৬. নহেতুসহেতুকদুকং

১-৭. পটিচ্চৱাৰাদি

১৩. নহেতুং নসহেতুকং ধম্মং পটিচ্চ নহেতু নসহেতুকো ধম্মো উপ্পজ্জতি হেতুপচ্চযা – একং মহাভূতং পটিচ্চ তযো মহাভূতা…পে…. নহেতুং নসহেতুকং ধম্মং পটিচ্চ নহেতু নঅহেতুকো ধম্মো উপ্পজ্জতি হেতুপচ্চযা – পটিসন্ধিক্খণে ৱত্থুং পটিচ্চ নহেতুসহেতুকা খন্ধা. নহেতুং নসহেতুকং ধম্মং পটিচ্চ নহেতু নসহেতুকো চ নহেতু নঅহেতুকো চ ধম্মা উপ্পজ্জন্তি হেতুপচ্চযা. (৩)

নহেতুং নঅহেতুকং ধম্মং পটিচ্চ নহেতু নঅহেতুকো ধম্মো উপ্পজ্জতি হেতুপচ্চযা. নহেতুং নঅহেতুকং ধম্মং পটিচ্চ নহেতু নসহেতুকো ধম্মো উপ্পজ্জতি হেতুপচ্চযা. নহেতুং নঅহেতুকং ধম্মং পটিচ্চ নহেতু নসহেতুকো চ নহেতু নঅহেতুকো চ ধম্মা উপ্পজ্জন্তি হেতুপচ্চযা. (৩)

নহেতুং নসহেতুকঞ্চ নহেতুং নঅহেতুকঞ্চ ধম্মং পটিচ্চ নহেতু নসহেতুকো ধম্মো উপ্পজ্জতি হেতুপচ্চযা. নহেতুং নসহেতুকঞ্চ নহেতুং নঅহেতুকঞ্চ ধম্মং পটিচ্চ নহেতু নঅহেতুকো ধম্মো উপ্পজ্জতি হেতুপচ্চযা. নহেতুং নসহেতুকঞ্চ নহেতুং নঅহেতুকঞ্চ ধম্মং পটিচ্চ নহেতু নসহেতুকো চ নহেতু নঅহেতুকো চ ধম্মা উপ্পজ্জন্তি হেতুপচ্চযা. (৩) (সংখিত্তং.)

১৪. হেতুযা নৱ, আৰম্মণে চত্তাৰি…পে… অৱিগতে নৱ.

(সহজাতৱাৰম্পি…পে… সম্পযুত্তৱাৰম্পি পটিচ্চৱাৰসদিসং.)

আৰম্মণপচ্চযো

১৫. নহেতু নসহেতুকো ধম্মো নহেতুস্স নসহেতুকস্স ধম্মস্স আৰম্মণপচ্চযেন পচ্চযো. নহেতু নসহেতুকো ধম্মো নহেতুস্স নঅহেতুকস্স ধম্মস্স আৰম্মণপচ্চযেন পচ্চযো. (২)

নহেতু নঅহেতুকো ধম্মো নহেতুস্স নঅহেতুকস্স ধম্মস্স আৰম্মণপচ্চযেন পচ্চযো. নহেতু নঅহেতুকো ধম্মো নহেতুস্স নসহেতুকস্স ধম্মস্স আৰম্মণপচ্চযেন পচ্চযো. (২) (সংখিত্তং.)

১৬. আৰম্মণে চত্তাৰি…পে… অৱিগতে সত্ত.

হেতুগোচ্ছকং নিট্ঠিতং.