১. ৱিভঙ্গৱাৰো

নহেতুপচ্চযো

৩২৩. অজ্ঝত্তিকং ধম্মং পটিচ্চ অজ্ঝত্তিকো ধম্মো উপ্পজ্জতি নহেতুপচ্চযা – অহেতুকপটিসন্ধিক্খণে চিত্তং পটিচ্চ অজ্ঝত্তিকং কটত্তাৰূপং. (১)

অজ্ঝত্তিকং ধম্মং পটিচ্চ বাহিৰো ধম্মো উপ্পজ্জতি নহেতুপচ্চযা – অহেতুকং চিত্তং পটিচ্চ সম্পযুত্তকা খন্ধা চিত্তসমুট্ঠানঞ্চ ৰূপং; অহেতুকপটিসন্ধিক্খণে চিত্তং পটিচ্চ সম্পযুত্তকা খন্ধা বাহিৰং কটত্তা চ ৰূপং, ৱিচিকিচ্ছাসহগতং উদ্ধচ্চসহগতং চিত্তং পটিচ্চ ৱিচিকিচ্ছাসহগতো উদ্ধচ্চসহগতো মোহো. (২)

অজ্ঝত্তিকং ধম্মং পটিচ্চ অজ্ঝত্তিকো চ বাহিৰো চ ধম্মা উপ্পজ্জন্তি নহেতুপচ্চযা – অহেতুকপটিসন্ধিক্খণে চিত্তং পটিচ্চ সম্পযুত্তকা খন্ধা অজ্ঝত্তিকঞ্চ বাহিৰঞ্চ কটত্তাৰূপং. (৩)

৩২৪. বাহিৰং ধম্মং পটিচ্চ বাহিৰো ধম্মো উপ্পজ্জতি নহেতুপচ্চযা – অহেতুকং বাহিৰং একং খন্ধং পটিচ্চ দ্ৱে খন্ধা চিত্তসমুট্ঠানঞ্চ ৰূপং, দ্ৱে খন্ধে…পে… অহেতুকপটিসন্ধিক্খণে …পে… (যাৱ অসঞ্ঞসত্তা) ৱিচিকিচ্ছাসহগতে উদ্ধচ্চসহগতে খন্ধে পটিচ্চ ৱিচিকিচ্ছাসহগতো উদ্ধচ্চসহগতো মোহো. (১)

বাহিৰং ধম্মং পটিচ্চ অজ্ঝত্তিকো ধম্মো উপ্পজ্জতি নহেতুপচ্চযা – অহেতুকে বাহিৰে খন্ধে পটিচ্চ চিত্তং; অহেতুকপটিসন্ধিক্খণে বাহিৰে খন্ধে পটিচ্চ চিত্তং অজ্ঝত্তিকং কটত্তা চ ৰূপং, অহেতুকপটিসন্ধিক্খণে ৱত্থুং পটিচ্চ চিত্তং. (২)

বাহিৰং ধম্মং পটিচ্চ অজ্ঝত্তিকো চ বাহিৰো চ ধম্মা উপ্পজ্জন্তি নহেতুপচ্চযা – অহেতুকং বাহিৰং একং খন্ধং পটিচ্চ দ্ৱে খন্ধা চিত্তঞ্চ চিত্তসমুট্ঠানঞ্চ ৰূপং, দ্ৱে খন্ধে …পে… অহেতুকপটিসন্ধিক্খণে বাহিৰং একং খন্ধং পটিচ্চ দ্ৱে খন্ধা চিত্তঞ্চ অজ্ঝত্তিকঞ্চ বাহিৰঞ্চ কটত্তাৰূপং, অহেতুকপটিসন্ধিক্খণে ৱত্থুং পটিচ্চ চিত্তং সম্পযুত্তকা চ খন্ধা. (৩)

৩২৫. অজ্ঝত্তিকঞ্চ বাহিৰঞ্চ ধম্মং পটিচ্চ অজ্ঝত্তিকো ধম্মো উপ্পজ্জতি নহেতুপচ্চযা – অহেতুকপটিসন্ধিক্খণে চিত্তঞ্চ সম্পযুত্তকে চ খন্ধে পটিচ্চ অজ্ঝত্তিকং কটত্তাৰূপং. (১)

অজ্ঝত্তিকঞ্চ বাহিৰঞ্চ ধম্মং পটিচ্চ বাহিৰো ধম্মো উপ্পজ্জতি নহেতুপচ্চযা – অহেতুকং বাহিৰং একং খন্ধঞ্চ চিত্তঞ্চ পটিচ্চ দ্ৱে খন্ধা চিত্তসমুট্ঠানঞ্চ ৰূপং, দ্ৱে খন্ধে…পে… অহেতুকং চিত্তঞ্চ মহাভূতে চ পটিচ্চ চিত্তসমুট্ঠানং ৰূপং; অহেতুকপটিসন্ধিক্খণে বাহিৰং একং খন্ধঞ্চ চিত্তঞ্চ পটিচ্চ দ্ৱে খন্ধা বাহিৰং কটত্তা চ ৰূপং; অহেতুকপটিসন্ধিক্খণে চিত্তঞ্চ মহাভূতে চ পটিচ্চ বাহিৰং কটত্তাৰূপং, অহেতুকপটিসন্ধিক্খণে চিত্তঞ্চ ৱত্থুঞ্চ পটিচ্চ বাহিৰা খন্ধা, ৱিচিকিচ্ছাসহগতে উদ্ধচ্চসহগতে খন্ধে চ চিত্তঞ্চ পটিচ্চ ৱিচিকিচ্ছাসহগতো উদ্ধচ্চসহগতো মোহো. (২)

অজ্ঝত্তিকঞ্চ বাহিৰঞ্চ ধম্মং পটিচ্চ অজ্ঝত্তিকো চ বাহিৰো চ ধম্মা উপ্পজ্জন্তি নহেতুপচ্চযা – অহেতুকপটিসন্ধিক্খণে বাহিৰং একং খন্ধঞ্চ চিত্তঞ্চ পটিচ্চ দ্ৱে খন্ধা অজ্ঝত্তিকঞ্চ বাহিৰঞ্চ কটত্তাৰূপং, দ্ৱে খন্ধে চ…পে…. (৩)

নআৰম্মণপচ্চযো

৩২৬. অজ্ঝত্তিকং ধম্মং পটিচ্চ অজ্ঝত্তিকো ধম্মো উপ্পজ্জতি নআৰম্মণপচ্চযা – পটিসন্ধিক্খণে চিত্তং পটিচ্চ অজ্ঝত্তিকং কটত্তাৰূপং. (১)

অজ্ঝত্তিকং ধম্মং পটিচ্চ বাহিৰো ধম্মো উপ্পজ্জতি নআৰম্মণপচ্চযা – চিত্তং পটিচ্চ চিত্তসমুট্ঠানং ৰূপং; পটিসন্ধিক্খণে চিত্তং পটিচ্চ বাহিৰং কটত্তাৰূপং. (২)

অজ্ঝত্তিকং ধম্মং পটিচ্চ অজ্ঝত্তিকো চ বাহিৰো চ ধম্মা উপ্পজ্জন্তি নআৰম্মণপচ্চযা; পটিসন্ধিক্খণে চিত্তং পটিচ্চ অজ্ঝত্তিকঞ্চ বাহিৰঞ্চ কটত্তাৰূপং. (৩)

বাহিৰং ধম্মং পটিচ্চ বাহিৰো ধম্মো উপ্পজ্জতি নআৰম্মণপচ্চযা – বাহিৰে খন্ধে পটিচ্চ চিত্তসমুট্ঠানং ৰূপং; পটিসন্ধিক্খণে বাহিৰে খন্ধে পটিচ্চ বাহিৰং কটত্তাৰূপং, বাহিৰে খন্ধে পটিচ্চ ৱত্থু, একং মহাভূতং…পে… (যাৱ অসঞ্ঞসত্তা). (১)

বাহিৰং ধম্মং পটিচ্চ অজ্ঝত্তিকো ধম্মো উপ্পজ্জতি নআৰম্মণপচ্চযা – পটিসন্ধিক্খণে বাহিৰে খন্ধে পটিচ্চ অজ্ঝত্তিকং কটত্তাৰূপং. (২)

বাহিৰং ধম্মং পটিচ্চ অজ্ঝত্তিকো চ বাহিৰো চ ধম্মা উপ্পজ্জন্তি নআৰম্মণপচ্চযা – পটিসন্ধিক্খণে বাহিৰে খন্ধে পটিচ্চ অজ্ঝত্তিকঞ্চ বাহিৰঞ্চ কটত্তাৰূপং. (৩)

৩২৭. অজ্ঝত্তিকঞ্চ বাহিৰঞ্চ ধম্মং পটিচ্চ অজ্ঝত্তিকো ধম্মো উপ্পজ্জতি নআৰম্মণপচ্চযা – পটিসন্ধিক্খণে চিত্তঞ্চ সম্পযুত্তকে চ খন্ধে পটিচ্চ অজ্ঝত্তিকং কটত্তাৰূপং. (১)

অজ্ঝত্তিকঞ্চ বাহিৰঞ্চ ধম্মং পটিচ্চ বাহিৰো ধম্মো উপ্পজ্জতি নআৰম্মণপচ্চযা – বাহিৰে খন্ধে চ চিত্তঞ্চ পটিচ্চ চিত্তসমুট্ঠানং ৰূপং, চিত্তঞ্চ মহাভূতে চ পটিচ্চ চিত্তসমুট্ঠানং ৰূপং (পটিসন্ধিক্খণে দ্ৱে কাতব্বা).

অজ্ঝত্তিকঞ্চ বাহিৰঞ্চ ধম্মং পটিচ্চ অজ্ঝত্তিকো চ বাহিৰো চ ধম্মা উপ্পজ্জন্তি নআৰম্মণপচ্চযা – পটিসন্ধিক্খণে চিত্তঞ্চ সম্পযুত্তকে চ খন্ধে পটিচ্চ অজ্ঝত্তিকঞ্চ বাহিৰঞ্চ কটত্তাৰূপং (সংখিত্তং). (৩)

নঝানপচ্চযো

৩২৮. অজ্ঝত্তিকং ধম্মং পটিচ্চ বাহিৰো ধম্মো উপ্পজ্জতি নঝানপচ্চযা – চক্খুৱিঞ্ঞাণং পটিচ্চ সম্পযুত্তকা খন্ধা…পে… কাযৱিঞ্ঞাণং…পে….

বাহিৰং ধম্মং পটিচ্চ বাহিৰো ধম্মো উপ্পজ্জতি নঝানপচ্চযা – চক্খুৱিঞ্ঞাণসহগতং একং খন্ধং পটিচ্চ দ্ৱে খন্ধা, দ্ৱে খন্ধে…পে… কাযৱিঞ্ঞাণসহগতং…পে… বাহিৰং… আহাৰসমুট্ঠানং… উতুসমুট্ঠানং… অসঞ্ঞসত্তানং…পে…. বাহিৰং ধম্মং পটিচ্চ অজ্ঝত্তিকো ধম্মো উপ্পজ্জতি নঝানপচ্চযা – চক্খুৱিঞ্ঞাণসহগতে খন্ধে পটিচ্চ চক্খুৱিঞ্ঞাণং…পে… কাযৱিঞ্ঞাণসহগতে খন্ধে পটিচ্চ কাযৱিঞ্ঞাণং. বাহিৰং ধম্মং পটিচ্চ অজ্ঝত্তিকো চ বাহিৰো চ ধম্মা উপ্পজ্জন্তি নঝানপচ্চযা – চক্খুৱিঞ্ঞাণসহগতং একং খন্ধং পটিচ্চ দ্ৱে খন্ধা চক্খুৱিঞ্ঞাণঞ্চ, দ্ৱে খন্ধে…পে… কাযৱিঞ্ঞাণসহগতং একং খন্ধং…পে…. (৩)

অজ্ঝত্তিকঞ্চ বাহিৰঞ্চ ধম্মং পটিচ্চ বাহিৰো ধম্মো উপ্পজ্জতি নঝানপচ্চযা – চক্খুৱিঞ্ঞাণসহগতং একং খন্ধঞ্চ চক্খুৱিঞ্ঞাণঞ্চ পটিচ্চ দ্ৱে খন্ধা, দ্ৱে খন্ধে…পে… কাযৱিঞ্ঞাণং (চক্কং).