অহেতুককিৰিযাঅব্যাকতং

কিৰিযামনোধাতু

৫৬৬. কতমে ধম্মা অব্যাকতা? যস্মিং সমযে মনোধাতু উপ্পন্না হোতি কিৰিযা নেৱ কুসলা নাকুসলা ন চ কম্মৱিপাকা উপেক্খাসহগতা ৰূপাৰম্মণা ৱা…পে… ফোট্ঠব্বাৰম্মণা ৱা যং যং ৱা পনাৰব্ভ, তস্মিং সমযে ফস্সো হোতি, ৱেদনা হোতি, সঞ্ঞা হোতি, চেতনা হোতি, চিত্তং হোতি, ৱিতক্কো হোতি, ৱিচাৰো হোতি, উপেক্খা হোতি, চিত্তস্সেকগ্গতা হোতি, মনিন্দ্ৰিযং হোতি, উপেক্খিন্দ্ৰিযং হোতি, জীৱিতিন্দ্ৰিযং হোতি; যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা – ইমে ধম্মা অব্যাকতা…পে….

তস্মিং খো পন সমযে চত্তাৰো খন্ধা হোন্তি, দ্ৱাযতনানি হোন্তি, দ্ৱে ধাতুযো হোন্তি, তযো আহাৰা হোন্তি, তীণিন্দ্ৰিযানি হোন্তি, একো ফস্সো হোতি…পে… একা মনোধাতু হোতি, একং ধম্মাযতনং হোতি, একা ধম্মধাতু হোতি; যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা – ইমে ধম্মা অব্যাকতা…পে….

৫৬৭. কতমো তস্মিং সমযে সঙ্খাৰক্খন্ধো হোতি? ফস্সো চেতনা ৱিতক্কো ৱিচাৰো চিত্তস্সেকগ্গতা জীৱিতিন্দ্ৰিযং; যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা ঠপেত্ৱা ৱেদনাক্খন্ধং ঠপেত্ৱা সঞ্ঞাক্খন্ধং ঠপেত্ৱা ৱিঞ্ঞাণক্খন্ধং – অযং তস্মিং সমযে সঙ্খাৰক্খন্ধো হোতি…পে… ইমে ধম্মা অব্যাকতা.

কিৰিযা মনোধাতু.

কিৰিযামনোৱিঞ্ঞাণধাতুসোমনস্সসহগতা

৫৬৮. কতমে ধম্মা অব্যাকতা? যস্মিং সমযে মনোৱিঞ্ঞাণধাতু উপ্পন্না হোতি কিৰিযা নেৱ কুসলা নাকুসলা ন চ কম্মৱিপাকা সোমনস্সসহগতা ৰূপাৰম্মণা ৱা…পে… ধম্মাৰম্মণা ৱা যং যং ৱা পনাৰব্ভ, তস্মিং সমযে ফস্সো হোতি, ৱেদনা হোতি, সঞ্ঞা হোতি, চেতনা হোতি, চিত্তং হোতি, ৱিতক্কো হোতি, ৱিচাৰো হোতি, পীতি হোতি, সুখং হোতি, চিত্তস্সেকগ্গতা হোতি, ৱীৰিযিন্দ্ৰিযং হোতি, সমাধিন্দ্ৰিযং হোতি, মনিন্দ্ৰিযং হোতি, সোমনস্সিন্দ্ৰিযং হোতি, জীৱিতিন্দ্ৰিযং হোতি; যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা – ইমে ধম্মা অব্যাকতা.

৫৬৯. কতমো তস্মিং সমযে ফস্সো হোতি? যো তস্মিং সমযে ফস্সো ফুসনা সংফুসনা সংফুসিতত্তং – অযং তস্মিং সমযে ফস্সো হোতি…পে….

৫৭০. কতমা তস্মিং সমযে চিত্তস্সেকগ্গতা হোতি? যা তস্মিং সমযে চিত্তস্স ঠিতি সণ্ঠিতি অৱট্ঠিতি অৱিসাহাৰো অৱিক্খেপো অৱিসাহটমানসতা সমথো সমাধিন্দ্ৰিযং সমাধিবলং – অযং তস্মিং সমযে চিত্তস্সেকগ্গতা হোতি.

৫৭১. কতমং তস্মিং সমযে ৱীৰিযিন্দ্ৰিযং হোতি? যো তস্মিং সমযে চেতসিকো ৱীৰিযাৰম্ভো নিক্কমো পৰক্কমো উয্যামো ৱাযামো উস্সাহো উস্সোড়্হী থামো ধিতি অসিথিলপৰক্কমতা অনিক্খিত্তছন্দতা অনিক্খিত্তধুৰতা ধুৰসম্পগ্গাহো ৱীৰিযং ৱীৰিযিন্দ্ৰিযং ৱীৰিযবলং – ইদং তস্মিং সমযে ৱীৰিযিন্দ্ৰিযং হোতি.

৫৭২. কতমং তস্মিং সমযে সমাধিন্দ্ৰিযং হোতি? যা তস্মিং সমযে চিত্তস্স ঠিতি সণ্ঠিতি অৱট্ঠিতি অৱিসাহাৰো অৱিক্খেপো অৱিসাহটমানসতা সমথো সমাধিন্দ্ৰিযং সমাধিবলং – ইদং তস্মিং সমযে সমাধিন্দ্ৰিযং হোতি…পে… যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা – ইমে ধম্মা অব্যাকতা.

তস্মিং খো পন সমযে চত্তাৰো খন্ধা হোন্তি, দ্ৱাযতনানি হোন্তি, দ্ৱে ধাতুযো হোন্তি, তযো আহাৰা হোন্তি, পঞ্চিন্দ্ৰিযানি হোন্তি, একো ফস্সো হোতি…পে… একা মনোৱিঞ্ঞাণধাতু হোতি, একং ধম্মাযতনং হোতি, একা ধম্মধাতু হোতি; যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা – ইমে ধম্মা অব্যাকতা…পে….

৫৭৩. কতমো তস্মিং সমযে সঙ্খাৰক্খন্ধো হোতি? ফস্সো চেতনা ৱিতক্কো ৱিচাৰো পীতি চিত্তস্সেকগ্গতা ৱীৰিযিন্দ্ৰিযং সমাধিন্দ্ৰিযং জীৱিতিন্দ্ৰিযং; যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা ঠপেত্ৱা ৱেদনাক্খন্ধং ঠপেত্ৱা সঞ্ঞাক্খন্ধং ঠপেত্ৱা ৱিঞ্ঞাণক্খন্ধং – অযং তস্মিং সমযে সঙ্খাৰক্খন্ধো হোতি…পে… ইমে ধম্মা অব্যাকতা.

কিৰিযা মনোৱিঞ্ঞাণধাতু সোমনস্সসহগতা.

কিৰিযামনোৱিঞ্ঞাণধাতুউপেক্খাসহগতা

৫৭৪. কতমে ধম্মা অব্যাকতা? যস্মিং সমযে মনোৱিঞ্ঞাণধাতু উপ্পন্না হোতি কিৰিযা নেৱ কুসলা নাকুসলা ন চ কম্মৱিপাকা উপেক্খাসহগতা ৰূপাৰম্মণা ৱা…পে… ধম্মাৰম্মণা ৱা যং যং ৱা পনাৰব্ভ, তস্মিং সমযে ফস্সো হোতি, ৱেদনা হোতি, সঞ্ঞা হোতি, চেতনা হোতি, চিত্তং হোতি, ৱিতক্কো হোতি, ৱিচাৰো হোতি, উপেক্খা হোতি, চিত্তস্সেকগ্গতা হোতি, ৱীৰিযিন্দ্ৰিযং হোতি, সমাধিন্দ্ৰিযং হোতি মনিন্দ্ৰিযং হোতি, উপেক্খিন্দ্ৰিযং হোতি, জীৱিতিন্দ্ৰিযং হোতি; যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা – ইমে ধম্মা অব্যাকতা…পে….

তস্মিং খো পন সমযে চত্তাৰো খন্ধা হোন্তি, দ্ৱাযতনানি হোন্তি, দ্ৱে ধাতুযো হোন্তি, তযো আহাৰা হোন্তি, পঞ্চিন্দ্ৰিযানি হোন্তি, একো ফস্সো হোতি…পে… একা মনোৱিঞ্ঞাণধাতু হোতি, একং ধম্মাযতনং হোতি, একা ধম্মধাতু হোতি; যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা – ইমে ধম্মা অব্যাকতা…পে….

৫৭৫. কতমো তস্মিং সমযে সঙ্খাৰক্খন্ধো হোতি? ফস্সো চেতনা ৱিতক্কো ৱিচাৰো চিত্তস্সেকগ্গতা ৱীৰিযিন্দ্ৰিযং সমাধিন্দ্ৰিযং জীৱিতিন্দ্ৰিযং; যে ৱা পন তস্মিং সমযে অঞ্ঞেপি অত্থি পটিচ্চসমুপ্পন্না অৰূপিনো ধম্মা ঠপেত্ৱা ৱেদনাক্খন্ধং ঠপেত্ৱা সঞ্ঞাক্খন্ধং ঠপেত্ৱা ৱিঞ্ঞাণক্খন্ধং – অযং তস্মিং সমযে সঙ্খাৰক্খন্ধো হোতি…পে… ইমে ধম্মা অব্যাকতা.

কিৰিযা মনোৱিঞ্ঞাণধাতু উপেক্খাসহগতা.

অহেতুকা কিৰিযা অব্যাকতা.

সহেতুককামাৱচৰকিৰিযা

৫৭৬. কতমে ধম্মা অব্যাকতা? যস্মিং সমযে মনোৱিঞ্ঞাণধাতু উপ্পন্না হোতি কিৰিযা নেৱ কুসলা নাকুসলা ন চ কম্মৱিপাকা সোমনস্সসহগতা ঞাণসম্পযুত্তা…পে… সোমনস্সসহগতা ঞাণসম্পযুত্তা সসঙ্খাৰেন…পে… সোমনস্সসহগতা ঞাণৱিপ্পযুত্তা…পে… সোমনস্সসহগতা ঞাণৱিপ্পযুত্তা সসঙ্খাৰেন…পে… উপেক্খাসহগতা ঞাণসম্পযুত্তা…পে… উপেক্খাসহগতা ঞাণসম্পযুত্তা সসঙ্খাৰেন…পে… উপেক্খাসহগতা ঞাণৱিপ্পযুত্তা…পে… উপেক্খাসহগতা ঞাণৱিপ্পযুত্তা সসঙ্খাৰেন ৰূপাৰম্মণা ৱা…পে… ধম্মাৰম্মণা ৱা যং যং ৱা পনাৰব্ভ, তস্মিং সমযে ফস্সো হোতি…পে… অৱিক্খেপো হোতি …পে… ইমে ধম্মা অব্যাকতা…পে… অলোভো অব্যাকতমূলং…পে… অদোসো অব্যাকতমূলং…পে… ইমে ধম্মা অব্যাকতা.

সহেতুকা কামাৱচৰকিৰিযা.

ৰূপাৱচৰকিৰিযা

৫৭৭. কতমে ধম্মা অব্যাকতা? যস্মিং সমযে ৰূপাৱচৰং ঝানং ভাৱেতি কিৰিযং নেৱ কুসলং নাকুসলং ন চ কম্মৱিপাকং দিট্ঠধম্মসুখৱিহাৰং ৱিৱিচ্চেৱ কামেহি…পে… পঠমং ঝানং উপসম্পজ্জ ৱিহৰতি পথৱীকসিণং, তস্মিং সমযে ফস্সো হোতি…পে… অৱিক্খেপো হোতি…পে… ইমে ধম্মা অব্যাকতা.

৫৭৮. কতমে ধম্মা অব্যাকতা? যস্মিং সমযে ৰূপাৱচৰং ঝানং ভাৱেতি কিৰিযং নেৱ কুসলং নাকুসলং ন চ কম্মৱিপাকং দিট্ঠধম্মসুখৱিহাৰং ৱিতক্কৱিচাৰানং ৱূপসমা…পে… দুতিযং ঝানং…পে… ততিযং ঝানং…পে… চতুত্থং ঝানং…পে… পঠমং ঝানং…পে… পঞ্চমং ঝানং উপসম্পজ্জ ৱিহৰতি পথৱীকসিণং, তস্মিং সমযে ফস্সো হোতি…পে… অৱিক্খেপো হোতি…পে… ইমে ধম্মা অব্যাকতা.

ৰূপাৱচৰকিৰিযা.

অৰূপাৱচৰকিৰিযা

৫৭৯. কতমে ধম্মা অব্যাকতা? যস্মিং সমযে অৰূপাৱচৰং ঝানং ভাৱেতি কিৰিযং নেৱ কুসলং নাকুসলং ন চ কম্মৱিপাকং দিট্ঠধম্মসুখৱিহাৰং সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা আকাসানঞ্চাযতনসঞ্ঞাসহগতং সুখস্স চ পহানা…পে… চতুত্থং ঝানং উপসম্পজ্জ ৱিহৰতি তস্মিং সমযে ফস্সো হোতি…পে… অৱিক্খেপো হোতি…পে… ইমে ধম্মা অব্যাকতা.

৫৮০. কতমে ধম্মা অব্যাকতা? যস্মিং সমযে অৰূপাৱচৰং ঝানং ভাৱেতি কিৰিযং নেৱ কুসলং নাকুসলং ন চ কম্মৱিপাকং দিট্ঠধম্মসুখৱিহাৰং সব্বসো আকাসানঞ্চাযতনং সমতিক্কম্ম ৱিঞ্ঞাণঞ্চাযতনসঞ্ঞাসহগতং সুখস্স চ পহানা…পে… চতুত্থং ঝানং উপসম্পজ্জ ৱিহৰতি, তস্মিং সমযে ফস্সো হোতি…পে… অৱিক্খেপো হোতি…পে… ইমে ধম্মা অব্যাকতা.

৫৮১. কতমে ধম্মা অব্যাকতা? যস্মিং সমযে অৰূপাৱচৰং ঝানং ভাৱেতি কিৰিযং নেৱ কুসলং নাকুসলং ন চ কম্মৱিপাকং দিট্ঠধম্মসুখৱিহাৰং সব্বসো ৱিঞ্ঞাণঞ্চাযতনং সমতিক্কম্ম আকিঞ্চঞ্ঞাযতনসঞ্ঞাসহগতং সুখস্স চ পহানা…পে… চতুত্থং ঝানং উপসম্পজ্জ ৱিহৰতি, তস্মিং সমযে ফস্সো হোতি…পে… অৱিক্খেপো হোতি…পে… ইমে ধম্মা অব্যাকতা.

৫৮২. কতমে ধম্মা অব্যাকতা? যস্মিং সমযে অৰূপাৱচৰং ঝানং ভাৱেতি কিৰিযং নেৱ কুসলং নাকুসলং ন চ কম্মৱিপাকং দিট্ঠধম্মসুখৱিহাৰং সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনসঞ্ঞাসহগতং সুখস্স চ পহানা…পে… চতুত্থং ঝানং উপসম্পজ্জ ৱিহৰতি, তস্মিং সমযে ফস্সো হোতি…পে… অৱিক্খেপো হোতি…পে… ইমে ধম্মা অব্যাকতা…পে… অলোভো অব্যাকতমূলং…পে… অদোসো অব্যাকতমূলং…পে… অমোহো অব্যাকতমূলং…পে… ইমে ধম্মা অব্যাকতা.

অৰূপাৱচৰকিৰিযা.

কিৰিযা অব্যাকতা.

চিত্তুপ্পাদকণ্ডং নিট্ঠিতং.