১. পদসোধনৱাৰো
(ক) অনুলোমং
৯৪. (ক) চক্খু চক্খুন্দ্ৰিযন্তি?
দিব্বচক্খু পঞ্ঞাচক্খু চক্খু, ন চক্খুন্দ্ৰিযং. চক্খুন্দ্ৰিযং চক্খু চেৱ চক্খুন্দ্ৰিযঞ্চ.
(খ) চক্খুন্দ্ৰিযং চক্খূতি? আমন্তা.
(ক) সোতং সোতিন্দ্ৰিযন্তি?
দিব্বসোতং তণ্হাসোতং সোতং, ন সোতিন্দ্ৰিযং. সোতিন্দ্ৰিযং সোতঞ্চেৱ সোতিন্দ্ৰিযঞ্চ.
(খ) সোতিন্দ্ৰিযং সোতন্তি? আমন্তা.
(ক) ঘানং ঘানিন্দ্ৰিযন্তি? আমন্তা.
(খ) ঘানিন্দ্ৰিযং ঘানন্তি? আমন্তা.
(ক) জিৱ্হা জিৱ্হিন্দ্ৰিযন্তি? আমন্তা.
(খ) জিৱ্হিন্দ্ৰিযং জিৱ্হাতি? আমন্তা.
(ক) কাযো কাযিন্দ্ৰিযন্তি?
কাযিন্দ্ৰিযং ঠপেত্ৱা অৱসেসো কাযো [অৱসেসা কাযো (সী. স্যা. ক.)], ন কাযিন্দ্ৰিযং. কাযিন্দ্ৰিযং কাযো চেৱ কাযিন্দ্ৰিযঞ্চ.
(খ) কাযিন্দ্ৰিযং কাযোতি? আমন্তা.
(ক) মনো মনিন্দ্ৰিযন্তি? আমন্তা.
(খ) মনিন্দ্ৰিযং মনোতি? আমন্তা.
(ক) ইত্থী ইত্থিন্দ্ৰিযন্তি? নো.
(খ) ইত্থিন্দ্ৰিযং ইত্থীতি? নো.
(ক) পুৰিসো পুৰিসিন্দ্ৰিযন্তি? নো.
(খ) পুৰিসিন্দ্ৰিযং পুৰিসোতি? নো.
(ক) জীৱিতং জীৱিতিন্দ্ৰিযন্তি? আমন্তা.
(খ) জীৱিতিন্দ্ৰিযং জীৱিতন্তি? আমন্তা.
(ক) সুখং সুখিন্দ্ৰিযন্তি? আমন্তা.
(খ) সুখিন্দ্ৰিযং সুখন্তি? আমন্তা.
(ক) দুক্খং দুক্খিন্দ্ৰিযন্তি? আমন্তা.
(খ) দুক্খিন্দ্ৰিযং দুক্খন্তি? আমন্তা.
(ক) সোমনস্সং সোমনস্সিন্দ্ৰিযন্তি? আমন্তা.
(খ) সোমনস্সিন্দ্ৰিযং সোমনস্সন্তি? আমন্তা.
(ক) দোমনস্সং দোমনস্সিন্দ্ৰিযন্তি? আমন্তা.
(খ) দোমনস্সিন্দ্ৰিযং দোমনস্সন্তি? আমন্তা.
(ক) উপেক্খা উপেক্খিন্দ্ৰিযন্তি?
উপেক্খিন্দ্ৰিযং ঠপেত্ৱা অৱসেসা উপেক্খা, ন উপেক্খিন্দ্ৰিযং. উপেক্খিন্দ্ৰিযং উপেক্খা চেৱ উপেক্খিন্দ্ৰিযঞ্চ.
(খ) উপেক্খিন্দ্ৰিযং উপেক্খাতি? আমন্তা.
(ক) সদ্ধা সদ্ধিন্দ্ৰিযন্তি? আমন্তা.
(খ) সদ্ধিন্দ্ৰিযং সদ্ধাতি? আমন্তা.
(ক) ৱীৰিযং ৱীৰিযিন্দ্ৰিযন্তি? আমন্তা.
(খ) ৱীৰিযিন্দ্ৰিযং ৱীৰিযন্তি? আমন্তা.
(ক) সতি সতিন্দ্ৰিযন্তি? আমন্তা.
(খ) সতিন্দ্ৰিযং সতীতি? আমন্তা.
(ক) সমাধি সমাধিন্দ্ৰিযন্তি? আমন্তা.
(খ) সমাধিন্দ্ৰিযং সমাধীতি? আমন্তা.
(ক) পঞ্ঞা পঞ্ঞিন্দ্ৰিযন্তি? আমন্তা.
(খ) পঞ্ঞিন্দ্ৰিযং পঞ্ঞাতি? আমন্তা.
(ক) অনঞ্ঞাতঞ্ঞস্সামীতি অনঞ্ঞাতঞ্ঞস্সামীতিন্দ্ৰিযন্তি? আমন্তা.
(খ) অনঞ্ঞাতঞ্ঞস্সামীতিন্দ্ৰিযং অনঞ্ঞাতঞ্ঞস্সামীতি? আমন্তা.
(ক) অঞ্ঞং অঞ্ঞিন্দ্ৰিযন্তি? আমন্তা.
(খ) অঞ্ঞিন্দ্ৰিযং অঞ্ঞন্তি? আমন্তা.
(ক) অঞ্ঞাতাৱী অঞ্ঞাতাৱিন্দ্ৰিযন্তি? আমন্তা.
(খ) অঞ্ঞাতাৱিন্দ্ৰিযং অঞ্ঞাতাৱীতি? আমন্তা.
(খ) পচ্চনীকং
৯৫. (ক) ন চক্খু ন চক্খুন্দ্ৰিযন্তি? আমন্তা.
(খ) ন চক্খুন্দ্ৰিযং ন চক্খূতি?
দিব্বচক্খু পঞ্ঞাচক্খু ন চক্খুন্দ্ৰিযং, চক্খু. চক্খুঞ্চ চক্খুন্দ্ৰিযঞ্চ ঠপেত্ৱা অৱসেসা ন চেৱ চক্খু ন চ চক্খুন্দ্ৰিযং.
(ক) ন সোতং ন সোতিন্দ্ৰিযন্তি? আমন্তা.
(খ) ন সোতিন্দ্ৰিযং ন সোতন্তি?
দিব্বসোতং তণ্হাসোতং ন সোতিন্দ্ৰিযং, সোতং. সোতঞ্চ সোতিন্দ্ৰিযঞ্চ ঠপেত্ৱা অৱসেসা ন চেৱ সোতং ন চ সোতিন্দ্ৰিযং.
(ক) ন ঘানং ন ঘানিন্দ্ৰিযন্তি? আমন্তা.
(খ) ন ঘানিন্দ্ৰিযং ন ঘানন্তি? আমন্তা.
(ক) ন জিৱ্হা ন জিৱ্হিন্দ্ৰিযন্তি? আমন্তা.
(খ) ন জিৱ্হিন্দ্ৰিযং ন জিৱ্হাতি? আমন্তা.
(ক) ন কাযো ন কাযিন্দ্ৰিযন্তি? আমন্তা.
(খ) ন কাযিন্দ্ৰিযং ন কাযোতি?
কাযিন্দ্ৰিযং ঠপেত্ৱা অৱসেসো ন কাযিন্দ্ৰিযং, কাযো. কাযঞ্চ কাযিন্দ্ৰিযঞ্চ ঠপেত্ৱা অৱসেসো ন চেৱ কাযো ন চ কাযিন্দ্ৰিযং.
(ক) ন মনো ন মনিন্দ্ৰিযন্তি? আমন্তা.
(খ) ন মনিন্দ্ৰিযং ন মনোতি? আমন্তা.
(ক) ন ইত্থী ন ইত্থিন্দ্ৰিযন্তি?
ইত্থিন্দ্ৰিযং ন ইত্থী, ইত্থিন্দ্ৰিযং. ইত্থিঞ্চ ইত্থিন্দ্ৰিযঞ্চ ঠপেত্ৱা অৱসেসা ন চেৱ ইত্থী ন চ ইত্থিন্দ্ৰিযং.
(খ) ন ইত্থিন্দ্ৰিযং ন ইত্থীতি?
ইত্থী ন ইত্থিন্দ্ৰিযং, ইত্থী. ইত্থিঞ্চ ইত্থিন্দ্ৰিযঞ্চ ঠপেত্ৱা অৱসেসা ন চেৱ ইত্থী ন চ ইত্থিন্দ্ৰিযং.
(ক) ন পুৰিসো ন পুৰিসিন্দ্ৰিযন্তি?
পুৰিসিন্দ্ৰিযং ন পুৰিসো, পুৰিসিন্দ্ৰিযং. পুৰিসঞ্চ পুৰিসিন্দ্ৰিযঞ্চ ঠপেত্ৱা অৱসেসা ন চেৱ পুৰিসো ন চ পুৰিসিন্দ্ৰিযং.
(খ) ন পুৰিসিন্দ্ৰিযং ন পুৰিসোতি?
পুৰিসো ন পুৰিসিন্দ্ৰিযং, পুৰিসো. পুৰিসঞ্চ পুৰিসিন্দ্ৰিযঞ্চ ঠপেত্ৱা অৱসেসা ন চেৱ পুৰিসো ন চ পুৰিসিন্দ্ৰিযং.
(ক) ন জীৱিতং ন জীৱিতিন্দ্ৰিযন্তি? আমন্তা.
(খ) ন জীৱিতিন্দ্ৰিযং ন জীৱিতন্তি? আমন্তা.
(ক) ন সুখং ন সুখিন্দ্ৰিযন্তি? আমন্তা.
(খ) ন সুখিন্দ্ৰিযং ন সুখন্তি? আমন্তা.
(ক) ন দুক্খং ন দুক্খিন্দ্ৰিযন্তি? আমন্তা.
(খ) ন দুক্খিন্দ্ৰিযং ন দুক্খন্তি? আমন্তা.
(ক) ন সোমনস্সং ন সোমনস্সিন্দ্ৰিযন্তি? আমন্তা.
(খ) ন সোমনস্সিন্দ্ৰিযং ন সোমনস্সন্তি? আমন্তা.
(ক) ন দোমনস্সং ন দোমনস্সিন্দ্ৰিযন্তি? আমন্তা.
(খ) ন দোমনস্সিন্দ্ৰিযং ন দোমনস্সন্তি? আমন্তা.
(ক) ন উপেক্খা ন উপেক্খিন্দ্ৰিযন্তি? আমন্তা.
(খ) ন উপেক্খিন্দ্ৰিযং ন উপেক্খাতি?
উপেক্খিন্দ্ৰিযং ঠপেত্ৱা অৱসেসা ন উপেক্খিন্দ্ৰিযং, উপেক্খা. উপেক্খঞ্চ উপেক্খিন্দ্ৰিযঞ্চ ঠপেত্ৱা অৱসেসা ন চেৱ উপেক্খা ন চ উপেক্খিন্দ্ৰিযং.
(ক) ন সদ্ধা ন সদ্ধিন্দ্ৰিযন্তি? আমন্তা.
(খ) ন সদ্ধিন্দ্ৰিযং ন সদ্ধাতি? আমন্তা.
(ক) ন ৱীৰিযং ন ৱীৰিযিন্দ্ৰিযন্তি? আমন্তা.
(খ) ন ৱীৰিযিন্দ্ৰিযং ন ৱীৰিযন্তি? আমন্তা.
(ক) ন সতি ন সতিন্দ্ৰিযন্তি? আমন্তা.
(খ) ন সতিন্দ্ৰিযং ন সতীতি? আমন্তা.
(ক) ন সমাধি ন সমাধিন্দ্ৰিযন্তি? আমন্তা.
(খ) ন সমাধিন্দ্ৰিযং ন সমাধীতি? আমন্তা.
(ক) ন পঞ্ঞা ন পঞ্ঞিন্দ্ৰিযন্তি? আমন্তা.
(খ) ন পঞ্ঞিন্দ্ৰিযং ন পঞ্ঞাতি? আমন্তা.
(ক) ন অনঞ্ঞাতঞ্ঞস্সামীতি ন অনঞ্ঞাতঞ্ঞস্সামীতিন্দ্ৰিযন্তি? আমন্তা.
(খ) ন অনঞ্ঞাতঞ্ঞস্সামীতিন্দ্ৰিযং ন অনঞ্ঞাতঞ্ঞস্সামীতি? আমন্তা.
(ক) ন অঞ্ঞং ন অঞ্ঞিন্দ্ৰিযন্তি? আমন্তা.
(খ) ন অঞ্ঞিন্দ্ৰিযং ন অঞ্ঞন্তি? আমন্তা.
(ক) ন অঞ্ঞাতাৱী ন অঞ্ঞাতাৱিন্দ্ৰিযন্তি? আমন্তা.
(খ) ন অঞ্ঞাতাৱিন্দ্ৰিযং ন অঞ্ঞাতাৱীতি? আমন্তা.