১৯. কাযগতাসতিৱগ্গৱণ্ণনা

৫৬৩. চেতসা ফুটোতি এত্থ দুৱিধং ফৰণং আপোফৰণঞ্চ দিব্বচক্খুফৰণঞ্চ. তত্থ আপোকসিণং সমাপজ্জিত্ৱা আপেন ফৰণং আপোফৰণং নাম. এৱং ফুটেপি মহাসমুদ্দে সব্বা সমুদ্দঙ্গমা কুন্নদিযো অন্তোগধাৱ হোন্তি. আলোকং পন ৱড্ঢেত্ৱা দিব্বচক্খুনা সকলসমুদ্দদস্সনং দিব্বচক্খুফৰণং নাম. এৱং ফুটেপি মহাসমুদ্দে সব্বা মহাসমুদ্দঙ্গমা কুন্নদিযো অন্তোগধাৱ হোন্তি. অন্তোগধা তস্সাতি তস্স ভিক্খুনো ভাৱনায অব্ভন্তৰগতাৱ হোন্তি. ৱিজ্জাভাগিযাতি এত্থ সম্পযোগৱসেন ৱিজ্জং ভজন্তীতি ৱিজ্জাভাগিযা, ৱিজ্জাভাগে ৱিজ্জাকোট্ঠাসে ৱত্তন্তীতিপি ৱিজ্জাভাগিযা. তত্থ ৱিপস্সনাঞাণং মনোমযিদ্ধি ছ অভিঞ্ঞাতি অট্ঠ ৱিজ্জা, পুৰিমেন অত্থেন তাহি সম্পযুত্তধম্মাপি ৱিজ্জাভাগিযা. পচ্ছিমেন অত্থেন তাসু যা কাচি একা ৱিজ্জা ৱিজ্জা, সেসা ৱিজ্জাভাগিযাতি এৱং ৱিজ্জাপি ৱিজ্জাসম্পযুত্তধম্মাপি ৱিজ্জাভাগিযাতেৱ ৱেদিতব্বা.

৫৬৪. মহতো সংৱেগাযাতি মহন্তস্স সংৱেগস্স অত্থায. উপৰিপদদ্ৱযেপি এসেৱ নযো. এত্থ চ মহাসংৱেগো নাম ৱিপস্সনা, মহাঅত্থো নাম চত্তাৰো মগ্গা, মহাযোগক্খেমো নাম চত্তাৰি সামঞ্ঞফলানি. অথ ৱা মহাসংৱেগো নাম সহ ৱিপস্সনায মগ্গো, মহাঅত্থো নাম চত্তাৰি সামঞ্ঞফলানি, মহাযোগক্খেমো নাম নিব্বানং. সতিসম্পজঞ্ঞাযাতি সতিযা চ ঞাণস্স চ অত্থায. ঞাণদস্সনপটিলাভাযাতি দিব্বচক্খুঞাণায. দিট্ঠধম্মসুখৱিহাৰাযাতি ইমস্মিংযেৱ পচ্চক্খে অত্তভাৱে সুখৱিহাৰত্থায. ৱিজ্জাৱিমুত্তিফলসচ্ছিকিৰিযাযাতি ৱিজ্জাৱিমুত্তীনং ফলস্স পচ্চৱেক্খকৰণত্থায. এত্থ চ ৱিজ্জাতি মগ্গপঞ্ঞা, ৱিমুত্তীতি তংসম্পযুত্তা সেসধম্মা. তেসং ফলং নাম অৰহত্তফলং, তস্স সচ্ছিকিৰিযাযাতি অত্থো.

৫৭১. কাযোপি পস্সম্ভতীতি নামকাযোপি কৰজকাযোপি পস্সম্ভতি, ৱূপসন্তদৰথো হোতি. ৱিতক্কৱিচাৰাপীতি এতে ধম্মা দুতিযজ্ঝানেন ৱূপসম্মন্তি নাম, ইধ পন ওড়াৰিকৱূপসমং সন্ধায ৱুত্তং. কেৱলাতি সকলা, সব্বে নিৰৱসেসাতি অত্থো. ৱিজ্জাভাগিযাতি ৱিজ্জাকোট্ঠাসিযা, তে হেট্ঠা ৱিভজিত্ৱা দস্সিতাৱ.

৫৭৪. অৱিজ্জা পহীযতীতি অট্ঠসু ঠানেসু ৱট্টমূলকং বহলন্ধকাৰং মহাতমং অঞ্ঞাণং পহীযতি. ৱিজ্জা উপ্পজ্জতীতি অৰহত্তমগ্গৱিজ্জা উপ্পজ্জতি. অস্মিমানো পহীযতীতি অস্মীতি নৱৱিধো মানো পহীযতি. অনুসযাতি সত্ত অনুসযা. সংযোজনানীতি দস সংযোজনানি.

৫৭৫. পঞ্ঞাপভেদাযাতি পঞ্ঞায পভেদগমনত্থং. অনুপাদাপৰিনিব্বানাযাতি অপচ্চযপৰিনিব্বানস্স সচ্ছিকিৰিযত্থায.

৫৭৬. অনেকধাতুপটিৱেধো হোতীতি অট্ঠাৰসন্নং ধাতূনং লক্খণপটিৱেধো হোতি. নানাধাতুপটিৱেধো হোতীতি তাসংযেৱ অট্ঠাৰসন্নং ধাতূনং নানাভাৱেন লক্খণপটিৱেধো হোতি. অনেকধাতুপটিসম্ভিদা হোতীতি ইমিনা ধাতুভেদঞাণং কথিতং. ধাতুপভেদঞাণং নাম ‘‘ইমায ধাতুযা উস্সন্নায ইদং নাম হোতী’’তি জাননপঞ্ঞা. তং পনেতং ধাতুভেদঞাণং ন সব্বেসং হোতি, বুদ্ধানমেৱ নিপ্পদেসং হোতি. তং সম্মাসম্বুদ্ধেন সব্বসো ন কথিতং. কস্মা? তস্মিং কথিতে অত্থো নত্থীতি.

৫৮৪. পঞ্ঞাপটিলাভাযাতিআদীনি সোড়স পদানি পটিসম্ভিদামগ্গে ‘‘সপ্পুৰিসসংসেৱো, সদ্ধম্মসৱনং, যোনিসোমনসিকাৰো, ধম্মানুধম্মপটিপত্তি. ইমে খো, ভিক্খৱে, চত্তাৰো ধম্মা ভাৱিতা বহুলীকতা পঞ্ঞাপটিলাভায সংৱত্তন্তি …পে… নিব্বেধিকপঞ্ঞতায সংৱত্তন্তী’’তি এৱং মাতিকং ঠপেত্ৱা ৱিত্থাৰিতানেৱ. ৱুত্তঞ্হেতং (পটি. ম. ৩.৪) –

পঞ্ঞাপটিলাভায সংৱত্তন্তীতি. ‘‘কতমো পঞ্ঞাপটিলাভো? চতুন্নং মগ্গঞাণানং, চতুন্নং ফলঞাণানং, চতুন্নং পটিসম্ভিদাঞাণানং, ছন্নং অভিঞ্ঞাঞাণানং, তেসত্ততীনং ঞাণানং, সত্তসত্ততীনং ঞাণানং লাভো পটিলাভো পত্তিসম্পত্তি ফস্সনা সচ্ছিকিৰিযা উপসম্পদা, পঞ্ঞাপটিলাভায সংৱত্তন্তীতি অযং পঞ্ঞাপটিলাভো.

পঞ্ঞাৱুদ্ধিযা সংৱত্তন্তীতি. ‘‘কতমা পঞ্ঞাৱুদ্ধি? সত্তন্নঞ্চ সেক্খানং পুথুজ্জনকল্যাণকস্স চ পঞ্ঞা ৱড্ঢতি, অৰহতো পঞ্ঞা ৱড্ঢিতৱড্ঢনা, পঞ্ঞাৱুদ্ধিযা সংৱত্তন্তীতি অযং পঞ্ঞাৱুদ্ধি.

পঞ্ঞাৱেপুল্লায সংৱত্তন্তীতি. ‘‘কতমং পঞ্ঞাৱেপুল্লং? সত্তন্নঞ্চ সেক্খানং পুথুজ্জনকল্যাণকস্স চ পঞ্ঞা ৱেপুল্লং গচ্ছতি, অৰহতো পঞ্ঞা ৱেপুল্লং গতা, পঞ্ঞাৱেপুল্লায সংৱত্তন্তীতি ইদং পঞ্ঞাৱেপুল্লং.

মহাপঞ্ঞতায সংৱত্তন্তীতি. ‘‘কতমা মহাপঞ্ঞা? মহন্তে অত্থে পৰিগ্গণ্হাতীতি মহাপঞ্ঞা, মহন্তে ধম্মে…পে… মহন্তা নিৰুত্তিযো, মহন্তানি পটিভানানি, মহন্তে সীলক্খন্ধে, মহন্তে সমাধিপঞ্ঞাৱিমুত্তিৱিমুত্তিঞাণদস্সনক্খন্ধে, মহন্তানি ঠানাট্ঠানানি, মহন্তা ৱিহাৰসমাপত্তিযো, মহন্তানি অৰিযসচ্চানি, মহন্তে সতিপট্ঠানে, সম্মপ্পধানে, ইদ্ধিপাদে, মহন্তানি ইন্দ্ৰিযানি, মহন্তানি বলানি, মহন্তে বোজ্ঝঙ্গে, মহন্তে অৰিযমগ্গে, মহন্তানি সামঞ্ঞফলানি, মহাভিঞ্ঞাযো, মহন্তং পৰমত্থং নিব্বানং পৰিগ্গণ্হাতীতি মহাপঞ্ঞা, মহাপঞ্ঞতায সংৱত্তন্তীতি অযং মহাপঞ্ঞা.

পুথুপঞ্ঞতায সংৱত্তন্তীতি. ‘‘কতমা পুথুপঞ্ঞা? পুথু নানাক্খন্ধেসু ঞাণং পৱত্ততীতি পুথুপঞ্ঞা. পুথু নানাধাতূসু, পুথু নানাআযতনেসু, পুথু নানাপটিচ্চসমুপ্পাদেসু, পুথু নানাসুঞ্ঞতমনুপলব্ভেসু, পুথু নানাঅত্থেসু, ধম্মেসু, নিৰুত্তীসু, পটিভানেসু, পুথু নানাসীলক্খন্ধেসু, সমাধিপঞ্ঞাৱিমুত্তিৱিমুত্তিঞাণদস্সনক্খন্ধেসু, পুথু নানাঠানাট্ঠানেসু, পুথু নানাৱিহাৰসমাপত্তীসু, পুথু নানাঅৰিযসচ্চেসু, পুথু নানাসতিপট্ঠানেসু, সম্মপ্পধানেসু, ইদ্ধিপাদেসু, ইন্দ্ৰিযেসু, বলেসু, বোজ্ঝঙ্গেসু, পুথু নানাঅৰিযমগ্গেসু, পুথু নানাসামঞ্ঞফলেসু, পুথু নানাঅভিঞ্ঞাসু ঞাণং পৱত্ততীতি পুথুপঞ্ঞা. পুথু নানাজনসাধাৰণে ধম্মে সমতিক্কম্ম পৰমত্থে নিব্বানে ঞাণং পৱত্ততীতি পুথুপঞ্ঞা. পুথুপঞ্ঞতায সংৱত্তন্তীতি অযং পুথুপঞ্ঞা.

ৱিপুলপঞ্ঞতায সংৱত্তন্তীতি. ‘‘কতমা ৱিপুলপঞ্ঞা? ৱিপুলে অত্থে পৰিগণ্হাতীতি ৱিপুলপঞ্ঞা…পে… ৱিপুলং পৰমত্থং নিব্বানং পৰিগণ্হাতীতি ৱিপুলপঞ্ঞা, ৱিপুলপঞ্ঞতায সংৱত্তন্তীতি অযং ৱিপুলপঞ্ঞা.

গম্ভীৰপঞ্ঞতায সংৱত্তন্তীতি. ‘‘কতমা গম্ভীৰপঞ্ঞা? গম্ভীৰেসু খন্ধেসু ঞাণং পৱত্ততীতি গম্ভীৰপঞ্ঞা. পুথুপঞ্ঞাসদিসো ৱিত্থাৰো. গম্ভীৰে পৰমত্থে নিব্বানে ঞাণং পৱত্ততীতি গম্ভীৰপঞ্ঞা, গম্ভীৰপঞ্ঞতায সংৱত্তন্তীতি অযং গম্ভীৰপঞ্ঞা.

অসামন্তপঞ্ঞতায সংৱত্তন্তীতি. ‘‘কতমা অসামন্তপঞ্ঞা? যস্স পুগ্গলস্স অত্থৱৱত্থানতো অত্থপটিসম্ভিদা অধিগতা হোতি সচ্ছিকতা ফস্সিতা পঞ্ঞায. ধম্মনিৰুত্তিপটিভানৱৱত্থানতো পটিভানপটিসম্ভিদা অধিগতা হোতি সচ্ছিকতা ফস্সিতা পঞ্ঞায, তস্স অত্থে চ ধম্মে চ নিৰুত্তিযা চ পটিভানে চ ন অঞ্ঞো কোচি সক্কোতি অভিসম্ভৱিতুং, অনভিসম্ভৱনীযো চ সো অঞ্ঞেহীতি অসামন্তপঞ্ঞো.

পুথুজ্জনকল্যাণকস্স পঞ্ঞা অট্ঠমকস্স পঞ্ঞায দূৰে ৱিদূৰে সুৱিদূৰে ন সন্তিকে ন সামন্তা, পুথুজ্জনকল্যাণকং উপাদায অট্ঠমকো অসামন্তপঞ্ঞো. অট্ঠমকস্স পঞ্ঞা সোতাপন্নস্স পঞ্ঞায দূৰে…পে… অট্ঠমকং উপাদায সোতাপন্নো অসামন্তপঞ্ঞো. সোতাপন্নস্স পঞ্ঞা সকদাগামিস্স পঞ্ঞায. সকদাগামিস্স পঞ্ঞা অনাগামিস্স পঞ্ঞায. অনাগামিস্স পঞ্ঞা অৰহতো পঞ্ঞায. অৰহতো পঞ্ঞা পচ্চেকবুদ্ধস্স পঞ্ঞায দূৰে ৱিদূৰে সুৱিদূৰে ন সন্তিকে ন সামন্তা, অৰহন্তং উপাদায পচ্চেকবুদ্ধো অসামন্তপঞ্ঞো. পচ্চেকবুদ্ধঞ্চ সদেৱকঞ্চ লোকং উপাদায তথাগতো অৰহং সম্মাসম্বুদ্ধো অগ্গো অসামন্তপঞ্ঞো.

পঞ্ঞাপভেদকুসলো পভিন্নঞাণো…পে… তে পঞ্হং অভিসঙ্খৰিত্ৱা অভিসঙ্খৰিত্ৱা তথাগতং উপসঙ্কমিত্ৱা পুচ্ছন্তি গূড়্হানি চ পটিচ্ছন্নানি চ, কথিতা ৱিসজ্জিতা চ তে পঞ্হা ভগৱতা হোন্তি নিদ্দিট্ঠকাৰণা, উপক্খিত্তকা চ তে ভগৱতা সম্পজ্জন্তি. অথ খো ভগৱা তত্থ অতিৰোচতি যদিদং পঞ্ঞাযাতি অগ্গো অসামন্তপঞ্ঞো, অসামন্তপঞ্ঞতায সংৱত্তন্তীতি অযং অসামন্তপঞ্ঞা.

ভূৰিপঞ্ঞতায সংৱত্তন্তীতি. ‘‘কতমা ভূৰিপঞ্ঞা? ৰাগং অভিভুয্যতীতি ভূৰিপঞ্ঞা, অভিভৱিতাতি ভূৰিপঞ্ঞা. দোসং, মোহং, কোধং, উপনাহং, মক্খং, পলাসং, ইস্সং, মচ্ছৰিযং, মাযং, সাঠেয্যং, থম্ভং, সাৰম্ভং, মানং, অতিমানং, মদং, পমাদং, সব্বে কিলেসে, সব্বে দুচ্চৰিতে, সব্বে অভিসঙ্খাৰে, সব্বে ভৱগামিকম্মে অভিভুয্যতীতি ভূৰিপঞ্ঞা, অভিভৱিতাতি ভূৰিপঞ্ঞা. ৰাগো অৰি, তং অৰিং মদ্দনিপঞ্ঞাতি ভূৰিপঞ্ঞা, দোসো, মোহো…পে… সব্বে ভৱগামিকম্মা অৰি, তং অৰিং মদ্দনিপঞ্ঞাতি ভূৰিপঞ্ঞা. ভূৰি ৱুচ্চতি পথৱী, তায পথৱিসমায ৱিত্থতায ৱিপুলায পঞ্ঞায সমন্নাগতোতি ভূৰিপঞ্ঞো. অপিচ পঞ্ঞায এতং অধিৱচনং ভূৰি মেধা পৰিণাযিকাতি, ভূৰিপঞ্ঞতায সংৱত্তন্তীতি অযং ভূৰিপঞ্ঞা.

পঞ্ঞাবাহুল্লায সংৱত্তন্তীতি. ‘‘কতমং পঞ্ঞাবাহুল্লং? ইধেকচ্চো পঞ্ঞাগৰুকো হোতি পঞ্ঞাচৰিতো পঞ্ঞাসযো পঞ্ঞাধিমুত্তো পঞ্ঞাধজো পঞ্ঞাকেতু পঞ্ঞাধিপতেয্যো ৱিচযবহুলো পৱিচযবহুলো ওক্খাযনবহুলো সমোক্খাযনবহুলো সম্পেক্খাযনধম্মো ৱিভূতৱিহাৰী তচ্চৰিতো তগ্গৰুকো তব্বহুলো তন্নিন্নো তপ্পোণো তপ্পব্ভাৰো তদধিমুত্তো তদাধিপতেয্যো, যথা গণগৰুকো ৱুচ্চতি গণবাহুলিকোতি, চীৱৰগৰুকো পত্তগৰুকো সেনাসনগৰুকো ৱুচ্চতি সেনাসনবাহুলিকোতি, এৱমেৱং ইধেকচ্চো পঞ্ঞাগৰুকো হোতি পঞ্ঞাচৰিতো…পে… তদাধিপতেয্যো, পঞ্ঞাবাহুল্লায সংৱত্তন্তীতি ইদং পঞ্ঞাবাহুল্লং.

সীঘপঞ্ঞতায সংৱত্তন্তীতি. ‘‘কতমা সীঘপঞ্ঞা? সীঘং সীঘং সীলানি পৰিপূৰেতীতি সীঘপঞ্ঞা. সীঘং সীঘং ইন্দ্ৰিযসংৱৰং, ভোজনে মত্তঞ্ঞুতং, জাগৰিযানুযোগং, সীলক্খন্ধং, সমাধি-পঞ্ঞা-ৱিমুত্তি-ৱিমুত্তিঞাণদস্সনক্খন্ধং পৰিপূৰেতীতি সীঘপঞ্ঞা. সীঘং সীঘং ঠানাট্ঠানানি পটিৱিজ্ঝতি. ৱিহাৰসমাপত্তিযো পৰিপূৰেতি. অৰিযসচ্চানি পটিৱিজ্ঝতি. সতিপট্ঠানে ভাৱেতি. সম্মপ্পধানে ইদ্ধিপাদে ইন্দ্ৰিযানি বলানি বোজ্ঝঙ্গে অৰিযমগ্গং ভাৱেতীতি সীঘপঞ্ঞা. সীঘং সীঘং সামঞ্ঞফলানি সচ্ছিকৰোতীতি সীঘপঞ্ঞা. সীঘং সীঘং অভিঞ্ঞাযো পটিৱিজ্ঝতীতি সীঘপঞ্ঞা. সীঘং সীঘং পৰমত্থং নিব্বানং সচ্ছিকৰোতীতি সীঘপঞ্ঞা, সীঘপঞ্ঞতায সংৱত্তন্তীতি অযং সীঘপঞ্ঞা.

লহুপঞ্ঞতায সংৱত্তন্তীতি. ‘‘কতমা লহুপঞ্ঞা? লহুং লহুং সীলানি পৰিপূৰেতীতি লহুপঞ্ঞা…পে… লহুপঞ্ঞতায সংৱত্তন্তীতি অযং লহুপঞ্ঞা.

হাসপঞ্ঞতায সংৱত্তন্তীতি. ‘‘কতমা হাসপঞ্ঞা? ইধেকচ্চো ৱেদবহুলো তুট্ঠিবহুলো হাসবহুলো পামোজ্জবহুলো সীলানি পৰিপূৰেতীতি হাসপঞ্ঞা…পে… পৰমত্থং নিব্বানং সচ্ছিকৰোতীতি হাসপঞ্ঞা, হাসপঞ্ঞতায সংৱত্তন্তীতি অযং হাসপঞ্ঞা.

জৱনপঞ্ঞতায সংৱত্তন্তীতি. ‘‘কতমা জৱনপঞ্ঞা? যং কিঞ্চি ৰূপং অতীতানাগতপচ্চুপ্পন্নং, যা কাচি ৱেদনা, যা কাচি সঞ্ঞা, যে কেচি সঙ্খাৰা, যংকিঞ্চি ৱিঞ্ঞাণং অতীতানাগতপচ্চুপ্পন্নং অজ্ঝত্তং ৱা বহিদ্ধা ৱা ওড়াৰিকং ৱা সুখুমং ৱা হীনং ৱা পণীতং ৱা যং দূৰে সন্তিকে ৱা, সব্বং ৱিঞ্ঞাণং অনিচ্চতো খিপ্পং জৱতীতি জৱনপঞ্ঞা, দুক্খতো, অনত্ততো খিপ্পং জৱতীতি জৱনপঞ্ঞা. চক্খুং…পে… জৰামৰণং অতীতানাগতপচ্চুপ্পন্নং অনিচ্চতো, দুক্খতো, অনত্ততো খিপ্পং জৱতীতি জৱনপঞ্ঞা. ৰূপং অতীতানাগতপচ্চুপ্পন্নং অনিচ্চং খযট্ঠেন, দুক্খং ভযট্ঠেন, অনত্তা অসাৰকট্ঠেনাতি তুলযিত্ৱা তীৰযিত্ৱা ৱিভাৱযিত্ৱা ৱিভূতং কত্ৱা ৰূপনিৰোধে নিব্বানে খিপ্পং জৱতীতি জৱনপঞ্ঞা…পে… জৰামৰণনিৰোধে নিব্বানে খিপ্পং জৱতীতি জৱনপঞ্ঞা. ৰূপং…পে… জৰামৰণং অতীতানাগতপচ্চুপ্পন্নং খযধম্মং ৱযধম্মং ৱিৰাগধম্মং নিৰোধধম্মন্তি তুলযিত্ৱা তীৰযিত্ৱা ৱিভাৱযিত্ৱা ৱিভূতং কত্ৱা জৰামৰণনিৰোধে নিব্বানে খিপ্পং জৱতীতি জৱনপঞ্ঞা, জৱনপঞ্ঞতায সংৱত্তন্তীতি অযং জৱনপঞ্ঞা.

তিক্খপঞ্ঞতায সংৱত্তন্তীতি. ‘‘কতমা তিক্খপঞ্ঞা? খিপ্পং কিলেসে ছিন্দতীতি তিক্খপঞ্ঞা. উপ্পন্নং কামৱিতক্কং, ৱ্যাপাদৱিতক্কং, ৱিহিংসাৱিতক্কং উপ্পন্নুপ্পন্নে পাপকে অকুসলে ধম্মে নাধিৱাসেতি পজহতি ৱিনোদেতি ব্যন্তীকৰোতি অনভাৱং গমেতীতি তিক্খপঞ্ঞা. উপ্পন্নং ৰাগং, দোসং, মোহং…পে… সব্বে ভৱগামিকম্মে নাধিৱাসেতি পজহতি ৱিনোদেতি ব্যন্তীকৰোতি অনভাৱং গমেতীতি তিক্খপঞ্ঞা. একস্মিং আসনে চত্তাৰো অৰিযমগ্গা চত্তাৰি সামঞ্ঞফলানি চতস্সো পটিসম্ভিদাযো ছ অভিঞ্ঞাযো অধিগতা হোন্তি সচ্ছিকতা ফস্সিতা পঞ্ঞাযাতি তিক্খপঞ্ঞা, তিক্খপঞ্ঞতায সংৱত্তন্তীতি অযং তিক্খপঞ্ঞা.

নিব্বেধিকপঞ্ঞতায সংৱত্তন্তীতি. ‘‘কতমা নিব্বেধিকপঞ্ঞা? ইধেকচ্চো সব্বসঙ্খাৰেসু উব্বেগবহুলো হোতি উত্তাসবহুলো উক্কণ্ঠনবহুলো অৰতিবহুলো অনভিৰতিবহুলো বহিমুখো ন ৰমতি সব্বসঙ্খাৰেসু, অনিব্বিদ্ধপুব্বং অপ্পদালিতপুব্বং লোভক্খন্ধং নিব্বিজ্ঝতি পদালেতীতি নিব্বেধিকপঞ্ঞা, অনিব্বিদ্ধপুব্বং অপ্পদালিতপুব্বং দোসক্খন্ধং, মোহক্খন্ধং, কোধং, উপনাহং…পে… সব্বে ভৱগামিকম্মে নিব্বিজ্ঝতি পদালেতীতি নিব্বেধিকপঞ্ঞা, নিব্বেধিকপঞ্ঞতায সংৱত্তন্তীতি অযং নিব্বেধিকপঞ্ঞা’’.

এৱং পটিসম্ভিদামগ্গে ৱুত্তনযেনেৱেত্থ অত্থো ৱেদিতব্বো. কেৱলঞ্হি তত্থ বহুৱচনং, ইধ একৱচনন্তি অযমেৱ ৱিসেসো. সেসং তাদিসমেৱাতি. ইমা চ পন সোড়স মহাপঞ্ঞা লোকিযলোকুত্তৰমিস্সকাৱ কথিতা.

কাযগতাসতিৱগ্গৱণ্ণনা.