১. ৱিভঙ্গৱাৰো

নহেতুপচ্চযো

৪২০. উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নহেতুপচ্চযা – অহেতুকং উপাদিন্নং একং খন্ধং পটিচ্চ তযো খন্ধা…পে… দ্ৱে খন্ধে…পে… অহেতুকপটিসন্ধিক্খণে উপাদিন্নং একং খন্ধং পটিচ্চ তযো খন্ধা কটত্তা চ ৰূপং…পে… দ্ৱে খন্ধে…পে… খন্ধে পটিচ্চ ৱত্থু, ৱত্থুং পটিচ্চ খন্ধা, একং মহাভূতং পটিচ্চ…পে… মহাভূতে পটিচ্চ কটত্তাৰূপং উপাদাৰূপং, অসঞ্ঞসত্তানং একং মহাভূতং পটিচ্চ…পে… মহাভূতে পটিচ্চ কটত্তাৰূপং উপাদাৰূপং. (১)

উপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নহেতুপচ্চযা – অহেতুকে উপাদিন্নে খন্ধে পটিচ্চ চিত্তসমুট্ঠানং ৰূপং. (২)

উপাদিন্নং ধম্মং পটিচ্চ উপাদিন্নো চ অনুপাদিন্নো চ ধম্মা উপ্পজ্জন্তি নহেতুপচ্চযা – অহেতুকং উপাদিন্নং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে…. (৩)

৪২১. অনুপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নহেতুপচ্চযা – অহেতুকং অনুপাদিন্নং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… একং মহাভূতং…পে… মহাভূতে পটিচ্চ চিত্তসমুট্ঠানং ৰূপং উপাদাৰূপং. বাহিৰং… আহাৰসমুট্ঠানং… উতুসমুট্ঠানং একং মহাভূতং…পে… মহাভূতে পটিচ্চ উপাদাৰূপং. ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

উপাদিন্নঞ্চ অনুপাদিন্নঞ্চ ধম্মং পটিচ্চ অনুপাদিন্নো ধম্মো উপ্পজ্জতি নহেতুপচ্চযা – অহেতুকে উপাদিন্নে খন্ধে চ মহাভূতে চ পটিচ্চ চিত্তসমুট্ঠানং ৰূপং. (১)

নআৰম্মণপচ্চযো

৪২২. উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নআৰম্মণপচ্চযা – পটিসন্ধিক্খণে উপাদিন্নে খন্ধে পটিচ্চ কটত্তাৰূপং, খন্ধে পটিচ্চ ৱত্থু, একং মহাভূতং…পে… মহাভূতে পটিচ্চ কটত্তাৰূপং উপাদাৰূপং. অসঞ্ঞসত্তানং একং মহাভূতং…পে… মহাভূতে পটিচ্চ কটত্তাৰূপং উপাদাৰূপং. (১)

উপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নআৰম্মণপচ্চযা – উপাদিন্নে খন্ধে পটিচ্চ চিত্তসমুট্ঠানং ৰূপং. (২)

অনুপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নআৰম্মণপচ্চযা – অনুপাদিন্নে খন্ধে পটিচ্চ চিত্তসমুট্ঠানং ৰূপং, একং মহাভূতং…পে… বাহিৰং… আহাৰসমুট্ঠানং… উতুসমুট্ঠানং একং মহাভূতং…পে… মহাভূতে পটিচ্চ উপাদাৰূপং. (১)

উপাদিন্নঞ্চ অনুপাদিন্নঞ্চ ধম্মং পটিচ্চ অনুপাদিন্নো ধম্মো উপ্পজ্জতি নআৰম্মণপচ্চযা – উপাদিন্নে খন্ধে চ মহাভূতে চ পটিচ্চ চিত্তসমুট্ঠানং ৰূপং. (১)

নঅধিপতিপচ্চযাদি

৪২৩. উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নঅধিপতিপচ্চযা… নঅনন্তৰপচ্চযা… নসমনন্তৰপচ্চযা… নঅঞ্ঞমঞ্ঞপচ্চযা… নউপনিস্সযপচ্চযা.

নপুৰেজাতপচ্চযাদি

৪২৪. উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নপুৰেজাতপচ্চযা – অৰূপে উপাদিন্নং একং খন্ধং পটিচ্চ তযো খন্ধা…পে… দ্ৱে খন্ধে…পে… পটিসন্ধিক্খণে উপাদিন্নং একং খন্ধং পটিচ্চ তযো খন্ধা কটত্তা চ ৰূপং…পে… দ্ৱে খন্ধে…পে… (যাৱ অসঞ্ঞসত্তা). (১)

উপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নপুৰেজাতপচ্চযা – উপাদিন্নে খন্ধে পটিচ্চ চিত্তসমুট্ঠানং ৰূপং. (২)

অনুপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নপুৰেজাতপচ্চযা – অৰূপে অনুপাদিন্নং একং খন্ধং পটিচ্চ তযো খন্ধা…পে… দ্ৱে খন্ধে…পে… অনুপাদিন্নে খন্ধে পটিচ্চ চিত্তসমুট্ঠানং ৰূপং, একং মহাভূতং…পে… (যাৱ অসঞ্ঞসত্তা). (১)

উপাদিন্নঞ্চ অনুপাদিন্নঞ্চ ধম্মং পটিচ্চ অনুপাদিন্নো ধম্মো উপ্পজ্জতি নপুৰেজাতপচ্চযা – উপাদিন্নে খন্ধে চ মহাভূতে চ পটিচ্চ চিত্তসমুট্ঠানং ৰূপং… নপচ্ছাজাতপচ্চযা… নআসেৱনপচ্চযা. (১)

নকম্মপচ্চযো

৪২৫. অনুপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নকম্মপচ্চযা – অনুপাদিন্নে খন্ধে পটিচ্চ অনুপাদিন্না চেতনা… বাহিৰং… আহাৰসমুট্ঠানং… উতুসমুট্ঠানং…পে… মহাভূতে পটিচ্চ উপাদাৰূপং. (১)

নৱিপাকপচ্চযো

৪২৬. উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নৱিপাকপচ্চযা – অসঞ্ঞসত্তানং একং মহাভূতং…পে… মহাভূতে পটিচ্চ কটত্তাৰূপং উপাদাৰূপং. (১)

অনুপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নৱিপাকপচ্চযা – অনুপাদিন্নং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে…পে… একং মহাভূতং…পে… (যাৱ উতুসমুট্ঠানং).

নআহাৰপচ্চযো

৪২৭. উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নআহাৰপচ্চযা – অসঞ্ঞসত্তানং একং মহাভূতং…পে…. (১)

অনুপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নআহাৰপচ্চযা – বাহিৰং… উতুসমুট্ঠানং…পে…. (১)

নইন্দ্ৰিযপচ্চযো

৪২৮. উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নইন্দ্ৰিযপচ্চযা – অসঞ্ঞসত্তানং মহাভূতে পটিচ্চ ৰূপজীৱিতিন্দ্ৰিযং. (১)

অনুপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নইন্দ্ৰিযপচ্চযা – বাহিৰং… আহাৰসমুট্ঠানং… উতুসমুট্ঠানং…পে…. (১)

নঝানপচ্চযাদি

৪২৯. উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নঝানপচ্চযা – পঞ্চৱিঞ্ঞাণসহগতং একং খন্ধং পটিচ্চ তযো খন্ধা…পে… দ্ৱে খন্ধে…পে… অসঞ্ঞসত্তানং…পে….

অনুপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নঝানপচ্চযা – বাহিৰং… আহাৰসমুট্ঠানং… উতুসমুট্ঠানং…পে….

উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নমগ্গপচ্চযা (নহেতুসদিসং, মোহো নত্থি)… নসম্পযুত্তপচ্চযা.

নৱিপ্পযুত্তপচ্চযাদি

৪৩০. উপাদিন্নং ধম্মং পটিচ্চ উপাদিন্নো ধম্মো উপ্পজ্জতি নৱিপ্পযুত্তপচ্চযা – অৰূপে উপাদিন্নং একং খন্ধং পটিচ্চ তযো খন্ধা…পে… দ্ৱে খন্ধে…পে… অসঞ্ঞসত্তানং একং মহাভূতং পটিচ্চ…পে….

অনুপাদিন্নং ধম্মং পটিচ্চ অনুপাদিন্নো ধম্মো উপ্পজ্জতি নৱিপ্পযুত্তপচ্চযা – অৰূপে অনুপাদিন্নং একং খন্ধং পটিচ্চ তযো খন্ধা…পে… দ্ৱে খন্ধে…পে… বাহিৰং … আহাৰসমুট্ঠানং… উতুসমুট্ঠানং…পে… নোনত্থিপচ্চযা… নোৱিগতপচ্চযা.