১. ৱিভঙ্গৱাৰো

হেতুপচ্চযো

৩৩২. অজ্ঝত্তিকং ধম্মং পচ্চযা অজ্ঝত্তিকো ধম্মো উপ্পজ্জতি হেতুপচ্চযা… তীণি (পটিচ্চসদিসা).

বাহিৰং ধম্মং পচ্চযা বাহিৰো ধম্মো উপ্পজ্জতি হেতুপচ্চযা – বাহিৰং একং খন্ধং পচ্চযা দ্ৱে খন্ধা চিত্তসমুট্ঠানঞ্চ ৰূপং, দ্ৱে খন্ধে…পে… (পটিসন্ধিক্খণে দ্ৱেপি কাতব্বা, যাৱ অজ্ঝত্তিকা মহাভূতা) ৱত্থুং পচ্চযা বাহিৰা খন্ধা. বাহিৰং ধম্মং পচ্চযা অজ্ঝত্তিকো ধম্মো উপ্পজ্জতি হেতুপচ্চযা – বাহিৰে খন্ধে পচ্চযা চিত্তং, ৱত্থুং পচ্চযা চিত্তং (পটিসন্ধিক্খণে দ্ৱেপি কাতব্বা). বাহিৰং ধম্মং পচ্চযা অজ্ঝত্তিকো চ বাহিৰো চ ধম্মা উপ্পজ্জন্তি হেতুপচ্চযা – বাহিৰং একং খন্ধং পচ্চযা দ্ৱে খন্ধা চিত্তঞ্চ চিত্তসমুট্ঠানঞ্চ ৰূপং, দ্ৱে খন্ধে…পে… ৱত্থুং পচ্চযা চিত্তং সম্পযুত্তকা চ খন্ধা (পটিসন্ধিক্খণে দ্ৱেপি কাতব্বা). (৩)

৩৩৩. অজ্ঝত্তিকঞ্চ বাহিৰঞ্চ ধম্মং পচ্চযা অজ্ঝত্তিকো ধম্মো উপ্পজ্জতি হেতুপচ্চযা – পটিসন্ধিক্খণে চিত্তঞ্চ সম্পযুত্তকে চ খন্ধে পচ্চযা অজ্ঝত্তিকং কটত্তাৰূপং. অজ্ঝত্তিকঞ্চ বাহিৰঞ্চ ধম্মং পচ্চযা বাহিৰো ধম্মো উপ্পজ্জতি হেতুপচ্চযা – বাহিৰং একং খন্ধঞ্চ চিত্তঞ্চ পচ্চযা দ্ৱে খন্ধা চিত্তসমুট্ঠানঞ্চ ৰূপং, দ্ৱে খন্ধে…পে… চিত্তঞ্চ মহাভূতে চ পচ্চযা চিত্তসমুট্ঠানং ৰূপং, চিত্তঞ্চ ৱত্থুঞ্চ পচ্চযা বাহিৰা খন্ধা (পটিসন্ধিক্খণে তীণিপি কাতব্বা). অজ্ঝত্তিকঞ্চ বাহিৰঞ্চ ধম্মং পচ্চযা অজ্ঝত্তিকো চ বাহিৰো চ ধম্মা উপ্পজ্জন্তি হেতুপচ্চযা – পটিসন্ধিক্খণে বাহিৰং একং খন্ধঞ্চ চিত্তঞ্চ পচ্চযা দ্ৱে খন্ধা অজ্ঝত্তিকঞ্চ বাহিৰঞ্চ কটত্তাৰূপং, দ্ৱে খন্ধে…পে…. (৩)

আৰম্মণপচ্চযো

৩৩৪. অজ্ঝত্তিকং ধম্মং পচ্চযা অজ্ঝত্তিকো ধম্মো উপ্পজ্জতি আৰম্মণপচ্চযা – চক্খাযতনং পচ্চযা চক্খুৱিঞ্ঞাণং…পে… কাযাযতনং …পে…. অজ্ঝত্তিকং ধম্মং পচ্চযা বাহিৰো ধম্মো উপ্পজ্জতি আৰম্মণপচ্চযা – চক্খাযতনঞ্চ চক্খুৱিঞ্ঞাণঞ্চ পচ্চযা চক্খুৱিঞ্ঞাণসহগতা খন্ধা…পে… কাযাযতনঞ্চ…পে… চিত্তং পচ্চযা সম্পযুত্তকা খন্ধা; পটিসন্ধিক্খণে…পে…. অজ্ঝত্তিকং ধম্মং পচ্চযা অজ্ঝত্তিকো চ বাহিৰো চ ধম্মা উপ্পজ্জন্তি আৰম্মণপচ্চযা – চক্খাযতনং পচ্চযা চক্খুৱিঞ্ঞাণং সম্পযুত্তকা চ খন্ধা…পে… কাযাযতনং…পে…. (৩)

বাহিৰং ধম্মং পচ্চযা বাহিৰো ধম্মো উপ্পজ্জতি আৰম্মণপচ্চযা – বাহিৰং একং খন্ধং পচ্চযা দ্ৱে খন্ধা, দ্ৱে খন্ধে…পে… পটিসন্ধিক্খণে…পে… ৱত্থুং পচ্চযা বাহিৰা খন্ধা. বাহিৰং ধম্মং পচ্চযা অজ্ঝত্তিকো ধম্মো উপ্পজ্জতি আৰম্মণপচ্চযা – বাহিৰে খন্ধে পচ্চযা চিত্তং, ৱত্থুং পচ্চযা চিত্তং (পটিসন্ধিক্খণে দ্ৱেপি কাতব্বা). বাহিৰং ধম্মং পচ্চযা অজ্ঝত্তিকো চ বাহিৰো চ ধম্মা উপ্পজ্জন্তি আৰম্মণপচ্চযা – ৱত্থুং পচ্চযা চিত্তঞ্চ সম্পযুত্তকা চ খন্ধা (পটিসন্ধিক্খণে একং কাতব্বং). (৩)

৩৩৫. অজ্ঝত্তিকঞ্চ বাহিৰঞ্চ ধম্মং পচ্চযা অজ্ঝত্তিকো ধম্মো উপ্পজ্জতি আৰম্মণপচ্চযা – চক্খুৱিঞ্ঞাণসহগতে খন্ধে চ চক্খাযতনঞ্চ পচ্চযা চক্খুৱিঞ্ঞাণং…পে… কাযৱিঞ্ঞাণসহগতে…পে….

অজ্ঝত্তিকঞ্চ বাহিৰঞ্চ ধম্মং পচ্চযা বাহিৰো ধম্মো উপ্পজ্জতি আৰম্মণপচ্চযা – চক্খুৱিঞ্ঞাণসহগতং একং খন্ধঞ্চ চক্খাযতনঞ্চ চক্খুৱিঞ্ঞাণঞ্চ পচ্চযা দ্ৱে খন্ধা, দ্ৱে খন্ধে…পে… কাযৱিঞ্ঞাণসহগতং…পে… বাহিৰং একং খন্ধঞ্চ চিত্তঞ্চ পচ্চযা দ্ৱে খন্ধা, দ্ৱে খন্ধে…পে… চিত্তঞ্চ ৱত্থুঞ্চ পচ্চযা বাহিৰা খন্ধা (পটিসন্ধিক্খণে দ্ৱেপি কাতব্বা). অজ্ঝত্তিকঞ্চ বাহিৰঞ্চ ধম্মং পচ্চযা অজ্ঝত্তিকো চ বাহিৰো চ ধম্মা উপ্পজ্জন্তি আৰম্মণপচ্চযা – চক্খুৱিঞ্ঞাণসহগতং একং খন্ধঞ্চ চক্খাযতনঞ্চ পচ্চযা দ্ৱে খন্ধা চক্খুৱিঞ্ঞাণঞ্চ, দ্ৱে খন্ধে…পে… (সংখিত্তং). (৩)