাযাসুত্তৱণ্ণনা

২৬৯. ততিযে আবাধিকোতি ইসিগণেন অভিসপকালে উপ্পন্নাবাধেন আবাধিকো. ৱাচেহি মন্তি সচে মং সম্বৰিমাযং ৱাচেসি, এৱমহং তম্পি তিকিচ্ছিস্সামীতি ৱদতি. মা খো ত্ৱং, মাৰিস, ৱাচেসীতি ৱিনাপি তাৱ সম্বৰিমাযং সক্কো অম্হে বাধতি, যদি পন তং জানিস্সতি, নট্ঠা মযং, মা অত্তনো একস্স অত্থায অম্হে নাসেহীতি ৱত্ৱা নিৱাৰযিংসু. সম্বৰোৱ সতং সমন্তি যথা সম্বৰো অসুৰিন্দো মাযাৱী মাযং পযোজেত্ৱা ৱস্সসতং নিৰযে পক্কো, এৱং পচ্চতি. তুম্হে ধম্মিকাৱ, অলং ৱো মাযাযাতি ৱদতি. কিং পন সক্কো তস্স কোধং তিকিচ্ছিতুং সক্কুণেয্যাতি? আম সক্কুণেয্য. কথং? তদা কিৰ সো ইসিগণো ধৰতিযেৱ, তস্মা নং ইসীনং সন্তিকং নেত্ৱা খমাপেয্য, এৱমস্স ফাসু ভৱেয্য. তেন পন ৱঞ্চিতত্তা তথা অকত্ৱা পক্কন্তোৱ. ততিযং.

৪. অচ্চযসুত্তৱণ্ণনা

২৭০. চতুত্থে সম্পযোজেসুন্তি কলহং অকংসু. অচ্চসৰাতি অতিক্কমি, একো ভিক্খু একং ভিক্খুং অতিক্কম্ম ৱচনং অৱোচাতি অত্থো. যথাধম্মং নপ্পটিগ্গণ্হাতীতি ন খমতি. কোধো ৱো ৱসমাযাতূতি কোধো তুম্হাকং ৱসং আগচ্ছতু, মা তুম্হে কোধৱসং গমিত্থাতি দীপেতি. মা চ মিত্তে হি ৱো জৰাতি এত্থ হীতি নিপাতমত্তং, তুম্হাকং মিত্তধম্মে জৰা নাম মা নিব্বত্তি. ভুম্মত্থে ৱা কৰণৱচনং, মিত্তেসু ৱো জৰা মা নিব্বত্তি, মিত্তভাৱতো অঞ্ঞথাভাৱো মা হোতূতি অত্থো. অগৰহিযং মা গৰহিত্থাতি অগাৰয্হং খীণাসৱপুগ্গলং মা গৰহিত্থ. চতুত্থং.

৫. অক্কোধসুত্তৱণ্ণনা

২৭১. পঞ্চমে মা ৱো কোধো অজ্ঝভৱীতি কোধো তুম্হে মা অভিভৱি, তুম্হেৱ কোধং অভিভৱথ. মা চ কুজ্ঝিত্থ কুজ্ঝিতন্তি কুজ্ঝন্তানং মা পটিকুজ্ঝিত্থ. অক্কোধোতি মেত্তা চ মেত্তাপুব্বভাগো চ. অৱিহিংসাতি কৰুণা চ কৰুণাপুব্বভাগো চ. অথ পাপজনং কোধো, পব্বতোৱাভিমদ্দতীতি লামকজনং পব্বতো ৱিয কোধো অভিমদ্দতীতি. পঞ্চমং.

ততিযো ৱগ্গো.

সক্কসংযুত্তৱণ্ণনা নিট্ঠিতা.

ইতি সাৰত্থপ্পকাসিনিযা সংযুত্তনিকায-অট্ঠকথায

সগাথাৱগ্গৱণ্ণনা নিট্ঠিতা.

সংযুত্তনিকায-অট্ঠকথায পঠমো ভাগো.