ইদ্ধিপাদসংযুত্ত

মোগ্গল্লানসুত্ত

পুচ্ছা – ইদ্ধিপাদসংযুত্তে আৱুসো চতুত্থং মোগ্গল্লানসুত্তং ভগৱতা কত্থ কং আৰব্ভ কিস্মিং ৱত্থুস্মিং কথঞ্চ ভাসিতং.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ভাসিতং. সম্বহুলা ভন্তে ভিক্খূ হেট্ঠামিগাৰমাতুপাসাদে ৱিহৰন্তি উদ্ধতা উন্নড়া চপলা মুখৰা ৱিকিণ্ণৱাচা মুট্ঠস্সতিনো অসম্পজানা অসমাহিতা ভন্তচিত্তা পাকতিন্দ্ৰিযা. তস্মিং ভন্তে ৱত্থুস্মিং আযস্মন্তং মহামোগ্গল্লানং তে ভিক্খূ সংৱেজেত্ৱা ‘‘কিং নু তুম্হে ভিক্খৱে সংৱিগ্গা লোমহট্ঠজাতা একমন্তং ঠিতা’’তি এৱমাদিনা ভগৱতা ভাসিতং.

অচ্ছৰিযং ৱত ভো, অব্ভুতং ৱত ভো.

নিৱাতঞ্চ ৱত.

অযঞ্চ মিগাৰমাতুপাসাদো গম্ভীৰনেমো.

তুম্হেৱ খো ভিক্খৱে সংৱেজেতুকামেন মোগ্গল্লানেন ভিক্খুনা পাদঙ্গুট্ঠকেন মিগাৰমাতুপাসাদো সঙ্কম্পিতো সম্পকম্পিতো সম্পধালিতো.

তং কিং মঞ্ঞথ ভিক্খৱে, কতমেসং ধম্মানং ভাৱিতত্তা বহুলীকতত্তা মোগ্গল্লানো ভিক্খু এৱং মহিদ্ধিকো এৱং মহানুভাৱো.