১. ৱিভঙ্গৱাৰো

হেতুপচ্চযো

১. সাৰম্মণং ধম্মং পটিচ্চ সাৰম্মণো ধম্মো উপ্পজ্জতি হেতুপচ্চযা – সাৰম্মণং একং খন্ধং পটিচ্চ তযো খন্ধা…পে… দ্ৱে খন্ধে…পে… পটিসন্ধিক্খণে…পে…. (১)

সাৰম্মণং ধম্মং পটিচ্চ অনাৰম্মণো ধম্মো উপ্পজ্জতি হেতুপচ্চযা – সাৰম্মণে খন্ধে পটিচ্চ চিত্তসমুট্ঠানং ৰূপং; পটিসন্ধিক্খণে…পে…. (২)

সাৰম্মণং ধম্মং পটিচ্চ সাৰম্মণো চ অনাৰম্মণো চ ধম্মা উপ্পজ্জন্তি হেতুপচ্চযা – সাৰম্মণং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… পটিসন্ধিক্খণে…পে…. (৩)

২. অনাৰম্মণং ধম্মং পটিচ্চ অনাৰম্মণো ধম্মো উপ্পজ্জতি হেতুপচ্চযা – একং মহাভূতং…পে… মহাভূতে পটিচ্চ চিত্তসমুট্ঠানং ৰূপং কটত্তাৰূপং উপাদাৰূপং. (১)

অনাৰম্মণং ধম্মং পটিচ্চ সাৰম্মণো ধম্মো উপ্পজ্জতি হেতুপচ্চযা – পটিসন্ধিক্খণে ৱত্থুং পটিচ্চ সাৰম্মণা খন্ধা. (২)

অনাৰম্মণং ধম্মং পটিচ্চ সাৰম্মণো চ অনাৰম্মণো চ ধম্মো উপ্পজ্জন্তি হেতুপচ্চযা – পটিসন্ধিক্খণে ৱত্থুং পটিচ্চ সাৰম্মণা খন্ধা, মহাভূতে পটিচ্চ কটত্তাৰূপং. (৩)

৩. সাৰম্মণঞ্চ অনাৰম্মণঞ্চ ধম্মং পটিচ্চ সাৰম্মণো ধম্মো উপ্পজ্জতি হেতুপচ্চযা – পটিসন্ধিক্খণে সাৰম্মণং একং খন্ধঞ্চ ৱত্থুঞ্চ পটিচ্চ তযো খন্ধা…পে… দ্ৱে খন্ধে চ…পে…. (১)

সাৰম্মণঞ্চ অনাৰম্মণঞ্চ ধম্মং পটিচ্চ অনাৰম্মণো ধম্মো উপ্পজ্জতি হেতুপচ্চযা – সাৰম্মণে খন্ধে চ মহাভূতে চ পটিচ্চ চিত্তসমুট্ঠানং ৰূপং; পটিসন্ধিক্খণে…পে…. (২)

সাৰম্মণঞ্চ অনাৰম্মণঞ্চ ধম্মং পটিচ্চ সাৰম্মণো চ অনাৰম্মণো চ ধম্মা উপ্পজ্জন্তি হেতুপচ্চযা – পটিসন্ধিক্খণে সাৰম্মণং একং খন্ধঞ্চ ৱত্থুঞ্চ পটিচ্চ তযো খন্ধা…পে… দ্ৱে খন্ধে চ…পে… সাৰম্মণে খন্ধে চ মহাভূতে চ পটিচ্চ কটত্তাৰূপং. (৩)

আৰম্মণপচ্চযো

৪. সাৰম্মণং ধম্মং পটিচ্চ সাৰম্মণো ধম্মো উপ্পজ্জতি আৰম্মণপচ্চযা – সাৰম্মণং একং খন্ধং পটিচ্চ তযো খন্ধা…পে… দ্ৱে খন্ধে…পে… পটিসন্ধিক্খণে…পে….

অনাৰম্মণং ধম্মং পটিচ্চ সাৰম্মণো ধম্মো উপ্পজ্জতি আৰম্মণপচ্চযা – পটিসন্ধিক্খণে ৱত্থুং পটিচ্চ সাৰম্মণা খন্ধা.

সাৰম্মণঞ্চ অনাৰম্মণঞ্চ ধম্মং পটিচ্চ সাৰম্মণো ধম্মো উপ্পজ্জতি আৰম্মণপচ্চযা – পটিসন্ধিক্খণে সাৰম্মণং একং খন্ধঞ্চ ৱত্থুঞ্চ পটিচ্চ তযো খন্ধা…পে… দ্ৱে খন্ধে চ…পে… (সংখিত্তং).