(৩) অনাগতৱাৰো

(ক) অনুলোমপুগ্গলো

১৩৭. (ক) যস্স কাযসঙ্খাৰো উপ্পজ্জিস্সতি তস্স ৱচীসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন ৱচীসঙ্খাৰো নিৰুজ্ঝিস্সতি তস্স কাযসঙ্খাৰো উপ্পজ্জিস্সতীতি?

কামাৱচৰানং পচ্ছিমচিত্তস্স উপ্পাদক্খণে যস্স চিত্তস্স অনন্তৰা কামাৱচৰানং পচ্ছিমচিত্তং উপ্পজ্জিস্সতি ৰূপাৱচৰে অৰূপাৱচৰে পচ্ছিমভৱিকানং যে চ ৰূপাৱচৰং অৰূপাৱচৰং উপপজ্জিত্ৱা পৰিনিব্বাযিস্সন্তি তেসং চৱন্তানং তেসং ৱচীসঙ্খাৰো নিৰুজ্ঝিস্সতি, নো চ তেসং কাযসঙ্খাৰো উপ্পজ্জিস্সতি. ইতৰেসং তেসং ৱচীসঙ্খাৰো চ নিৰুজ্ঝিস্সতি কাযসঙ্খাৰো চ উপ্পজ্জিস্সতি.

(ক) যস্স কাযসঙ্খাৰো উপ্পজ্জিস্সতি তস্স চিত্তসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন চিত্তসঙ্খাৰো নিৰুজ্ঝিস্সতি তস্স কাযসঙ্খাৰো উপ্পজ্জিস্সতীতি?

কামাৱচৰানং পচ্ছিমচিত্তস্স উপ্পাদক্খণে যস্স চিত্তস্স অনন্তৰা কামাৱচৰানং পচ্ছিমচিত্তং উপ্পজ্জিস্সতি ৰূপাৱচৰে অৰূপাৱচৰে পচ্ছিমভৱিকানং যে চ ৰূপাৱচৰং অৰূপাৱচৰং উপপজ্জিত্ৱা পৰিনিব্বাযিস্সন্তি তেসং চৱন্তানং তেসং চিত্তসঙ্খাৰো নিৰুজ্ঝিস্সতি, নো চ তেসং কাযসঙ্খাৰো উপ্পজ্জিস্সতি. ইতৰেসং তেসং চিত্তসঙ্খাৰো চ নিৰুজ্ঝিস্সতি কাযসঙ্খাৰো চ উপ্পজ্জিস্সতি.

১৩৮. (ক) যস্স ৱচীসঙ্খাৰো উপ্পজ্জিস্সতি তস্স চিত্তসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন চিত্তসঙ্খাৰো নিৰুজ্ঝিস্সতি তস্স ৱচীসঙ্খাৰো উপ্পজ্জিস্সতীতি?

পচ্ছিমচিত্তস্স উপ্পাদক্খণে যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি তেসং চিত্তসঙ্খাৰো নিৰুজ্ঝিস্সতি, নো চ তেসং ৱচীসঙ্খাৰো উপ্পজ্জিস্সতি. ইতৰেসং তেসং চিত্তসঙ্খাৰো চ নিৰুজ্ঝিস্সতি ৱচীসঙ্খাৰো চ উপ্পজ্জিস্সতি.

(খ) অনুলোমওকাসো

১৩৯. যত্থ কাযসঙ্খাৰো উপ্পজ্জিস্সতি…পে….

(গ) অনুলোমপুগ্গলোকাসা

১৪০. (ক) যস্স যত্থ কাযসঙ্খাৰো উপ্পজ্জিস্সতি তস্স তত্থ ৱচীসঙ্খাৰো নিৰুজ্ঝিস্সতীতি?

দুতিযজ্ঝানং ততিযজ্ঝানং সমাপন্নানং তেসং তত্থ কাযসঙ্খাৰো উপ্পজ্জিস্সতি, নো চ তেসং তত্থ ৱচীসঙ্খাৰো নিৰুজ্ঝিস্সতি. পঠমজ্ঝানং সমাপন্নানং কামাৱচৰানং তেসং তত্থ কাযসঙ্খাৰো চ উপ্পজ্জিস্সতি ৱচীসঙ্খাৰো চ নিৰুজ্ঝিস্সতি.

(খ) যস্স ৱা পন যত্থ ৱচীসঙ্খাৰো নিৰুজ্ঝিস্সতি তস্স তত্থ কাযসঙ্খাৰো উপ্পজ্জিস্সতীতি?

কামাৱচৰানং পচ্ছিমচিত্তস্স উপ্পাদক্খণে যস্স চিত্তস্স অনন্তৰা কামাৱচৰানং পচ্ছিমচিত্তং উপ্পজ্জিস্সতি ৰূপাৱচৰানং অৰূপাৱচৰানং তেসং তত্থ ৱচীসঙ্খাৰো নিৰুজ্ঝিস্সতি, নো চ তেসং তত্থ কাযসঙ্খাৰো উপ্পজ্জিস্সতি. পঠমজ্ঝানং সমাপন্নানং ইতৰেসং কামাৱচৰানং তেসং তত্থ ৱচীসঙ্খাৰো চ নিৰুজ্ঝিস্সতি কাযসঙ্খাৰো চ উপ্পজ্জিস্সতি.

(ক) যস্স যত্থ কাযসঙ্খাৰো উপ্পজ্জিস্সতি তস্স তত্থ চিত্তসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন যত্থ চিত্তসঙ্খাৰো নিৰুজ্ঝিস্সতি তস্স তত্থ কাযসঙ্খাৰো উপ্পজ্জিস্সতীতি?

কামাৱচৰানং পচ্ছিমচিত্তস্স উপ্পাদক্খণে যস্স চিত্তস্স অনন্তৰা কামাৱচৰানং পচ্ছিমচিত্তং উপ্পজ্জিস্সতি চতুত্থজ্ঝানং সমাপন্নানং ৰূপাৱচৰানং অৰূপাৱচৰানং তেসং তত্থ চিত্তসঙ্খাৰো নিৰুজ্ঝিস্সতি, নো চ তেসং তত্থ কাযসঙ্খাৰো উপ্পজ্জিস্সতি. পঠমজ্ঝানং দুতিযজ্ঝানং ততিযজ্ঝানং সমাপন্নানং ইতৰেসং কামাৱচৰানং তেসং তত্থ চিত্তসঙ্খাৰো চ নিৰুজ্ঝিস্সতি কাযসঙ্খাৰো চ উপ্পজ্জিস্সতি.

১৪১. (ক) যস্স যত্থ ৱচীসঙ্খাৰো উপ্পজ্জিস্সতি তস্স তত্থ চিত্তসঙ্খাৰো নিৰুজ্ঝিস্সতীতি? আমন্তা.

(খ) যস্স ৱা পন যত্থ চিত্তসঙ্খাৰো নিৰুজ্ঝিস্সতি তস্স তত্থ ৱচীসঙ্খাৰো উপ্পজ্জিস্সতীতি?

পচ্ছিমচিত্তস্স উপ্পাদক্খণে যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং চতুত্থজ্ঝানং সমাপন্নানং তেসং তত্থ চিত্তসঙ্খাৰো নিৰুজ্ঝিস্সতি, নো চ তেসং তত্থ ৱচীসঙ্খাৰো উপ্পজ্জিস্সতি. পঠমজ্ঝানং সমাপন্নানং কামাৱচৰানং ইতৰেসং ৰূপাৱচৰানং অৰূপাৱচৰানং তেসং তত্থ চিত্তসঙ্খাৰো চ নিৰুজ্ঝিস্সতি ৱচীসঙ্খাৰো চ উপ্পজ্জিস্সতি.

(ঘ) পচ্চনীকপুগ্গলো

১৪২. (ক) যস্স কাযসঙ্খাৰো নুপ্পজ্জিস্সতি তস্স ৱচীসঙ্খাৰো ন নিৰুজ্ঝিস্সতীতি?

কামাৱচৰানং পচ্ছিমচিত্তস্স উপ্পাদক্খণে যস্স চিত্তস্স অনন্তৰা কামাৱচৰানং পচ্ছিমচিত্তং উপ্পজ্জিস্সতি ৰূপাৱচৰে অৰূপাৱচৰে পচ্ছিমভৱিকানং যে চ ৰূপাৱচৰং অৰূপাৱচৰং উপপজ্জিত্ৱা পৰিনিব্বাযিস্সন্তি তেসং চৱন্তানং তেসং কাযসঙ্খাৰো নুপ্পজ্জিস্সতি, নো চ তেসং ৱচীসঙ্খাৰো ন নিৰুজ্ঝিস্সতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি তেসং কাযসঙ্খাৰো চ নুপ্পজ্জিস্সতি ৱচীসঙ্খাৰো চ ন নিৰুজ্ঝিস্সতি.

(খ) যস্স ৱা পন…পে…? আমন্তা.

(ক) যস্স কাযসঙ্খাৰো নুপ্পজ্জিস্সতি তস্স চিত্তসঙ্খাৰো ন নিৰুজ্ঝিস্সতীতি?

কামাৱচৰানং পচ্ছিমচিত্তস্স উপ্পাদক্খণে যস্স চিত্তস্স অনন্তৰা কামাৱচৰানং পচ্ছিমচিত্তং উপ্পজ্জিস্সতি ৰূপাৱচৰে অৰূপাৱচৰে পচ্ছিমভৱিকানং যে চ ৰূপাৱচৰং অৰূপাৱচৰং উপপজ্জিত্ৱা পৰিনিব্বাযিস্সন্তি তেসং চৱন্তানং তেসং কাযসঙ্খাৰো নুপ্পজ্জিস্সতি, নো চ তেসং চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে তেসং কাযসঙ্খাৰো চ নুপ্পজ্জিস্সতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন…পে…? আমন্তা.

১৪৩. (ক) যস্স ৱচীসঙ্খাৰো নুপ্পজ্জিস্সতি তস্স চিত্তসঙ্খাৰো ন নিৰুজ্ঝিস্সতীতি?

পচ্ছিমচিত্তস্স উপ্পাদক্খণে যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি তেসং ৱচীসঙ্খাৰো নুপ্পজ্জিস্সতি, নো চ তেসং চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে তেসং ৱচীসঙ্খাৰো চ নুপ্পজ্জিস্সতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন…পে…? আমন্তা.

(ঙ) পচ্চনীকওকাসো

১৪৪. যত্থ কাযসঙ্খাৰো নুপ্পজ্জিস্সতি…পে….

(চ) পচ্চনীকপুগ্গলোকাসা

১৪৫. (ক) যস্স যত্থ কাযসঙ্খাৰো নুপ্পজ্জিস্সতি তস্স তত্থ ৱচীসঙ্খাৰো ন নিৰুজ্ঝিস্সতীতি?

কামাৱচৰানং পচ্ছিমচিত্তস্স উপ্পাদক্খণে যস্স চিত্তস্স অনন্তৰা কামাৱচৰানং পচ্ছিমচিত্তং উপ্পজ্জিস্সতি ৰূপাৱচৰানং অৰূপাৱচৰানং তেসং তত্থ কাযসঙ্খাৰো নুপ্পজ্জিস্সতি, নো চ তেসং তত্থ ৱচীসঙ্খাৰো ন নিৰুজ্ঝিস্সতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি চতুত্থজ্ঝানং সমাপন্নানং অসঞ্ঞসত্তানং তেসং তত্থ কাযসঙ্খাৰো চ নুপ্পজ্জিস্সতি ৱচীসঙ্খাৰো চ ন নিৰুজ্ঝিস্সতি.

(খ) যস্স ৱা পন যত্থ ৱচীসঙ্খাৰো ন নিৰুজ্ঝিস্সতি তস্স তত্থ কাযসঙ্খাৰো নুপ্পজ্জিস্সতীতি?

দুতিযজ্ঝানং ততিযজ্ঝানং সমাপন্নানং তেসং তত্থ ৱচীসঙ্খাৰো ন নিৰুজ্ঝিস্সতি, নো চ তেসং তত্থ কাযসঙ্খাৰো নুপ্পজ্জিস্সতি. সৱিতক্কসৱিচাৰপচ্ছিমচিত্তস্স ভঙ্গক্খণে অৱিতক্কঅৱিচাৰপচ্ছিমচিত্তসমঙ্গীনং যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি চতুত্থজ্ঝানং সমাপন্নানং অসঞ্ঞসত্তানং তেসং তত্থ ৱচীসঙ্খাৰো চ ন নিৰুজ্ঝিস্সতি কাযসঙ্খাৰো চ নুপ্পজ্জিস্সতি.

(ক) যস্স যত্থ কাযসঙ্খাৰো নুপ্পজ্জিস্সতি তস্স তত্থ চিত্তসঙ্খাৰো ন নিৰুজ্ঝিস্সতীতি?

কামাৱচৰানং পচ্ছিমচিত্তস্স উপ্পাদক্খণে যস্স চিত্তস্স অনন্তৰা কামাৱচৰানং পচ্ছিমচিত্তং উপ্পজ্জিস্সতি চতুত্থজ্ঝানং সমাপন্নানং ৰূপাৱচৰানং অৰূপাৱচৰানং তেসং তত্থ কাযসঙ্খাৰো নুপ্পজ্জিস্সতি, নো চ তেসং তত্থ চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে অসঞ্ঞসত্তানং তেসং তত্থ কাযসঙ্খাৰো চ নুপ্পজ্জিস্সতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন যত্থ…পে…? আমন্তা.

১৪৬. (ক) যস্স যত্থ ৱচীসঙ্খাৰো নুপ্পজ্জিস্সতি তস্স তত্থ চিত্তসঙ্খাৰো ন নিৰুজ্ঝিস্সতীতি?

পচ্ছিমচিত্তস্স উপ্পাদক্খণে যস্স চিত্তস্স অনন্তৰা অৱিতক্কঅৱিচাৰং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং চতুত্থজ্ঝানং সমাপন্নানং তেসং তত্থ ৱচীসঙ্খাৰো নুপ্পজ্জিস্সতি, নো চ তেসং তত্থ চিত্তসঙ্খাৰো ন নিৰুজ্ঝিস্সতি. পচ্ছিমচিত্তস্স ভঙ্গক্খণে অসঞ্ঞসত্তানং তেসং তত্থ ৱচীসঙ্খাৰো চ নুপ্পজ্জিস্সতি চিত্তসঙ্খাৰো চ ন নিৰুজ্ঝিস্সতি.

(খ) যস্স ৱা পন যত্থ…পে…? আমন্তা.