১. ৱিভঙ্গৱাৰো

নহেতুপচ্চযো

৫৩. চিত্তং ধম্মং পটিচ্চ নোচিত্তো ধম্মো উপ্পজ্জতি নহেতুপচ্চযা – অহেতুকং চিত্তং পটিচ্চ সম্পযুত্তকা খন্ধা চিত্তসমুট্ঠানঞ্চ ৰূপং; অহেতুকপটিসন্ধিক্খণে চিত্তং…পে… ৱিচিকিচ্ছাসহগতং উদ্ধচ্চসহগতং চিত্তং পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

নোচিত্তং ধম্মং পটিচ্চ নোচিত্তো ধম্মো উপ্পজ্জতি নহেতুপচ্চযা – অহেতুকং নোচিত্তং একং খন্ধং পটিচ্চ দ্ৱে খন্ধা চিত্তসমুট্ঠানঞ্চ ৰূপং, দ্ৱে খন্ধে…পে… অহেতুকপটিসন্ধিক্খণে …পে… (যাৱ অসঞ্ঞসত্তা) ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

নোচিত্তং ধম্মং পটিচ্চ চিত্তো ধম্মো উপ্পজ্জতি নহেতুপচ্চযা – অহেতুকে নোচিত্তে খন্ধে পটিচ্চ চিত্তং; অহেতুকপটিসন্ধিক্খণে নোচিত্তে খন্ধে পটিচ্চ চিত্তং; অহেতুকপটিসন্ধিক্খণে ৱত্থুং পটিচ্চ চিত্তং. (২)

নোচিত্তং ধম্মং পটিচ্চ চিত্তো চ নোচিত্তো চ ধম্মা উপ্পজ্জন্তি নহেতুপচ্চযা – অহেতুকং নোচিত্তং একং খন্ধং পটিচ্চ দ্ৱে খন্ধা চিত্তঞ্চ চিত্তসমুট্ঠানঞ্চ ৰূপং, দ্ৱে খন্ধে…পে… অহেতুকপটিসন্ধিক্খণে…পে… অহেতুকপটিসন্ধিক্খণে ৱত্থুং পটিচ্চ চিত্তঞ্চ সম্পযুত্তকা চ খন্ধা. (৩)

চিত্তঞ্চ নোচিত্তঞ্চ ধম্মং পটিচ্চ নোচিত্তো ধম্মো উপ্পজ্জতি নহেতুপচ্চযা – অহেতুকং নোচিত্তং একং খন্ধঞ্চ চিত্তঞ্চ পটিচ্চ দ্ৱে খন্ধা চিত্তসমুট্ঠানঞ্চ ৰূপং, দ্ৱে খন্ধে চ…পে… অহেতুকপটিসন্ধিক্খণে নোচিত্তং একং খন্ধঞ্চ চিত্তঞ্চ পটিচ্চ দ্ৱে খন্ধা কটত্তা চ ৰূপং, দ্ৱে খন্ধে চ…পে… অহেতুকপটিসন্ধিক্খণে চিত্তঞ্চ ৱত্থুঞ্চ পটিচ্চ নোচিত্তা খন্ধা, ৱিচিকিচ্ছাসহগতং উদ্ধচ্চসহগতং চিত্তঞ্চ সম্পযুত্তকে চ খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

নআৰম্মণপচ্চযো

৫৪. চিত্তং ধম্মং পটিচ্চ নোচিত্তো ধম্মো উপ্পজ্জতি নআৰম্মণপচ্চযা – চিত্তং পটিচ্চ চিত্তসমুট্ঠানং ৰূপং; পটিসন্ধিক্খণে…পে…. (১)

নোচিত্তং ধম্মং পটিচ্চ নোচিত্তো ধম্মো উপ্পজ্জতি নআৰম্মণপচ্চযা – নোচিত্তে খন্ধে পটিচ্চ চিত্তসমুট্ঠানং ৰূপং; পটিসন্ধিক্খণে…পে… (যাৱ অসঞ্ঞসত্তা). (২)

চিত্তঞ্চ নোচিত্তঞ্চ ধম্মং পটিচ্চ নোচিত্তো ধম্মো উপ্পজ্জতি নআৰম্মণপচ্চযা – চিত্তঞ্চ সম্পযুত্তকে চ খন্ধে পটিচ্চ চিত্তসমুট্ঠানং ৰূপং, চিত্তঞ্চ মহাভূতে চ পটিচ্চ চিত্তসমুট্ঠানং ৰূপং; পটিসন্ধিক্খণে চিত্তঞ্চ সম্পযুত্তকে চ খন্ধে পটিচ্চ কটত্তাৰূপং, চিত্তঞ্চ মহাভূতে চ পটিচ্চ কটত্তাৰূপং. (১)

নঅধিপতিপচ্চযাদি

৫৫. চিত্তং ধম্মং পটিচ্চ নোচিত্তো ধম্মো উপ্পজ্জতি নঅধিপতিপচ্চযা … পঞ্চ… নঅনন্তৰপচ্চযা…পে… নউপনিস্সযপচ্চযা… তীণি.

নপুৰেজাতপচ্চযাদি

৫৬. চিত্তং ধম্মং পটিচ্চ নোচিত্তো ধম্মো উপ্পজ্জতি নপুৰেজাতপচ্চযা – অৰূপে চিত্তং পটিচ্চ সম্পযুত্তকা খন্ধা, চিত্তং পটিচ্চ চিত্তসমুট্ঠানং ৰূপং; পটিসন্ধিক্খণে চিত্তং পটিচ্চ সম্পযুত্তকা খন্ধা কটত্তা চ ৰূপং. (১)

নোচিত্তং ধম্মং পটিচ্চ নোচিত্তো ধম্মো উপ্পজ্জতি নপুৰেজাতপচ্চযা – অৰূপে নোচিত্তং একং খন্ধং পটিচ্চ দ্ৱে খন্ধা, দ্ৱে খন্ধে…পে… নোচিত্তে খন্ধে পটিচ্চ চিত্তসমুট্ঠানং ৰূপং; পটিসন্ধিক্খণে…পে… (যাৱ অসঞ্ঞসত্তা). (১)

নোচিত্তং ধম্মং পটিচ্চ চিত্তো ধম্মো উপ্পজ্জতি নপুৰেজাতপচ্চযা – অৰূপে নোচিত্তে খন্ধে পটিচ্চ চিত্তং; পটিসন্ধিক্খণে… ৱত্থুং পটিচ্চ চিত্তং. (২)

নোচিত্তং ধম্মং পটিচ্চ চিত্তো চ নোচিত্তো চ ধম্মা উপ্পজ্জন্তি নপুৰেজাতপচ্চযা – অৰূপে নোচিত্তং একং খন্ধং পটিচ্চ দ্ৱে খন্ধা চিত্তঞ্চ, দ্ৱে খন্ধে…পে… পটিসন্ধিক্খণে ৱত্থুং পটিচ্চ চিত্তঞ্চ সম্পযুত্তকা চ খন্ধা. (৩)

চিত্তঞ্চ নোচিত্তঞ্চ ধম্মং পটিচ্চ নোচিত্তো ধম্মো উপ্পজ্জতি নপুৰেজাতপচ্চযা – অৰূপে নোচিত্তং একং খন্ধঞ্চ চিত্তঞ্চ পটিচ্চ দ্ৱে খন্ধা, দ্ৱে খন্ধে চ…পে… নোচিত্তে খন্ধে চ চিত্তঞ্চ পটিচ্চ চিত্তসমুট্ঠানং ৰূপং, চিত্তঞ্চ মহাভূতে চ পটিচ্চ চিত্তসমুট্ঠানং ৰূপং; পটিসন্ধিক্খণে চিত্তঞ্চ ৱত্থুঞ্চ পটিচ্চ নোচিত্তা খন্ধা; পটিসন্ধিক্খণে চিত্তঞ্চ সম্পযুত্তকে চ খন্ধে পটিচ্চ কটত্তাৰূপং, চিত্তঞ্চ মহাভূতে চ পটিচ্চ কটত্তাৰূপং. (১)

নপচ্ছাজাতপচ্চযা… নআসেৱনপচ্চযা….

নকম্মপচ্চযো

৫৭. চিত্তং ধম্মং পটিচ্চ নোচিত্তো ধম্মো উপ্পজ্জতি নকম্মপচ্চযা – চিত্তং পটিচ্চ সম্পযুত্তকা চেতনা. (১)

নোচিত্তং ধম্মং পটিচ্চ নোচিত্তো ধম্মো উপ্পজ্জতি নকম্মপচ্চযা – নোচিত্তে খন্ধে পটিচ্চ সম্পযুত্তকা চেতনা; বাহিৰং… আহাৰসমুট্ঠানং… উতুসমুট্ঠানং…পে…. (১)

চিত্তঞ্চ নোচিত্তঞ্চ ধম্মং পটিচ্চ নোচিত্তো ধম্মো উপ্পজ্জতি নকম্মপচ্চযা – নোচিত্তে খন্ধে চ চিত্তঞ্চ পটিচ্চ সম্পযুত্তকা চেতনা (সংখিত্তং). (১)