১. ৱিভঙ্গৱাৰো

নহেতুপচ্চযো

৬. সাৰম্মণং ধম্মং পটিচ্চ সাৰম্মণো ধম্মো উপ্পজ্জতি নহেতুপচ্চযা – অহেতুকং সাৰম্মণং একং খন্ধং পটিচ্চ তযো খন্ধা…পে… দ্ৱে খন্ধে…পে… অহেতুকপটিসন্ধিক্খণে…পে… ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

সাৰম্মণং ধম্মং পটিচ্চ অনাৰম্মণো ধম্মো উপ্পজ্জতি নহেতুপচ্চযা – অহেতুকে সাৰম্মণে খন্ধে পটিচ্চ চিত্তসমুট্ঠানং ৰূপং; অহেতুকপটিসন্ধিক্খণে…পে…. (২)

সাৰম্মণং ধম্মং পটিচ্চ সাৰম্মণো চ অনাৰম্মণো চ ধম্মা উপ্পজ্জন্তি নহেতুপচ্চযা – অহেতুকং সাৰম্মণং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… অহেতুকপটিসন্ধিক্খণে…পে…. (৩)

৭. অনাৰম্মণং ধম্মং পটিচ্চ অনাৰম্মণো ধম্মো উপ্পজ্জতি নহেতুপচ্চযা – একং মহাভূতং…পে… অসঞ্ঞসত্তানং একং মহাভূতং…পে…. (১)

অনাৰম্মণং ধম্মং পটিচ্চ সাৰম্মণো ধম্মো উপ্পজ্জতি নহেতুপচ্চযা – অহেতুকপটিসন্ধিক্খণে ৱত্থুং পটিচ্চ সাৰম্মণা খন্ধা. (২)

অনাৰম্মণং ধম্মং পটিচ্চ সাৰম্মণো চ অনাৰম্মণো চ ধম্মা উপ্পজ্জন্তি নহেতুপচ্চযা – অহেতুকপটিসন্ধিক্খণে ৱত্থুং পটিচ্চ সাৰম্মণা খন্ধা, মহাভূতে পটিচ্চ কটত্তাৰূপং. (৩)

৮. সাৰম্মণঞ্চ অনাৰম্মণঞ্চ ধম্মং পটিচ্চ সাৰম্মণো ধম্মো উপ্পজ্জতি নহেতুপচ্চযা – অহেতুকপটিসন্ধিক্খণে সাৰম্মণং একং খন্ধঞ্চ ৱত্থুঞ্চ পটিচ্চ তযো খন্ধা…পে… দ্ৱে খন্ধে চ…পে…. (১)

সাৰম্মণঞ্চ অনাৰম্মণঞ্চ ধম্মং পটিচ্চ অনাৰম্মণো ধম্মো উপ্পজ্জতি নহেতুপচ্চযা – অহেতুকে সাৰম্মণে খন্ধে চ মহাভূতে চ পটিচ্চ চিত্তসমুট্ঠানং ৰূপং; অহেতুকপটিসন্ধিক্খণে…পে…. (২)

সাৰম্মণঞ্চ অনাৰম্মণঞ্চ ধম্মং পটিচ্চ সাৰম্মণো চ অনাৰম্মণো চ ধম্মা উপ্পজ্জন্তি নহেতুপচ্চযা – অহেতুকপটিসন্ধিক্খণে সাৰম্মণং একং খন্ধঞ্চ ৱত্থুঞ্চ পটিচ্চ তযো খন্ধা…পে… দ্ৱে খন্ধে চ…পে… সাৰম্মণে খন্ধে চ মহাভূতে চ পটিচ্চ কটত্তাৰূপং. (৩)

নআৰম্মণপচ্চযো

৯. সাৰম্মণং ধম্মং পটিচ্চ অনাৰম্মণো ধম্মো উপ্পজ্জতি নআৰম্মণপচ্চযা – সাৰম্মণে খন্ধে পটিচ্চ চিত্তসমুট্ঠানং ৰূপং; পটিসন্ধিক্খণে…পে…. (১)

অনাৰম্মণং ধম্মং পটিচ্চ অনাৰম্মণো ধম্মো উপ্পজ্জতি নআৰম্মণপচ্চযা (যাৱ অসঞ্ঞসত্তা). (১)

সাৰম্মণঞ্চ অনাৰম্মণঞ্চ ধম্মং পটিচ্চ অনাৰম্মণো ধম্মো উপ্পজ্জতি নআৰম্মণপচ্চযা – সাৰম্মণে খন্ধে চ মহাভূতে চ পটিচ্চ চিত্তসমুট্ঠানং ৰূপং; পটিসন্ধিক্খণে…পে… (সংখিত্তং). (১)