৮. কল্যাণমিত্ততাদিৱগ্গৱণ্ণনা

৭১. অট্ঠমস্স পঠমে কল্যাণমিত্ততাতি কল্যাণা মিত্তা অস্সাতি কল্যাণমিত্তো, তস্স ভাৱো কল্যাণমিত্ততা. সেসং ৱুত্তপটিপক্খনযেন ৱেদিতব্বং.

৭২-৭৩. দুতিযে অনুযোগোতি যোগো পযোগো. অননুযোগোতি অযোগো অপ্পযোগো. অনুযোগাতি অনুযোগেন. অননুযোগাতি অননুযোগেন. কুসলানং ধম্মানন্তি চতুভূমককুসলধম্মানং. ততিযং উত্তানত্থমেৱ.

৭৪. চতুত্থে বোজ্ঝঙ্গাতি বুজ্ঝনকসত্তস্স অঙ্গভূতা সত্ত ধম্মা. যায ৱা ধম্মসামগ্গিযা সো বুজ্ঝতি, সম্মোহনিদ্দাতো ৱা ৱুট্ঠাতি, চতুসচ্চধম্মং ৱা সচ্ছিকৰোতি. তস্সা বোধিযা অঙ্গভূতাতিপি বোজ্ঝঙ্গা. ‘‘বোজ্ঝঙ্গাতি কেনট্ঠেন বোজ্ঝঙ্গা? বুজ্ঝন্তীতি বোজ্ঝঙ্গা, অনুবুজ্ঝন্তীতি বোজ্ঝঙ্গা, পটিবুজ্ঝন্তীতি বোজ্ঝঙ্গা, সম্বুজ্ঝন্তীতি বোজ্ঝঙ্গা, বোধায সংৱত্তন্তীতি বোজ্ঝঙ্গা’’তি (পটি. ম. ২.১৭). এৱং পনেতং পদং ৱিভত্তমেৱ.

৭৫. পঞ্চমে ভাৱনাপাৰিপূৰিং গচ্ছন্তীতি ইমিনা পদেন বোজ্ঝঙ্গানং যাথাৱসৰসভূমি নাম কথিতা. সা পনেসা চতুব্বিধা হোতি – ৱিপস্সনা, ৱিপস্সনাপাদকজ্ঝানং, মগ্গো, ফলন্তি. তত্থ ৱিপস্সনায উপ্পজ্জনকালে বোজ্ঝঙ্গা কামাৱচৰা হোন্তি, ৱিপস্সনাপাদকজ্ঝানম্হি উপ্পজ্জনকালে ৰূপাৱচৰঅৰূপাৱচৰা, মগ্গফলেসু উপ্পজ্জনকালে লোকুত্তৰা. ইতি ইমস্মিং সুত্তে বোজ্ঝঙ্গা চতুভূমকা কথিতা.

৭৬. ছট্ঠস্স অট্ঠুপ্পত্তিকো নিক্খেপো. অট্ঠুপ্পত্তিযং হেতং নিক্খিত্তং, সম্বহুলা কিৰ ভিক্খূ ধম্মসভাযং সন্নিসিন্না. তেসং অন্তৰে বন্ধুলমল্লসেনাপতিং আৰব্ভ অযং কথা উদপাদি, ‘‘আৱুসো, অসুকং নাম কুলং পুব্বে বহুঞাতিকং অহোসি বহুপক্খং, ইদানি অপ্পঞাতিকং অপ্পপক্খং জাত’’ন্তি. অথ ভগৱা তেসং চিত্তাচাৰং ঞত্ৱা ‘‘মযি গতে মহতী দেসনা ভৱিস্সতী’’তি ঞত্ৱা গন্ধকুটিতো নিক্খম্ম ধম্মসভাযং পঞ্ঞত্তৱৰবুদ্ধাসনে নিসীদিত্ৱা ‘‘কায নুত্থ, ভিক্খৱে, এতৰহি কথায সন্নিসিন্না’’তি আহ. ভগৱা অঞ্ঞা গামনিগমাদিকথা নত্থি, অসুকং নাম কুলং পুব্বে বহুঞাতিকং অহোসি বহুপক্খং, ইদানি অপ্পঞাতিকং অপ্পপক্খং জাতন্তি ৱদন্তা নিসিন্নম্হাতি. সত্থা ইমিস্সা অট্ঠুপ্পত্তিযা অপ্পমত্তিকা এসা, ভিক্খৱে, পৰিহানীতি ইদং সুত্তং আৰভি.

তত্থ অপ্পমত্তিকাতি পৰিত্তা পৰিত্তপ্পমাণা. এতায হি পৰিহানিযা সগ্গতো ৱা মগ্গতো ৱা পৰিহানি নাম নত্থি, দিট্ঠধম্মিকপৰিহানিমত্তমেৱ এতন্তি আহ. এতং পতিকিট্ঠন্তি এতং পচ্ছিমং এতং লামকং. যদিদং পঞ্ঞাপৰিহানীতি যা এসা মম সাসনে কম্মস্সকতপঞ্ঞায ঝানপঞ্ঞায ৱিপস্সনাপঞ্ঞায মগ্গপঞ্ঞায ফলপঞ্ঞায চ পৰিহানি, এসা পচ্ছিমা, এসা লামকা, এসা ছড্ডনীযাতি অত্থো.

৭৭. সত্তমম্পি অট্ঠুপ্পত্তিযমেৱ কথিতং. ধম্মসভাযং কিৰ নিসিন্নেসু ভিক্খূসু একচ্চে এৱং আহংসু – ‘‘অসুকং নাম কুলং পুব্বে অপ্পঞাতিকং অপ্পপক্খং অহোসি, ইদানি তং বহুঞাতিকং বহুপক্খং জাত’’ন্তি. কং সন্ধায এৱমাহংসূতি? ৱিসাখং উপাসিকং ৱেসালিকে চ লিচ্ছৱী. সত্থা তেসং চিত্তাচাৰং ঞত্ৱা পুৰিমনযেনেৱ আগন্ত্ৱা ধম্মাসনে নিসিন্নো ‘‘কায নুত্থ, ভিক্খৱে, এতৰহি কথায সন্নিসিন্না’’তি পুচ্ছি. তে যথাভূতং কথযিংসু. সত্থা ইমিস্সা অট্ঠুপ্পত্তিযা ইমং সুত্তং আৰভি. তত্থ অপ্পমত্তিকাতি তং সম্পত্তিং নিস্সায সগ্গং ৱা মগ্গং ৱা সম্পত্তানং অভাৱতো পৰিত্তা. যদিদং পঞ্ঞাৱুদ্ধীতি কম্মস্সকতপঞ্ঞাদীনং ৱুদ্ধি. তস্মাতি যস্মা ঞাতীনং ৱুদ্ধি নাম দিট্ঠধম্মিকমত্তা অপ্পা পৰিত্তা, সা সগ্গং ৱা মগ্গং ৱা পাপেতুং অসমত্থা, তস্মা. পঞ্ঞাৱুদ্ধিযাতি কম্মস্সকতাদিপঞ্ঞায ৱুদ্ধিযা.

৭৮. অট্ঠমম্পি অট্ঠুপ্পত্তিযমেৱ কথিতং. সম্বহুলা কিৰ ভিক্খূ ধম্মসভাযং সন্নিসিন্না মহাধনসেট্ঠিপুত্তং আৰব্ভ ‘‘অসুকং নাম কুলং পুব্বে মহাভোগং মহাহিৰঞ্ঞসুৱণ্ণং অহোসি, তং ইদানি অপ্পভোগং জাত’’ন্তি কথযিংসু. সত্থা পুৰিমনযেনেৱ আগন্ত্ৱা তেসং ৱচনং সুত্ৱা ইমং সুত্তং আৰভি.

৭৯. নৱমম্পি অট্ঠুপ্পত্তিযমেৱ ৱুত্তং. ধম্মসভাযং কিৰ সন্নিসিন্না ভিক্খূ কাকৱলিযসেট্ঠিঞ্চ পুণ্ণসেট্ঠিঞ্চ আৰব্ভ ‘‘অসুকং নাম কুলং পুব্বে অপ্পভোগং অহোসি, তং ইদানি মহাভোগং জাত’’ন্তি কথযিংসু. সত্থা পুৰিমনযেনেৱ আগন্ত্ৱা তেসং ৱচনং সুত্ৱা ইমং সুত্তং আৰভি. সেসং ইমেসু দ্ৱীসুপি হেট্ঠা ৱুত্তনযেনেৱ ৱেদিতব্বং.

৮০. দসমম্পি অট্ঠুপ্পত্তিযং ৱুত্তং. ধম্মসভাযং কিৰ ভিক্খূ কোসলমহাৰাজানং আৰব্ভ ‘‘অসুকং নাম কুলং পুব্বে মহাযসং মহাপৰিৱাৰং অহোসি, ইদানি অপ্পযসং অপ্পপৰিৱাৰং জাত’’ন্তি কথযিংসু. ভগৱা পুৰিমনযেনেৱ আগন্ত্ৱা তেসং ৱচনং সুত্ৱা ইমং ধম্মদেসনং আৰভি. সেসং ৱুত্তনযেনেৱ ৱেদিতব্বন্তি.

কল্যাণমিত্ততাদিৱগ্গৱণ্ণনা.