১-৭. পটিচ্চৱাৰাদি

পচ্চযচতুক্কং

৫১. কুসলং পৰিত্তং ধম্মং পটিচ্চ কুসলো পৰিত্তো ধম্মো উপ্পজ্জতি হেতুপচ্চযা. কুসলং পৰিত্তং ধম্মং পটিচ্চ অব্যাকতো পৰিত্তো ধম্মো উপ্পজ্জতি হেতুপচ্চযা. কুসলং পৰিত্তং ধম্মং পটিচ্চ কুসলো পৰিত্তো চ অব্যাকতো পৰিত্তো চ ধম্মা উপ্পজ্জন্তি হেতুপচ্চযা. (৩)

অকুসলং পৰিত্তং ধম্মং পটিচ্চ অকুসলো পৰিত্তো ধম্মো উপ্পজ্জতি হেতুপচ্চযা… তীণি.

অব্যাকতং পৰিত্তং ধম্মং পটিচ্চ অব্যাকতো পৰিত্তো ধম্মো উপ্পজ্জতি হেতুপচ্চযা. (১)

কুসলং পৰিত্তঞ্চ অব্যাকতং পৰিত্তঞ্চ ধম্মং পটিচ্চ অব্যাকতো পৰিত্তো ধম্মো উপ্পজ্জতি হেতুপচ্চযা. (১)

অকুসলং পৰিত্তঞ্চ অব্যাকতং পৰিত্তঞ্চ ধম্মং পটিচ্চ অব্যাকতো পৰিত্তো ধম্মো উপ্পজ্জতি হেতুপচ্চযা. (সংখিত্তং.)

হেতুযা নৱ, আৰম্মণে তীণি, অৱিগতে নৱ. (সংখিত্তং. সহজাতৱাৰম্পি…পে… সম্পযুত্তৱাৰম্পি পটিচ্চৱাৰসদিসং.)

৫২. কুসলো পৰিত্তো ধম্মো কুসলস্স পৰিত্তস্স ধম্মস্স হেতুপচ্চযেন পচ্চযো… তীণি.

অকুসলো পৰিত্তো ধম্মো অকুসলস্স পৰিত্তস্স ধম্মস্স হেতুপচ্চযেন পচ্চযো… তীণি.

অব্যাকতো পৰিত্তো ধম্মো অব্যাকতস্স পৰিত্তস্স ধম্মস্স হেতুপচ্চযেন পচ্চযো. (১)

কুসলো পৰিত্তো ধম্মো কুসলস্স পৰিত্তস্স ধম্মস্স আৰম্মণপচ্চযেন পচ্চযো. (সংখিত্তং.)

হেতুযা সত্ত, আৰম্মণে নৱ, অৱিগতে তেৰস. (সংখিত্তং. যথা কুসলত্তিকে পঞ্হাৱাৰং এৱং ৱিত্থাৰেতব্বং.)

মহগ্গতাদিপদানি

হেতুপচ্চযো

৫৩. কুসলং মহগ্গতং ধম্মং পটিচ্চ কুসলো মহগ্গতো ধম্মো উপ্পজ্জতি হেতুপচ্চযা. (১)

অব্যাকতং মহগ্গতং ধম্মং পটিচ্চ অব্যাকতো মহগ্গতো ধম্মো উপ্পজ্জতি হেতুপচ্চযা. (১) (সংখিত্তং.)

হেতুযা দ্ৱে, আৰম্মণে দ্ৱে, অৱিগতে দ্ৱে. (সংখিত্তং. সহজাতৱাৰেপি…পে… পঞ্হাৱাৰেপি সব্বত্থ ৱিত্থাৰো).

৫৪. কুসলং অপ্পমাণং ধম্মং পটিচ্চ কুসলো অপ্পমাণো ধম্মো উপ্পজ্জতি হেতুপচ্চযা. (১)

অব্যাকতং অপ্পমাণং ধম্মং পটিচ্চ অব্যাকতো অপ্পমাণো ধম্মো উপ্পজ্জতি হেতুপচ্চযা. (১) (সংখিত্তং.)

হেতুযা দ্ৱে, অৱিগতে দ্ৱে. (সংখিত্তং. সহজাতৱাৰেপি…পে… পঞ্হাৱাৰেপি সব্বত্থ ৱিত্থাৰো.)