১. ৱিভঙ্গৱাৰো

হেতুপচ্চযো

৩০০. চিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স ধম্মস্স হেতুপচ্চযেন পচ্চযো – চিত্তসংসট্ঠসমুট্ঠানা হেতূ সম্পযুত্তকানং খন্ধানং হেতুপচ্চযেন পচ্চযো; পটিসন্ধিক্খণে…পে…. (মূলং কাতব্বং) চিত্তসংসট্ঠসমুট্ঠানা হেতূ চিত্তস্স চিত্তসমুট্ঠানানঞ্চ ৰূপানং হেতুপচ্চযেন পচ্চযো; পটিসন্ধিক্খণে…পে…. (মূলং কাতব্বং) চিত্তসংসট্ঠসমুট্ঠানা হেতূ সম্পযুত্তকানং খন্ধানং চিত্তস্স চ চিত্তসমুট্ঠানানঞ্চ ৰূপানং হেতুপচ্চযেন পচ্চযো; পটিসন্ধিক্খণে…পে…. (৩)

আৰম্মণপচ্চযো

৩০১. চিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স ধম্মস্স আৰম্মণপচ্চযেন পচ্চযো – চিত্তসংসট্ঠসমুট্ঠানে খন্ধে আৰব্ভ চিত্তসংসট্ঠসমুট্ঠানা খন্ধা উপ্পজ্জন্তি. (মূলং কাতব্বং) চিত্তসংসট্ঠসমুট্ঠানে খন্ধে আৰব্ভ চিত্তং উপ্পজ্জতি. (মূলং কাতব্বং) চিত্তসংসট্ঠসমুট্ঠানে খন্ধে আৰব্ভ চিত্তঞ্চ সম্পযুত্তকা চ খন্ধা উপ্পজ্জন্তি. (৩)

নোচিত্তসংসট্ঠসমুট্ঠানো ধম্মো নোচিত্তসংসট্ঠসমুট্ঠানস্স ধম্মস্স আৰম্মণপচ্চযেন পচ্চযো – অৰিযা মগ্গা ৱুট্ঠহিত্ৱা মগ্গং পচ্চৱেক্খন্তি…পে… নিব্বানং পচ্চৱেক্খন্তি. নিব্বানং গোত্ৰভুস্স…পে…. (সংখিত্তং. যথা চিত্তসহভূদুকে আৰম্মণং এৱং কাতব্বং, নিন্নানাকৰণং. নৱপি পঞ্হা.)

অধিপতিপচ্চযো

৩০২. চিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি… তীণি (দ্ৱেপি অধিপতী কাতব্বা). (৩)

নোচিত্তসংসট্ঠসমুট্ঠানো ধম্মো নোচিত্তসংসট্ঠসমুট্ঠানস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি… তীণি (দ্ৱেপি অধিপতি কাতব্বা). (৩)

চিত্তসংসট্ঠসমুট্ঠানো চ নোচিত্তসংসট্ঠসমুট্ঠানো চ ধম্মা চিত্তসংসট্ঠসমুট্ঠানস্স ধম্মস্স অধিপতিপচ্চযেন পচ্চযো – আৰম্মণাধিপতি. (একাযেৱ অধিপতি কাতব্বা, নৱপি পঞ্হা. যথা চিত্তসহভূদুকং, এৱং কাতব্বং, নিন্নানাকৰণং).

অনন্তৰপচ্চযাদি

৩০৩. চিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স ধম্মস্স অনন্তৰপচ্চযেন পচ্চযো (নৱপি পঞ্হা চিত্তসহভূদুকসদিসা)… সমনন্তৰপচ্চযেন পচ্চযো… নৱ… সহজাতপচ্চযেন পচ্চযো… নৱ (পটিচ্চসদিসা)… অঞ্ঞমঞ্ঞপচ্চযেন পচ্চযো… নৱ (পটিচ্চসদিসা)… নিস্সযপচ্চযেন পচ্চযো… নৱ (পচ্চযসদিসা)… উপনিস্সযপচ্চযেন পচ্চযো (নৱপি পঞ্হা চিত্তসহভূদুকসদিসা, নিন্নানাকৰণং).

পুৰেজাতপচ্চযাদি

৩০৪. নোচিত্তসংসট্ঠসমুট্ঠানো ধম্মো নোচিত্তসংসট্ঠসমুট্ঠানস্স ধম্মস্স পুৰেজাতপচ্চযেন পচ্চযো – আৰম্মণপুৰেজাতং, ৱত্থুপুৰেজাতং… তীণি (চিত্তসহভূদুকসদিসা, নিন্নানাকৰণং).

চিত্তসংসট্ঠসমুট্ঠানো ধম্মো নোচিত্তসংসট্ঠসমুট্ঠানস্স ধম্মস্স পচ্ছাজাতপচ্চযেন পচ্চযো (চিত্তসহভূদুকসদিসা, নিন্নানাকৰণং. তীণিপি পচ্ছাজাতা. দ্ৱে. একমূলানং একা ঘটনা)… আসেৱনপচ্চযেন পচ্চযো… নৱ.

কম্মপচ্চযাদি

৩০৫. চিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স ধম্মস্স কম্মপচ্চযেন পচ্চযো… তীণি (চিত্তসহভূদুকসদিসা নিন্নানাকৰণা. তীণিপি সহজাতা, নানাক্খণিকা)… ৱিপাকপচ্চযেন পচ্চযো… নৱ… আহাৰপচ্চযেন পচ্চযো… নৱ (চিত্তসহভূগমনসদিসা, একংযেৱ কবড়ীকাৰং আহাৰং)… ইন্দ্ৰিযপচ্চযেন পচ্চযো… নৱ… ঝানপচ্চযেন পচ্চযো… তীণি… মগ্গপচ্চযেন পচ্চযো… তীণি… সম্পযুত্তপচ্চযেন পচ্চযো… পঞ্চ.

ৱিপ্পযুত্তপচ্চযো

৩০৬. চিত্তসংসট্ঠসমুট্ঠানো ধম্মো নোচিত্তসংসট্ঠসমুট্ঠানস্স ধম্মস্স ৱিপ্পযুত্তপচ্চযেন পচ্চযো – সহজাতং, পচ্ছাজাতং (সংখিত্তং). (১)

নোচিত্তসংসট্ঠসমুট্ঠানো ধম্মো নোচিত্তসংসট্ঠসমুট্ঠানস্স ধম্মস্স ৱিপ্পযুত্তপচ্চযেন পচ্চযো – সহজাতং, পুৰেজাতং, পচ্ছাজাতং (সংখিত্তং). (১)

নোচিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স ধম্মস্স ৱিপ্পযুত্তপচ্চযেন পচ্চযো – সহজাতং, পুৰেজাতং. সহজাতং – পটিসন্ধিক্খণে ৱত্থু চিত্তসংসট্ঠসমুট্ঠানানং খন্ধানং ৱিপ্পযুত্তপচ্চযেন পচ্চযো. পুৰেজাতং – চক্খাযতনং চক্খুৱিঞ্ঞাণসহগতানং খন্ধানং ৱিপ্পযুত্তপচ্চযেন পচ্চযো…পে… কাযাযতনং…পে… ৱত্থু চিত্তসংসট্ঠসমুট্ঠানানং খন্ধানং ৱিপ্পযুত্তপচ্চযেন পচ্চযো. (২)

নোচিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স চ নোচিত্তসংসট্ঠসমুট্ঠানস্স চ ধম্মস্স ৱিপ্পযুত্তপচ্চযেন পচ্চযো – সহজাতং, পুৰেজাতং. সহজাতং – পটিসন্ধিক্খণে ৱত্থু চিত্তস্স সম্পযুত্তকানঞ্চ খন্ধানং ৱিপ্পযুত্তপচ্চযেন পচ্চযো. পুৰেজাতং – চক্খাযতনং চক্খুৱিঞ্ঞাণস্স সম্পযুত্তকানঞ্চ খন্ধানং ৱিপ্পযুত্তপচ্চযেন পচ্চযো…পে… কাযাযতনং…পে… ৱত্থু চিত্তস্স সম্পযুত্তকানঞ্চ খন্ধানং ৱিপ্পযুত্তপচ্চযেন পচ্চযো. (৩)

চিত্তসংসট্ঠসমুট্ঠানো চ নোচিত্তসংসট্ঠসমুট্ঠানো চ ধম্মা নোচিত্তসংসট্ঠসমুট্ঠানস্স ধম্মস্স ৱিপ্পযুত্তপচ্চযেন পচ্চযো – সহজাতং, পচ্ছাজাতং (সংখিত্তং).

অত্থিপচ্চযো

৩০৭. চিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স ধম্মস্স অত্থিপচ্চযেন পচ্চযো (পটিচ্চসদিসা). চিত্তসংসট্ঠসমুট্ঠানো ধম্মো নোচিত্তসংসট্ঠসমুট্ঠানস্স ধম্মস্স অত্থিপচ্চযেন পচ্চযো – সহজাতং, পচ্ছাজাতং (সংখিত্তং). চিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স চ নোচিত্তসংসট্ঠসমুট্ঠানস্স চ ধম্মস্স অত্থিপচ্চযেন পচ্চযো (পটিচ্চসদিসা). (৩)

নোচিত্তসংসট্ঠসমুট্ঠানো ধম্মো নোচিত্তসংসট্ঠসমুট্ঠানস্স ধম্মস্স অত্থিপচ্চযেন পচ্চযো – সহজাতং, পুৰেজাতং, পচ্ছাজাতং, আহাৰং, ইন্দ্ৰিযং (পুৰেজাতসদিসং পুৰেজাতং কাতব্বং. সব্বং সংখিত্তং. ৱিত্থাৰেতব্বং). (১)

নোচিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতং – চিত্তং সম্পযুত্তকানং খন্ধানং অত্থিপচ্চযেন পচ্চযো; পটিসন্ধিক্খণে চিত্তং সম্পযুত্তকানং খন্ধানং অত্থিপচ্চযেন পচ্চযো, পটিসন্ধিক্খণে ৱত্থু চিত্তসংসট্ঠসমুট্ঠানানং খন্ধানং অত্থিপচ্চযেন পচ্চযো. পুৰেজাতং (পুৰেজাতসদিসং, নিন্নানাকৰণং). (২)

নোচিত্তসংসট্ঠসমুট্ঠানো ধম্মো চিত্তসংসট্ঠসমুট্ঠানস্স চ নোচিত্তসংসট্ঠসমুট্ঠানস্স চ ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতং – চিত্তং সম্পযুত্তকানং খন্ধানং চিত্তসমুট্ঠানানঞ্চ ৰূপানং অত্থিপচ্চযেন পচ্চযো; পটিসন্ধিক্খণে চিত্তং সম্পযুত্তকানং খন্ধানং কটত্তা চ ৰূপানং অত্থিপচ্চযেন পচ্চযো, পটিসন্ধিক্খণে ৱত্থু চিত্তস্স সম্পযুত্তকানঞ্চ খন্ধানং অত্থিপচ্চযেন পচ্চযো. পুৰেজাতং (পুৰেজাতসদিসং). (৩)

৩০৮. চিত্তসংসট্ঠসমুট্ঠানো চ নোচিত্তসংসট্ঠসমুট্ঠানো চ ধম্মা চিত্তসংসট্ঠসমুট্ঠানস্স ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতো – চক্খুৱিঞ্ঞাণসহগতো একো খন্ধো চ চক্খুৱিঞ্ঞাণঞ্চ দ্ৱিন্নং খন্ধানং…পে… দ্ৱে খন্ধা চ…পে… চক্খুৱিঞ্ঞাণসহগতো একো খন্ধো চ চক্খাযতনঞ্চ দ্ৱিন্নং খন্ধানং…পে… দ্ৱে খন্ধা চ…পে… কাযৱিঞ্ঞাণসহগতো…পে… চিত্তসংসট্ঠসমুট্ঠানো একো খন্ধো চ চিত্তঞ্চ দ্ৱিন্নং খন্ধানং অত্থিপচ্চযেন পচ্চযো, দ্ৱে খন্ধা চ…পে… চিত্তসংসট্ঠসমুট্ঠানো একো খন্ধো চ ৱত্থু চ দ্ৱিন্নং খন্ধানং অত্থিপচ্চযেন পচ্চযো…পে… দ্ৱে খন্ধা চ…পে… (পটিসন্ধিক্খণে দ্ৱেপি কাতব্বা). (১)

চিত্তসংসট্ঠসমুট্ঠানো চ নোচিত্তসংসট্ঠসমুট্ঠানো চ ধম্মা নোচিত্তসংসট্ঠসমুট্ঠানস্স ধম্মস্স অত্থিপচ্চযেন পচ্চযো – সহজাতং, পুৰেজাতং, পচ্ছাজাতং, আহাৰং, ইন্দ্ৰিযং. সহজাতা – চক্খুৱিঞ্ঞাণসহগতা খন্ধা চ চক্খাযতনঞ্চ চক্খুৱিঞ্ঞাণস্স অত্থিপচ্চযেন পচ্চযো…পে… কাযৱিঞ্ঞাণসহগতা…পে… চিত্তসংসট্ঠসমুট্ঠানা খন্ধা চ চিত্তঞ্চ চিত্তসংসট্ঠসমুট্ঠানানং ৰূপানং অত্থিপচ্চযেন পচ্চযো, চিত্তসংসট্ঠসমুট্ঠানা খন্ধা চ মহাভূতা চ চিত্তসংসট্ঠসমুট্ঠানানং ৰূপানং অত্থিপচ্চযেন পচ্চযো, চিত্তসংসট্ঠসমুট্ঠানা খন্ধা চ ৱত্থু চ চিত্তস্স অত্থিপচ্চযেন পচ্চযো (পটিসন্ধিক্খণে তীণি কাতব্বা). পচ্ছাজাতা – চিত্তসংসট্ঠসমুট্ঠানা খন্ধা চ চিত্তঞ্চ পুৰেজাতস্স ইমস্স নোচিত্তসংসট্ঠসমুট্ঠানস্স কাযস্স অত্থিপচ্চযেন পচ্চযো. পচ্ছাজাতা – চিত্তসংসট্ঠসমুট্ঠানা খন্ধা চ চিত্তঞ্চ কবড়ীকাৰো আহাৰো চ ইমস্স নোচিত্তসংসট্ঠসমুট্ঠানস্স কাযস্স অত্থিপচ্চযেন পচ্চযো. পচ্ছাজাতা – চিত্তসংসট্ঠসমুট্ঠানা খন্ধা চ চিত্তঞ্চ ৰূপজীৱিতিন্দ্ৰিযঞ্চ কটত্তাৰূপানং অত্থিপচ্চযেন পচ্চযো. (২)

চিত্তসংসট্ঠসমুট্ঠানো চ নোচিত্তসংসট্ঠসমুট্ঠানো চ ধম্মা চিত্তসংসট্ঠসমুট্ঠানস্স চ নোচিত্তসংসট্ঠসমুট্ঠানস্স চ ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতো – চক্খুৱিঞ্ঞাণসহগতো একো খন্ধো চ চক্খাযতনঞ্চ দ্ৱিন্নং খন্ধানং চক্খুৱিঞ্ঞাণস্স চ অত্থিপচ্চযেন পচ্চযো, দ্ৱে খন্ধা চ…পে… কাযৱিঞ্ঞাণসহগতো…পে…. সহজাতো – চিত্তসংসট্ঠসমুট্ঠানো একো খন্ধো চ চিত্তঞ্চ দ্ৱিন্নং খন্ধানং চিত্তসমুট্ঠানানঞ্চ ৰূপানং অত্থিপচ্চযেন পচ্চযো, দ্ৱে খন্ধা চ…পে… চিত্তসংসট্ঠসমুট্ঠানো একো খন্ধো চ ৱত্থু চ দ্ৱিন্নং খন্ধানং চিত্তস্স চ অত্থিপচ্চযেন পচ্চযো, দ্ৱে খন্ধা চ…পে… (পটিসন্ধিক্খণে দ্ৱেপি কাতব্বা). (৩)