(৬) অতীতানাগতৱাৰো

(ক) অনুলোমপুগ্গলো

১৪৩. (ক) যস্স ৰূপক্খন্ধো নিৰুজ্ঝিত্থ তস্স ৱেদনাক্খন্ধো নিৰুজ্ঝিস্সতীতি?

পৰিনিব্বন্তানং তেসং ৰূপক্খন্ধো নিৰুজ্ঝিত্থ, নো চ তেসং ৱেদনাক্খন্ধো নিৰুজ্ঝিস্সতি. ইতৰেসং তেসং ৰূপক্খন্ধো চ নিৰুজ্ঝিত্থ ৱেদনাক্খন্ধো চ নিৰুজ্ঝিস্সতি.

(খ) যস্স ৱা পন ৱেদনাক্খন্ধো নিৰুজ্ঝিস্সতি তস্স ৰূপক্খন্ধো নিৰুজ্ঝিত্থাতি? আমন্তা.

১৪৪. (ক) যস্স ৱেদনাক্খন্ধো নিৰুজ্ঝিত্থ তস্স সঞ্ঞাক্খন্ধো নিৰুজ্ঝিস্সতীতি?

পৰিনিব্বন্তানং তেসং ৱেদনাক্খন্ধো নিৰুজ্ঝিত্থ, নো চ তেসং সঞ্ঞাক্খন্ধো নিৰুজ্ঝিস্সতি. ইতৰেসং তেসং ৱেদনাক্খন্ধো চ নিৰুজ্ঝিত্থ সঞ্ঞাক্খন্ধো চ নিৰুজ্ঝিস্সতি.

(খ) যস্স ৱা পন সঞ্ঞাক্খন্ধো নিৰুজ্ঝিস্সতি তস্স ৱেদনাক্খন্ধো নিৰুজ্ঝিত্থাতি? আমন্তা.

(খ) অনুলোমওকাসো

১৪৫. যত্থ ৰূপক্খন্ধো নিৰুজ্ঝিত্থ…পে….

(গ) অনুলোমপুগ্গলোকাসা

১৪৬. (ক) যস্স যত্থ ৰূপক্খন্ধো নিৰুজ্ঝিত্থ তস্স তত্থ ৱেদনাক্খন্ধো নিৰুজ্ঝিস্সতীতি?

পঞ্চৱোকাৰে পৰিনিব্বন্তানং অসঞ্ঞসত্তানং তেসং তত্থ ৰূপক্খন্ধো নিৰুজ্ঝিত্থ, নো চ তেসং তত্থ ৱেদনাক্খন্ধো নিৰুজ্ঝিস্সতি. ইতৰেসং পঞ্চৱোকাৰানং তেসং তত্থ ৰূপক্খন্ধো চ নিৰুজ্ঝিত্থ ৱেদনাক্খন্ধো চ নিৰুজ্ঝিস্সতি.

(খ) যস্স ৱা পন যত্থ ৱেদনাক্খন্ধো নিৰুজ্ঝিস্সতি তস্স তত্থ ৰূপক্খন্ধো নিৰুজ্ঝিত্থাতি?

সুদ্ধাৱাসং উপপজ্জন্তানং অৰূপানং তেসং তত্থ ৱেদনাক্খন্ধো নিৰুজ্ঝিস্সতি, নো চ তেসং তত্থ ৰূপক্খন্ধো নিৰুজ্ঝিত্থ. ইতৰেসং পঞ্চৱোকাৰানং তেসং তত্থ ৱেদনাক্খন্ধো চ নিৰুজ্ঝিস্সতি ৰূপক্খন্ধো চ নিৰুজ্ঝিত্থ.

১৪৭. (ক) যস্স যত্থ ৱেদনাক্খন্ধো নিৰুজ্ঝিত্থ তস্স তত্থ সঞ্ঞাক্খন্ধো নিৰুজ্ঝিস্সতীতি?

পৰিনিব্বন্তানং তেসং তত্থ ৱেদনাক্খন্ধো নিৰুজ্ঝিত্থ, নো চ তেসং তত্থ সঞ্ঞাক্খন্ধো নিৰুজ্ঝিস্সতি. ইতৰেসং চতুৱোকাৰানং পঞ্চৱোকাৰানং তেসং তত্থ ৱেদনাক্খন্ধো চ নিৰুজ্ঝিত্থ সঞ্ঞাক্খন্ধো চ নিৰুজ্ঝিস্সতি.

(খ) যস্স ৱা পন যত্থ সঞ্ঞাক্খন্ধো নিৰুজ্ঝিস্সতি তস্স তত্থ ৱেদনাক্খন্ধো নিৰুজ্ঝিত্থাতি?

সুদ্ধাৱাসং উপপজ্জন্তানং তেসং তত্থ সঞ্ঞাক্খন্ধো নিৰুজ্ঝিস্সতি, নো চ তেসং তত্থ ৱেদনাক্খন্ধো নিৰুজ্ঝিত্থ. ইতৰেসং চতুৱোকাৰানং পঞ্চৱোকাৰানং তেসং তত্থ সঞ্ঞাক্খন্ধো চ নিৰুজ্ঝিস্সতি ৱেদনাক্খন্ধো চ নিৰুজ্ঝিত্থ.

(ঘ) পচ্চনীকপুগ্গলো

১৪৮. (ক) যস্স ৰূপক্খন্ধো ন নিৰুজ্ঝিত্থ তস্স ৱেদনাক্খন্ধো ন নিৰুজ্ঝিস্সতীতি? নত্থি.

(খ) যস্স ৱা পন ৱেদনাক্খন্ধো ন নিৰুজ্ঝিস্সতি তস্স ৰূপক্খন্ধো ন নিৰুজ্ঝিত্থাতি? নিৰুজ্ঝিত্থ.

১৪৯. (ক) যস্স ৱেদনাক্খন্ধো ন নিৰুজ্ঝিত্থ তস্স সঞ্ঞাক্খন্ধো ন নিৰুজ্ঝিস্সতীতি? নত্থি.

(খ) যস্স ৱা পন সঞ্ঞাক্খন্ধো ন নিৰুজ্ঝিস্সতি তস্স ৱেদনাক্খন্ধো ন নিৰুজ্ঝিত্থাতি? নিৰুজ্ঝিত্থ.

(ঙ) পচ্চনীকওকাসো

১৫০. যত্থ ৰূপক্খন্ধো ন নিৰুজ্ঝিত্থ…পে….

(চ) পচ্চনীকপুগ্গলোকাসা

১৫১. (ক) যস্স যত্থ ৰূপক্খন্ধো ন নিৰুজ্ঝিত্থ তস্স তত্থ ৱেদনাক্খন্ধো ন নিৰুজ্ঝিস্সতীতি?

সুদ্ধাৱাসং উপপজ্জন্তানং অৰূপানং তেসং তত্থ ৰূপক্খন্ধো ন নিৰুজ্ঝিত্থ, নো চ তেসং তত্থ ৱেদনাক্খন্ধো ন নিৰুজ্ঝিস্সতি. সুদ্ধাৱাসে পৰিনিব্বন্তানং অৰূপে পৰিনিব্বন্তানং তেসং তত্থ ৰূপক্খন্ধো চ ন নিৰুজ্ঝিত্থ, ৱেদনাক্খন্ধো চ ন নিৰুজ্ঝিস্সতি.

(খ) যস্স ৱা পন যত্থ ৱেদনাক্খন্ধো ন নিৰুজ্ঝিস্সতি তস্স তত্থ ৰূপক্খন্ধো ন নিৰুজ্ঝিত্থাতি?

পঞ্চৱোকাৰে পৰিনিব্বন্তানং অসঞ্ঞসত্তানং তেসং তত্থ ৱেদনাক্খন্ধো ন নিৰুজ্ঝিস্সতি, নো চ তেসং তত্থ ৰূপক্খন্ধো ন নিৰুজ্ঝিত্থ. সুদ্ধাৱাসে পৰিনিব্বন্তানং অৰূপে পৰিনিব্বন্তানং তেসং তত্থ ৱেদনাক্খন্ধো চ ন নিৰুজ্ঝিস্সতি ৰূপক্খন্ধো চ ন নিৰুজ্ঝিত্থ.

১৫২. (ক) যস্স যত্থ ৱেদনাক্খন্ধো ন নিৰুজ্ঝিত্থ তস্স তত্থ সঞ্ঞাক্খন্ধো ন নিৰুজ্ঝিস্সতীতি?

সুদ্ধাৱাসং উপপজ্জন্তানং তেসং তত্থ ৱেদনাক্খন্ধো ন নিৰুজ্ঝিত্থ, নো চ তেসং তত্থ সঞ্ঞাক্খন্ধো ন নিৰুজ্ঝিস্সতি. সুদ্ধাৱাসে পৰিনিব্বন্তানং অসঞ্ঞসত্তানং তেসং তত্থ ৱেদনাক্খন্ধো চ ন নিৰুজ্ঝিত্থ সঞ্ঞাক্খন্ধো চ ন নিৰুজ্ঝিস্সতি.

(খ) যস্স ৱা পন যত্থ সঞ্ঞাক্খন্ধো ন নিৰুজ্ঝিস্সতি তস্স তত্থ ৱেদনাক্খন্ধো ন নিৰুজ্ঝিত্থাতি?

পৰিনিব্বন্তানং তেসং তত্থ সঞ্ঞাক্খন্ধো ন নিৰুজ্ঝিস্সতি, নো চ তেসং তত্থ ৱেদনাক্খন্ধো ন নিৰুজ্ঝিত্থ. সুদ্ধাৱাসে পৰিনিব্বন্তানং অসঞ্ঞসত্তানং তেসং তত্থ সঞ্ঞাক্খন্ধো চ ন নিৰুজ্ঝিস্সতি ৱেদনাক্খন্ধো চ ন নিৰুজ্ঝিত্থ.

নিৰোধৱাৰো.