(৪) পচ্চুপ্পন্নাতীতৱাৰো

(ক) অনুলোমপুগ্গলো

১৩৩. (ক) যস্স কুসলা ধম্মা নিৰুজ্ঝন্তি তস্স অকুসলা ধম্মা নিৰুজ্ঝিত্থাতি? আমন্তা.

(খ) যস্স ৱা পন অকুসলা ধম্মা নিৰুজ্ঝিত্থ তস্স কুসলা ধম্মা নিৰুজ্ঝন্তীতি?

সব্বেসং চিত্তস্স উপ্পাদক্খণে কুসলৱিপ্পযুত্তচিত্তস্স ভঙ্গক্খণে নিৰোধসমাপন্নানং অসঞ্ঞসত্তানং তেসং অকুসলা ধম্মা নিৰুজ্ঝিত্থ, নো চ তেসং কুসলা ধম্মা নিৰুজ্ঝন্তি. কুসলানং ভঙ্গক্খণে তেসং অকুসলা চ ধম্মা নিৰুজ্ঝিত্থ কুসলা চ ধম্মা নিৰুজ্ঝন্তি.

(ক) যস্স কুসলা ধম্মা নিৰুজ্ঝন্তি তস্স অব্যাকতা ধম্মা নিৰুজ্ঝিত্থাতি? আমন্তা.

(খ) যস্স ৱা পন অব্যাকতা ধম্মা নিৰুজ্ঝিত্থ তস্স কুসলা ধম্মা নিৰুজ্ঝন্তীতি?

সব্বেসং চিত্তস্স উপ্পাদক্খণে কুসলৱিপ্পযুত্তচিত্তস্স ভঙ্গক্খণে নিৰোধসমাপন্নানং অসঞ্ঞসত্তানং তেসং অব্যাকতা ধম্মা নিৰুজ্ঝিত্থ, নো চ তেসং কুসলা ধম্মা নিৰুজ্ঝন্তি. কুসলানং ভঙ্গক্খণে তেসং অব্যাকতা চ ধম্মা নিৰুজ্ঝিত্থ কুসলা চ ধম্মা নিৰুজ্ঝন্তি.

১৩৪. (ক) যস্স অকুসলা ধম্মা নিৰুজ্ঝন্তি তস্স অব্যাকতা ধম্মা নিৰুজ্ঝিত্থাতি? আমন্তা.

(খ) যস্স ৱা পন অব্যাকতা ধম্মা নিৰুজ্ঝিত্থ তস্স অকুসলা ধম্মা নিৰুজ্ঝন্তীতি?

সব্বেসং চিত্তস্স উপ্পাদক্খণে অকুসলৱিপ্পযুত্তচিত্তস্স ভঙ্গক্খণে নিৰোধসমাপন্নানং অসঞ্ঞসত্তানং তেসং অব্যাকতা ধম্মা নিৰুজ্ঝিত্থ, নো চ তেসং অকুসলা ধম্মা নিৰুজ্ঝন্তি. অকুসলানং ভঙ্গক্খণে তেসং অব্যাকতা চ ধম্মা নিৰুজ্ঝিত্থ অকুসলা চ ধম্মা নিৰুজ্ঝন্তি.

(খ) অনুলোমওকাসো

১৩৫. যত্থ কুসলা ধম্মা নিৰুজ্ঝন্তি তত্থ অকুসলা ধম্মা নিৰুজ্ঝিত্থাতি?…পে….

(গ) অনুলোমপুগ্গলোকাসা

১৩৬. (ক) যস্স যত্থ কুসলা ধম্মা নিৰুজ্ঝন্তি তস্স তত্থ অকুসলা ধম্মা নিৰুজ্ঝিত্থাতি? আমন্তা.

(খ) যস্স ৱা পন যত্থ অকুসলা ধম্মা নিৰুজ্ঝিত্থ তস্স তত্থ কুসলা ধম্মা নিৰুজ্ঝন্তীতি?

সব্বেসং চিত্তস্স উপ্পাদক্খণে কুসলৱিপ্পযুত্তচিত্তস্স ভঙ্গক্খণে তেসং তত্থ অকুসলা ধম্মা নিৰুজ্ঝিত্থ, নো চ তেসং তত্থ কুসলা ধম্মা নিৰুজ্ঝন্তি. কুসলানং ভঙ্গক্খণে তেসং তত্থ অকুসলা চ ধম্মা নিৰুজ্ঝিত্থ কুসলা চ ধম্মা নিৰুজ্ঝন্তি.

(ক) যস্স যত্থ কুসলা ধম্মা নিৰুজ্ঝন্তি তস্স তত্থ অব্যাকতা ধম্মা নিৰুজ্ঝিত্থাতি? আমন্তা.

(খ) যস্স ৱা পন যত্থ অব্যাকতা ধম্মা নিৰুজ্ঝিত্থ তস্স তত্থ কুসলা ধম্মা নিৰুজ্ঝন্তীতি?

সব্বেসং চিত্তস্স উপ্পাদক্খণে কুসলৱিপ্পযুত্তচিত্তস্স ভঙ্গক্খণে অসঞ্ঞসত্তানং তেসং তত্থ অব্যাকতা ধম্মা নিৰুজ্ঝিত্থ, নো চ তেসং তত্থ কুসলা ধম্মা নিৰুজ্ঝন্তি. কুসলানং ভঙ্গক্খণে তেসং তত্থ অব্যাকতা চ ধম্মা নিৰুজ্ঝিত্থ কুসলা চ ধম্মা নিৰুজ্ঝন্তি.

১৩৭. (ক) যস্স যত্থ অকুসলা ধম্মা নিৰুজ্ঝন্তি তস্স তত্থ অব্যাকতা ধম্মা নিৰুজ্ঝিত্থাতি? আমন্তা.

(খ) যস্স ৱা পন যত্থ অব্যাকতা ধম্মা নিৰুজ্ঝিত্থ তস্স তত্থ অকুসলা ধম্মা নিৰুজ্ঝন্তীতি?

সব্বেসং চিত্তস্স উপ্পাদক্খণে অকুসলৱিপ্পযুত্তচিত্তস্স ভঙ্গক্খণে অসঞ্ঞসত্তানং তেসং তত্থ অব্যাকতা ধম্মা নিৰুজ্ঝিত্থ, নো চ তেসং তত্থ অকুসলা ধম্মা নিৰুজ্ঝন্তি. অকুসলানং ভঙ্গক্খণে তেসং তত্থ অব্যাকতা চ ধম্মা নিৰুজ্ঝিত্থ অকুসলা চ ধম্মা নিৰুজ্ঝন্তি.

(ঘ) পচ্চনীকপুগ্গলো

১৩৮. (ক) যস্স কুসলা ধম্মা ন নিৰুজ্ঝন্তি তস্স অকুসলা ধম্মা ন নিৰুজ্ঝিত্থাতি? নিৰুজ্ঝিত্থ.

(খ) যস্স ৱা পন অকুসলা ধম্মা ন নিৰুজ্ঝিত্থ তস্স কুসলা ধম্মা ন নিৰুজ্ঝন্তীতি? নত্থি.

(ক) যস্স কুসলা ধম্মা ন নিৰুজ্ঝন্তি তস্স অব্যাকতা ধম্মা ন নিৰুজ্ঝিত্থাতি? নিৰুজ্ঝিত্থ.

(খ) যস্স ৱা পন অব্যাকতা ধম্মা ন নিৰুজ্ঝিত্থ তস্স কুসলা ধম্মা ন নিৰুজ্ঝন্তীতি? নত্থি.

১৩৯. (ক) যস্স অকুসলা ধম্মা ন নিৰুজ্ঝন্তি তস্স অব্যাকতা ধম্মা ন নিৰুজ্ঝিত্থাতি? নিৰুজ্ঝিত্থ.

(খ) যস্স ৱা পন অব্যাকতা ধম্মা ন নিৰুজ্ঝিত্থ তস্স অকুসলা ধম্মা ন নিৰুজ্ঝন্তীতি? নত্থি.

(ঙ) পচ্চনীকওকাসো

১৪০. যত্থ কুসলা ধম্মা ন নিৰুজ্ঝন্তি তত্থ অকুসলা ধম্মা ন নিৰুজ্ঝিত্থাতি?…পে….

(চ) পচ্চনীকপুগ্গলোকাসা

১৪১. (ক) যস্স যত্থ কুসলা ধম্মা ন নিৰুজ্ঝন্তি তস্স তত্থ অকুসলা ধম্মা ন নিৰুজ্ঝিত্থাতি?

সব্বেসং চিত্তস্স উপ্পাদক্খণে কুসলৱিপ্পযুত্তচিত্তস্স ভঙ্গক্খণে তেসং তত্থ কুসলা ধম্মা ন নিৰুজ্ঝন্তি, নো চ তেসং তত্থ অকুসলা ধম্মা ন নিৰুজ্ঝিত্থ. সুদ্ধাৱাসানং দুতিযে চিত্তে ৱত্তমানে অসঞ্ঞসত্তানং তেসং তত্থ কুসলা চ ধম্মা ন নিৰুজ্ঝন্তি অকুসলা চ ধম্মা ন নিৰুজ্ঝিত্থ.

(খ) যস্স ৱা পন যত্থ অকুসলা ধম্মা ন নিৰুজ্ঝিত্থ তস্স তত্থ কুসলা ধম্মা ন নিৰুজ্ঝন্তীতি? আমন্তা.

(ক) যস্স যত্থ কুসলা ধম্মা ন নিৰুজ্ঝন্তি তস্স তত্থ অব্যাকতা ধম্মা ন নিৰুজ্ঝিত্থাতি?

সব্বেসং চিত্তস্স উপ্পাদক্খণে কুসলৱিপ্পযুত্তচিত্তস্স ভঙ্গক্খণে অসঞ্ঞসত্তানং তেসং তত্থ কুসলা ধম্মা ন নিৰুজ্ঝন্তি, নো চ তেসং তত্থ অব্যাকতা ধম্মা ন নিৰুজ্ঝিত্থ. সুদ্ধাৱাসং উপপজ্জন্তানং তেসং তত্থ কুসলা চ ধম্মা ন নিৰুজ্ঝন্তি অব্যাকতা চ ধম্মা ন নিৰুজ্ঝিত্থ.

(খ) যস্স ৱা পন যত্থ অব্যাকতা ধম্মা ন নিৰুজ্ঝিত্থ তস্স তত্থ কুসলা ধম্মা ন নিৰুজ্ঝন্তীতি? আমন্তা.

১৪২. (ক) যস্স যত্থ অকুসলা ধম্মা ন নিৰুজ্ঝন্তি তস্স তত্থ অব্যাকতা ধম্মা ন নিৰুজ্ঝিত্থাতি?

সব্বেসং চিত্তস্স উপ্পাদক্খণে অকুসলৱিপ্পযুত্তচিত্তস্স ভঙ্গক্খণে অসঞ্ঞসত্তানং তেসং তত্থ অকুসলা ধম্মা ন নিৰুজ্ঝন্তি, নো চ তেসং তত্থ অব্যাকতা ধম্মা ন নিৰুজ্ঝিত্থ. সুদ্ধাৱাসং উপপজ্জন্তানং তেসং তত্থ অকুসলা চ ধম্মা ন নিৰুজ্ঝন্তি অব্যাকতা চ ধম্মা ন নিৰুজ্ঝিত্থ.

(খ) যস্স ৱা পন যত্থ অব্যাকতা ধম্মা ন নিৰুজ্ঝিত্থ তস্স তত্থ অকুসলা ধম্মা ন নিৰুজ্ঝন্তীতি? আমন্তা.