১. ৱিভঙ্গৱাৰো

হেতুপচ্চযো

৮. সপ্পচ্চযো ধম্মো সপ্পচ্চযস্স ধম্মস্স হেতুপচ্চযেন পচ্চযো – সপ্পচ্চযা হেতূ সম্পযুত্তকানং খন্ধানং চিত্তসমুট্ঠানানঞ্চ ৰূপানং হেতুপচ্চযেন পচ্চযো; পটিসন্ধিক্খণে…পে….

আৰম্মণপচ্চযো

৯. সপ্পচ্চযো ধম্মো সপ্পচ্চযস্স ধম্মস্স আৰম্মণপচ্চযেন পচ্চযো – দানং দত্ৱা, সীলং সমাদিযিত্ৱা, উপোসথকম্মং কত্ৱা তং পচ্চৱেক্খতি, পুব্বে সুচিণ্ণানি…পে… ঝানা ৱুট্ঠহিত্ৱা…পে… অৰিযা মগ্গা ৱুট্ঠহিত্ৱা মগ্গং পচ্চৱেক্খন্তি, ফলং পচ্চৱেক্খন্তি; পহীনে কিলেসে…পে… ৱিক্খম্ভিতে কিলেসে…পে… পুব্বে সমুদাচিণ্ণে কিলেসে জানন্তি, চক্খুং…পে… ৱত্থুং… সপ্পচ্চযে খন্ধে অনিচ্চতো…পে… দোমনস্সং উপ্পজ্জতি; দিব্বেন চক্খুনা ৰূপং পস্সতি, দিব্বায সোতধাতুযা সদ্দং সুণাতি. চেতোপৰিযঞাণেন সপ্পচ্চযচিত্তসমঙ্গিস্স চিত্তং জানাতি, আকাসানঞ্চাযতনং ৱিঞ্ঞাণঞ্চাযতনস্স…পে… আকিঞ্চঞ্ঞাযতনং নেৱসঞ্ঞানাসঞ্ঞাযতনস্স…পে… ৰূপাযতনং চক্খুৱিঞ্ঞাণস্স…পে… ফোট্ঠব্বাযতনং কাযৱিঞ্ঞাণস্স…পে… সপ্পচ্চযা খন্ধা ইদ্ধিৱিধঞাণস্স, চেতোপৰিযঞাণস্স, পুব্বেনিৱাসানুস্সতিঞাণস্স, যথাকম্মূপগঞাণস্স, অনাগতংসঞাণস্স, আৱজ্জনায আৰম্মণপচ্চযেন পচ্চযো. (১)

অপ্পচ্চযো ধম্মো সপ্পচ্চযস্স ধম্মস্স আৰম্মণপচ্চযেন পচ্চযো – অৰিযা নিব্বানং পচ্চৱেক্খন্তি; নিব্বানং গোত্ৰভুস্স, ৱোদানস্স, মগ্গস্স, ফলস্স, আৱজ্জনায আৰম্মণপচ্চযেন পচ্চযো. (১)

অধিপতিপচ্চযো

১০. সপ্পচ্চযো ধম্মো সপ্পচ্চযস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – দানং দত্ৱা সীলং…পে… উপোসথকম্মং কত্ৱা তং গৰুং কত্ৱা পচ্চৱেক্খতি, পুব্বে…পে… ঝানা…পে… অৰিযা মগ্গা ৱুট্ঠহিত্ৱা মগ্গং গৰুং কত্ৱা পচ্চৱেক্খন্তি, ফলং গৰুং কত্ৱা…পে… চক্খুং…পে… ৱত্থুং… সপ্পচ্চযে খন্ধে গৰুং কত্ৱা অস্সাদেতি অভিনন্দতি; তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি. সহজাতাধিপতি – সপ্পচ্চযাধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো. (১)

অপ্পচ্চযো ধম্মো সপ্পচ্চযস্স ধম্মস্স অধিপতিপচ্চযেন পচ্চযো. আৰম্মণাধিপতি – অৰিযা নিব্বানং গৰুং কত্ৱা পচ্চৱেক্খন্তি; নিব্বানং গোত্ৰভুস্স, ৱোদানস্স, মগ্গস্স, ফলস্স অধিপতিপচ্চযেন পচ্চযো. (১)

অনন্তৰপচ্চযাদি

১১. সপ্পচ্চযো ধম্মো সপ্পচ্চযস্স ধম্মস্স অনন্তৰপচ্চযেন পচ্চযো…পে… উপনিস্সযপচ্চযেন পচ্চযো…পে… (দ্ৱে পঞ্হা উপনিস্সযমূলং) পুৰেজাতপচ্চযেন পচ্চযো…পে… অৱিগতপচ্চযেন পচ্চযো (সব্বত্থ একাযেৱ পঞ্হা).