১. ৱিভঙ্গৱাৰো

হেতুপচ্চযো

১. দস্সনেন পহাতব্বং ধম্মং পটিচ্চ দস্সনেন পহাতব্বো ধম্মো উপ্পজ্জতি হেতুপচ্চযা – দস্সনেন পহাতব্বং একং খন্ধং পটিচ্চ তযো খন্ধা…পে… দ্ৱে খন্ধে পটিচ্চ দ্ৱে খন্ধা. (১)

দস্সনেন পহাতব্বং ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি হেতুপচ্চযা – দস্সনেন পহাতব্বে খন্ধে পটিচ্চ চিত্তসমুট্ঠানং ৰূপং. (২)

দস্সনেন পহাতব্বং ধম্মং পটিচ্চ দস্সনেন পহাতব্বো চ নেৱদস্সনেন নভাৱনায পহাতব্বো চ ধম্মা উপ্পজ্জন্তি হেতুপচ্চযা – দস্সনেন পহাতব্বং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে পটিচ্চ দ্ৱে খন্ধা চিত্তসমুট্ঠানঞ্চ ৰূপং. (৩)

২. ভাৱনায পহাতব্বং ধম্মং পটিচ্চ ভাৱনায পহাতব্বো ধম্মো উপ্পজ্জতি হেতুপচ্চযা – ভাৱনায পহাতব্বং একং খন্ধং পটিচ্চ তযো খন্ধা…পে… দ্ৱে খন্ধে পটিচ্চ দ্ৱে খন্ধা. (১)

ভাৱনায পহাতব্বং ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি হেতুপচ্চযা – ভাৱনায পহাতব্বে খন্ধে পটিচ্চ চিত্তসমুট্ঠানং ৰূপং. (২)

ভাৱনায পহাতব্বং ধম্মং পটিচ্চ ভাৱনায পহাতব্বো চ নেৱদস্সনেন নভাৱনায পহাতব্বো চ ধম্মা উপ্পজ্জন্তি হেতুপচ্চযা – ভাৱনায পহাতব্বং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে পটিচ্চ দ্ৱে খন্ধা চিত্তসমুট্ঠানঞ্চ ৰূপং. (৩)

৩. নেৱদস্সনেন নভাৱনায পহাতব্বং ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি হেতুপচ্চযা – নেৱদস্সনেন নভাৱনায পহাতব্বং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে পটিচ্চ দ্ৱে খন্ধা চিত্তসমুট্ঠানঞ্চ ৰূপং. পটিসন্ধিক্খণে নেৱদস্সনেন নভাৱনায পহাতব্বং একং খন্ধং পটিচ্চ তযো খন্ধা কটত্তা চ ৰূপং…পে… দ্ৱে খন্ধে পটিচ্চ দ্ৱে খন্ধা কটত্তা চ ৰূপং, খন্ধে পটিচ্চ ৱত্থু, ৱত্থুং পটিচ্চ খন্ধা; একং মহাভূতং পটিচ্চ তযো মহাভূতা…পে… দ্ৱে মহাভূতে পটিচ্চ দ্ৱে মহাভূতা, মহাভূতে পটিচ্চ চিত্তসমুট্ঠানং ৰূপং কটত্তাৰূপং উপাদাৰূপং. (১)

৪. দস্সনেন পহাতব্বঞ্চ নেৱদস্সনেন নভাৱনায পহাতব্বঞ্চ ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি হেতুপচ্চযা – দস্সনেন পহাতব্বে খন্ধে চ মহাভূতে চ পটিচ্চ চিত্তসমুট্ঠানং ৰূপং. (১)

ভাৱনায পহাতব্বঞ্চ নেৱদস্সনেন নভাৱনায পহাতব্বঞ্চ ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি হেতুপচ্চযা – ভাৱনায পহাতব্বে খন্ধে চ মহাভূতে চ পটিচ্চ চিত্তসমুট্ঠানং ৰূপং. (১)

আৰম্মণপচ্চযো

৫. দস্সনেন পহাতব্বং ধম্মং পটিচ্চ দস্সনেন পহাতব্বো ধম্মো উপ্পজ্জতি আৰম্মণপচ্চযা – দস্সনেন পহাতব্বং একং খন্ধং পটিচ্চ তযো খন্ধা…পে… দ্ৱে খন্ধে পটিচ্চ দ্ৱে খন্ধা. (১)

ভাৱনায পহাতব্বং ধম্মং পটিচ্চ ভাৱনায পহাতব্বো ধম্মো উপ্পজ্জতি আৰম্মণপচ্চযা – ভাৱনায পহাতব্বং একং খন্ধং পটিচ্চ তযো খন্ধা…পে… দ্ৱে খন্ধে পটিচ্চ দ্ৱে খন্ধা. (১)

নেৱদস্সনেন নভাৱনায পহাতব্বং ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি আৰম্মণপচ্চযা – নেৱদস্সনেন নভাৱনায পহাতব্বং একং খন্ধং পটিচ্চ তযো খন্ধা…পে… দ্ৱে খন্ধে পটিচ্চ দ্ৱে খন্ধা. পটিসন্ধিক্খণে নেৱদস্সনেন নভাৱনায পহাতব্বং একং খন্ধং পটিচ্চ তযো খন্ধা…পে… দ্ৱে খন্ধে পটিচ্চ দ্ৱে খন্ধা. ৱত্থুং পটিচ্চ খন্ধা. (১)

অধিপতিপচ্চযো

৬. দস্সনেন পহাতব্বং ধম্মং পটিচ্চ দস্সনেন পহাতব্বো ধম্মো উপ্পজ্জতি অধিপতিপচ্চযা… তীণি.

ভাৱনায পহাতব্বং ধম্মং পটিচ্চ ভাৱনায পহাতব্বো ধম্মো উপ্পজ্জতি অধিপতিপচ্চযা… তীণি.

নেৱদস্সনেন নভাৱনায পহাতব্বং ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি অধিপতিপচ্চযা – নেৱদস্সনেন নভাৱনায পহাতব্বং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… দ্ৱে খন্ধে পটিচ্চ দ্ৱে খন্ধা চিত্তসমুট্ঠানঞ্চ ৰূপং; একং মহাভূতং পটিচ্চ তযো মহাভূতা…পে… দ্ৱে মহাভূতে পটিচ্চ দ্ৱে মহাভূতা, মহাভূতে পটিচ্চ চিত্তসমুট্ঠানং ৰূপং উপাদাৰূপং. (১)

৭. দস্সনেন পহাতব্বঞ্চ নেৱদস্সনেন নভাৱনায পহাতব্বঞ্চ ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি অধিপতিপচ্চযা – দস্সনেন পহাতব্বে খন্ধে চ মহাভূতে চ পটিচ্চ চিত্তসমুট্ঠানং ৰূপং. (১)

ভাৱনায পহাতব্বঞ্চ নেৱদস্সনেন নভাৱনায পহাতব্বঞ্চ ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি অধিপতিপচ্চযা – ভাৱনায পহাতব্বে খন্ধে চ মহাভূতে চ পটিচ্চ চিত্তসমুট্ঠানং ৰূপং. (১)

অনন্তৰ-সমনন্তৰপচ্চযা

৮. দস্সনেন পহাতব্বং ধম্মং পটিচ্চ দস্সনেন পহাতব্বো ধম্মো উপ্পজ্জতি অনন্তৰপচ্চযা… সমনন্তৰপচ্চযা (আৰম্মণসদিসং).

সহজাতপচ্চযো

৯. দস্সনেন পহাতব্বং ধম্মং পটিচ্চ দস্সনেন পহাতব্বো ধম্মো উপ্পজ্জতি সহজাতপচ্চযা… তীণি.

ভাৱনায পহাতব্বং ধম্মং পটিচ্চ ভাৱনায পহাতব্বো ধম্মো উপ্পজ্জতি সহজাতপচ্চযা… তীণি.

নেৱদস্সনেন নভাৱনায পহাতব্বং ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি সহজাতপচ্চযা…পে… একং মহাভূতং পটিচ্চ…পে… বাহিৰং… আহাৰসমুট্ঠানং… উতুসমুট্ঠানং… অসঞ্ঞসত্তানং একং মহাভূতং…পে…. (১)

১০. দস্সনেন পহাতব্বঞ্চ নেৱদস্সনেন নভাৱনায পহাতব্বঞ্চ ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি সহজাতপচ্চযা – দস্সনেন পহাতব্বে খন্ধে চ মহাভূতে চ পটিচ্চ চিত্তসমুট্ঠানং ৰূপং.

ভাৱনায পহাতব্বঞ্চ নেৱদস্সনেন নভাৱনায পহাতব্বঞ্চ ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি সহজাতপচ্চযা – ভাৱনায পহাতব্বে খন্ধে চ মহাভূতে চ পটিচ্চ চিত্তসমুট্ঠানং ৰূপং. (১)

অঞ্ঞমঞ্ঞপচ্চযো

১১. দস্সনেন পহাতব্বং ধম্মং পটিচ্চ দস্সনেন পহাতব্বো ধম্মো উপ্পজ্জতি অঞ্ঞমঞ্ঞপচ্চযা… একং.

ভাৱনায পহাতব্বং ধম্মং পটিচ্চ ভাৱনায পহাতব্বো ধম্মো উপ্পজ্জতি সহজাতপচ্চযা… একং.

নেৱদস্সনেন নভাৱনায পহাতব্বং ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি অঞ্ঞমঞ্ঞপচ্চযা – নেৱদস্সনেন নভাৱনায পহাতব্বং একং খন্ধং পটিচ্চ তযো খন্ধা…পে… দ্ৱে খন্ধে পটিচ্চ দ্ৱে খন্ধা. পটিসন্ধিক্খণে নেৱদস্সনেন নভাৱনায পহাতব্বং একং খন্ধং পটিচ্চ তযো খন্ধা ৱত্থু চ…পে… দ্ৱে খন্ধে পটিচ্চ দ্ৱে খন্ধা ৱত্থু চ, খন্ধে পটিচ্চ ৱত্থু, ৱত্থুং পটিচ্চ খন্ধা; একং মহাভূতং পটিচ্চ তযো মহাভূতা…পে… দ্ৱে মহাভূতে পটিচ্চ দ্ৱে মহাভূতা; বাহিৰং… আহাৰসমুট্ঠানং… উতুসমুট্ঠানং… অসঞ্ঞসত্তানং…পে… দ্ৱে মহাভূতে পটিচ্চ দ্ৱে মহাভূতা.

নিস্সযপচ্চযাদি

১২. দস্সনেন পহাতব্বং ধম্মং পটিচ্চ দস্সনেন পহাতব্বো ধম্মো উপ্পজ্জতি নিস্সযপচ্চযা… (হেতুপচ্চযসদিসং) উপনিস্সযপচ্চযা… তীণি… পুৰেজাতপচ্চযা… তীণি (পটিসন্ধি নত্থি)… আসেৱনপচ্চযা… (ৱিপাকপটিসন্ধি নত্থি) কম্মপচ্চযা (পৰিপুণ্ণং. অজ্ঝত্তিকা চ অসঞ্ঞসত্তানঞ্চ মহাভূতা).

ৱিপাকপচ্চযো

১৩. নেৱদস্সনেন নভাৱনায পহাতব্বং ধম্মং পটিচ্চ নেৱদস্সনেন নভাৱনায পহাতব্বো ধম্মো উপ্পজ্জতি ৱিপাকপচ্চযা – ৱিপাকং একং খন্ধং পটিচ্চ তযো খন্ধা চিত্তসমুট্ঠানঞ্চ ৰূপং…পে… পটিসন্ধিক্খণে…পে… খন্ধে পটিচ্চ ৱত্থু, ৱত্থুং পটিচ্চ খন্ধা; একং মহাভূতং…পে… মহাভূতে পটিচ্চ চিত্তসমুট্ঠানং ৰূপং কটত্তাৰূপং উপাদাৰূপং. (১)

আহাৰপচ্চযাদি

১৪. দস্সনেন পহাতব্বং ধম্মং পটিচ্চ দস্সনেন পহাতব্বো ধম্মো উপ্পজ্জতি আহাৰপচ্চযা (পৰিপুণ্ণং, অজ্ঝত্তিকা মহাভূতা চ আহাৰসমুট্ঠানঞ্চ)… ইন্দ্ৰিযপচ্চযা (কম্মপচ্চযসদিসং)… ঝানপচ্চযা… মগ্গপচ্চযা (হেতুপচ্চযসদিসং)… সম্পযুত্তপচ্চযা (আৰম্মণপচ্চযসদিসং)… ৱিপ্পযুত্তপচ্চযা (কুসলত্তিকে ৱিপ্পযুত্তপচ্চযসদিসং)… অত্থিপচ্চযা (সহজাতপচ্চযসদিসং)… নত্থিপচ্চযা… ৱিগতপচ্চযা… অৱিগতপচ্চযা.