(১) পচ্চুপ্পন্নৱাৰো

(ক) অনুলোমপুগ্গলো

২৭. (ক) যস্স দুক্খসচ্চং উপ্পজ্জতি তস্স সমুদযসচ্চং উপ্পজ্জতীতি?

সব্বেসং উপপজ্জন্তানং পৱত্তে তণ্হাৱিপ্পযুত্তচিত্তস্স উপ্পাদক্খণে তেসং দুক্খসচ্চং উপ্পজ্জতি, নো চ তেসং সমুদযসচ্চং উপ্পজ্জতি. তণ্হায উপ্পাদক্খণে তেসং দুক্খসচ্চঞ্চ উপ্পজ্জতি সমুদযসচ্চঞ্চ উপ্পজ্জতি.

(খ) যস্স ৱা পন সমুদযসচ্চং উপ্পজ্জতি তস্স দুক্খসচ্চং উপ্পজ্জতীতি? আমন্তা.

(ক) যস্স দুক্খসচ্চং উপ্পজ্জতি তস্স মগ্গসচ্চং উপ্পজ্জতীতি?

সব্বেসং উপপজ্জন্তানং পৱত্তে মগ্গৱিপ্পযুত্তচিত্তস্স উপ্পাদক্খণে তেসং দুক্খসচ্চং উপ্পজ্জতি, নো চ তেসং মগ্গসচ্চং উপ্পজ্জতি. পঞ্চৱোকাৰে মগ্গস্স উপ্পাদক্খণে তেসং দুক্খসচ্চঞ্চ উপ্পজ্জতি মগ্গসচ্চঞ্চ উপ্পজ্জতি.

(খ) যস্স ৱা পন মগ্গসচ্চং উপ্পজ্জতি তস্স দুক্খসচ্চং উপ্পজ্জতীতি?

অৰূপে মগ্গস্স উপ্পাদক্খণে তেসং মগ্গসচ্চং উপ্পজ্জতি, নো চ তেসং দুক্খসচ্চং উপ্পজ্জতি. পঞ্চৱোকাৰে মগ্গস্স উপ্পাদক্খণে তেসং মগ্গসচ্চঞ্চ উপ্পজ্জতি দুক্খসচ্চঞ্চ উপ্পজ্জতি.

২৮. (ক) যস্স সমুদযসচ্চং উপ্পজ্জতি তস্স মগ্গসচ্চং উপ্পজ্জতীতি? নো.

(খ) যস্স ৱা পন মগ্গসচ্চং উপ্পজ্জতি তস্স সমুদযসচ্চং উপ্পজ্জতীতি? নো.

(খ) অনুলোমওকাসো

২৯. (ক) যত্থ দুক্খসচ্চং উপ্পজ্জতি তত্থ সমুদযসচ্চং উপ্পজ্জতীতি?

অসঞ্ঞসত্তে তত্থ দুক্খসচ্চং উপ্পজ্জতি, নো চ তত্থ সমুদযসচ্চং উপ্পজ্জতি. চতুৱোকাৰে পঞ্চৱোকাৰে তত্থ দুক্খসচ্চঞ্চ উপ্পজ্জতি সমুদযসচ্চঞ্চ উপ্পজ্জতি.

(খ) যত্থ ৱা পন…পে…? আমন্তা.

(ক) যত্থ দুক্খসচ্চং উপ্পজ্জতি তত্থ মগ্গসচ্চং উপ্পজ্জতীতি?

অপাযে অসঞ্ঞসত্তে তত্থ দুক্খসচ্চং উপ্পজ্জতি, নো চ তত্থ মগ্গসচ্চং উপ্পজ্জতি. অৱসেসে চতুৱোকাৰে পঞ্চৱোকাৰে তত্থ দুক্খসচ্চঞ্চ উপ্পজ্জতি মগ্গসচ্চঞ্চ উপ্পজ্জতি.

(খ) যত্থ ৱা পন মগ্গসচ্চং উপ্পজ্জতি তত্থ দুক্খসচ্চং উপ্পজ্জতীতি? আমন্তা.

৩০. (ক) যত্থ সমুদযসচ্চং উপ্পজ্জতি তত্থ মগ্গসচ্চং উপ্পজ্জতীতি?

অপাযে তত্থ সমুদযসচ্চং উপ্পজ্জতি, নো চ তত্থ মগ্গসচ্চং উপ্পজ্জতি. অৱসেসে চতুৱোকাৰে পঞ্চৱোকাৰে তত্থ সমুদযসচ্চঞ্চ উপ্পজ্জতি মগ্গসচ্চঞ্চ উপ্পজ্জতি.

(খ) যত্থ ৱা পন…পে…? আমন্তা.

(গ) অনুলোমপুগ্গলোকাসা

৩১. যস্স যত্থ দুক্খসচ্চং উপ্পজ্জতি তস্স তত্থ সমুদযসচ্চং উপ্পজ্জতীতি?…পে….

(যস্সকম্পি যস্সযত্থকম্পি সদিসং ৱিত্থাৰেতব্বং).

(ঘ) পচ্চনীকপুগ্গলো

৩২. (ক) যস্স দুক্খসচ্চং নুপ্পজ্জতি তস্স সমুদযসচ্চং নুপ্পজ্জতীতি? আমন্তা.

(খ) যস্স ৱা পন সমুদযসচ্চং নুপ্পজ্জতি তস্স দুক্খসচ্চং নুপ্পজ্জতীতি?

সব্বেসং উপপজ্জন্তানং পৱত্তে তণ্হাৱিপ্পযুত্তচিত্তস্স উপ্পাদক্খণে তেসং সমুদযসচ্চং নুপ্পজ্জতি, নো চ তেসং দুক্খসচ্চং নুপ্পজ্জতি. সব্বেসং চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং সমুদযসচ্চঞ্চ নুপ্পজ্জতি দুক্খসচ্চঞ্চ নুপ্পজ্জতি.

(ক) যস্স দুক্খসচ্চং নুপ্পজ্জতি তস্স মগ্গসচ্চং নুপ্পজ্জতীতি?

অৰূপে মগ্গস্স উপ্পাদক্খণে তেসং দুক্খসচ্চং নুপ্পজ্জতি, নো চ তেসং মগ্গসচ্চং নুপ্পজ্জতি. সব্বেসং চৱন্তানং পৱত্তে চিত্তস্স ভঙ্গক্খণে অৰূপে ফলস্স উপ্পাদক্খণে তেসং দুক্খসচ্চঞ্চ নুপ্পজ্জতি মগ্গসচ্চঞ্চ নুপ্পজ্জতি.

(খ) যস্স ৱা পন মগ্গসচ্চং নুপ্পজ্জতি তস্স দুক্খসচ্চং নুপ্পজ্জতীতি?

সব্বেসং উপপজ্জন্তানং পৱত্তে মগ্গৱিপ্পযুত্তচিত্তস্স উপ্পাদক্খণে তেসং মগ্গসচ্চং নুপ্পজ্জতি, নো চ তেসং দুক্খসচ্চং নুপ্পজ্জতি. সব্বেসং চৱন্তানং পৱত্তে চিত্তস্স ভঙ্গক্খণে অৰূপে ফলস্স উপ্পাদক্খণে তেসং মগ্গসচ্চঞ্চ নুপ্পজ্জতি দুক্খসচ্চঞ্চ নুপ্পজ্জতি.

৩৩. (ক) যস্স সমুদযসচ্চং নুপ্পজ্জতি তস্স মগ্গসচ্চং নুপ্পজ্জতীতি?

মগ্গস্স উপ্পাদক্খণে তেসং সমুদযসচ্চং নুপ্পজ্জতি, নো চ তেসং মগ্গসচ্চং নুপ্পজ্জতি. সব্বেসং চিত্তস্স ভঙ্গক্খণে তণ্হাৱিপ্পযুত্তমগ্গৱিপ্পযুত্তচিত্তস্স উপ্পাদক্খণে নিৰোধসমাপন্নানং অসঞ্ঞসত্তানং তেসং সমুদযসচ্চঞ্চ নুপ্পজ্জতি মগ্গসচ্চঞ্চ নুপ্পজ্জতি.

(খ) যস্স ৱা পন মগ্গসচ্চং নুপ্পজ্জতি তস্স সমুদযসচ্চং নুপ্পজ্জতীতি?

তণ্হায উপ্পাদক্খণে তেসং মগ্গসচ্চং নুপ্পজ্জতি, নো চ তেসং সমুদযসচ্চং নুপ্পজ্জতি. সব্বেসং চিত্তস্স ভঙ্গক্খণে মগ্গৱিপ্পযুত্ততণ্হাৱিপ্পযুত্তচিত্তস্স [তণ্হাৱিপ্পযুত্তমগ্গৱিপ্পযুত্তচিত্তস্স (সী.) এৱং পুগ্গলোকাসেপি নিৰোধৱাৰেপি] উপ্পাদক্খণে নিৰোধসমাপন্নানং অসঞ্ঞসত্তানং তেসং মগ্গসচ্চঞ্চ নুপ্পজ্জতি সমুদযসচ্চঞ্চ নুপ্পজ্জতি.

(ঙ) পচ্চনীকওকাসো

৩৪. (ক) যত্থ দুক্খসচ্চং নুপ্পজ্জতি তত্থ সমুদযসচ্চং নুপ্পজ্জতীতি? নত্থি.

(খ) যত্থ ৱা পন সমুদযসচ্চং নুপ্পজ্জতি তত্থ দুক্খসচ্চং নুপ্পজ্জতীতি? উপ্পজ্জতি.

(ক) যত্থ দুক্খসচ্চং নুপ্পজ্জতি তত্থ মগ্গসচ্চং নুপ্পজ্জতীতি? নত্থি.

(খ) যত্থ ৱা পন মগ্গসচ্চং নুপ্পজ্জতি তত্থ দুক্খসচ্চং নুপ্পজ্জতীতি? উপ্পজ্জতি.

৩৫. (ক) যত্থ সমুদযসচ্চং নুপ্পজ্জতি তত্থ মগ্গসচ্চং নুপ্পজ্জতীতি? আমন্তা.

(খ) যত্থ ৱা পন মগ্গসচ্চং নুপ্পজ্জতি তত্থ সমুদযসচ্চং নুপ্পজ্জতীতি?

অপাযে তত্থ মগ্গসচ্চং নুপ্পজ্জতি, নো চ তত্থ সমুদযসচ্চং নুপ্পজ্জতি. অসঞ্ঞসত্তে তত্থ মগ্গসচ্চঞ্চ নুপ্পজ্জতি সমুদযসচ্চঞ্চ নুপ্পজ্জতি.

(চ) পচ্চনীকপুগ্গলোকাসা

৩৬. (ক) যস্স যত্থ দুক্খসচ্চং নুপ্পজ্জতি তস্স তত্থ সমুদযসচ্চং নুপ্পজ্জতীতি? আমন্তা.

(খ) যস্স ৱা পন যত্থ সমুদযসচ্চং নুপ্পজ্জতি তস্স তত্থ দুক্খসচ্চং নুপ্পজ্জতীতি?

সব্বেসং উপপজ্জন্তানং পৱত্তে তণ্হাৱিপ্পযুত্তচিত্তস্স উপ্পাদক্খণে তেসং তত্থ সমুদযসচ্চং নুপ্পজ্জতি, নো চ তেসং তত্থ দুক্খসচ্চং নুপ্পজ্জতি. সব্বেসং চৱন্তানং পৱত্তে চিত্তস্স ভঙ্গক্খণে অৰূপে মগ্গস্স চ ফলস্স চ উপ্পাদক্খণে তেসং তত্থ সমুদযসচ্চঞ্চ নুপ্পজ্জতি দুক্খসচ্চঞ্চ নুপ্পজ্জতি.

(ক) যস্স যত্থ দুক্খসচ্চং নুপ্পজ্জতি তস্স তত্থ মগ্গসচ্চং নুপ্পজ্জতীতি?

অৰূপে মগ্গস্স উপ্পাদক্খণে তেসং তত্থ দুক্খসচ্চং নুপ্পজ্জতি, নো চ তেসং তত্থ মগ্গসচ্চং নুপ্পজ্জতি. সব্বেসং চৱন্তানং পৱত্তে চিত্তস্স ভঙ্গক্খণে অৰূপে ফলস্স উপ্পাদক্খণে তেসং তত্থ দুক্খসচ্চঞ্চ নুপ্পজ্জতি মগ্গসচ্চঞ্চ নুপ্পজ্জতি.

(খ) যস্স ৱা পন যত্থ মগ্গসচ্চং নুপ্পজ্জতি তস্স তত্থ দুক্খসচ্চং নুপ্পজ্জতীতি?

সব্বেসং উপপজ্জন্তানং পৱত্তে মগ্গৱিপ্পযুত্তচিত্তস্স উপ্পাদক্খণে তেসং তত্থ মগ্গসচ্চং নুপ্পজ্জতি, নো চ তেসং তত্থ দুক্খসচ্চং নুপ্পজ্জতি. সব্বেসং চৱন্তানং পৱত্তে চিত্তস্স ভঙ্গক্খণে অৰূপে ফলস্স উপ্পাদক্খণে তেসং তত্থ মগ্গসচ্চঞ্চ নুপ্পজ্জতি দুক্খসচ্চঞ্চ নুপ্পজ্জতি.

৩৭. (ক) যস্স যত্থ সমুদযসচ্চং নুপ্পজ্জতি তস্স তত্থ মগ্গসচ্চং নুপ্পজ্জতীতি?

মগ্গস্স উপ্পাদক্খণে তেসং তত্থ সমুদযসচ্চং নুপ্পজ্জতি, নো চ তেসং তত্থ মগ্গসচ্চং নুপ্পজ্জতি. সব্বেসং চিত্তস্স ভঙ্গক্খণে তণ্হাৱিপ্পযুত্তমগ্গৱিপ্পযুত্তচিত্তস্স উপ্পাদক্খণে অসঞ্ঞসত্তানং তেসং তত্থ সমুদযসচ্চঞ্চ নুপ্পজ্জতি মগ্গসচ্চঞ্চ নুপ্পজ্জতি.

(খ) যস্স ৱা পন যত্থ মগ্গসচ্চং নুপ্পজ্জতি তস্স তত্থ সমুদযসচ্চং নুপ্পজ্জতীতি?

তণ্হায উপ্পাদক্খণে তেসং তত্থ মগ্গসচ্চং নুপ্পজ্জতি, নো চ তেসং তত্থ সমুদযসচ্চং নুপ্পজ্জতি. সব্বেসং চিত্তস্স ভঙ্গক্খণে মগ্গৱিপ্পযুত্ততণ্হাৱিপ্পযুত্তচিত্তস্স উপ্পাদক্খণে অসঞ্ঞসত্তানং তেসং তত্থ মগ্গসচ্চঞ্চ নুপ্পজ্জতি সমুদযসচ্চঞ্চ নুপ্পজ্জতি.