১. ৱিভঙ্গৱাৰো

নহেতুপচ্চযো

৯৯. চেতসিকং ধম্মং পটিচ্চ চেতসিকো ধম্মো উপ্পজ্জতি নহেতুপচ্চযা – অহেতুকং চেতসিকং একং খন্ধং পটিচ্চ দ্ৱে খন্ধা, দ্ৱে খন্ধে…পে… অহেতুকপটিসন্ধিক্খণে…পে… ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

চেতসিকং ধম্মং পটিচ্চ অচেতসিকো ধম্মো উপ্পজ্জতি নহেতুপচ্চযা – অহেতুকে চেতসিকে খন্ধে পটিচ্চ চিত্তঞ্চ চিত্তসমুট্ঠানঞ্চ ৰূপং; অহেতুকপটিসন্ধিক্খণে…পে…. (২)

চেতসিকং ধম্মং পটিচ্চ চেতসিকো চ অচেতসিকো চ ধম্মা উপ্পজ্জন্তি নহেতুপচ্চযা – অহেতুকং চেতসিকং একং খন্ধং পটিচ্চ দ্ৱে খন্ধা চিত্তঞ্চ চিত্তসমুট্ঠানঞ্চ ৰূপং, দ্ৱে খন্ধে…পে… অহেতুকপটিসন্ধিক্খণে …পে…. (৩)

১০০. অচেতসিকং ধম্মং পটিচ্চ অচেতসিকো ধম্মো উপ্পজ্জতি নহেতুপচ্চযা – অহেতুকং চিত্তং পটিচ্চ চিত্তসমুট্ঠানং ৰূপং; অহেতুকপটিসন্ধিক্খণে চিত্তং পটিচ্চ কটত্তাৰূপং, চিত্তং পটিচ্চ ৱত্থু, ৱত্থুং পটিচ্চ চিত্তং, একং মহাভূতং…পে… অসঞ্ঞসত্তানং একং মহাভূতং…পে…. (১)

অচেতসিকং ধম্মং পটিচ্চ চেতসিকো ধম্মো উপ্পজ্জতি নহেতুপচ্চযা – অহেতুকং চিত্তং পটিচ্চ সম্পযুত্তকা খন্ধা; অহেতুকপটিসন্ধিক্খণে চিত্তং পটিচ্চ সম্পযুত্তকা খন্ধা, অহেতুকপটিসন্ধিক্খণে ৱত্থুং পটিচ্চ চেতসিকা খন্ধা, ৱিচিকিচ্ছাসহগতং উদ্ধচ্চসহগতং চিত্তং পটিচ্চ ৱিচিকিচ্ছাসহগতো উদ্ধচ্চসহগতো মোহো. (২)

অচেতসিকং ধম্মং পটিচ্চ চেতসিকো চ অচেতসিকো চ ধম্মা উপ্পজ্জন্তি নহেতুপচ্চযা – অহেতুকং চিত্তং পটিচ্চ সম্পযুত্তকা খন্ধা চিত্তসমুট্ঠানঞ্চ ৰূপং; অহেতুকপটিসন্ধিক্খণে চিত্তং পটিচ্চ সম্পযুত্তকা খন্ধা কটত্তা চ ৰূপং, অহেতুকপটিসন্ধিক্খণে ৱত্থুং পটিচ্চ চিত্তঞ্চ সম্পযুত্তকা চ খন্ধা. (৩)

১০১. চেতসিকঞ্চ অচেতসিকঞ্চ ধম্মং পটিচ্চ চেতসিকো ধম্মো উপ্পজ্জতি নহেতুপচ্চযা – অহেতুকং চেতসিকং একং খন্ধঞ্চ চিত্তঞ্চ পটিচ্চ দ্ৱে খন্ধা, দ্ৱে খন্ধে চ…পে… অহেতুকপটিসন্ধিক্খণে চেতসিকং একং খন্ধঞ্চ চিত্তঞ্চ পটিচ্চ দ্ৱে খন্ধা, দ্ৱে খন্ধে চ…পে… অহেতুকপটিসন্ধিক্খণে চেতসিকং একং খন্ধঞ্চ ৱত্থুঞ্চ পটিচ্চ দ্ৱে খন্ধা, দ্ৱে খন্ধে চ…পে… ৱিচিকিচ্ছাসহগতে উদ্ধচ্চসহগতে খন্ধে চ চিত্তঞ্চ পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

চেতসিকঞ্চ অচেতসিকঞ্চ ধম্মং পটিচ্চ অচেতসিকো ধম্মো উপ্পজ্জতি নহেতুপচ্চযা – অহেতুকে চেতসিকে খন্ধে চ চিত্তঞ্চ পটিচ্চ চিত্তসমুট্ঠানং ৰূপং, অহেতুকে চেতসিকে খন্ধে চ মহাভূতে চ পটিচ্চ চিত্তসমুট্ঠানং ৰূপং; অহেতুকপটিসন্ধিক্খণে চেতসিকে খন্ধে চ চিত্তঞ্চ পটিচ্চ কটত্তাৰূপং, অহেতুকপটিসন্ধিক্খণে চেতসিকে খন্ধে চ মহাভূতে চ পটিচ্চ কটত্তাৰূপং, অহেতুকপটিসন্ধিক্খণে চেতসিকে খন্ধে চ ৱত্থুঞ্চ পটিচ্চ চিত্তং. (২)

চেতসিকঞ্চ অচেতসিকঞ্চ ধম্মং পটিচ্চ চেতসিকো চ অচেতসিকো চ ধম্মা উপ্পজ্জন্তি নহেতুপচ্চযা – অহেতুকং চেতসিকং একং খন্ধঞ্চ চিত্তঞ্চ পটিচ্চ দ্ৱে খন্ধা চিত্তসমুট্ঠানঞ্চ ৰূপং; অহেতুকপটিসন্ধিক্খণে চেতসিকং একং খন্ধঞ্চ চিত্তঞ্চ পটিচ্চ দ্ৱে খন্ধা কটত্তা চ ৰূপং, অহেতুকপটিসন্ধিক্খণে চেতসিকং একং খন্ধঞ্চ ৱত্থুঞ্চ পটিচ্চ দ্ৱে খন্ধা চিত্তঞ্চ, দ্ৱে খন্ধে চ…পে…. (৩)

নআৰম্মণপচ্চযো

১০২. চেতসিকং ধম্মং পটিচ্চ অচেতসিকো ধম্মো উপ্পজ্জতি নআৰম্মণপচ্চযা – চেতসিকে খন্ধে পটিচ্চ চিত্তসমুট্ঠানং ৰূপং; পটিসন্ধিক্খণে…পে…. (১)

অচেতসিকং ধম্মং পটিচ্চ অচেতসিকো ধম্মো উপ্পজ্জতি নআৰম্মণপচ্চযা – চিত্তং পটিচ্চ চিত্তসমুট্ঠানং ৰূপং; পটিসন্ধিক্খণে …পে… (যাৱ অসঞ্ঞসত্তা). (১)

চেতসিকঞ্চ অচেতসিকঞ্চ ধম্মং পটিচ্চ অচেতসিকো ধম্মো উপ্পজ্জতি নআৰম্মণপচ্চযা – চেতসিকে খন্ধে চ চিত্তঞ্চ পটিচ্চ চিত্তসমুট্ঠানং ৰূপং, চেতসিকে খন্ধে চ মহাভূতে চ পটিচ্চ চিত্তসমুট্ঠানং ৰূপং (পটিসন্ধিক্খণে দ্ৱেপি কাতব্বা, সংখিত্তং).