(৫) পচ্চুপ্পন্নানাগতৱাৰো

(ক) অনুলোমপুগ্গলো

১৫৪. (ক) যস্স দুক্খসচ্চং উপ্পজ্জতি তস্স সমুদযসচ্চং নিৰুজ্ঝিস্সতীতি?

অগ্গমগ্গস্স উপ্পাদক্খণে অৰহন্তানং চিত্তস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স উপ্পাদক্খণে তেসং দুক্খসচ্চং উপ্পজ্জতি, নো চ তেসং সমুদযসচ্চং নিৰুজ্ঝিস্সতি. ইতৰেসং উপপজ্জন্তানং পৱত্তে চিত্তস্স উপ্পাদক্খণে তেসং দুক্খসচ্চঞ্চ উপ্পজ্জতি সমুদযসচ্চঞ্চ নিৰুজ্ঝিস্সতি.

(খ) যস্স ৱা পন সমুদযসচ্চং নিৰুজ্ঝিস্সতি তস্স দুক্খসচ্চং উপ্পজ্জতীতি?

সব্বেসং চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং সমুদযসচ্চং নিৰুজ্ঝিস্সতি, নো চ তেসং দুক্খসচ্চং উপ্পজ্জতি. সব্বেসং উপপজ্জন্তানং পৱত্তে চিত্তস্স উপ্পাদক্খণে তেসং সমুদযসচ্চঞ্চ নিৰুজ্ঝিস্সতি দুক্খসচ্চঞ্চ উপ্পজ্জতি.

(ক) যস্স দুক্খসচ্চং উপ্পজ্জতি তস্স মগ্গসচ্চং নিৰুজ্ঝিস্সতীতি?

অৰহন্তানং চিত্তস্স উপ্পাদক্খণে যে চ পুথুজ্জনা মগ্গং ন পটিলভিস্সন্তি তেসং উপপজ্জন্তানং পৱত্তে চিত্তস্স উপ্পাদক্খণে তেসং দুক্খসচ্চং উপ্পজ্জতি, নো চ তেসং মগ্গসচ্চং নিৰুজ্ঝিস্সতি. অগ্গমগ্গস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স উপ্পাদক্খণে যে চঞ্ঞে মগ্গং পটিলভিস্সন্তি তেসং উপপজ্জন্তানং পৱত্তে চিত্তস্স উপ্পাদক্খণে তেসং দুক্খসচ্চঞ্চ উপ্পজ্জতি মগ্গসচ্চঞ্চ নিৰুজ্ঝিস্সতি.

(খ) যস্স ৱা পন মগ্গসচ্চং নিৰুজ্ঝিস্সতি তস্স দুক্খসচ্চং উপ্পজ্জতীতি?

যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স ভঙ্গক্খণে যে চঞ্ঞে মগ্গং পটিলভিস্সন্তি তেসং চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং মগ্গসচ্চং নিৰুজ্ঝিস্সতি, নো চ তেসং দুক্খসচ্চং উপ্পজ্জতি. অগ্গমগ্গস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স উপ্পাদক্খণে যে চঞ্ঞে মগ্গং পটিলভিস্সন্তি তেসং উপপজ্জন্তানং পৱত্তে চিত্তস্স উপ্পাদক্খণে তেসং মগ্গসচ্চঞ্চ নিৰুজ্ঝিস্সতি দুক্খসচ্চঞ্চ উপ্পজ্জতি.

১৫৫. (ক) যস্স সমুদযসচ্চং উপ্পজ্জতি তস্স মগ্গসচ্চং নিৰুজ্ঝিস্সতীতি?

যে পুথুজ্জনা মগ্গং ন পটিলভিস্সন্তি তেসং তণ্হায উপ্পাদক্খণে তেসং সমুদযসচ্চং উপ্পজ্জতি, নো চ তেসং মগ্গসচ্চং নিৰুজ্ঝিস্সতি. যে মগ্গং পটিলভিস্সন্তি তেসং তণ্হায উপ্পাদক্খণে তেসং সমুদযসচ্চঞ্চ উপ্পজ্জতি মগ্গসচ্চঞ্চ নিৰুজ্ঝিস্সতি.

(খ) যস্স ৱা পন মগ্গসচ্চং নিৰুজ্ঝিস্সতি তস্স সমুদযসচ্চং উপ্পজ্জতীতি?

অগ্গমগ্গস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি যে চঞ্ঞে মগ্গং পটিলভিস্সন্তি তেসং তণ্হায ভঙ্গক্খণে তণ্হাৱিপ্পযুত্তচিত্তে ৱত্তমানে নিৰোধসমাপন্নানং অসঞ্ঞসত্তানং তেসং মগ্গসচ্চং নিৰুজ্ঝিস্সতি, নো চ তেসং সমুদযসচ্চং উপ্পজ্জতি. যে মগ্গং পটিলভিস্সন্তি তেসং তণ্হায উপ্পাদক্খণে তেসং মগ্গসচ্চঞ্চ নিৰুজ্ঝিস্সতি সমুদযসচ্চঞ্চ উপ্পজ্জতি.

(খ) অনুলোমওকাসো

১৫৬. যত্থ দুক্খসচ্চং উপ্পজ্জতি…পে….

(গ) অনুলোমপুগ্গলোকাসা

১৫৭. (ক) যস্স যত্থ দুক্খসচ্চং উপ্পজ্জতি তস্স তত্থ সমুদযসচ্চং নিৰুজ্ঝিস্সতীতি?

অগ্গমগ্গস্স উপ্পাদক্খণে অৰহন্তানং চিত্তস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স উপ্পাদক্খণে অসঞ্ঞসত্তং উপপজ্জন্তানং তেসং তত্থ দুক্খসচ্চং…পে… ইতৰেসং চতুৱোকাৰং পঞ্চৱোকাৰং উপপজ্জন্তানং পৱত্তে চিত্তস্স উপ্পাদক্খণে তেসং তত্থ দুক্খসচ্চং…পে….

(খ) যস্স ৱা পন যত্থ সমুদযসচ্চং নিৰুজ্ঝিস্সতি তস্স তত্থ দুক্খসচ্চং উপ্পজ্জতীতি?

চতুৱোকাৰা পঞ্চৱোকাৰা চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং তত্থ সমুদযসচ্চং নিৰুজ্ঝিস্সতি, নো চ তেসং তত্থ দুক্খসচ্চং উপ্পজ্জতি. চতুৱোকাৰং পঞ্চৱোকাৰং উপপজ্জন্তানং পৱত্তে চিত্তস্স উপ্পাদক্খণে তেসং তত্থ সমুদযসচ্চঞ্চ নিৰুজ্ঝিস্সতি দুক্খসচ্চঞ্চ উপ্পজ্জতি.

(ক) যস্স যত্থ দুক্খসচ্চং উপ্পজ্জতি তস্স তত্থ মগ্গসচ্চং নিৰুজ্ঝিস্সতীতি?

অৰহন্তানং চিত্তস্স উপ্পাদক্খণে আপাযিকানং যে চ পুথুজ্জনা মগ্গং ন পটিলভিস্সন্তি তেসং উপপজ্জন্তানং পৱত্তে চিত্তস্স উপ্পাদক্খণে অসঞ্ঞসত্তং উপপজ্জন্তানং তেসং তত্থ দুক্খসচ্চং উপ্পজ্জতি, নো চ তেসং তত্থ মগ্গসচ্চং নিৰুজ্ঝিস্সতি. অগ্গমগ্গস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স উপ্পাদক্খণে যে চঞ্ঞে মগ্গং পটিলভিস্সন্তি তেসং উপপজ্জন্তানং পৱত্তে চিত্তস্স উপ্পাদক্খণে তেসং তত্থ দুক্খসচ্চঞ্চ উপ্পজ্জতি মগ্গসচ্চঞ্চ নিৰুজ্ঝিস্সতি.

(খ) যস্স ৱা পন যত্থ মগ্গসচ্চং নিৰুজ্ঝিস্সতি তস্স তত্থ দুক্খসচ্চং উপ্পজ্জতীতি?

যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স ভঙ্গক্খণে যে চঞ্ঞে মগ্গং পটিলভিস্সন্তি তেসং চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং তত্থ মগ্গসচ্চং নিৰুজ্ঝিস্সতি, নো চ তেসং তত্থ দুক্খসচ্চং উপ্পজ্জতি. অগ্গমগ্গস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স উপ্পাদক্খণে যে চঞ্ঞে মগ্গং পটিলভিস্সন্তি তেসং উপপজ্জন্তানং পৱত্তে চিত্তস্স উপ্পাদক্খণে তেসং তত্থ মগ্গসচ্চঞ্চ নিৰুজ্ঝিস্সতি দুক্খসচ্চঞ্চ উপ্পজ্জতি.

১৫৮. (ক) যস্স যত্থ সমুদযসচ্চং উপ্পজ্জতি তস্স তত্থ মগ্গসচ্চং নিৰুজ্ঝিস্সতীতি?

আপাযিকানং যে চ পুথুজ্জনা মগ্গং ন পটিলভিস্সন্তি তেসং তণ্হায উপ্পাদক্খণে তেসং তত্থ সমুদযসচ্চং উপ্পজ্জতি, নো চ তেসং তত্থ মগ্গসচ্চং নিৰুজ্ঝিস্সতি. যে মগ্গং পটিলভিস্সন্তি তেসং তণ্হায উপ্পাদক্খণে তেসং তত্থ সমুদযসচ্চঞ্চ উপ্পজ্জতি মগ্গসচ্চঞ্চ নিৰুজ্ঝিস্সতি.

(খ) যস্স ৱা পন যত্থ মগ্গসচ্চং নিৰুজ্ঝিস্সতি তস্স তত্থ সমুদযসচ্চং উপ্পজ্জতীতি?

অগ্গমগ্গস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি যে চঞ্ঞে মগ্গং পটিলভিস্সন্তি তেসং তণ্হায ভঙ্গক্খণে তণ্হাৱিপ্পযুত্তচিত্তে ৱত্তমানে তেসং তত্থ মগ্গসচ্চং নিৰুজ্ঝিস্সতি, নো চ তেসং তত্থ সমুদযসচ্চং উপ্পজ্জতি. যে মগ্গং পটিলভিস্সন্তি তেসং তণ্হায উপ্পাদক্খণে তেসং তত্থ মগ্গসচ্চঞ্চ নিৰুজ্ঝিস্সতি সমুদযসচ্চঞ্চ উপ্পজ্জতি.

(ঘ) পচ্চনীকপুগ্গলো

১৫৯. (ক) যস্স দুক্খসচ্চং নুপ্পজ্জতি তস্স সমুদযসচ্চং ন নিৰুজ্ঝিস্সতীতি?

সব্বেসং চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং দুক্খসচ্চং নুপ্পজ্জতি, নো চ তেসং সমুদযসচ্চং ন নিৰুজ্ঝিস্সতি. অগ্গমগ্গস্স ভঙ্গক্খণে অৰহন্তানং চিত্তস্স ভঙ্গক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স ভঙ্গক্খণে অৰূপে অগ্গমগ্গস্স চ ফলস্স চ উপ্পাদক্খণে তেসং দুক্খসচ্চঞ্চ নুপ্পজ্জতি সমুদযসচ্চঞ্চ ন নিৰুজ্ঝিস্সতি.

(খ) যস্স ৱা পন সমুদযসচ্চং ন নিৰুজ্ঝিস্সতি তস্স দুক্খসচ্চং নুপ্পজ্জতীতি?

অগ্গমগ্গস্স উপ্পাদক্খণে অৰহন্তানং চিত্তস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স উপ্পাদক্খণে তেসং সমুদযসচ্চং ন নিৰুজ্ঝিস্সতি, নো চ তেসং দুক্খসচ্চং নুপ্পজ্জতি. অগ্গমগ্গস্স ভঙ্গক্খণে অৰহন্তানং চিত্তস্স ভঙ্গক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স ভঙ্গক্খণে অৰূপে অগ্গমগ্গস্স চ ফলস্স চ উপ্পাদক্খণে তেসং সমুদযসচ্চঞ্চ ন নিৰুজ্ঝিস্সতি দুক্খসচ্চঞ্চ নুপ্পজ্জতি.

(ক) যস্স দুক্খসচ্চং নুপ্পজ্জতি তস্স মগ্গসচ্চং ন নিৰুজ্ঝিস্সতীতি?

যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স ভঙ্গক্খণে যে চঞ্ঞে মগ্গং পটিলভিস্সন্তি তেসং চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং দুক্খসচ্চং নুপ্পজ্জতি, নো চ তেসং মগ্গসচ্চং ন নিৰুজ্ঝিস্সতি. অগ্গমগ্গস্স ভঙ্গক্খণে অৰহন্তানং চিত্তস্স ভঙ্গক্খণে যে চ পুথুজ্জনা মগ্গং ন পটিলভিস্সন্তি তেসং চৱন্তানং পৱত্তে চিত্তস্স ভঙ্গক্খণে অৰূপে অগ্গফলস্স উপ্পাদক্খণে তেসং দুক্খসচ্চঞ্চ নুপ্পজ্জতি মগ্গসচ্চঞ্চ ন নিৰুজ্ঝিস্সতি.

(খ) যস্স ৱা পন মগ্গসচ্চং ন নিৰুজ্ঝিস্সতি তস্স দুক্খসচ্চং নুপ্পজ্জতীতি?

অৰহন্তানং চিত্তস্স উপ্পাদক্খণে যে চ পুথুজ্জনা মগ্গং ন পটিলভিস্সন্তি তেসং উপপজ্জন্তানং পৱত্তে চিত্তস্স উপ্পাদক্খণে তেসং মগ্গসচ্চং ন নিৰুজ্ঝিস্সতি, নো চ তেসং দুক্খসচ্চং নুপ্পজ্জতি. অগ্গমগ্গস্স ভঙ্গক্খণে অৰহন্তানং চিত্তস্স ভঙ্গক্খণে যে চ পুথুজ্জনা মগ্গং ন পটিলভিস্সন্তি তেসং চৱন্তানং পৱত্তে চিত্তস্স ভঙ্গক্খণে অৰূপে অগ্গফলস্স উপ্পাদক্খণে তেসং মগ্গসচ্চঞ্চ ন নিৰুজ্ঝিস্সতি দুক্খসচ্চঞ্চ নুপ্পজ্জতি.

১৬০. (ক) যস্স সমুদযসচ্চং নুপ্পজ্জতি তস্স মগ্গসচ্চং ন নিৰুজ্ঝিস্সতীতি?

অগ্গমগ্গস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি যে চঞ্ঞে মগ্গং পটিলভিস্সন্তি তেসং তণ্হায ভঙ্গক্খণে তণ্হাৱিপ্পযুত্তচিত্তে ৱত্তমানে নিৰোধসমাপন্নানং অসঞ্ঞসত্তানং তেসং সমুদযসচ্চং নুপ্পজ্জতি, নো চ তেসং মগ্গসচ্চং ন নিৰুজ্ঝিস্সতি. অগ্গমগ্গস্স ভঙ্গক্খণে অৰহন্তানং যে চ পুথুজ্জনা মগ্গং ন পটিলভিস্সন্তি তেসং তণ্হায ভঙ্গক্খণে তণ্হাৱিপ্পযুত্তচিত্তে ৱত্তমানে তেসং সমুদযসচ্চঞ্চ নুপ্পজ্জতি মগ্গসচ্চঞ্চ ন নিৰুজ্ঝিস্সতি.

(খ) যস্স ৱা পন মগ্গসচ্চং ন নিৰুজ্ঝিস্সতি তস্স সমুদযসচ্চং নুপ্পজ্জতীতি?

যে পুথুজ্জনা মগ্গং ন পটিলভিস্সন্তি তেসং তণ্হায উপ্পাদক্খণে তেসং মগ্গসচ্চং ন নিৰুজ্ঝিস্সতি, নো চ তেসং সমুদযসচ্চং নুপ্পজ্জতি. অগ্গমগ্গস্স ভঙ্গক্খণে অৰহন্তানং যে চ পুথুজ্জনা মগ্গং ন পটিলভিস্সন্তি তেসং তণ্হায ভঙ্গক্খণে তণ্হাৱিপ্পযুত্তচিত্তে ৱত্তমানে তেসং মগ্গসচ্চঞ্চ ন নিৰুজ্ঝিস্সতি সমুদযসচ্চঞ্চ নুপ্পজ্জতি.

(ঙ) পচ্চনীকওকাসো

১৬১. যত্থ দুক্খসচ্চং নুপ্পজ্জতি…পে….

(চ) পচ্চনীকপুগ্গলোকাসা

১৬২. (ক) যস্স যত্থ দুক্খসচ্চং নুপ্পজ্জতি তস্স তত্থ সমুদযসচ্চং ন নিৰুজ্ঝিস্সতীতি?

চতুৱোকাৰা পঞ্চৱোকাৰা চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং তত্থ দুক্খসচ্চং নুপ্পজ্জতি, নো চ তেসং তত্থ সমুদযসচ্চং ন নিৰুজ্ঝিস্সতি. অগ্গমগ্গস্স ভঙ্গক্খণে অৰহন্তানং চিত্তস্স ভঙ্গক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স ভঙ্গক্খণে অৰূপে অগ্গমগ্গস্স চ ফলস্স চ উপ্পাদক্খণে অসঞ্ঞসত্তা চৱন্তানং তেসং তত্থ দুক্খসচ্চঞ্চ নুপ্পজ্জতি সমুদযসচ্চঞ্চ ন নিৰুজ্ঝিস্সতি.

(খ) যস্স ৱা পন যত্থ সমুদযসচ্চং ন নিৰুজ্ঝিস্সতি তস্স তত্থ দুক্খসচ্চং নুপ্পজ্জতীতি?

অগ্গমগ্গস্স উপ্পাদক্খণে অৰহন্তানং চিত্তস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স উপ্পাদক্খণে অসঞ্ঞসত্তং উপপজ্জন্তানং তেসং তত্থ সমুদযসচ্চং ন নিৰুজ্ঝিস্সতি, নো চ তেসং তত্থ দুক্খসচ্চং নুপ্পজ্জতি. অগ্গমগ্গস্স ভঙ্গক্খণে অৰহন্তানং চিত্তস্স ভঙ্গক্খণে যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স ভঙ্গক্খণে অৰূপে অগ্গমগ্গস্স চ ফলস্স চ উপ্পাদক্খণে অসঞ্ঞসত্তা চৱন্তানং তেসং তত্থ সমুদযসচ্চঞ্চ ন নিৰুজ্ঝিস্সতি দুক্খসচ্চঞ্চ নুপ্পজ্জতি.

(ক) যস্স যত্থ দুক্খসচ্চং নুপ্পজ্জতি তস্স তত্থ মগ্গসচ্চং ন নিৰুজ্ঝিস্সতীতি?

যস্স চিত্তস্স অনন্তৰা অগ্গমগ্গং পটিলভিস্সন্তি তস্স চিত্তস্স ভঙ্গক্খণে যে চঞ্ঞে মগ্গং পটিলভিস্সন্তি তেসং চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং তত্থ দুক্খসচ্চং নুপ্পজ্জতি, নো চ তেসং তত্থ মগ্গসচ্চং ন নিৰুজ্ঝিস্সতি. অগ্গমগ্গস্স ভঙ্গক্খণে অৰহন্তানং চিত্তস্স ভঙ্গক্খণে আপাযিকানং যে চ পুথুজ্জনা মগ্গং ন পটিলভিস্সন্তি তেসং চৱন্তানং পৱত্তে চিত্তস্স ভঙ্গক্খণে অৰূপে অগ্গফলস্স উপ্পাদক্খণে অসঞ্ঞসত্তা [অপাযা অসঞ্ঞসত্তা (স্যা.)] চৱন্তানং তেসং তত্থ দুক্খসচ্চঞ্চ নুপ্পজ্জতি মগ্গসচ্চঞ্চ ন নিৰুজ্ঝিস্সতি.

(খ) যস্স ৱা পন যত্থ মগ্গসচ্চং ন নিৰুজ্ঝিস্সতি তস্স তত্থ দুক্খসচ্চং নুপ্পজ্জতীতি?

অৰহন্তানং চিত্তস্স উপ্পাদক্খণে আপাযিকানং যে চ পুথুজ্জনা মগ্গং ন পটিলভিস্সন্তি তেসং উপপজ্জন্তানং পৱত্তে চিত্তস্স উপ্পাদক্খণে অসঞ্ঞসত্তং [অপাযং অসঞ্ঞসত্তং (স্যা.)] উপপজ্জন্তানং তেসং তত্থ মগ্গসচ্চং ন নিৰুজ্ঝিস্সতি, নো চ তেসং তত্থ দুক্খসচ্চং নুপ্পজ্জতি. অগ্গমগ্গস্স ভঙ্গক্খণে অৰহন্তানং চিত্তস্স ভঙ্গক্খণে আপাযিকানং যে চ পুথুজ্জনা মগ্গং ন পটিলভিস্সন্তি তেসং চৱন্তানং পৱত্তে চিত্তস্স ভঙ্গক্খণে অৰূপে অগ্গফলস্স উপ্পাদক্খণে অসঞ্ঞসত্তা চৱন্তানং তেসং তত্থ মগ্গসচ্চঞ্চ ন নিৰুজ্ঝিস্সতি দুক্খসচ্চঞ্চ নুপ্পজ্জতি.

১৬৩. (ক) যস্স যত্থ সমুদযসচ্চং নুপ্পজ্জতি তস্স তত্থ মগ্গসচ্চং ন নিৰুজ্ঝিস্সতীতি?

অগ্গমগ্গস্স উপ্পাদক্খণে যস্স চিত্তস্স অনন্তৰা অগ্গমগ্গং পটিলভিস্সন্তি যে চঞ্ঞে মগ্গং পটিলভিস্সন্তি তেসং তণ্হায ভঙ্গক্খণে তণ্হাৱিপ্পযুত্তচিত্তে ৱত্তমানে তেসং তত্থ সমুদযসচ্চং নুপ্পজ্জতি, নো চ তেসং তত্থ মগ্গসচ্চং ন নিৰুজ্ঝিস্সতি. অগ্গমগ্গস্স ভঙ্গক্খণে অৰহন্তানং আপাযিকানং যে চ পুথুজ্জনা মগ্গং ন পটিলভিস্সন্তি তেসং তণ্হায ভঙ্গক্খণে তণ্হাৱিপ্পযুত্তচিত্তে ৱত্তমানে অসঞ্ঞসত্তানং তেসং তত্থ সমুদযসচ্চঞ্চ নুপ্পজ্জতি মগ্গসচ্চঞ্চ ন নিৰুজ্ঝিস্সতি.

(খ) যস্স ৱা পন যত্থ মগ্গসচ্চং ন নিৰুজ্ঝিস্সতি তস্স তত্থ সমুদযসচ্চং নুপ্পজ্জতীতি?

আপাযিকানং যে চ পুথুজ্জনা মগ্গং ন পটিলভিস্সন্তি তেসং তণ্হায উপ্পাদক্খণে তেসং তত্থ মগ্গসচ্চং ন নিৰুজ্ঝিস্সতি, নো চ তেসং তত্থ সমুদযসচ্চং নুপ্পজ্জতি. অগ্গমগ্গস্স ভঙ্গক্খণে অৰহন্তানং আপাযিকানং যে চ পুথুজ্জনা মগ্গং ন পটিলভিস্সন্তি তেসং তণ্হায ভঙ্গক্খণে তণ্হাৱিপ্পযুত্তচিত্তে ৱত্তমানে অসঞ্ঞসত্তানং তেসং তত্থ মগ্গসচ্চঞ্চ ন নিৰুজ্ঝিস্সতি সমুদযসচ্চঞ্চ নুপ্পজ্জতি.