১. ৱিভঙ্গৱাৰো

হেতুপচ্চযো

৫৫. পৰিত্তো ধম্মো পৰিত্তস্স ধম্মস্স হেতুপচ্চযেন পচ্চযো – পৰিত্তা হেতূ সম্পযুত্তকানং খন্ধানং চিত্তসমুট্ঠানানঞ্চ ৰূপানং হেতুপচ্চযেন পচ্চযো. পটিসন্ধিক্খণে…পে…. (১)

মহগ্গতো ধম্মো মহগ্গতস্স ধম্মস্স হেতুপচ্চযেন পচ্চযো… তীণি (পৱত্তিপটিসন্ধি কাতব্বা).

অপ্পমাণো ধম্মো অপ্পমাণস্স ধম্মস্স হেতুপচ্চযেন পচ্চযো… তীণি.

আৰম্মণপচ্চযো

৫৬. পৰিত্তো ধম্মো পৰিত্তস্স ধম্মস্স আৰম্মণপচ্চযেন পচ্চযো – দানং দত্ৱা সীলং সমাদিযিত্ৱা উপোসথকম্মং কত্ৱা তং পচ্চৱেক্খতি, পুব্বে সুচিণ্ণানি পচ্চৱেক্খতি, অৰিযা গোত্ৰভুং পচ্চৱেক্খন্তি, ৱোদানং পচ্চৱেক্খন্তি, পহীনে কিলেসে পচ্চৱেক্খন্তি, ৱিক্খম্ভিতে কিলেসে পচ্চৱেক্খন্তি, পুব্বে সমুদাচিণ্ণে কিলেসে জানন্তি. চক্খুং…পে… ৱত্থুং… পৰিত্তে খন্ধে অনিচ্চতো…পে… ৱিপস্সন্তি অস্সাদেন্তি অভিনন্দন্তি, তং আৰব্ভ ৰাগো উপ্পজ্জতি …পে… দোমনস্সং উপ্পজ্জতি. ৰূপাযতনং চক্খুৱিঞ্ঞাণস্স…পে… ফোট্ঠব্বাযতনং কাযৱিঞ্ঞাণস্স আৰম্মণপচ্চযেন পচ্চযো. (১)

পৰিত্তো ধম্মো মহগ্গতস্স ধম্মস্স আৰম্মণপচ্চযেন পচ্চযো – দিব্বেন চক্খুনা ৰূপং পস্সতি, দিব্বায সোতধাতুযা সদ্দং সুণাতি, চেতোপৰিযঞাণেন পৰিত্তচিত্তসমঙ্গিস্স চিত্তং জানাতি. পৰিত্তা খন্ধা ইদ্ধিৱিধঞাণস্স, চেতোপৰিযঞাণস্স পুব্বেনিৱাসানুস্সতিঞাণস্স যথাকম্মূপগঞাণস্স অনাগতংসঞাণস্স আৰম্মণপচ্চযেন পচ্চযো. (২)

৫৭. মহগ্গতো ধম্মো মহগ্গতস্স ধম্মস্স আৰম্মণপচ্চযেন পচ্চযো – চেতোপৰিযঞাণেন মহগ্গতচিত্তসমঙ্গিস্স চিত্তং জানাতি, আকাসানঞ্চাযতনং ৱিঞ্ঞাণঞ্চাযতনস্স… আকিঞ্চঞ্ঞাযতনং নেৱসঞ্ঞানাসঞ্ঞাযতনস্স আৰম্মণপচ্চযেন পচ্চযো. মহগ্গতা খন্ধা ইদ্ধিৱিধঞাণস্স, চেতোপৰিযঞাণস্স পুব্বেনিৱাসানুস্সতিঞাণস্স যথাকম্মূপগঞাণস্স অনাগতংসঞাণস্স আৰম্মণপচ্চযেন পচ্চযো. (১)

মহগ্গতো ধম্মো পৰিত্তস্স ধম্মস্স আৰম্মণপচ্চযেন পচ্চযো – পঠমং ঝানং পচ্চৱেক্খতি…পে… নেৱসঞ্ঞানাসঞ্ঞাযতনং পচ্চৱেক্খতি, দিব্বং চক্খুং পচ্চৱেক্খতি, দিব্বং সোতধাতুং পচ্চৱেক্খতি, ইদ্ধিৱিধঞাণং পচ্চৱেক্খতি, চেতোপৰিযঞাণং পচ্চৱেক্খতি, পুব্বেনিৱাসানুস্সতিঞাণং পচ্চৱেক্খতি, যথাকম্মূপগঞাণং পচ্চৱেক্খতি, অনাগতংসঞাণং পচ্চৱেক্খতি. মহগ্গতে খন্ধে অনিচ্চতো…পে… ৱিপ্পস্সতি অস্সাদেতি অভিনন্দতি, তং আৰব্ভ ৰাগো উপ্পজ্জতি…পে… দোমনস্সং উপ্পজ্জতি. (২)

৫৮. অপ্পমাণো ধম্মো অপ্পমাণস্স ধম্মস্স আৰম্মণপচ্চযেন পচ্চযো – নিব্বানং মগ্গস্স, ফলস্স আৰম্মণপচ্চযেন পচ্চযো. (১)

অপ্পমাণো ধম্মো পৰিত্তস্স ধম্মস্স আৰম্মণপচ্চযেন পচ্চযো – অৰিযা মগ্গা ৱুট্ঠহিত্ৱা মগ্গং পচ্চৱেক্খন্তি, ফলং পচ্চৱেক্খন্তি, নিব্বানং পচ্চৱেক্খন্তি, নিব্বানং গোত্ৰভুস্স, ৱোদানস্স, আৱজ্জনায আৰম্মণপচ্চযেন পচ্চযো. (২)

অপ্পমাণো ধম্মো মহগ্গতস্স ধম্মস্স আৰম্মণপচ্চযেন পচ্চযো – অৰিযা চেতোপৰিযঞাণেন অপ্পমাণচিত্তসমঙ্গিস্স চিত্তং জানন্তি, অপ্পমাণা খন্ধা চেতোপৰিযঞাণস্স, পুব্বেনিৱাসানুস্সতিঞাণস্স, অনাগতংসঞাণস্স আৰম্মণপচ্চযেন পচ্চযো. (৩)

অধিপতিপচ্চযো

৫৯. পৰিত্তো ধম্মো পৰিত্তস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – দানং দত্ৱা সীলং সমাদিযিত্ৱা উপোসথকম্মং কত্ৱা তং গৰুং কত্ৱা পচ্চৱেক্খতি, পুব্বে সুচিণ্ণানি গৰুং কত্ৱা পচ্চৱেক্খতি. সেক্খা গোত্ৰভুং গৰুং কত্ৱা পচ্চৱেক্খন্তি, ৱোদানং গৰুং কত্ৱা পচ্চৱেক্খন্তি. চক্খুং…পে… ৱত্থুং… পৰিত্তে খন্ধে গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি, দিট্ঠি উপ্পজ্জতি. সহজাতাধিপতি – পৰিত্তাধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো. (১)

মহগ্গতো ধম্মো মহগ্গতস্স ধম্মস্স অধিপতিপচ্চযেন পচ্চযো. সহজাতাধিপতি – মহগ্গতাধিপতি সম্পযুত্তকানং খন্ধানং অধিপতিপচ্চযেন পচ্চযো. (১)

মহগ্গতো ধম্মো পৰিত্তস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – পঠমং ঝানং গৰুং কত্ৱা…পে… নেৱসঞ্ঞানাসঞ্ঞাযতনং…পে… দিব্বং চক্খুং…পে… অনাগতংসঞাণং গৰুং কত্ৱা পচ্চৱেক্খতি. মহগ্গতে খন্ধে গৰুং কত্ৱা অস্সাদেতি অভিনন্দতি, তং গৰুং কত্ৱা ৰাগো উপ্পজ্জতি… দিট্ঠি উপ্পজ্জতি. সহজাতাধিপতি – মহগ্গতাধিপতি চিত্তসমুট্ঠানানং ৰূপানং অধিপতিপচ্চযেন পচ্চযো. (২)

মহগ্গতো ধম্মো পৰিত্তস্স চ মহগ্গতস্স চ ধম্মস্স অধিপতিপচ্চযেন পচ্চযো. সহজাতাধিপতি – মহগ্গতাধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো. (৩)

৬০. অপ্পমাণো ধম্মো অপ্পমাণস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – নিব্বানং মগ্গস্স… ফলস্স অধিপতিপচ্চযেন পচ্চযো. সহজাতাধিপতি – অপ্পমাণাধিপতি সম্পযুত্তকানং খন্ধানং অধিপতিপচ্চযেন পচ্চযো. (১)

অপ্পমাণো ধম্মো পৰিত্তস্স ধম্মস্স অধিপতিপচ্চযেন পচ্চযো – আৰম্মণাধিপতি, সহজাতাধিপতি. আৰম্মণাধিপতি – অৰিযা মগ্গা ৱুট্ঠহিত্ৱা মগ্গং গৰুং কত্ৱা পচ্চৱেক্খন্তি, ফলং গৰুং কত্ৱা পচ্চৱেক্খন্তি, নিব্বানং গৰুং কত্ৱা পচ্চৱেক্খন্তি, নিব্বানং গোত্ৰভুস্স, ৱোদানস্স অধিপতিপচ্চযেন পচ্চযো. সহজাতাধিপতি – অপ্পমাণাধিপতি চিত্তসমুট্ঠানানং ৰূপানং অধিপতিপচ্চযেন পচ্চযো. (২)

অপ্পমাণো ধম্মো পৰিত্তস্স চ অপ্পমাণস্স চ ধম্মস্স অধিপতিপচ্চযেন পচ্চযো. সহজাতাধিপতি – অপ্পমাণাধিপতি সম্পযুত্তকানং খন্ধানং চিত্তসমুট্ঠানানঞ্চ ৰূপানং অধিপতিপচ্চযেন পচ্চযো. (৩)

অনন্তৰপচ্চযো

৬১. পৰিত্তো ধম্মো পৰিত্তস্স ধম্মস্স অনন্তৰপচ্চযেন পচ্চযো – পুৰিমা পুৰিমা পৰিত্তা খন্ধা পচ্ছিমানং পচ্ছিমানং পৰিত্তানং খন্ধানং অনন্তৰপচ্চযেন পচ্চযো. অনুলোমং গোত্ৰভুস্স… অনুলোমং ৱোদানস্স… আৱজ্জনা পৰিত্তানং খন্ধানং অনন্তৰপচ্চযেন পচ্চযো. (১)

পৰিত্তো ধম্মো মহগ্গতস্স ধম্মস্স অনন্তৰপচ্চযেন পচ্চযো – পৰিত্তং চুতিচিত্তং মহগ্গতস্স উপপত্তিচিত্তস্স অনন্তৰপচ্চযেন পচ্চযো. পৰিত্তা খন্ধা মহগ্গতস্স ৱুট্ঠানস্স অনন্তৰপচ্চযেন পচ্চযো. পঠমস্স ঝানস্স পৰিকম্মং…পে… নেৱসঞ্ঞানাসঞ্ঞাযতনস্স পৰিকম্মং…পে… দিব্বস্স চক্খুস্স পৰিকম্মং…পে… অনাগতংসঞাণস্স পৰিকম্মং অনাগতংসঞাণস্স অনন্তৰপচ্চযেন পচ্চযো. (২)

পৰিত্তো ধম্মো অপ্পমাণস্স ধম্মস্স অনন্তৰপচ্চযেন পচ্চযো – গোত্ৰভু মগ্গস্স… ৱোদানং মগ্গস্স… অনুলোমং ফলসমাপত্তিযা অনন্তৰপচ্চযেন পচ্চযো. (৩)

৬২. মহগ্গতো ধম্মো মহগ্গতস্স ধম্মস্স অনন্তৰপচ্চযেন পচ্চযো – পুৰিমা পুৰিমা মহগ্গতা খন্ধা পচ্ছিমানং পচ্ছিমানং মহগ্গতানং খন্ধানং অনন্তৰপচ্চযেন পচ্চযো. (১)

মহগ্গতো ধম্মো পৰিত্তস্স ধম্মস্স অনন্তৰপচ্চযেন পচ্চযো – মহগ্গতং চুতিচিত্তং পৰিত্তস্স উপপত্তিচিত্তস্স অনন্তৰপচ্চযেন পচ্চযো. মহগ্গতং ভৱঙ্গং আৱজ্জনায অনন্তৰপচ্চযেন পচ্চযো. মহগ্গতা খন্ধা পৰিত্তস্স ৱুট্ঠানস্স অনন্তৰপচ্চযেন পচ্চযো. (২)

মহগ্গতো ধম্মো অপ্পমাণস্স ধম্মস্স অনন্তৰপচ্চযেন পচ্চযো – নেৱসঞ্ঞানাসঞ্ঞাযতনং নিৰোধা ৱুট্ঠহন্তস্স ফলসমাপত্তিযা অনন্তৰপচ্চযেন পচ্চযো. (৩)

৬৩. অপ্পমাণো ধম্মো অপ্পমাণস্স ধম্মস্স অনন্তৰপচ্চযেন পচ্চযো – পুৰিমা পুৰিমা অপ্পমাণা খন্ধা পচ্ছিমানং পচ্ছিমানং অপ্পমাণানং খন্ধানং অনন্তৰপচ্চযেন পচ্চযো. মগ্গো ফলস্স… ফলং ফলস্স অনন্তৰপচ্চযেন পচ্চযো. (১)

অপ্পমাণো ধম্মো পৰিত্তস্স ধম্মস্স অনন্তৰপচ্চযেন পচ্চযো – ফলং পৰিত্তস্স ৱুট্ঠানস্স অনন্তৰপচ্চযেন পচ্চযো. (২)

অপ্পমাণো ধম্মো মহগ্গতস্স ধম্মস্স অনন্তৰপচ্চযেন পচ্চযো – ফলং মহগ্গতস্স ৱুট্ঠানস্স অনন্তৰপচ্চযেন পচ্চযো. (৩)

(সমনন্তৰপচ্চযং অনন্তৰপচ্চযসদিসং.)

সহজাতপচ্চযো

৬৪. পৰিত্তো ধম্মো পৰিত্তস্স ধম্মস্স সহজাতপচ্চযেন পচ্চযো – পৰিত্তো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং সহজাতপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে…পে… খন্ধা ৱত্থুস্স, ৱত্থু খন্ধানং সহজাতপচ্চযেন পচ্চযো; একং মহাভূতং…পে… অসঞ্ঞসত্তানং…পে…. (১)

পৰিত্তো ধম্মো মহগ্গতস্স ধম্মস্স সহজাতপচ্চযেন পচ্চযো – পটিসন্ধিক্খণে ৱত্থু মহগ্গতানং খন্ধানং সহজাতপচ্চযেন পচ্চযো. (২)

৬৫. মহগ্গতো ধম্মো মহগ্গতস্স ধম্মস্স সহজাতপচ্চযেন পচ্চযো – মহগ্গতো একো খন্ধো তিণ্ণন্নং খন্ধানং…পে… দ্ৱে খন্ধা…পে… পটিসন্ধিক্খণে…পে…. (১)

মহগ্গতো ধম্মো পৰিত্তস্স ধম্মস্স সহজাতপচ্চযেন পচ্চযো – মহগ্গতা খন্ধা চিত্তসমুট্ঠানানং ৰূপানং সহজাতপচ্চযেন পচ্চযো. পটিসন্ধিক্খণে মহগ্গতা খন্ধা কটত্তাৰূপানং সহজাতপচ্চযেন পচ্চযো. (২)

মহগ্গতো ধম্মো পৰিত্তস্স চ মহগ্গতস্স চ ধম্মস্স সহজাতপচ্চযেন পচ্চযো – মহগ্গতো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং সহজাতপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে…পে…. (৩)

৬৬. অপ্পমাণো ধম্মো অপ্পমাণস্স ধম্মস্স সহজাতপচ্চযেন পচ্চযো – অপ্পমাণো একো খন্ধো তিণ্ণন্নং খন্ধানং সহজাতপচ্চযেন পচ্চযো…পে…. (১)

অপ্পমাণো ধম্মো পৰিত্তস্স ধম্মস্স সহজাতপচ্চযেন পচ্চযো – অপ্পমাণা খন্ধা চিত্তসমুট্ঠানানং ৰূপানং সহজাতপচ্চযেন পচ্চযো. (২)

অপ্পমাণো ধম্মো পৰিত্তস্স চ অপ্পমাণস্স চ ধম্মস্স সহজাতপচ্চযেন পচ্চযো – অপ্পমাণো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং সহজাতপচ্চযেন পচ্চযো…পে…. (৩)

৬৭. পৰিত্তো চ অপ্পমাণো চ ধম্মা পৰিত্তস্স ধম্মস্স সহজাতপচ্চযেন পচ্চযো – অপ্পমাণা খন্ধা চ মহাভূতা চ চিত্তসমুট্ঠানানং ৰূপানং সহজাতপচ্চযেন পচ্চযো. (১)

পৰিত্তো চ মহগ্গতো চ ধম্মা পৰিত্তস্স ধম্মস্স সহজাতপচ্চযেন পচ্চযো – মহগ্গতা খন্ধা চ মহাভূতা চ চিত্তসমুট্ঠানানং ৰূপানং সহজাতপচ্চযেন পচ্চযো. পটিসন্ধিক্খণে মহগ্গতা খন্ধা চ মহাভূতা চ কটত্তাৰূপানং সহজাতপচ্চযেন পচ্চযো. (১)

পৰিত্তো চ মহগ্গতো চ ধম্মা মহগ্গতস্স ধম্মস্স সহজাতপচ্চযেন পচ্চযো – পটিসন্ধিক্খণে মহগ্গতো একো খন্ধো চ ৱত্থু চ তিণ্ণন্নং খন্ধানং সহজাতপচ্চযেন পচ্চযো…পে…. (২)

অঞ্ঞমঞ্ঞপচ্চযো

৬৮. পৰিত্তো ধম্মো পৰিত্তস্স ধম্মস্স অঞ্ঞমঞ্ঞপচ্চযেন পচ্চযো – পৰিত্তো একো খন্ধো তিণ্ণন্নং খন্ধানং অঞ্ঞমঞ্ঞপচ্চযেন পচ্চযো…পে… পটিসন্ধিক্খণে…পে… খন্ধা ৱত্থুস্স…পে… ৱত্থু খন্ধানং অঞ্ঞমঞ্ঞপচ্চযেন পচ্চযো; একং মহাভূতং…পে… অসঞ্ঞসত্তানং…পে…. (১)

পৰিত্তো ধম্মো মহগ্গতস্স ধম্মস্স অঞ্ঞমঞ্ঞপচ্চযেন পচ্চযো…পে… পটিসন্ধিক্খণে ৱত্থু মহগ্গতানং খন্ধানং অঞ্ঞমঞ্ঞপচ্চযেন পচ্চযো…পে…. (২)

মহগ্গতো ধম্মো মহগ্গতস্স ধম্মস্স অঞ্ঞমঞ্ঞপচ্চযেন পচ্চযো – মহগ্গতো একো খন্ধো তিণ্ণন্নং খন্ধানং অঞ্ঞমঞ্ঞপচ্চযেন পচ্চযো…পে… পটিসন্ধিক্খণে…পে…. (১)

মহগ্গতো ধম্মো পৰিত্তস্স ধম্মস্স অঞ্ঞমঞ্ঞপচ্চযেন পচ্চযো – পটিসন্ধিক্খণে মহগ্গতা খন্ধা ৱত্থুস্স অঞ্ঞমঞ্ঞপচ্চযেন পচ্চযো. (২)

মহগ্গতো ধম্মো পৰিত্তস্স চ মহগ্গতস্স চ ধম্মস্স অঞ্ঞমঞ্ঞপচ্চযেন পচ্চযো – পটিসন্ধিক্খণে মহগ্গতো একো খন্ধো তিণ্ণন্নং খন্ধানং ৱত্থুস্স চ অঞ্ঞমঞ্ঞপচ্চযেন পচ্চযো…পে…. (৩)

অপ্পমাণো ধম্মো অপ্পমাণস্স ধম্মস্স অঞ্ঞমঞ্ঞপচ্চযেন পচ্চযো – অপ্পমাণো একো খন্ধো তিণ্ণন্নং খন্ধানং অঞ্ঞমঞ্ঞপচ্চযেন পচ্চযো…পে… দ্ৱে খন্ধা…পে…. (১)

পৰিত্তো চ মহগ্গতো চ ধম্মা মহগ্গতস্স ধম্মস্স অঞ্ঞমঞ্ঞপচ্চযেন পচ্চযো – পটিসন্ধিক্খণে মহগ্গতো একো খন্ধো চ ৱত্থু চ তিণ্ণন্নং খন্ধানং অঞ্ঞমঞ্ঞপচ্চযেন পচ্চযো…পে…. (১)

নিস্সযপচ্চযো

৬৯. পৰিত্তো ধম্মো পৰিত্তস্স ধম্মস্স নিস্সযপচ্চযেন পচ্চযো – পৰিত্তো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং নিস্সযপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে…পে… খন্ধা ৱত্থুস্স…পে… ৱত্থু খন্ধানং নিস্সযপচ্চযেন পচ্চযো…পে… একং মহাভূতং…পে… অসঞ্ঞসত্তানং একং মহাভূতং…পে… চক্খাযতনং চক্খুৱিঞ্ঞাণস্স…পে… কাযাযতনং কাযৱিঞ্ঞাণস্স… ৱত্থু পৰিত্তানং খন্ধানং নিস্সযপচ্চযেন পচ্চযো. (১)

পৰিত্তো ধম্মো মহগ্গতস্স ধম্মস্স নিস্সযপচ্চযেন পচ্চযো – ৱত্থু মহগ্গতানং খন্ধানং নিস্সযপচ্চযেন পচ্চযো. পটিসন্ধিক্খণে ৱত্থু মহগ্গতানং খন্ধানং নিস্সযপচ্চযেন পচ্চযো. (২)

পৰিত্তো ধম্মো অপ্পমাণস্স ধম্মস্স নিস্সযপচ্চযেন পচ্চযো – ৱত্থু অপ্পমাণানং খন্ধানং নিস্সযপচ্চযেন পচ্চযো. (৩)

৭০. মহগ্গতো ধম্মো মহগ্গতস্স ধম্মস্স নিস্সযপচ্চযেন পচ্চযো – মহগ্গতো একো খন্ধো তিণ্ণন্নং খন্ধানং…পে… দ্ৱে খন্ধা…পে… পটিসন্ধিক্খণে…পে…. (১)

মহগ্গতো ধম্মো পৰিত্তস্স ধম্মস্স নিস্সযপচ্চযেন পচ্চযো – মহগ্গতা খন্ধা চিত্তসমুট্ঠানানং ৰূপানং নিস্সযপচ্চযেন পচ্চযো. পটিসন্ধিক্খণে মহগ্গতা খন্ধা কটত্তাৰূপানং নিস্সযপচ্চযেন পচ্চযো. (২)

মহগ্গতো ধম্মো পৰিত্তস্স চ মহগ্গতস্স চ ধম্মস্স নিস্সযপচ্চযেন পচ্চযো – মহগ্গতো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং নিস্সযপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে…পে…. (৩)

৭১. অপ্পমাণো ধম্মো অপ্পমাণস্স ধম্মস্স নিস্সযপচ্চযেন পচ্চযো – অপ্পমাণো একো খন্ধো তিণ্ণন্নং খন্ধানং নিস্সযপচ্চযেন পচ্চযো…পে…. (১)

অপ্পমাণো ধম্মো পৰিত্তস্স ধম্মস্স নিস্সযপচ্চযেন পচ্চযো – অপ্পমাণা খন্ধা চিত্তসমুট্ঠানানং ৰূপানং নিস্সযপচ্চযেন পচ্চযো. (২)

অপ্পমাণো ধম্মো পৰিত্তস্স চ অপ্পমাণস্স চ ধম্মস্স নিস্সযপচ্চযেন পচ্চযো – অপ্পমাণো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং নিস্সযপচ্চযেন পচ্চযো…পে…. (৩)

পৰিত্তো চ অপ্পমাণো চ ধম্মা পৰিত্তস্স ধম্মস্স নিস্সযপচ্চযেন পচ্চযো – অপ্পমাণা খন্ধা চ মহাভূতা চ চিত্তসমুট্ঠানানং ৰূপানং নিস্সযপচ্চযেন পচ্চযো. (১)

পৰিত্তো চ অপ্পমাণো চ ধম্মা অপ্পমাণস্স ধম্মস্স নিস্সযপচ্চযেন পচ্চযো – অপ্পমাণো একো খন্ধো চ ৱত্থু চ তিণ্ণন্নং খন্ধানং নিস্সযপচ্চযেন পচ্চযো…পে… দ্ৱে খন্ধা…পে…. (২)

পৰিত্তো চ মহগ্গতো চ ধম্মা পৰিত্তস্স ধম্মস্স নিস্সযপচ্চযেন পচ্চযো – মহগ্গতা খন্ধা চ মহাভূতা চ চিত্তসমুট্ঠানানং ৰূপানং নিস্সযপচ্চযেন পচ্চযো. পটিসন্ধিক্খণে মহগ্গতা খন্ধা চ মহাভূতা চ কটত্তাৰূপানং নিস্সযপচ্চযেন পচ্চযো. (১)

পৰিত্তো চ মহগ্গতো চ ধম্মা মহগ্গতস্স ধম্মস্স নিস্সযপচ্চযেন পচ্চযো – মহগ্গতো একো খন্ধো চ ৱত্থু চ তিণ্ণন্নং খন্ধানং নিস্সযপচ্চযেন পচ্চযো…পে… পটিসন্ধিক্খণে মহগ্গতো একো খন্ধো চ ৱত্থু চ তিণ্ণন্নং খন্ধানং নিস্সযপচ্চযেন পচ্চযো…পে… দ্ৱে খন্ধা…পে…. (২)

উপনিস্সযপচ্চযো

৭২. পৰিত্তো ধম্মো পৰিত্তস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – পৰিত্তং সদ্ধং উপনিস্সায দানং দেতি, সীলং সমাদিযতি, উপোসথকম্মং কৰোতি, ৱিপস্সনং উপ্পাদেতি, মানং জপ্পেতি, দিট্ঠিং গণ্হাতি, পৰিত্তং সীলং…পে… পঞ্ঞং… ৰাগং…পে… পত্থনং… কাযিকং সুখং…পে… সেনাসনং উপনিস্সায দানং দেতি, সীলং…পে… উপোসথং…পে… ৱিপস্সনং উপ্পাদেতি, পাণং হনতি…পে… সঙ্ঘং ভিন্দতি. পৰিত্তা সদ্ধা…পে… পঞ্ঞা, ৰাগো…পে… পত্থনা, কাযিকং সুখং…পে… সেনাসনং পৰিত্তায সদ্ধায…পে… পঞ্ঞায, ৰাগস্স…পে… পত্থনায, কাযিকস্স সুখস্স, কাযিকস্স দুক্খস্স উপনিস্সযপচ্চযেন পচ্চযো. কুসলাকুসলং কম্মং ৱিপাকস্স উপনিস্সযপচ্চযেন পচ্চযো. পাণাতিপাতো পাণাতিপাতস্স উপনিস্সযপচ্চযেন পচ্চযো (চক্কং কাতব্বং). মাতুঘাতিকম্মং মাতুঘাতিকম্মস্স উপনিস্সযপচ্চযেন পচ্চযো (চক্কং কাতব্বং কুসলত্তিকসদিসং). (১)

পৰিত্তো ধম্মো মহগ্গতস্স ধম্মস্স উপনিস্সযপচ্চযেন পচ্চযো – অনন্তৰূপনিস্সযো, পকতূপনিস্সযো…পে…. পকতূপনিস্সযো – পৰিত্তং সদ্ধং উপনিস্সায মহগ্গতং ঝানং উপ্পাদেতি, অভিঞ্ঞং উপ্পাদেতি, সমাপত্তিং উপ্পাদেতি. পৰিত্তং সীলং…পে… পঞ্ঞং… ৰাগং…পে… সেনাসনং উপনিস্সায মহগ্গতং ঝানং উপ্পাদেতি, অভিঞ্ঞং উপ্পাদেতি, সমাপত্তিং উপ্পাদেতি. পৰিত্তা সদ্ধা…পে… সেনাসনং মহগ্গতায সদ্ধায…পে… পঞ্ঞায উপনিস্সযপচ্চযেন পচ্চযো. পঠমস্স ঝানস্স পৰিকম্মং…পে… নেৱসঞ্ঞানাসঞ্ঞাযতনস্স পৰিকম্মং নেৱসঞ্ঞানাসঞ্ঞাযতনস্স উপনিস্সযপচ্চযেন পচ্চযো. দিব্বস্স চক্খুস্স পৰিকম্মং…পে… অনাগতংসঞাণস্স পৰিকম্মং…পে…. (২)

পৰিত্তো ধম্মো অপ্পমাণস্স ধম্মস্স উপনিস্সযপচ্চযেন পচ্চযো – অনন্তৰূপনিস্সযো, পকতূপনিস্সযো…পে…. পকতূপনিস্সযো পৰিত্তং সদ্ধং উপনিস্সায অপ্পমাণং ঝানং উপ্পাদেতি, মগ্গং উপ্পাদেতি, ফলসমাপত্তিং উপ্পাদেতি. পৰিত্তং সীলং…পে… পঞ্ঞং… ৰাগং…পে… পত্থনং… কাযিকং সুখং…পে… সেনাসনং উপনিস্সায অপ্পমাণং ঝানং উপ্পাদেতি, মগ্গং উপ্পাদেতি, ফলসমাপত্তিং উপ্পাদেতি. পৰিত্তা সদ্ধা…পে… সেনাসনং অপ্পমাণায সদ্ধায…পে… পঞ্ঞায, মগ্গস্স ফলসমাপত্তিযা উপনিস্সযপচ্চযেন পচ্চযো. পঠমস্স মগ্গস্স পৰিকম্মং পঠমস্স মগ্গস্স…পে… চতুত্থস্স মগ্গস্স পৰিকম্মং চতুত্থস্স মগ্গস্স উপনিস্সযপচ্চযেন পচ্চযো. (৩)

৭৩. মহগ্গতো ধম্মো মহগ্গতস্স ধম্মস্স উপনিস্সযপচ্চযেন পচ্চযো – অনন্তৰূপনিস্সযো, পকতূপনিস্সযো…পে…. পকতূপনিস্সযো – মহগ্গতং সদ্ধং উপনিস্সায মহগ্গতং ঝানং উপ্পাদেতি, অভিঞ্ঞং উপ্পাদেতি, সমাপত্তিং উপ্পাদেতি. মহগ্গতং সীলং…পে… পঞ্ঞং উপনিস্সায মহগ্গতং ঝানং উপ্পাদেতি, অভিঞ্ঞং উপ্পাদেতি, সমাপত্তিং উপ্পাদেতি. মহগ্গতা সদ্ধা…পে… পঞ্ঞা মহগ্গতায সদ্ধায…পে… পঞ্ঞায উপনিস্সযপচ্চযেন পচ্চযো. পঠমং ঝানং দুতিযস্স ঝানস্স…পে… আকিঞ্চঞ্ঞাযতনং নেৱসঞ্ঞানাসঞ্ঞাযতনস্স উপনিস্সযপচ্চযেন পচ্চযো. (১)

মহগ্গতো ধম্মো পৰিত্তস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – মহগ্গতং সদ্ধং উপনিস্সায দানং দেতি, সীলং সমাদিযতি, উপোসথকম্মং কৰোতি, ৱিপস্সনং উপ্পাদেতি, মানং জপ্পেতি, দিট্ঠিং গণ্হাতি, মহগ্গতং সীলং…পে… পঞ্ঞং উপনিস্সায দানং দেতি…পে… ৱিপস্সনং উপ্পাদেতি…পে… মহগ্গতা সদ্ধা…পে… পঞ্ঞা পৰিত্তায সদ্ধায…পে… পঞ্ঞায…পে… কাযিকস্স সুখস্স, কাযিকস্স দুক্খস্স উপনিস্সযপচ্চযেন পচ্চযো. (২)

মহগ্গতো ধম্মো অপ্পমাণস্স ধম্মস্স উপনিস্সযপচ্চযেন পচ্চযো – অনন্তৰূপনিস্সযো, পকতূপনিস্সযো…পে…. পকতূপনিস্সযো – মহগ্গতং সদ্ধং উপনিস্সায অপ্পমাণং ঝানং উপ্পাদেতি, মগ্গং উপ্পাদেতি, ফলসমাপত্তিং উপ্পাদেতি. মহগ্গতং সীলং…পে… পঞ্ঞং উপনিস্সায অপ্পমাণং ঝানং উপ্পাদেতি, মগ্গং উপ্পাদেতি, ফলসমাপত্তিং উপ্পাদেতি. মহগ্গতা সদ্ধা…পে… পঞ্ঞা অপ্পমাণায সদ্ধায…পে… পঞ্ঞায মগ্গস্স ফলসমাপত্তিযা উপনিস্সযপচ্চযেন পচ্চযো. (৩)

৭৪. অপ্পমাণো ধম্মো অপ্পমাণস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – অপ্পমাণং সদ্ধং উপনিস্সায অপ্পমাণং ঝানং উপ্পাদেতি, মগ্গং উপ্পাদেতি, ফলসমাপত্তিং উপ্পাদেতি. অপ্পমাণং সীলং…পে… পঞ্ঞং উপনিস্সায অপ্পমাণং ঝানং উপ্পাদেতি, মগ্গং উপ্পাদেতি, ফলসমাপত্তিং উপ্পাদেতি. অপ্পমাণা সদ্ধা…পে… পঞ্ঞা অপ্পমাণায সদ্ধায…পে… পঞ্ঞায উপনিস্সযপচ্চযেন পচ্চযো. পঠমো মগ্গো দুতিযস্স মগ্গস্স…পে… ততিযো মগ্গো চতুত্থস্স মগ্গস্স… মগ্গো ফলসমাপত্তিযা উপনিস্সযপচ্চযেন পচ্চযো. (১)

অপ্পমাণো ধম্মো পৰিত্তস্স ধম্মস্স উপনিস্সযপচ্চযেন পচ্চযো – আৰম্মণূপনিস্সযো, অনন্তৰূপনিস্সযো, পকতূপনিস্সযো…পে…. পকতূপনিস্সযো – অপ্পমাণং সদ্ধং উপনিস্সায দানং দেতি, সীলং…পে… উপোসথকম্মং… ৱিপস্সনং উপ্পাদেতি. অপ্পমাণং সীলং…পে… পঞ্ঞং উপনিস্সায দানং দেতি, সীলং…পে… উপোসথকম্মং… ৱিপস্সনং… অপ্পমাণা সদ্ধা…পে… পঞ্ঞা পৰিত্তায সদ্ধায…পে… পঞ্ঞায…পে… কাযিকস্স সুখস্স, কাযিকস্স দুক্খস্স উপনিস্সযপচ্চযেন পচ্চযো. ফলসমাপত্তি কাযিকস্স সুখস্স উপনিস্সযপচ্চযেন পচ্চযো. অৰিযা মগ্গং উপনিস্সায সঙ্খাৰে অনিচ্চতো…পে… ৱিপস্সন্তি, মগ্গো অৰিযানং অত্থপ্পটিসম্ভিদায…পে… পটিভানপ্পটিসম্ভিদায… ঠানাঠানকোসল্লস্স উপনিস্সযপচ্চযেন পচ্চযো. (২)

অপ্পমাণো ধম্মো মহগ্গতস্স ধম্মস্স উপনিস্সযপচ্চযেন পচ্চযো – অনন্তৰূপনিস্সযো, পকতূপনিস্সযো…পে…. পকতূপনিস্সযো – অপ্পমাণং সদ্ধং উপনিস্সায মহগ্গতং ঝানং উপ্পাদেতি, অভিঞ্ঞং উপ্পাদেতি, সমাপত্তিং উপ্পাদেতি, অপ্পমাণং সীলং…পে… পঞ্ঞং উপনিস্সায মহগ্গতং ঝানং উপ্পাদেতি, অভিঞ্ঞং উপ্পাদেতি, সমাপত্তিং উপ্পাদেতি. অপ্পমাণা সদ্ধা…পে… পঞ্ঞা মহগ্গতায সদ্ধায…পে… পঞ্ঞায উপনিস্সযপচ্চযেন পচ্চযো, অৰিযা মগ্গং উপনিস্সায অনুপ্পন্নং সমাপত্তিং উপ্পাদেন্তি, উপ্পন্নং সমাপজ্জন্তি. (৩)

পুৰেজাতপচ্চযো

৭৫. পৰিত্তো ধম্মো পৰিত্তস্স ধম্মস্স পুৰেজাতপচ্চযেন পচ্চযো – আৰম্মণপুৰেজাতং, ৱত্থুপুৰেজাতং. আৰম্মণপুৰেজাতং – চক্খুং অনিচ্চতো…পে… ৱিপস্সতি অস্সাদেতি অভিনন্দতি; তং আৰব্ভ ৰাগো উপ্পজ্জতি…পে… দোমনস্সং উপ্পজ্জতি. সোতং…পে… ৱত্থুং অনিচ্চতো…পে… দোমনস্সং উপ্পজ্জতি. ৰূপাযতনং চক্খুৱিঞ্ঞাণস্স…পে… ফোট্ঠব্বাযতনং কাযৱিঞ্ঞাণস্স পুৰেজাতপচ্চযেন পচ্চযো. ৱত্থুপুৰেজাতং – চক্খাযতনং চক্খুৱিঞ্ঞাণস্স…পে… কাযাযতনং কাযৱিঞ্ঞাণস্স… ৱত্থু পৰিত্তানং খন্ধানং পুৰেজাতপচ্চযেন পচ্চযো. (১)

পৰিত্তো ধম্মো মহগ্গতস্স ধম্মস্স পুৰেজাতপচ্চযেন পচ্চযো – আৰম্মণপুৰেজাতং, ৱত্থুপুৰেজাতং. আৰম্মণপুৰেজাতং – দিব্বেন চক্খুনা ৰূপং পস্সতি, দিব্বায সোতধাতুযা সদ্দং সুণাতি. ৱত্থুপুৰেজাতং – ৱত্থু মহগ্গতানং খন্ধানং পুৰেজাতপচ্চযেন পচ্চযো. (২)

পৰিত্তো ধম্মো অপ্পমাণস্স ধম্মস্স পুৰেজাতপচ্চযেন পচ্চযো. ৱত্থুপুৰেজাতং – ৱত্থু অপ্পমাণানং খন্ধানং পুৰেজাতপচ্চযেন পচ্চযো. (৩)

পচ্ছাজাতপচ্চযো

৭৬. পৰিত্তো ধম্মো পৰিত্তস্স ধম্মস্স পচ্ছাজাতপচ্চযেন পচ্চযো – পচ্ছাজাতা পৰিত্তা খন্ধা পুৰেজাতস্স ইমস্স কাযস্স পচ্ছাজাতপচ্চযেন পচ্চযো. (১)

মহগ্গতো ধম্মো পৰিত্তস্স ধম্মস্স পচ্ছাজাতপচ্চযেন পচ্চযো – পচ্ছাজাতা মহগ্গতা খন্ধা পুৰেজাতস্স ইমস্স কাযস্স পচ্ছাজাতপচ্চযেন পচ্চযো. (১)

অপ্পমাণো ধম্মো পৰিত্তস্স ধম্মস্স পচ্ছাজাতপচ্চযেন পচ্চযো – পচ্ছাজাতা অপ্পমাণা খন্ধা পুৰেজাতস্স ইমস্স কাযস্স পচ্ছাজাতপচ্চযেন পচ্চযো. (১)

আসেৱনপচ্চযো

৭৭. পৰিত্তো ধম্মো পৰিত্তস্স ধম্মস্স আসেৱনপচ্চযেন পচ্চযো – পুৰিমা পুৰিমা পৰিত্তা খন্ধা পচ্ছিমানং পচ্ছিমানং পৰিত্তানং খন্ধানং…পে… অনুলোমং গোত্ৰভুস্স, অনুলোমং ৱোদানস্স আসেৱনপচ্চযেন পচ্চযো. (১)

পৰিত্তো ধম্মো মহগ্গতস্স ধম্মস্স আসেৱনপচ্চযেন পচ্চযো – পঠমস্স ঝানস্স পৰিকম্মং তস্সেৱ [পঠমস্স ঝানস্স (?)] আসেৱনপচ্চযেন পচ্চযো…পে… নেৱসঞ্ঞানাসঞ্ঞাযতনস্স পৰিকম্মং তস্সেৱ [নেৱসঞ্ঞানাসঞ্ঞাযতনস্স (?) অঞ্ঞেসু তিকেসু ওলোকেতব্বং] আসেৱনপচ্চযেন পচ্চযো. দিব্বস্স চক্খুস্স পৰিকম্মং…পে… অনাগতংসঞাণস্স পৰিকম্মং অনাগতংসঞাণস্স আসেৱনপচ্চযেন পচ্চযো. (২)

পৰিত্তো ধম্মো অপ্পমাণস্স ধম্মস্স আসেৱনপচ্চযেন পচ্চযো – গোত্ৰভু মগ্গস্স… ৱোদানং মগ্গস্স আসেৱনপচ্চযেন পচ্চযো. (৩)

মহগ্গতো ধম্মো মহগ্গতস্স ধম্মস্স আসেৱনপচ্চযেন পচ্চযো – পুৰিমা পুৰিমা মহগ্গতা খন্ধা পচ্ছিমানং পচ্ছিমানং মহগ্গতানং খন্ধানং…পে… আসেৱনপচ্চযেন পচ্চযো. (১)

কম্মপচ্চযো

৭৮. পৰিত্তো ধম্মো পৰিত্তস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – পৰিত্তা চেতনা সম্পযুত্তকানং খন্ধানং চিত্তসমুট্ঠানানঞ্চ ৰূপানং কম্মপচ্চযেন পচ্চযো. পটিসন্ধিক্খণে পৰিত্তা চেতনা সম্পযুত্তকানং খন্ধানং কটত্তা চ ৰূপানং কম্মপচ্চযেন পচ্চযো. নানাক্খণিকা – পৰিত্তা চেতনা ৱিপাকানং পৰিত্তানং খন্ধানং কটত্তা চ ৰূপানং কম্মপচ্চযেন পচ্চযো. (১)

মহগ্গতো ধম্মো মহগ্গতস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – মহগ্গতা চেতনা সম্পযুত্তকানং খন্ধানং কম্মপচ্চযেন পচ্চযো. পটিসন্ধিক্খণে মহগ্গতা চেতনা সম্পযুত্তকানং খন্ধানং কম্মপচ্চযেন পচ্চযো. নানাক্খণিকা – মহগ্গতা চেতনা ৱিপাকানং মহগ্গতানং খন্ধানং কম্মপচ্চযেন পচ্চযো. (১)

মহগ্গতো ধম্মো পৰিত্তস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – মহগ্গতা চেতনা চিত্তসমুট্ঠানানং ৰূপানং কম্মপচ্চযেন পচ্চযো. পটিসন্ধিক্খণে মহগ্গতা চেতনা কটত্তাৰূপানং কম্মপচ্চযেন পচ্চযো. নানাক্খণিকা – মহগ্গতা চেতনা কটত্তাৰূপানং কম্মপচ্চযেন পচ্চযো. (২)

মহগ্গতো ধম্মো পৰিত্তস্স চ মহগ্গতস্স চ ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – মহগ্গতা চেতনা সম্পযুত্তকানং খন্ধানং চিত্তসমুট্ঠানানঞ্চ ৰূপানং কম্মপচ্চযেন পচ্চযো. পটিসন্ধিক্খণে মহগ্গতা চেতনা সম্পযুত্তকানং খন্ধানং কটত্তা চ ৰূপানং কম্মপচ্চযেন পচ্চযো. নানাক্খণিকা – মহগ্গতা চেতনা ৱিপাকানং মহগ্গতানং খন্ধানং কটত্তা চ ৰূপানং কম্মপচ্চযেন পচ্চযো. (৩)

৭৯. অপ্পমাণো ধম্মো অপ্পমাণস্স ধম্মস্স কম্মপচ্চযেন পচ্চযো – সহজাতা, নানাক্খণিকা. সহজাতা – অপ্পমাণা চেতনা সম্পযুত্তকানং খন্ধানং কম্মপচ্চযেন পচ্চযো. নানাক্খণিকা – অপ্পমাণা চেতনা ৱিপাকানং অপ্পমাণানং খন্ধানং কম্মপচ্চযেন পচ্চযো. (১)

অপ্পমাণো ধম্মো পৰিত্তস্স ধম্মস্স কম্মপচ্চযেন পচ্চযো – অপ্পমাণা চেতনা চিত্তসমুট্ঠানানং ৰূপানং কম্মপচ্চযেন পচ্চযো. (২)

অপ্পমাণো ধম্মো পৰিত্তস্স চ অপ্পমাণস্স চ ধম্মস্স কম্মপচ্চযেন পচ্চযো – অপ্পমাণা চেতনা সম্পযুত্তকানং খন্ধানং চিত্তসমুট্ঠানানঞ্চ ৰূপানং কম্মপচ্চযেন পচ্চযো. (৩)

ৱিপাকপচ্চযো

৮০. পৰিত্তো ধম্মো পৰিত্তস্স ধম্মস্স ৱিপাকপচ্চযেন পচ্চযো – ৱিপাকো পৰিত্তো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং ৱিপাকপচ্চযেন পচ্চযো…পে… পটিসন্ধিক্খণে…পে… খন্ধা ৱত্থুস্স ৱিপাকপচ্চযেন পচ্চযো. (১)

মহগ্গতো ধম্মো মহগ্গতস্স ধম্মস্স ৱিপাকপচ্চযেন পচ্চযো…পে… (তিস্সো পঞ্হা, পৱত্তিপটিসন্ধি কাতব্বা). (৩)

অপ্পমাণো ধম্মো অপ্পমাণস্স ধম্মস্স ৱিপাকপচ্চযেন পচ্চযো… তীণি (পৱত্তিমেৱ).

আহাৰপচ্চযাদি

৮১. পৰিত্তো ধম্মো পৰিত্তস্স ধম্মস্স আহাৰপচ্চযেন পচ্চযো…পে… ইন্দ্ৰিযপচ্চযেন পচ্চযো… ঝানপচ্চযেন পচ্চযো… মগ্গপচ্চযেন পচ্চযো… সম্পযুত্তপচ্চযেন পচ্চযো… ৱিপ্পযুত্তপচ্চযেন পচ্চযো – সহজাতং, পুৰেজাতং, পচ্ছাজাতং. সহজাতা – পৰিত্তা খন্ধা চিত্তসমুট্ঠানানং ৰূপানং ৱিপ্পযুত্তপচ্চযেন পচ্চযো. পটিসন্ধিক্খণে পৰিত্তা খন্ধা কটত্তাৰূপানং ৱিপ্পযুত্তপচ্চযেন পচ্চযো. খন্ধা ৱত্থুস্স…পে… ৱত্থু খন্ধানং ৱিপ্পযুত্তপচ্চযেন পচ্চযো. পুৰেজাতং – চক্খাযতনং চক্খুৱিঞ্ঞাণস্স ৱিপ্পযুত্তপচ্চযেন পচ্চযো…পে… কাযাযতনং কাযৱিঞ্ঞাণস্স ৱিপ্পযুত্তপচ্চযেন পচ্চযো. ৱত্থু পৰিত্তানং খন্ধানং ৱিপ্পযুত্তপচ্চযেন পচ্চযো. পচ্ছাজাতা – পৰিত্তা খন্ধা পুৰেজাতস্স ইমস্স কাযস্স ৱিপ্পযুত্তপচ্চযেন পচ্চযো. (১)

পৰিত্তো ধম্মো মহগ্গতস্স ধম্মস্স ৱিপ্পযুত্তপচ্চযেন পচ্চযো – সহজাতং, পুৰেজাতং. সহজাতং – পটিসন্ধিক্খণে ৱত্থু মহগ্গতানং খন্ধানং ৱিপ্পযুত্তপচ্চযেন পচ্চযো. পুৰেজাতং – ৱত্থু মহগ্গতানং খন্ধানং ৱিপ্পযুত্তপচ্চযেন পচ্চযো. (২)

পৰিত্তো ধম্মো অপ্পমাণস্স ধম্মস্স ৱিপ্পযুত্তপচ্চযেন পচ্চযো. পুৰেজাতং – ৱত্থু অপ্পমাণানং খন্ধানং ৱিপ্পযুত্তপচ্চযেন পচ্চযো. (৩)

৮২. মহগ্গতো ধম্মো পৰিত্তস্স ধম্মস্স ৱিপ্পযুত্তপচ্চযেন পচ্চযো – সহজাতং, পচ্ছাজাতং. সহজাতা – মহগ্গতা খন্ধা চিত্তসমুট্ঠানানং ৰূপানং ৱিপ্পযুত্তপচ্চযেন পচ্চযো. পটিসন্ধিক্খণে…পে… পচ্ছাজাতা – মহগ্গতা খন্ধা পুৰেজাতস্স ইমস্স কাযস্স ৱিপ্পযুত্তপচ্চযেন পচ্চযো. (১)

অপ্পমাণো ধম্মো পৰিত্তস্স ধম্মস্স ৱিপ্পযুত্তপচ্চযেন পচ্চযো – সহজাতং, পচ্ছাজাতং. সহজাতা – অপ্পমাণা খন্ধা চিত্তসমুট্ঠানানং ৰূপানং ৱিপ্পযুত্তপচ্চযেন পচ্চযো. পচ্ছাজাতা – অপ্পমাণা খন্ধা পুৰেজাতস্স ইমস্স কাযস্স ৱিপ্পযুত্তপচ্চযেন পচ্চযো. (১)

অত্থিপচ্চযো

৮৩. পৰিত্তো ধম্মো পৰিত্তস্স ধম্মস্স অত্থিপচ্চযেন পচ্চযো – সহজাতং, পুৰেজাতং, পচ্ছাজাতং, আহাৰং, ইন্দ্ৰিযং. সহজাতো – পৰিত্তো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং অত্থিপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে…পে… খন্ধা ৱত্থুস্স অত্থিপচ্চযেন পচ্চযো. ৱত্থু খন্ধানং অত্থিপচ্চযেন পচ্চযো; একং মহাভূতং…পে… অসঞ্ঞসত্তানং…পে…. পুৰেজাতং – চক্খুং…পে… ৱত্থুং অনিচ্চতো…পে… ৱিপস্সতি অস্সাদেতি অভিনন্দতি, তং আৰব্ভ ৰাগো উপ্পজ্জতি…পে… দোমনস্সং উপ্পজ্জতি, ৰূপাযতনং চক্খুৱিঞ্ঞাণস্স…পে… ফোট্ঠব্বাযতনং কাযৱিঞ্ঞাণস্স অত্থিপচ্চযেন পচ্চযো. চক্খাযতনং চক্খুৱিঞ্ঞাণস্স অত্থিপচ্চযেন পচ্চযো…পে… কাযাযতনং কাযৱিঞ্ঞাণস্স…পে… ৱত্থু পৰিত্তানং খন্ধানং অত্থিপচ্চযেন পচ্চযো. পচ্ছাজাতা – পৰিত্তা খন্ধা পুৰেজাতস্স ইমস্স কাযস্স অত্থিপচ্চযেন পচ্চযো. কবড়ীকাৰো আহাৰো ইমস্স কাযস্স অত্থিপচ্চযেন পচ্চযো. ৰূপজীৱিতিন্দ্ৰিযং কটত্তাৰূপানং অত্থিপচ্চযেন পচ্চযো. (১)

পৰিত্তো ধম্মো মহগ্গতস্স ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতং – পটিসন্ধিক্খণে ৱত্থু মহগ্গতানং খন্ধানং অত্থিপচ্চযেন পচ্চযো. পুৰেজাতং – দিব্বেন চক্খুনা ৰূপং পস্সতি, দিব্বায সোতধাতুযা সদ্দং সুণাতি, ৱত্থু মহগ্গতানং খন্ধানং অত্থিপচ্চযেন পচ্চযো. (২)

পৰিত্তো ধম্মো অপ্পমাণস্স ধম্মস্স অত্থিপচ্চযেন পচ্চযো. পুৰেজাতং – ৱত্থু অপ্পমাণানং খন্ধানং অত্থিপচ্চযেন পচ্চযো. (৩)

৮৪. মহগ্গতো ধম্মো মহগ্গতস্স ধম্মস্স অত্থিপচ্চযেন পচ্চযো. মহগ্গতো একো খন্ধো তিণ্ণন্নং খন্ধানং…পে… দ্ৱে খন্ধা…পে… পটিসন্ধিক্খণে…পে…. (১)

মহগ্গতো ধম্মো পৰিত্তস্স ধম্মস্স অত্থিপচ্চযেন পচ্চযো – সহজাতং, পচ্ছাজাতং. সহজাতা – মহগ্গতা খন্ধা চিত্তসমুট্ঠানানং ৰূপানং অত্থিপচ্চযেন পচ্চযো. পটিসন্ধিক্খণে মহগ্গতা খন্ধা কটত্তাৰূপানং অত্থিপচ্চযেন পচ্চযো. পচ্ছাজাতা – মহগ্গতা খন্ধা পুৰেজাতস্স ইমস্স কাযস্স অত্থিপচ্চযেন পচ্চযো. (২)

মহগ্গতো ধম্মো পৰিত্তস্স চ মহগ্গতস্স চ ধম্মস্স অত্থিপচ্চযেন পচ্চযো – মহগ্গতো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং অত্থিপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে…পে…. (৩)

৮৫. অপ্পমাণো ধম্মো অপ্পমাণস্স ধম্মস্স অত্থিপচ্চযেন পচ্চযো – অপ্পমাণো একো খন্ধো তিণ্ণন্নং খন্ধানং…পে…. (১)

অপ্পমাণো ধম্মো পৰিত্তস্স ধম্মস্স অত্থিপচ্চযেন পচ্চযো – সহজাতং, পচ্ছাজাতং. সহজাতা – অপ্পমাণা খন্ধা চিত্তসমুট্ঠানানং ৰূপানং অত্থিপচ্চযেন পচ্চযো. পচ্ছাজাতা – অপ্পমাণা খন্ধা পুৰেজাতস্স ইমস্স কাযস্স অত্থিপচ্চযেন পচ্চযো. (২)

অপ্পমাণো ধম্মো পৰিত্তস্স চ অপ্পমাণস্স চ ধম্মস্স অত্থিপচ্চযেন পচ্চযো – অপ্পমাণো একো খন্ধো তিণ্ণন্নং খন্ধানং চিত্তসমুট্ঠানানঞ্চ ৰূপানং অত্থিপচ্চযেন পচ্চযো…পে…. (৩)

৮৬. পৰিত্তো চ অপ্পমাণো চ ধম্মা পৰিত্তস্স ধম্মস্স অত্থিপচ্চযেন পচ্চযো – সহজাতং, পচ্ছাজাতং, আহাৰং, ইন্দ্ৰিযং. সহজাতা – অপ্পমাণা খন্ধা চ মহাভূতা চ চিত্তসমুট্ঠানানং ৰূপানং অত্থিপচ্চযেন পচ্চযো. পচ্ছাজাতা – অপ্পমাণা খন্ধা চ কবড়ীকাৰো আহাৰো চ ইমস্স কাযস্স অত্থিপচ্চযেন পচ্চযো. পচ্ছাজাতা – অপ্পমাণা খন্ধা চ ৰূপজীৱিতিন্দ্ৰিযঞ্চ কটত্তাৰূপানং অত্থিপচ্চযেন পচ্চযো. (১)

পৰিত্তো চ অপ্পমাণো চ ধম্মা অপ্পমাণস্স ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতো – অপ্পমাণো একো খন্ধো চ ৱত্থু চ তিণ্ণন্নং খন্ধানং অত্থিপচ্চযেন পচ্চযো…পে… দ্ৱে খন্ধা…পে…. (২)

পৰিত্তো চ মহগ্গতো চ ধম্মা পৰিত্তস্স ধম্মস্স অত্থিপচ্চযেন পচ্চযো – সহজাতং, পচ্ছাজাতং, আহাৰং, ইন্দ্ৰিযং. সহজাতা – মহগ্গতা খন্ধা চ মহাভূতা চ চিত্তসমুট্ঠানানং ৰূপানং অত্থিপচ্চযেন পচ্চযো. পটিসন্ধিক্খণে মহগ্গতা খন্ধা চ মহাভূতা চ কটত্তাৰূপানং অত্থিপচ্চযেন পচ্চযো. পচ্ছাজাতা – মহগ্গতা খন্ধা চ কবড়ীকাৰো আহাৰো চ ইমস্স কাযস্স অত্থিপচ্চযেন পচ্চযো. পচ্ছাজাতা – মহগ্গতা খন্ধা চ ৰূপজীৱিতিন্দ্ৰিযঞ্চ কটত্তাৰূপানং অত্থিপচ্চযেন পচ্চযো. (১)

পৰিত্তো চ মহগ্গতো চ ধম্মা মহগ্গতস্স ধম্মস্স অত্থিপচ্চযেন পচ্চযো – সহজাতং, পুৰেজাতং. সহজাতো – মহগ্গতো একো খন্ধো চ ৱত্থু চ তিণ্ণন্নং খন্ধানং অত্থিপচ্চযেন পচ্চযো…পে… দ্ৱে খন্ধা…পে… পটিসন্ধিক্খণে মহগ্গতো একো খন্ধো চ ৱত্থু চ তিণ্ণন্নং খন্ধানং অত্থিপচ্চযেন পচ্চযো…পে… দ্ৱে খন্ধা চ ৱত্থু চ…পে… নত্থিপচ্চযেন পচ্চযো… ৱিগতপচ্চযেন পচ্চযো… অৱিগতপচ্চযেন পচ্চযো. (২)