১-৭. পটিচ্চৱাৰাদি

পচ্চযচতুক্কং

হেতুপচ্চযো

২৯. কুসলং সৱিতক্কসৱিচাৰং ধম্মং পটিচ্চ কুসলো সৱিতক্কসৱিচাৰো ধম্মো উপ্পজ্জতি হেতুপচ্চযা. (১)

অকুসলং সৱিতক্কসৱিচাৰং ধম্মং পটিচ্চ অকুসলো সৱিতক্কসৱিচাৰো ধম্মো উপ্পজ্জতি হেতুপচ্চযা. (১)

অব্যাকতং সৱিতক্কসৱিচাৰং ধম্মং পটিচ্চ অব্যাকতো সৱিতক্কসৱিচাৰো ধম্মো উপ্পজ্জতি হেতুপচ্চযা. (১) (সংখিত্তং.)

হেতুযা তীণি, আৰম্মণে তীণি, অৱিগতে তীণি. (সংখিত্তং. সহজাতৱাৰম্পি…পে… সম্পযুত্তৱাৰম্পি পটিচ্চৱাৰসদিসং.)

৩০. কুসলো সৱিতক্কসৱিচাৰো ধম্মো কুসলস্স সৱিতক্কসৱিচাৰস্স ধম্মস্স হেতুপচ্চযেন পচ্চযো. (১)

অকুসলো সৱিতক্কসৱিচাৰো ধম্মো অকুসলস্স সৱিতক্কসৱিচাৰস্স ধম্মস্স হেতুপচ্চযেন পচ্চযো. (১)

অব্যাকতো সৱিতক্কসৱিচাৰো ধম্মো অব্যাকতস্স সৱিতক্কসৱিচাৰস্স ধম্মস্স হেতুপচ্চযেন পচ্চযো. (১) (সংখিত্তং.)

৩১. হেতুযা তীণি, আৰম্মণে নৱ, অৱিগতে তীণি. (সংখিত্তং.) (যথা কুসলত্তিকে পঞ্হাৱাৰং এৱং ৱিত্থাৰেতব্বং).

৩২. কুসলং অৱিতক্কৱিচাৰমত্তং ধম্মং পটিচ্চ কুসলো অৱিতক্কৱিচাৰমত্তো ধম্মো উপ্পজ্জতি হেতুপচ্চযা. (১)

অব্যাকতং অৱিতক্কৱিচাৰমত্তং ধম্মং পটিচ্চ অব্যাকতো অৱিতক্কৱিচাৰমত্তো ধম্মো উপ্পজ্জতি হেতুপচ্চযা. (১) (সংখিত্তং.)

হেতুযা দ্ৱে, অৱিগতে দ্ৱে. (সংখিত্তং.)

(সহজাতৱাৰেপি…পে… সম্পযুত্তৱাৰেপি পঞ্হাৱাৰেপি সব্বত্থ ৱিত্থাৰো.)

৩৩. কুসলং অৱিতক্কঅৱিচাৰং ধম্মং পটিচ্চ কুসলো অৱিতক্কঅৱিচাৰো ধম্মো উপ্পজ্জতি হেতুপচ্চযা… তীণি.

অব্যাকতং অৱিতক্কঅৱিচাৰং ধম্মং পটিচ্চ অব্যাকতো অৱিতক্কঅৱিচাৰো ধম্মো উপ্পজ্জতি হেতুপচ্চযা. (১)

কুসলং অৱিতক্কঅৱিচাৰঞ্চ অব্যাকতং অৱিতক্কঅৱিচাৰঞ্চ ধম্মং পটিচ্চ অব্যাকতো অৱিতক্কঅৱিচাৰো ধম্মো উপ্পজ্জতি হেতুপচ্চযা. (১) (সংখিত্তং.)

হেতুযা পঞ্চ, আৰম্মণে দ্ৱে, অৱিগতে পঞ্চ. (সংখিত্তং. সহজাতৱাৰম্পি…পে… পঞ্হাৱাৰম্পি ৱিত্থাৰেতব্বং.)