(১) পচ্চুপ্পন্নৱাৰো

(ক) অনুলোমপুগ্গলো

৭৯. (ক) যস্স কাযসঙ্খাৰো নিৰুজ্ঝতি তস্স ৱচীসঙ্খাৰো নিৰুজ্ঝতীতি?

ৱিনা ৱিতক্কৱিচাৰেহি অস্সাসপস্সাসানং ভঙ্গক্খণে তেসং কাযসঙ্খাৰো নিৰুজ্ঝতি, নো চ তেসং ৱচীসঙ্খাৰো নিৰুজ্ঝতি. পঠমজ্ঝানং সমাপন্নানং কামাৱচৰানং অস্সাসপস্সাসানং ভঙ্গক্খণে তেসং কাযসঙ্খাৰো চ নিৰুজ্ঝতি ৱচীসঙ্খাৰো চ নিৰুজ্ঝতি.

(খ) যস্স ৱা পন ৱচীসঙ্খাৰো নিৰুজ্ঝতি তস্স কাযসঙ্খাৰো নিৰুজ্ঝতীতি?

ৱিনা অস্সাসপস্সাসেহি ৱিতক্কৱিচাৰানং ভঙ্গক্খণে তেসং ৱচীসঙ্খাৰো নিৰুজ্ঝতি, নো চ তেসং কাযসঙ্খাৰো নিৰুজ্ঝতি. পঠমজ্ঝানং সমাপন্নানং কামাৱচৰানং অস্সাসপস্সাসানং ভঙ্গক্খণে তেসং ৱচীসঙ্খাৰো চ নিৰুজ্ঝতি কাযসঙ্খাৰো চ নিৰুজ্ঝতি.

(ক) যস্স কাযসঙ্খাৰো নিৰুজ্ঝতি তস্স চিত্তসঙ্খাৰো নিৰুজ্ঝতীতি? আমন্তা.

(খ) যস্স ৱা পন চিত্তসঙ্খাৰো নিৰুজ্ঝতি তস্স কাযসঙ্খাৰো নিৰুজ্ঝতীতি?

ৱিনা অস্সাসপস্সাসেহি চিত্তস্স ভঙ্গক্খণে তেসং চিত্তসঙ্খাৰো নিৰুজ্ঝতি, নো চ তেসং কাযসঙ্খাৰো নিৰুজ্ঝতি. অস্সাসপস্সাসানং ভঙ্গক্খণে তেসং চিত্তসঙ্খাৰো চ নিৰুজ্ঝতি কাযসঙ্খাৰো চ নিৰুজ্ঝতি.

৮০. (ক) যস্স ৱচীসঙ্খাৰো নিৰুজ্ঝতি তস্স চিত্তসঙ্খাৰো নিৰুজ্ঝতীতি? আমন্তা.

(খ) যস্স ৱা পন চিত্তসঙ্খাৰো নিৰুজ্ঝতি তস্স ৱচীসঙ্খাৰো নিৰুজ্ঝতীতি?

ৱিনা ৱিতক্কৱিচাৰেহি চিত্তস্স ভঙ্গক্খণে তেসং চিত্তসঙ্খাৰো নিৰুজ্ঝতি, নো চ তেসং ৱচীসঙ্খাৰো নিৰুজ্ঝতি. ৱিতক্কৱিচাৰানং ভঙ্গক্খণে তেসং চিত্তসঙ্খাৰো চ নিৰুজ্ঝতি ৱচীসঙ্খাৰো চ নিৰুজ্ঝতি.

(খ) অনুলোমওকাসো

৮১. যত্থ কাযসঙ্খাৰো নিৰুজ্ঝতি তত্থ ৱচীসঙ্খাৰো নিৰুজ্ঝতীতি?…পে….

(গ) অনুলোমপুগ্গলোকাসা

৮২. যস্স যত্থ কাযসঙ্খাৰো নিৰুজ্ঝতি তস্স তত্থ ৱচীসঙ্খাৰো নিৰুজ্ঝতীতি?…পে…. (যস্সকম্পি যস্সযত্থকম্পি সদিসং.)

(ঘ) পচ্চনীকপুগ্গলো

৮৩. (ক) যস্স কাযসঙ্খাৰো ন নিৰুজ্ঝতি তস্স ৱচীসঙ্খাৰো ন নিৰুজ্ঝতীতি?

ৱিনা অস্সাসপস্সাসেহি ৱিতক্কৱিচাৰানং ভঙ্গক্খণে তেসং কাযসঙ্খাৰো ন নিৰুজ্ঝতি, নো চ তেসং ৱচীসঙ্খাৰো ন নিৰুজ্ঝতি. সব্বেসং চিত্তস্স উপ্পাদক্খণে ৱিনা অস্সাসপস্সাসেহি অৱিতক্কঅৱিচাৰচিত্তস্স ভঙ্গক্খণে নিৰোধসমাপন্নানং অসঞ্ঞসত্তানং তেসং কাযসঙ্খাৰো চ ন নিৰুজ্ঝতি ৱচীসঙ্খাৰো চ ন নিৰুজ্ঝতি.

(খ) যস্স ৱা পন ৱচীসঙ্খাৰো ন নিৰুজ্ঝতি তস্স কাযসঙ্খাৰো ন নিৰুজ্ঝতীতি?

ৱিনা ৱিতক্কৱিচাৰেহি অস্সাসপস্সাসানং ভঙ্গক্খণে তেসং ৱচীসঙ্খাৰো ন নিৰুজ্ঝতি, নো চ তেসং কাযসঙ্খাৰো ন নিৰুজ্ঝতি. সব্বেসং চিত্তস্স উপ্পাদক্খণে ৱিনা অস্সাসপস্সাসেহি অৱিতক্কঅৱিচাৰচিত্তস্স ভঙ্গক্খণে নিৰোধসমাপন্নানং অসঞ্ঞসত্তানং তেসং ৱচীসঙ্খাৰো চ ন নিৰুজ্ঝতি কাযসঙ্খাৰো চ ন নিৰুজ্ঝতি.

(ক) যস্স কাযসঙ্খাৰো ন নিৰুজ্ঝতি তস্স চিত্তসঙ্খাৰো ন নিৰুজ্ঝতীতি?

ৱিনা অস্সাসপস্সাসেহি চিত্তস্স ভঙ্গক্খণে তেসং কাযসঙ্খাৰো ন নিৰুজ্ঝতি, নো চ তেসং চিত্তসঙ্খাৰো ন নিৰুজ্ঝতি. সব্বেসং চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং কাযসঙ্খাৰো চ ন নিৰুজ্ঝতি চিত্তসঙ্খাৰো চ ন নিৰুজ্ঝতি.

(খ) যস্স ৱা পন…পে…? আমন্তা.

৮৪. (ক) যস্স ৱচীসঙ্খাৰো ন নিৰুজ্ঝতি তস্স চিত্তসঙ্খাৰো ন নিৰুজ্ঝতীতি?

ৱিনা ৱিতক্কৱিচাৰেহি চিত্তস্স ভঙ্গক্খণে তেসং ৱচীসঙ্খাৰো ন নিৰুজ্ঝতি, নো চ তেসং চিত্তসঙ্খাৰো ন নিৰুজ্ঝতি. সব্বেসং চিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং ৱচীসঙ্খাৰো চ ন নিৰুজ্ঝতি চিত্তসঙ্খাৰো চ ন নিৰুজ্ঝতি.

(খ) যস্স ৱা পন…পে…? আমন্তা.

(ঙ) পচ্চনীকওকাসা

৮৫. যত্থ কাযসঙ্খাৰো ন নিৰুজ্ঝতি…পে….

(চ) পচ্চনীকপুগ্গলোকাসা

৮৬. যস্স যত্থ কাযসঙ্খাৰো ন নিৰুজ্ঝতি তস্স তত্থ ৱচীসঙ্খাৰো ন নিৰুজ্ঝতীতি?

ৱিনা অস্সাসপস্সাসেহি ৱিতক্কৱিচাৰানং ভঙ্গক্খণে তেসং তত্থ কাযসঙ্খাৰো ন নিৰুজ্ঝতি, নো চ তেসং তত্থ ৱচীসঙ্খাৰো ন নিৰুজ্ঝতি. সব্বেসং চিত্তস্স উপ্পাদক্খণে ৱিনা অস্সাসপস্সাসেহি অৱিতক্কঅৱিচাৰচিত্তস্স ভঙ্গক্খণে অসঞ্ঞসত্তানং তেসং তত্থ কাযসঙ্খাৰো চ ন নিৰুজ্ঝতি ৱচীসঙ্খাৰো চ ন নিৰুজ্ঝতি.

যস্স ৱা পন যত্থ ৱচীসঙ্খাৰো ন নিৰুজ্ঝতি…পে….

(যস্সকম্পি যস্সযত্থকম্পি সদিসং ৱিত্থাৰেতব্বং, যস্সযত্থকে নিৰোধসমাপন্নানন্তি ন কাতব্বং.)