১. ৱিভঙ্গৱাৰো

হেতুপচ্চযো

২০১. চিত্তসমুট্ঠানং ধম্মং পচ্চযা চিত্তসমুট্ঠানো ধম্মো উপ্পজ্জতি হেতুপচ্চযা… তীণি (পটিচ্চৱাৰসদিসং).

নোচিত্তসমুট্ঠানং ধম্মং পচ্চযা নোচিত্তসমুট্ঠানো ধম্মো উপ্পজ্জতি হেতুপচ্চযা – ৱত্থুং পচ্চযা চিত্তং; পটিসন্ধিক্খণে…পে… (পটিচ্চৱাৰসদিসা). (১)

নোচিত্তসমুট্ঠানং ধম্মং পচ্চযা চিত্তসমুট্ঠানো ধম্মো উপ্পজ্জতি হেতুপচ্চযা – চিত্তং পচ্চযা সম্পযুত্তকা খন্ধা চিত্তসমুট্ঠানঞ্চ ৰূপং, ৱত্থুং পচ্চযা চিত্তসমুট্ঠানা খন্ধা (পটিসন্ধিক্খণে দ্ৱেপি কাতব্বা). (১)

নোচিত্তসমুট্ঠানং ধম্মং পচ্চযা চিত্তসমুট্ঠানো চ নোচিত্তসমুট্ঠানো চ ধম্মা উপ্পজ্জন্তি হেতুপচ্চযা – ৱত্থুং পচ্চযা চিত্তং সম্পযুত্তকা চ খন্ধা; পটিসন্ধিক্খণে দ্ৱে (পটিচ্চৱাৰসদিসং). (৩)

২০২. চিত্তসমুট্ঠানঞ্চ নোচিত্তসমুট্ঠানঞ্চ ধম্মং পচ্চযা চিত্তসমুট্ঠানো ধম্মো উপ্পজ্জতি হেতুপচ্চযা – চিত্তসমুট্ঠানং একং খন্ধঞ্চ চিত্তঞ্চ পচ্চযা দ্ৱে খন্ধা, দ্ৱে খন্ধে…পে… চিত্তসমুট্ঠানং একং খন্ধঞ্চ ৱত্থুঞ্চ পচ্চযা দ্ৱে খন্ধা, দ্ৱে খন্ধে…পে… (পটিসন্ধিক্খণে দ্ৱেপি পটিচ্চৱাৰসদিসা). (১)

চিত্তসমুট্ঠানঞ্চ নোচিত্তসমুট্ঠানঞ্চ ধম্মং পচ্চযা নোচিত্তসমুট্ঠানো ধম্মো উপ্পজ্জতি হেতুপচ্চযা – চিত্তসমুট্ঠানে খন্ধে চ ৱত্থুঞ্চ পচ্চযা চিত্তং (পটিসন্ধিক্খণে তীণিপি কাতব্বা পটিচ্চৱাৰসদিসা). (২)

চিত্তসমুট্ঠানঞ্চ নোচিত্তসমুট্ঠানঞ্চ ধম্মং পচ্চযা চিত্তসমুট্ঠানো চ নোচিত্তসমুট্ঠানো চ ধম্মা উপ্পজ্জন্তি হেতুপচ্চযা – চিত্তসমুট্ঠানং একং খন্ধঞ্চ ৱত্থুঞ্চ পচ্চযা দ্ৱে খন্ধা চিত্তঞ্চ, দ্ৱে খন্ধে…পে… (পটিসন্ধিক্খণে দ্ৱেপি কাতব্বা পটিচ্চৱাৰসদিসা). (৩)

আৰম্মণপচ্চযো

২০৩. চিত্তসমুট্ঠানং ধম্মং পচ্চযা চিত্তসমুট্ঠানো ধম্মো উপ্পজ্জতি আৰম্মণপচ্চযা… তীণি (পটিচ্চৱাৰসদিসা).

নোচিত্তসমুট্ঠানং ধম্মং পচ্চযা নোচিত্তসমুট্ঠানো ধম্মো উপ্পজ্জতি আৰম্মণপচ্চযা – চক্খাযতনং পচ্চযা চক্খুৱিঞ্ঞাণং…পে… কাযাযতনং পচ্চযা কাযৱিঞ্ঞাণং…পে… ৱত্থুং পচ্চযা চিত্তং. (১)

নোচিত্তসমুট্ঠানং ধম্মং পচ্চযা চিত্তসমুট্ঠানো ধম্মো উপ্পজ্জতি আৰম্মণপচ্চযা – চক্খাযতনং পচ্চযা চক্খুৱিঞ্ঞাণসহগতা খন্ধা…পে… কাযাযতনং পচ্চযা কাযৱিঞ্ঞাণসহগতা খন্ধা, চিত্তং পচ্চযা সম্পযুত্তকা খন্ধা, ৱত্থুং পচ্চযা চিত্তসমুট্ঠানা খন্ধা (পটিসন্ধিক্খণে দ্ৱেপি). (২)

নোচিত্তসমুট্ঠানং ধম্মং পচ্চযা চিত্তসমুট্ঠানো চ নোচিত্তসমুট্ঠানো চ ধম্মা উপ্পজ্জন্তি আৰম্মণপচ্চযা – চক্খাযতনং পচ্চযা চক্খুৱিঞ্ঞাণং সম্পযুত্তকা চ খন্ধা…পে… কাযাযতনং…পে… ৱত্থুং পচ্চযা চিত্তং সম্পযুত্তকা চ খন্ধা; পটিসন্ধিক্খণে…পে…. (৩)

২০৪. চিত্তসমুট্ঠানঞ্চ নোচিত্তসমুট্ঠানঞ্চ ধম্মং পচ্চযা চিত্তসমুট্ঠানো ধম্মো উপ্পজ্জতি আৰম্মণপচ্চযা – চিত্তসমুট্ঠানং একং খন্ধঞ্চ চিত্তঞ্চ পচ্চযা দ্ৱে খন্ধা, দ্ৱে খন্ধে …পে… চিত্তসমুট্ঠানং একং খন্ধঞ্চ ৱত্থুঞ্চ পচ্চযা দ্ৱে খন্ধা, দ্ৱে খন্ধে…পে… (পটিসন্ধিক্খণে দ্ৱেপি কাতব্বা). (১)

চিত্তসমুট্ঠানঞ্চ নোচিত্তসমুট্ঠানঞ্চ ধম্মং পচ্চযা নোচিত্তসমুট্ঠানো ধম্মো উপ্পজ্জতি আৰম্মণপচ্চযা – চক্খুৱিঞ্ঞাণসহগতে খন্ধে চ চক্খাযতনঞ্চ পচ্চযা চক্খুৱিঞ্ঞাণং…পে… কাযৱিঞ্ঞাণসহগতে…পে… চিত্তসমুট্ঠানে খন্ধে চ ৱত্থুঞ্চ পচ্চযা চিত্তং; পটিসন্ধিক্খণে…পে…. (২)

চিত্তসমুট্ঠানঞ্চ নোচিত্তসমুট্ঠানঞ্চ ধম্মং পচ্চযা চিত্তসমুট্ঠানো চ নোচিত্তসমুট্ঠানো চ ধম্মা উপ্পজ্জন্তি আৰম্মণপচ্চযা – চক্খুৱিঞ্ঞাণসহগতং একং খন্ধঞ্চ চক্খাযতনঞ্চ পচ্চযা দ্ৱে খন্ধা চক্খুৱিঞ্ঞাণঞ্চ, দ্ৱে খন্ধে…পে… কাযৱিঞ্ঞাণসহগতং…পে… চিত্তসমুট্ঠানং একং খন্ধঞ্চ ৱত্থুঞ্চ পচ্চযা দ্ৱে খন্ধা চিত্তঞ্চ, দ্ৱে খন্ধে…পে… পটিসন্ধিক্খণে…পে…. (৩) (সংখিত্তং).